Elder Takashi Wada

Vakaitutu Raraba ena Vitusagavulu

Ena dua na siga batabata ni vula o Noveba, a toboki Takashi Wada e dua na taro mai vua e dua na daukaulotu ni Amerika ka taroga tiko na gaunisala ki na positovesi.

E a sa vakasalataka na gone yabaki 15 oqo na tamana me dau levei ira na Momani, ka ra dau veivosaki kei ira na tamata ena veigaunisala mai Nagano, Japani, rauta ni tolu ga na miniti mai nodratou vale. Ia a vakauqeti Takashi nodrau vosa vakajapani na daukaulotu kai Amerika.

Ena vica ga na siga tarava, a tarovi Takashi e dua tale na daukaulotu. Se bera ni dede nona tiko e Japani. Ena vosa vaka-Japani cacavukavuka, a tovolea me wasea okoya na italanoa kei Josefa Simici.

A sega ni kila o Takashi na veika kece e tukuni, “ia au vakila ni dodonu meu vakarorogo,” e nanuma lesu o koya.

Erau vakavulica vua na daukaulotu na ikabakaba ni masu kei na lesoni. A lakova na veisoqoni ni Lotu ka tarai koya na nodra ivakadinadina na lewenilotu e kea. Ni leqataka tiko nodratou nanamaki nona matavuvale lotu Budha, e tukuna tikoga o Takashi vei rau na daukaulotu, “Au sega ni rawa ni curu ki na Lotu, ia au vinakata meu vulica eso tale na ka.”

Ena rua na yabaki i muri, ni bera ni biubiu o Takashi me la‘ki vuli ki Amerika ni yabaki 17, rau sa vakadonuya nona itubutubu, ka lewena okoya na Lotu.

A rawata o Elder Wada, ka a sucu ena 5 ni Feperueri, 1965, vei rau o Kenzo kei Kazuko Wada, a rawata e dua na koroi n bejila ena vosa ena 1990 kei na dua na koroi ni masita ni liutaki bisinisi ena 1996, mai na Brigham Young University ruarua.

A daukaulotu ena Tabana ni Kaulotu na Utah Salt Lake City North ka vakamautaki Naomi Ueno ena 18 ni June, 1994, ena Valetabu e Tokyo Japani. E rua na luvedrau tagane.

E oka ena bula vakacakacaka nei Elder Wada e vica na itutu ena veikabani ni veimatanitu e Amerika kei Japani, vakakina na itutu vakadairekita ni veika vakayago ni Lotu ena iWasewase e Vualiku kei Amerika ena Ra, Vualiku kei Amerika ena Vuaira, kei na Vualiku kei Esia.

Sa veiqaravi oti vakabisopi, lewe ni matabose e cake, ka qasenivuli ni semineri o Elder Wada. A veiqaravi vakaperesitedi ni Tabana ni Kaulotu na Japan Tokyo South mai na 2013 ki na 2016. A tokoni me Vakaitutu Raraba ena Vitusagavulu ena 31 ni Maji, 2018.