Soqoni ena iKava ni Sigatabu

Ena ikava ni Sigatabu ni veivula, era veitalanoataka na veikuoramu, kei na Soqosoqo ni Veivukei e dua na iulutaga e digitaki mai na Mataveiliutaki Taumada kei na Kuoramu ni iApositolo Le Tinikarua. Na iulutaga enai kava ni Sigatabu eso oqo era na vakavoui tiko ena vei koniferedi raraba. Vakatekivu nikua me yacova na koniferedi raraba e tarava, sa na ulutaga tiko na “Veiqaravi Vei ira na Tamata.” Ena veivula yadua, sa rawa vei ira na iliuliu se qasenivuli mera liutaka na veivosakitaki ni dua na ivakavuvuli oqo sa baleta na veiqaravi.

Me baleta na ikuri ni ivurevure me tokona na veivosaki baleta na veiqaravi, raica na ministering.lds.org kei na ivakamacala ni “iVakavuvuli ni Veiqaravi” ena ilavelave e tarava ni Liaona.

Na cava na kena ibalebale mo veiqaravi?

Na cava na ibalebale ni veiqaravi vei ira na lewenilotu ena nomu tabanalevu se tabana? Me kilai, sa rawa mo vola ena papa na Veiqaravi ka sureta na lewenikalasi mera vola wavokita kina na veivosa e sema ki na veiqaravi. Sa rawa mera vakasaqara na vosa se malanivosa me ikuri ni veika era sa vola mai na ivolanikalou vakaoqo: Maciu 25:34–40; Luke 10:25–37; 2 Nifai 25:26; Mosaia 18:8–9; 3 Nifai 18:25; kei na Vunau kei na Veiyalayalati 81:5. Na cava eda sa vulica mai na veitikina oqo me baleta na veiqaravi? Sa rawa mo kerea na lewenikalasi mera wasea na ivakaraitaki eso ni veiqaravi era sa raica. Ena veivuke vakacava na noda veiqaravi me sotava na nodra gagadre vakayalo vakayago na tamata? Ena vukea vakacava mera toro voleka mai na tamata vei Karisito?

Na iVakabula sa noda ivakaraitaki uasivi ni veiqaravi.

Me vulici na sala mana ni veiqaravi, sa rawa ki na lewenikalasi mera wasea na italanoa eso mai na ivolanikalou a veiqaravi kina na iVakabula vei ira na tamata—e rawa ni kune e vica na ivakaraitaki ena Joni 4–6 kei na Marika 2:1–12. Sa rawa mera wasea na lewenikalasi na veika era sa uqeti kina mai na italanoa oqo kei na ivakavuvuli cava era sa vulica rawa baleta na veiqaravi. Me vakataka, a cakava vakacava na iVakabula me Nona dina na veiqaravi vei ira na tamata? A sotava vakacava na nodra gagadre vakayalo na tamata vakakina na veika vakayago? Sa rawa mera wasea na lewenikalasi na nodra raica kina eso era a vakayagataka kina na ivakavuvuli oqo ni ra veiqaravi.

Na veiqaravi sa vakauqeti ena loloma sa Vakarisito.

Me curumi yani na kaukauwa ni veiqaravi e veivakauqeti kina na loloma sa Vakarisito, sa rawa me volai ena papa na veiyatuvosa oqo ka sureta na lewenikalasi mera vakatura na sala me volai ena tikina e vo tiko: Niu lomani ira vakaidina na tamata au qarava, au sa . Niu veiqaravi ena so tale na inaki, au sa . Na cava eda rawa ni cakava me vakadeitaka ni noda veiqaravi vei ira na tamata sa vakauqeti ena loloma sa Vakarisito? Eda sa tauyavutaka vakacava na loloma sa Vakarisito vei ira eda sa lesi meda qarava? (raica na Moronai 7:45–48). Sa rawa talega mera wasea na lewenikalasi na ivakaraitaki eso ni veiqaravi a vakauqeti ena loloma sa Vakarisito.

E vinakata na Kalou mera wanonovi ka lomani na luvena taucoko.

A kaya o Peresitedi Russell M. Nelson, “Na ivakatakilakila ni Lotu dina e bula tiko ni Turaga o ya na kena dau tiko e dua na sasaga ni veiqaravi e tuvanaki, dusimaki vei ira yadua na luve ni Kalou kei na nodra matavuvale” (“Veiqaravi ena Kaukauwa kei na Lewa ni Kalou,” Liaona, Me 2018, 69.). Na cava e vakavulica o Peresitedi Nelson era sa sala “tuvanaki, dusimaki” sa vukei keda tiko kina na Lotu meda lomani ira cake kina na tamata? Na cava na vuna era sa “ivakatakilakila ni Lotu dina e bula tiko ni Turaga” na sasaga oqo? (raica na Mosaia 18:21–22 kei na Moronai 6:4–6 me baleta vakasama eso). Na veivakalougatataki cava sa yaco mai ki na noda bula se nodra bula na tamata baleta ni ra veiqaravi na tamata ena nodra veikacivi se ilesilesi ni Lotu?

Raica sa ka talei ena mata ni Kalou na tamata kecega.

Na veika eratou a sotava na luvei Mosai sa ivakaraitaki ni ivakarau ni noda raici ira na tamata sa na vakauqeta na sala eda na qaravi ira kina. Sa rawa mo vola ena papa Na sala era raici ira kina na Nifaiti na Lemanaiti kei na Sala a raici ira kina na Leimanaiti na luvei Mosaia. Mo qai sureta na lewenikalasi mera vakasaqara ena Mosaia 28:1–3 kei na Alama 26:23–26 na vosa kei na malanivosa eso me ra volai ena ruku ni itukutuku oqo. Na cava e vakavulica vei keda na veivakatautauvatataki oqo ena sala eda dau raici ira kina na tamata ni na vakauqeta na sala eda na qaravi ira kina? Eda na vulica vakacava meda raici ira kina na tamata me vaka e raici ira na Kalou? (raica na V&V 18:10-16).

O ira na dauveiqaravi dina era raica vakatabakidua na nodra gagadre na tamata.

Me vukea na lewenikalasi mera kila vinaka cake na yaga bibi ni raicimatua na nodra gagadre na tamata ni da veiqaravi, sa rawa mo vakatauvatana na veiqaravi ena kena soli ka ciqomi na iloloma. Eda sa ciqoma beka e dua na iloloma e vakaibalebale cake mai vua e dua sa kila vinaka tu na ka eda gadreva se vinakata tu? E tautauvata vakacava na veiqaravi ki na kena soli e dua na iloloma vuku? Sa rawa me veivosakitaki na italanoa eso mai na koniferedi raraba se qai oti toka ga e tukuna tiko na sala era veiqaravi kina na tamata me vaka na nodra gagadre na tamata (raica me vakataka na Jean B. Bingham, “Veiqaravi me Vakataka na iVakabula,” Liaona, Me 2018). Sa rawa mera wasea talega na lewenikalasi na italanoa tale eso e vakaraitaka tiko na ivakavuvuli oqo.

Eda na vulica vakacava na nodra gagadre na tamata? Sureta na lewenikalasi yadua mera vola na tamata era a veiqaravi kina. Ena yasa ni yaca yadua mera na vola kina na isau ni taro “Na cava e gadreva na tamata oqo me toro voleka mai kina vei Karisito?” Ni rawa, vakayaloqaqataki ira na lewenikalasi mera okata kina na cakacaka vakalotu ni tamata yadua era gadreva mera ciqoma. Sureta na lewenikalasi mera vakasamataka tikoga na taro oqo ka vakasaqara na veivakauqeti me vukei ira mera sotava na nodra gagadre na tamata.

E vinakata na Turaga meda dau ciqoma na nodra veiqaravi mai na tamata.

E kaya o Elder Robert D. Hales: “Na ituvatuva ni kosipeli e gadrevi kina na solisoli kei na ciqoma. … Era dau kaya na tamata era tiko leqa: ‘Au na cakava ga vakai au,’ … ‘Au rawa ni bula rawati au ga.’ Sa dau tukuni tu ni sega ni dua e vutuniyau sara ka sega ni gadreva e dua na veivuke mai vua e dua, e sega ni dua e dravudravua sara me sega ni rawa me yaga kivei ira na kai nona ena dua na ka. Na yalo ni kere veivuke maivei ira na tamata ena yalonuidei, kei na solia ena yalololoma, e dodonu me sa tiki ni noda bula” (“We Can’t Do It Alone,” Ensign, Nov. 1975, 91, 93). Na cava na vuna eda dau lomalomarua kina meda ciqoma na veivuke mai vei ira na tamata? Ena vukea vakacava mera vakalougatataki o ira era qaravi keda ni da lomasoli meda vukei? Solia e dua na gauna vei ira na lewenikalasi mera tugana na sala era na lomadina kina mera ciqoma nodra qaravi mai vei ira na tamata. Na cava e tukuna tiko na 1 Korinica 12:13–21 baleta na vuna e dodonu kina meda veilomani tiko kina vakai keda?

E vuqa tu na sala me da veiqaravi kina vei ira na tamata.

Mera vukei na lewenikalasi mera raica e vuqa na sala meda veiqaravi kina vakai keda, mo sureti ira mera taleva lesu na itukutuku nei Elder Jeffrey R. Holland “Tiko Vata Kei Ira ka Vakaukauwataki Ira” (Liaona, Me 2018, 101–3; raica talega na “iVakavuvuli ni Veiqaravi” ena ilavelave e tarava ni Liaona). Sa rawa me wasei vakailawalawa lalai na lewenikalasi, ka mera vakasamataka na ilawalawa e vica na vakanananu e rawa ni vukei kina e dua na tamata. Sa rawa mera vakasamataka vakabibi na sala eso mera veiqaravi kina na tamata ki na nodra gagadre vakayalo vakayago na tamata era vakanananu tiko kina. Kerea ki na ilawalawa oqo mera wasea na nodra vakasama ka tugana ke dua vei ira na vakasama oqo ena rawa me vakalougatataki ira era qarava.