Soqoni enai Karua kei nai ka Tolu ni Siga Tabu
Ena ikarua kei na ikatolu ni Sigatabu ni veivula, na kuoramu ni italatala qase kei na Soqosoqo ni Veivukei era na vulica na nodra ivakavuvuli na iliuliu ni Lotu mai na koniferedi raraba se qai oti toka ga. Me na vulici vakalevu na nodra itukutuku na lewe ni Mataveiliutaki Taumada kei na Kuoramu ni iApositolo Le Tinikarua. Ia, ena vuku ni veika e gadrevi kei na veivakauqeti ni Yalo, sa rawa me veivosakitaki na itukutuku mai na koniferedi raraba se qai oti toka ga.
Ena vuqa na gauna, na mataveiliutaki ni kuoramu ni italatala qase se iSoqosoqo ni Veivukei, ena digitaka e dua na itukutuku ni koniferedi me vulici ka yavutaki ena gagadre ni lewenilotu, dina ga ni rau na soli vakasama talega kina o bisopi se peresitedi ni iteki. Era rawa ni digitaka na iliuliu e dua na itukutuku ka semati ki nai ulutaga a veivosakitaki ena matabose ni soqoni ni matai-ni Siga Tabu, se era rawa ni digitaka e dua tale na itukutuku e duidui na kena ulutaga, e yavutaki mai na veivakauqeti ni Yalo.
O ira na iliuliu kei na qasenivuli e dodonu mera kunea na sala me vakayaloqaqataki ira na lewenilotu me ra wilika taumada na itukutuku digitaki ka vakavakarau me ra mai wasea na dina ni kosipeli kei na vakasama ka mera na cakava vakacava. Na vakaturi ni itaviqaravi ni vuli e ra, ka vakatau ena ivakavuvuli ena Veivakavulici ena Sala ni iVakabula, rawa ni vakaitavitaki ira na lewenilotu ena vuli mai na itukutuku ni koniferedi raraba.
M. Russell Ballard, “iSolisoli Talei mai Vua na Kalou,” 9–11
E vakamacalataki ena itukutuku nei Peresitedi Ballard e vica na mataqali ulutaga—oka kina na parofita, vakabauta na Karisito, na sakaramede, kei na veiqaravi—ka na rawa mera kunea na lewe ni nomu kuoramu se iSoqosoqo ni Veivukei na ulutaga eso era vakaibalebale cake. Sureta na lewenikalasi mera wasea e dua na ka mai na itukutuku oqo e veivakauqeti vei ira. Na veisureti se veivakalougatataki cava eda kunea rawa mai na itukutuku nei Peresitedi Ballard? Sa rawa mo sureta na lewenikalasi mera tugana me vica na miniti na ka era sa vakauqeti kina mera cakava a vu mai na veivosaki oqo.
Gary E. Stevenson, “Na Loma ni Dua na Parofita,” 17–20
Me vukei ira na lewenikalasi mera “kila vinaka na cecere” ni kena kacivi e dua na parofita vou, sa rawa mo sureta na lewenikalasi mera vakasaqara ena itukutuku nei Elder Stevenson, na dina kei na veivakararamataki e veivuke mera kila ni sa bibi ka tabu na cakacaka vakalou oqo. Sa rawa mo sureti ira na lewenikalasi mera wasea na veika era a vakila ena soqoni vakalou a tokoni kina o Peresitedi Nelson me Peresitedi ni Lotu. Sa rawa mo droinitaka ena papa e dua na uto ni tamata ka kerea na kalasi mera vola kina na vosa se malanivosa eso e vakamacalataka na yalo kei na ivakarau nei Peresitedi Nelson. Na cava e sa vakavulica o koya e sa vakalougatataki keda?
Neil L. Andersen, “Na Parofita ni Kalou,” 24–27
Na veivosakitaki ni itukutuku nei Elder Andersen ena rawa me vaqaqacotaka na nodra vakabauti ira na parofita bula na lewenikalasi. Sa rawa mo sureti ira mera vakasaqara ena nona itukutuku na veika ena vukea mera kila vinaka na vuna e vakatikori ira kina na parofita na Kalou e vuravura kei na vuna meda na muri ira kina. Eda sa vakalougatataki vakacava baleta ni tiko e dua na parofita? Sa rawa mera wasea na lewenikalasi na sala era a rawata kina e dua na ivakadinadina ni o Peresitedi Russell M. Nelson sa parofita ni Turaga ka Peresitedi ni Lotu i Jisu Karisito ni Yalododonu Edaidai.
David A. Bednar, “Yalomalua ka Yalomalumalumu,” 30–33
Me vakauqeti na kena veivosakitaki na itukutuku nei Elder Bednar, sa rawa mo vola ena papa Na yalomalua sai koya na … kei na yalomalua e sega ni … Mera qai vakasaqara na lewenikalasi na itukutuku nei Elder Bednar ka vola ena papa na malanivosa era raica ni na vakataucokotaka na itukutuku oqo. Na cava eda sa vulica mai na itukutuku oqo e vakauqeti keda meda yalomalua cake kina? Na ivakaraitaki cava ni yalomalua eda rawa ni vakasamataka? Eda na taurivaka vakacava na ivakasala nei Elder Bednar meda yalomalua cake kina?
Bonnie L. Oscarson, “Era Cakacaka na Goneyalewa,” 36–38
Na taro sa dua na sala me sureta na vakasama vakatitobu. Sa rawa mo vola ena papa e vica na taro e saumi tiko mai na itukutuku nei Sister Oscarson, me vakataka Eda na vakaitavitaki ira vakacava na goneyalewa ena cakacaka ni Turaga? Sureta na lewenikalasi mera vakasaqara ena nona itukutuku na isaunitaro oqo ka veivosakitaka na veika era sa vulica. Na veivakalougatataki cava ena yaco mai ni ra vakaitavi na goneyalewa ena veiqaravi? Sa rawa ki na lewenikalasi mera wasea na veika era sotava ni ra a veiqaravi vata tiko kei ira na goneyalewa. Ni yavutaki ena noda veivosaki, na cava eda sa vakauqeti kina meda cakava?
Dale G. Renlund, “Cakacaka ni Valetabu kei na Tuva Kawa: Veivauci kei na Veivakabulai,” 46–49
A vakamacalataka o Elder Renlund na raivotu nei Isikeli baleta na valetabu kei na wai a drodro mai kina (raica na Isikeli 47:8–9). Sa rawa vua e dua na lewe ni kuoramu se iSoqosoqo ni Veivukei me droinitaka na raivotu oqo ena papa. Era sa tautauvata vakacava na veivakalougatataki ni cakacaka ni valetabu kei na tuva kawa vata kei na wai a raica ena raivotu o Isikeli? Sa rawa mo sureta na kalasi mera wasea na veivakalougatataki ni cakacaka ni valetabu kei na tuva kawa era sa sotava. Na cava eda rawa ni cakava me tiki wasoma ni noda bula na cakacaka ni tuva kawa kei na valetabu?
D. Todd Christofferson, “Na Kuoramu ni iTalatala Qase,” 55–58
Sa rawa mo sureti ira na lewe ni kuoramu ni italatala qase, mera wilika na wase ni itukutuku nei Elder Christofferson “Na iNaki ni Veisau Oqo.” Na cava eda rawa ni cakava meda rawata kina na inaki oqo? Ena iSoqosoqo ni Veivukei, sa rawa mo kerea e dua me tukuna na usutu ni veisau oqo ni kuoramu ni Matabete i Melikiseteki e tukuna tiko o Elder Christofferson. Sa rawa vei ira na marama mera raica na ivakavuvuli e tukuni tiko ena veisau oqo e rawa ni vakayagataki ena cakacaka ni nomuni iSoqosoqo ni Veivukei. Sa rawa vei ira na lewe ni kuoramu ni italatala qase se na iSoqosoqo ni Veivukei, mera veivosakitaka na veika era sa vulica mai na italanoa kei Brother Goates kei na kena taurivaki ena nodra cakacaka.
Ronald A. Rasband, “Raica! Na Mataivalu Vakatui,” 58–61
Na kena lagati, rogoci, se wiliki vata na qaqani “Raica! Na Mataivalu Vakatui” (Serenilotu, naba 151) ena vakauqeta na kena veivosakitaki na itukutuku nei Elder Rasband. Era sa vakataka vakacava e dua na mataivalu vakatui o ira na kuoramu ni matabete kei na iSoqosoqo ni Veivukei? Sa rawa vei ira na lewenikalasi mera vakasaqara talega ka veivosakitaka na “vuqa na veivakalougatataki” e tukuna tiko o Elder Rasband ni na lako mai ena veisau vou oqo ni kuoramu ni matabete. Na veivakalougatataki cava tale eso eda sa ciqoma—se da nuitaka tiko meda ciqoma—ni da na cakava na veisau oqo? Era na vakalougatataki vakalevu vakacava na iSoqosoqo ni Veivukei ena “veimataqali isolisoli” kei na “veituberi”
Henry B. Eyring, “Veiqaravi Veivakauqeti,” 61–64
E a tukuna o Peresitedi Eyring ni a vakauqeti ena rua na vosa ni soqoni ni sakaramede me baleta na veiqaravi. Sa rawa mo kerea e veimama ni lewe ni kuoramu se iSoqosoqo ni Veivukei mera taleva lesu na vosa nei cauravou yabaki 14 kei na karua ni veimama mera taleva lesu na italanoa kei dauveituberi ni vuvale. Ni ra sa wilika, sa rawa ki na lewenikalasi mera vakasamataka e dua na ivakasala e rawa ni ra solia vua e dua na cauravou se goneyalewa sa lesi vou me veiqaravi vua e dua. Ena rawa vakacava “meda sa dauvakauqeti ka dauloloma cake vakalevu ena noda … veiqaravi”?
Dallin H. Oaks, “Na Kaukauwa ni Matabete,” 65–68
Me tekivutaki e dua na veivosaki, sa rawa mo vola ena papa na ulutaga ni va na wasewase ni itukutuku nei Peresitedi Oaks. Oti mo sureti ira yadua na lewenikalasi mera wilika lo e dua na iwasewase ka qai vola ena papa e dua na yatuvosa e usutu ni itukutuku ni iwasewase o ya. Sa rawa vei ira na lewenikalasi mera wasea na veika era uqeti kina mai na veika era sa wilika. Ena rawa vakacava me torocake na noda veiqaravi vaka-lewe ni matabete se marama ni iSoqosoqo ni Veivukei ni da bulataka na ivakavuvuli ena itukutuku nei Peresitedi Oaks?
Russell M. Nelson, “Veiqaravi ena Kaukauwa kei na Lewa ni Kalou,” 68–75
Sa sureti ira tiko na lewe ni matabete o Peresitedi Nelson mera “tucake yani” ka vakayagataka na matabete mera vakalougatataki ira kina na luvei Tamada Vakalomalagi. Sureta na lewe ni nomu kuoramu se iSoqosoqo ni Veivukei mera vakasaqara na ivakaraitaki e solia mai ka veivosakitaki me vukea noda kila vinaka noda rawa ni vakayagataka na matabete me vakalougatataka nodra matavuvale kei ira na tamata. Na veigauna cava eda rawa ni wasea eda a vakalougatataki kina ena kaukauwa ni matabete? Eda na vukei ira vakacava na tamata se o keda meda vakabauta noda vakayagataka na matabete ni Kalou meda “veiqaravi ena Yacana”?
Reyna I. Aburto, “Ena Lewa Vata,” 78–80
E vakarautaka na itukutuku nei Sister Aburto na madigi ki na nomu kuoramu se iSoqosoqo ni Veivukei me dikevi na nomuni sa cakacaka vinaka tiko ena duavata ena cakacaka ni Turaga. Me vukei mera cakava oqo na lewenikalasi, mo vakaraitaka na kedra iyaloyalo na bebe vakatui, kei na nona sikovi ira na Nifai na iVakabula (raica na iVola Yaloyalo ni Kosipeli, 82, 83, 84), kei na cakacaka ni Lotu baleti ira na kawatamata raraba (raica na LDS.org). Mera vakasaqara na lewenikalasi na itukutuku ka raica na sala a vakayagataka o Sister Aburto na ivakaraitaki oqo me vakavulica kina na inaki kei na kalougata ni cakacaka ena duavata. Na cava eda rawa ni cakava meda cakacaka “ena lewa vata”?
Henry B. Eyring, “Me Tiko kei Kemuni na Yalona,” 86–89
Me torocake noda gadreva ka guta meda ciqoma na Yalo Tabu, e wasea o Peresitedi Eyring e vica na ka a sotava ka veivakasalataki kina vakamatata. Ni dikevi lesu na veika a sotava, na vakanananu cava vata o ya era rawa ni wasea na lewe ni nomu kuoramu se iSoqosoqo ni Veivukei ena gauna a tara kina na yalodra na Yalo Tabu se vakadeitaka kina na ka dina? Sa rawa talega ki na lewenikalasi mera vola ena papa na veidusimaki nei Peresitedi Eyring me vukea “noda dolava na yaloda meda ciqoma na veiqaravi ni Yalo.” Ena vukei keda vakacava ni da muria nona veidusimaki ki na noda bula kei na noda matavuvale? ena noda kuoramu se iSoqosoqo ni Veivukei?
Dallin H. Oaks, “Na Veika Lalai ka Rawarawa,” 89–92
Era tiko ena itukutuku nei Peresitedi Oaks na vosa vakaibalebale e vakavulica ni ka lalai ka rawarawa e ka mana kaukauwa ni ka vinaka se ka butobuto. Na vosa vakaibalebale oqo era oka kina na waka ni kau, dua na timi ni voce bavelo, wa ni dali, kei na tuturu ni wai. Sa rawa mera wilika oqo na lewenikalasi ka veivosakitaka na ka era vakavulica baleta na kaukauwa ni cakava na veika lalai ka rawarawa ena veigauna. Na veika lalai ka rawarawa cava e kauta mai na veivakauqeti ni Yalo Tabu ki na noda bula? Sureta na lewenikalasi mera tugana na veika era sa uqeti kina mera muria na ivakasala nei Peresitedi Oaks.
Russell M. Nelson, “iVakatakila ki na Lotu, iVakatakila ki na Noda Bula,” 93–96
Ena nona itukutuku, sa vakamasuti keda kina o Peresitedi Nelson meda toroya cake na noda “gugumatua vakayalo meda ciqoma na ivakatakila.” Me vukea nodra muria na nona ivakasala na lewenikalasi, mo vola na taro vakaoqo ena papa: Na cava na vuna eda gadreva kina na ivakatakila? Eda na toroya cake vakacava na noda gugumatua meda ciqoma kina na ivakatakila—na tamata yadua kei na noda veivakasalataki vata? Na veivakalougatataki cava a yalataka o Peresitedi Nelson kevaka meda vakasaqara na ivakatakila? Wasea vakailawalawa na lewenikalasi, ka sureta na ilawalawa yadua mera vakasaqara ka wasea e dua na isau ni taro oqo.
Gerrit W. Gong, “Sa Tucake ko Jisu,” 97–98
Na cava era rawa ni vulica na lewe ni nomu kuoramu se iSoqosoqo ni Veivukei mai na itukutuku nei Elder Gong me baleta na noda veiyalayalati kei na Veisorovaki i Jisu Karisito? Sa rawa mo sureta na lewenikalasi mera vakasaqara ena itukutuku, na veivakalougatataki ni Veisorovaki ni iVakabula kei na noda veiyalayalati—ni rau cakacaka vata—ena solia vei keda. Mo qai taroga vakaoqo me baleta na veika era sa kunea: E rau cakacaka vata vakacava na noda veiyalayalati kei na Veisorovaki me da “tamata yaco ka cecere” kina? Erau vukei keda ena cava meda tautauri matua kina ka sega ni sorova?
Ulisses Soares, “Era Vosa na Parofita ena Kaukauwa ni Yalo Tabu,” 98–99
Sa rawa ni uqeti keda na itukutuku nei Elder Soares meda cakacaka ena vakabauta ni da bula luluqa ena vakayacora na lewa ni Turaga. A ciqoma vakacava o Elder Soares na vakacegu kei na veivakadeitaki ni sa ciqoma na nona veikacivi vou me dua na iApositolo? Na cava a vulica mai na veika a sotava ni sa kacivi me dua na peresitedi ni kaulotu? Na cava e rawa ni da vulica mai na veika a sotava? Solia na gauna ki na lewenikalasi mera wasea na gauna era a lomatarotarotaka kina nona vinakata na Turaga mera cakava e dua na ka. Na cava era a cakava mera kunea kina na vakabauta mera toso yani ki liu?
Jeffrey R. Holland, “Tiko Vata kei Ira ka Vakaukauwataki Ira,” 101–3
Ni ra sa mai vulica na lewe ni nomu kuoramu se iSoqosoqo ni Veivukei na veisau ki na “ivakarau ni veiqaravi ni matabete kei na iSoqosoqo ni Veivukei,” na cava era sa taroga tiko? Na itukutuku nei Elder Holland ena rawa me vakarautaka na isaunitaro. Sa rawa mera vakasaqara na lewenikalasi na ivakavuvuli ni kosipeli e vakavulica o Elder Holland ni ra sa yavu ni veisau oqo. Na veisureti cava eda kunea ena nona itukutuku? Na veivakalougatataki cava sa yalataki tu? Ena vukei keda vakacava na sala vou oqo ni veiqaravi meda sa “tisaipeli dina i Karisito”?
Jean B. Bingham, “Veiqaravi me Vakataka na iVakabula,” 104–7
Ena nona itukutuku, sa sureti keda kina o Sister Bingham meda tarogi keda ena veika me dusimaka na noda sasaga ni veiqaravi. Sa rawa ki na lewenikalasi mera veivosakitaka na veitaro oqo mena dusimaka vakacava na nodra sasaga ka vakasaqara na isau ni taro nei Sister Bingham, “E vakacava beka na irairai ni [veiqaravi]?” Sa rawa mo taura na gauna mo dikeva kina eso na ivakaraitaki e tukuna tiko o Sister Bingham baleta nodra veiqaravi eso ka sureta na lewenikalasi mera wasea na nodra ivakaraitaki. Na cava eda kunea ena itukutuku nei Sister Bingham e vakalevutaka noda kila vinaka na vuna kei na sala ni noda veiqaravi?
Dieter F. Uchtdorf, “Raica na Tamata!,” 107–10
Eda na vukea vakacava e dua me kila vinaka ni solibula veisorovaki ni Tucaketale i Jisu Karisito a gauna bibi duadua ena itukutuku kei vuravura? Sureta na lewenikalasi mera tugana na taro oqo ni ra wilika na tiki ni itukutuku nei Elder Uchtdorf. Na cava era sa kunea sa vukea me vakamacalataka kina na kena bibi vei ira na gauna oqo? Ni oti na veivosaki, sa rawa mera veivosakitaka na lewenikalasi na ibalebale ni “raica na tamata.” Eda sa vulica vakacava meda “raica na tamata”?
Quentin L. Cook, “Vakarau Mo Sotava na Kalou,” 114–17
Sa rawa me tekivu na veivosakitaki ni itukutuku nei Elder Cook ena nona sureti e dua ena kalasi me solia na usutu ni vakalesuimai ni idola ni matabete ena Valetabu e Kirtland. Ena itukutuku nei Elder Cook, na ilesilesi cava ni Lotu era sema tiko ki na idola oqo? Era sa vakaraitaki tiko vakacava na ileslesi oqo ena Lotu nikua? Vola ena papa na vosa valavala dodonu, duavata, kei na tautauvata ka kerea na lewenikalasi mera wasea na veivakararamataki era sa rawata baleta na ivakavuvuli yadua oqo mai na itukutuku nei Elder Cook. Era veivuke vakacava na ivakavuvuli oqo meda cakava rawa kina na ilesilesi tabu?