Michelle D. Craig

iMatai ni Daunivakasala ena Mataveiliutaki Raraba ni Goneyalewa

Ni se qai yabaki 16, a rogoca o Sister Michelle D. Craig ni sa vakarau toki nona matavuvale mai Provo, Utah, Amerika, ki Harrisburg, Pennsylvania, Amerika, me rawa ni tekivu qarava kina o tamana na ilesilesi ni peresitedi ni kaulotu.

A marau me tiko vata kei nona matavuvale, ia na toki oya a vakavuna “nona bula galili” na goneyalewa o Michelle ena nona gauna ni vuli.

“Oqori dina na veiyabaki ni vulitovo,” e kaya o Sister Craig. “Au sa sega ni vakararavi vei ira na itokani, ia au vakararavi ga ki na noqu matavuvale kei na noqu ivakadinadina, ka sa yaco na lotu me yavunibula.” E vakabibitaka vakalevu na nona veiwekani kei Tamada Vakalomalagi kei na iVakabula.

A sucu o Michelle Daines Craig ena 13 ni Julai, 1963, e Provo, Utah, ka qase duadua vei iratou na vitu na luvedrau o Janet Lundgren kei Robert Henry Daines III. A vakaitikotiko mai Provo okoya me yacova ni toki nona matavuvale ki Pennsylvania. Ena rua na yabaki i muri, a lesu tale ki Provo o Sisita Craig me vuli ena Brigham Young University, ka rawata kina e dua na diqiri ni bejila ni vuli ena itabavuli e ra. Ena 1984 a ciqoma e dua na kaci me laki veiqaravi ena Tabana ni Kaulotu na Dominican Republic Santo Domingo.

“Au a dau dua voli ga na dauvakabauta,” e kaya o Sister Craig, ka a tokoni me iMatai ni Daunivakasala ena Mataveiliutaki Raraba ni Goneyalewa ena 31 ni Maji, 2018. “Ni’u se gone sara, au a sa kila ni’u dua na luvena goneyalewa na Kalou. Ia au nanuma [ena noqu kaulotu] ni veigauna kece au dau wasea kina noqu ivakadinadina baleta na Parofita o Josefa Simici, au na vakila na Yalo. Au rawata e dua na veivakadeitaki totoka ka vaqaqacotaka noqu ivakadinadina.”

Ni oti ga e vica na siga nona lesu mai, a tukuna vua o ganena ni na gadreva me veigadivi kei Boyd Craig, e dua nona itokani mai na nona kaulotu. Ni oti e walu na vula erau sa veimusumusuki me rau veiwatini na lewe rua. Erau a vakamau ena 19 ni Tiseba, 1986, ena Valetabu e Salt Lake. Erau nodratou itubutubu e tolu na gone, ka ono na makubudrau.

Sa veiqaravi oti o koya ena vuqa na veikacivi, okati kina na liganicakacaka ena Valetabu e Provo Utah vakakina vaka qasenivuli ni iVakavuvuli ni Kosipeli. Ena nona kacivi ki na Mataveiliutaki Raraba ni Goneyaalewa, a veiqaravi voli o koya ena matabose raraba ni Lalai.