Elder Steven R. Bangerter

Vakaitutu Raraba ena Vitusagavulu

Ena dua na keba ena gauna ni gone, eratou a vodo basikeli ni gaunisala qereqere o Elder Steven R. Bangerter kei na nona matavuvale ki na dela ni dua na ulunivanua. Ni ratou siro sobu mai, a lako sese ka mani tawase tani mai vei iratou na kena vo.

Ni tekiduru ena yakavi oya ka vakatakekere vei Tamana mai Lomalagi me vukei, a raica ena mata ni nona vakasama na sala sa sega tiko ni kunea rawa. Ni tekivu muria sobu, “a yaco yani o taciqu ki na itekivu ni sala ena nona motopai, mokoti au, ka liutaki au sobu mai ena buto ki na keba, ka vica toka na auwa na kena yawa.”

Na ka oqori e dua ga vei ira na vuqa ka a vakila kina nona lomani ena nona gauna ni gone. “E sega vakadua ni dua na gauna ena noqu bula meu a taroga kina seu lomani beka ka kauwaitaki,” e kaya o Elder Bangerter.

A sucu o Elder Bangerter mai Salt Lake City, Utah, Amerika, vei rau o Max E. kei Thelma R. Bangerter ena 29 ni Julai, 1961. A tubucake e Granger, Utah.

Ni oti e vica na macawa nona lesu mai ena veiqaravi mai na Tabana ni Kaulotu na Canada Vancouver, a sotavi Susann Alexis Hughes o Elder Bangerter. Ena imatai ni nodrau veigadivi, a vakila o koya na nona gagadre me veiqaravi ka uqeti kina me kerei koya ena ikarua ni nodrau veigadivi me watina. Erau a vauci ena Valetabu mai Salt Lake ena ika 17 ni Maji, 1983. Erau nodra itubutubu e ono na gone.

A rawata o Elder Bangerter e dua na diqiri ni bejila mai na Arizona State University ena vuli lotu kei na diqiri ni doketa ni lawa mai na Western State University College of Law. Ena 25 na yabaki sa oti, sa dau matataka o Elder Bangerter na veimatalotu eso kei na isoqosoqo ni vakabauta eso ena veika vakalawa ena Ceva kei California kei na ceva kei Utah. A itokani o koya mai Cooksey, Toolen, Gage, Duffy, kei Woog mai na 1993 ki na 2003 ka yaco me itokani liu ni Bangerter, Frazier, kei Graff ena 2004.

Sa veiqaravi oti o Elder Bangerter vaka-Vitusagavulu ni iWasewase, peresitedi ni iteki, daunivakasala ena mataveiliutaki ni iteki, bisopi, peresitedi ni kuoramu ni italatala qase, ka peresitedi ni Cauravou ena tabanalevu.