Lawatu, iWalewale, kei na iMawena Vou
iTabagone kei na Cakacaka ni Valetabu. Eratou sa kacivaka na Mataveiliutaki Taumada na veisau eso ena lawatu ni valetabu ka soli kina vei ira na cauravou kei na goneyalewa eso tale na madigi ni cakacaka ena valetabu ka vukei ira na gone ena Lalai me ra vakarau vakavinaka cake ki na veiqaravi ena valetabu.
Tarova, kila, ka sotava na veivakalolomataki. Ena sasaga tikoga ni nodra vakasalataki na iliuliu ena ivakarau me tarovi, kilai, ka sotavi na veivakalolomataki, eratou sa vakauta yani kina na Mataveiliutaki Taumada e dua na ivola ena 26 ni Maji, 2018, kei na dua na itukutuku ivurevure vei ira na iliuliu ni Lotu e Amerika kei Canada. E okati ena itukutuku na idusidusi vakadodonutaki ena ivakarau e dodonu me ra veivakasalataki kina na bisopi kei na mataveiliutaki ni iteki vei ira era vakalolomataki ena ivakarau ni veiyacovi kei na ivakarau ni veivakatarogi vei ira na lewe ni Lotu.
Veisau ena Keba ni Goneyalewa. Na veisau ena parokaramu ni keba ni goneyalewa, e okati kina e dua na idusidusi vou ni keba me na tavoci ena vica na vula mai qo, oka kina ni sa kau laivi na veivakadeitaki kei na vakabibitaki ni iliuliu ni itabagone.
Kena inaki me “vakayagataki e vuravura raraba” baleti ira na itabagone era tiko ena veiyasai vuravura taucoko, sa tu na iDusidusi ni Keba ni Goneyalewa vou ena vosa Vakavalagi (ka qai muria mai ena 23 na vosa) me ivurevure ki na mataveiliutaki ni Goneyalewa, kenadau ni keba, kei ira na iliuliu ni keba ni itabagone ena youngwomen.lds.org.
Soli yani na ivakatagi. Na veisau se qai yaco wale toka ena iwalewale ni soli sere ki na Lotu ena totolo ka rawarawa kina vei ira na lewe ni Lotu me ra vakauta yani na sere/ivakatagi tabu sega ni lavetaki ki na Lotu. E rawa ni vakau yani na sere/ivakatagi ena apps.lds.org/artcomp.
Sala ni kakaburaki ni vidio na “How To”. Sa tavoca na Lotu ena YouTube e dua na sala ni kakaburaki vou ka vakatokai na “How To” ka vakarautaki kina na veivuke rawarawa matata baleta na bolebole dina ni bula. Me vaka ni “oqo e dua na sala ni kakaburaki eda na kunea kina na veivuke eda gadreva ena gauna eda gadreva kina,” na sala oqo e tiko kina ena gauna oqo e sivia ni 600 na vidio ka wasei vakaciwa, o ira yadua e yavica na ituvatuva ni lewena e duidui na kena ulutaga Vakavalagi, ka so ena vosa vaka-Sipeni kei na Potukali. Raica ena HowTo.lds.org.
Vakadewataki ni iVolanikalou: Sa kacivaka na Lotu na cakacaka ni vakavakadewa me baleta e 34 na vosa, kei na dua na iwalewale vou ka na rawa kina vei ira na tamata yadua me ra vulica na iwasewase vakatovotovo ni vakavakadewa ni se bera ni qai tabaki tudei, kena ibalebale ni rawa ni ra na raica taumada na lewenilotu na ivolanikalou ena nodra vosa.