Elder Robert C. Gay

Mataveiliutaki ni Vitusagavulu

Ni veiqaravi voli vakaperesitedi ni kaulotu e Ghana, a vakauqeti ena dua na siga o Elder Robert C. Gay me tu vakadua ka vukea e dua na gonetagane a tagi tiko. Taumada, a sega ni rogoca na veivakauqeti oqori ia e muri a qai tala e dua na lewe ni Lotu me raica ka kauta mai vua na gonetagane oya.

A qai kila o Elder Gay, ka a tokoni me Mataveiliutaki ni Vitusagavulu ena 31 ni Maji, 2018, ni gonetagane oya e dau volitaka nona ika mamaca o koya e qaravi koya tiko. Ena siga oya a lutu na ilavo e rawata na gonetagane oqo baleta ni qara tu na nona taga.

“Kevaka me lesu yani ki vale ka sega na ilavo, ena tukuni vua ni lasu, ena kana kuita, qai cemuri ki tuba me bula tu e gaunisala,” a kaya o Elder Gay. “Keitou a vakaruruya nona lomaleqa, vakaisosomitaka na ka a yali, ka kauti koya ki vale vua e qaravi koya voli.”

Me vaka e vakamacalataka ena koniferedi raraba ni Okotova 2012, ni ka a sotava oqori e vakavulica vei Elder Gay e rua na dina lelevu: “Ai matai, au sa qai kila me vaka au se sega ni bau kila eliu ni Kalou ena dau nanumi keda yadua ka na sega vakadua ni laivi keda; kena ikarua, au kila ni dodonu me dau rogoci na domo ni Yalotabu e lomada ka lako “vakatotolo” ki na vanua cava ga e kauti keda kina, veitalia noda taqaya se lomaleqa.”

A tokoni o Elder Gay me Vakaitutu Raraba ena Vitusagavulu ena 31 ni Maji, 2012. Ena gauna e kacivi kina ki na Mataveiliutaki ni Vitusagavulu, a veiqaravi voli vaka-Peresitedi ni iWasewase ena iWasewase na Vualiku kei Esia. A veiqaravi e liu ena valenivolavola liu ni Lotu vakajeameni ni Komiti ni Veiqaravi ni Bula Rawati Koya/iLavovure ni Vuli, kei na itavi ni veiqaravi ni bula rawati koya e vuravura raraba.

Ni bera nona kacivi ki na Vitusagavulu, a vunilewa voli ena dua na kabani ni vakatubuilavo a veivuke ena kena tauyavu. A veivuke talega ena tauyavu ka dairekita ena vica na isoqosoqo ni bula raraba ni vuravura taucoko ka cakacaka ena baqe ni vakatubuilavo e Wall Street, daunivakasala ni vakataulewa, vakakina vakaqasenivuli ni economics ena Univesiti e Havard.

A rawata o Elder Gay e dua na koroi ni bachelor of arts ka vakabibitaki kina na veika vakaiwiliwili mai na Univesiti e Utah kei na dua na PhD ena lalawaka vakabisinisi mai na Univesiti e Havard.

A veiqaravi vakadaukaulotu tudei o Elder Gay e Spain, iliuliu ni ilawalawa ni bete levu, peresitedi ni Cauravou ena tabanalevu, lewe ni matabose e cake, daunivakasala ena matabisopi, ka Vitusagavulu ni iWasewase.

A sucu o koya e Los Angeles, California, Amerika, ena 1 ni Sepiteba, 1951. A vakamautaki Lynette Nielsen ena Epereli 1974. Erau nodratou itubutubu e vitu na gone.