Bonnie H. Cordon

Peresitedi Raraba ni Goneyalewa

E dua na ivolanikalou taleitaki vei Sisita Bonnie H. Cordon e kunei ena Vunau kei na Veiyalayalati 123:17: “Me da kitaka na veika kecega eda rawata ena yalo mamarau; io me da tudei sara ka nuitaka tu ni da na raica na veivakabulai ni Kalou, io me da raica na ligana ni sa vakaraitaka mai.”

Vei koya na tikina oqo e kovuta na veilesoni sa vulica ena nona bula taucoko. “E rawa ni da cakava na veika dredre, ia e rawa talega ni da cakava ena yaloreki,” e kaya o Sister Cordon, ka a tokoni ena 31 ni Maji, 2018, me Peresitedi Raraba ni Goneyalewa.

A vakadeitaki vua na kilaka oqori ena “gauna ni gone vakairogorogo” ni cakacaka voli ena dua na vanua ni teitei lailai ena cevaicake kei Idaho vakakina nona sasaga gumatua me vulica e dua na vosa vou e Potukali. Oqo talega e dua na itukutuku a dau taleva wasoma vei ira na daukaulotu ni veiqaravi voli kei na watina ni vakatulewataka na Tabana ni Kaulotu na Brazil Curitiba. Ka sa dua oqori e nakita voli ena gauna oqo me wasea vei ira na goneyalewa e vuravura taucoko.

O ira na goneyalewa nikua, e kaya o koya, era sa kerei me ra tu ka tosoya ki liu na cakacaka ni Turaga. “Ka eda rawa ni cakava,” e vakuria okoya.

A sucu o Bonnie Hillam Cordon ena 11 ni Maji, 1964, vei rau o Harold kei Carol Rasmussen Hillam e Idaho Falls, Idaho, Amerika. Ni oti nona kaulotu a ciqoma nona koroi ni bejila ni vuli ena Brigham Young University, ka sota kina kei Derek Lane Cordon. Erau a vakamau ena 25 ni Epereli, 1986, ena valetabu e Salt Lake. E va na luvedrau ka va na makubudrau.

Nona bula ni veiqaravi ena Lotu e okati kina na veiliutaki ena isususu kei na qasenivuli ni semineri. Ni bera nona kacivi ena rua na yabaki sa oti me veiqaravi vakadaunivakasala ena Mataveiliutaki Raraba ni Lalai, dau taleitaka o Sisita Cordon na veiqaravi vakaperesitedi ni Goneyalewa ena iteki. Ni oti sara mada ga nona sa vagalalataki mai na veikacivi oya, “Au sega vakadua ni cegu ena masulaki ira na goneyalewa,” e kaya o koya.

E dua na itukutuku e gadreva me wasea vei ira na goneyalewa e vuravura taucoko sai koya ni lomani ira, ka bibi cake, ni lomani ira na Kalou.