Elder Gerrit W. Gong

Kuoramu ni iApositolo Le Tinikarua

“Ena Sigatabu ni Siganimate oqo, au lagata vata kei kemuni ena reki na, ‘Alleluia,’” e kaya o Elder Gerrit W. Gong ena imatai ni nona vosa ena koniferedi raraba vakalewe ni Kuoramu ni iApositolo Le Tinikarua. “Na sere ni nona loloma veivueti na noda iVakabula sa vakaturi cake e marautaki kina na duavata ni veiyalayalati … kei na Veisorovaki i Jisu Karisito.”

Sa dau reki tiko ena nona bula taucoko o Elder Gong ena duavata oya. E kila o koya na mana ni noda veiyalayalati, cokovata kei na Veisorovaki ni iVakabula, ena “vakaukauwa ka vakaturagataki” keda. “Ni rau lako vata, e vakamikamicataka, maroroya, vakasavasavataka, ka veivueti,” e kaya o koya.

Ena dua na vakamau ena valetabu ena dua na siga, a ilovi ena iloilo ni valetabu, na mana ni veiyalayalati, cokovata kei na Veisorovaki. A raitayaloyalotaka na itabatamata ni nona matavuvale ni drodro kosova na tawamudu, mai vua na wekana e liu duadua ka kilai rawa, o First Dragon Gong, sucu ena 837 ni sa sucu oti na Karisito, curuma e 36 na itabatamata vei ira na makubuna oqo ka toso tiko ena yasana ruarua.

“Sa tekivu meu kilai au kei na marama watiqu ni keirau sa luvedrau na neirau itubutubu ka keirau itubutubu ni luvei keirau, ka keirau makubudrau na tukai keirau kei na bui keirau ka tukadra ka budra na makubui keirau. “E curuma na yaloi keirau na neirau vulica na lesoni cecere ni bula oqo ni keirau vulica ka vakavulica na neirau ilesilesi tawamudu oka kina na gone kei na itubutubu, na itubutubu kei na gone.”

Sa veiqaravi o Elder Gong vaka-Vitusagavulu Vakaitutu Raraba me tekivu mai na Epereli 2010 ka lewe ni Mataveiliutaki ni Vitusagavulu tekivu mai na Okotova ni 2015. A tokoni me lewe ni Kuoramu ni iApositolo Le Tinikarua ena 31 ni Maji, 2018, ka vakamacalataka o koya ni “veikacivi tabu ni Turaga ka kauta tani na noqu icegu.”

Mai na 2011 ki na 2015, a veiqaravi o Elder Gong ena Mataveiliutaki ni iWasewase e Esia, ka vakacavara na veiqaravi oya vaka-Peresitedi ni iWasewase. A veiqaravi vakadaukaulotu tudei ena Tabana ni Kaulotu e Taiwan Taipei, lewe ni matabose e cake, iliuliu ni ilawalawa ni bete levu, peresitedi ni Matawilivola ni Sigatabu, qasenivuli ni semineri, bisopi, peresitedi ni kaulotu ni iteki, peresitedi ni iteki, ka Vitusagavulu ni iWasewase.

A rawata o Elder Gong e dua na koroi ni bejila ena Vulici ni veika Vaka-Esia kei na University Studies mai na Univesiti na Brigham Young ena 1977. A qai rawata ena 1979 e dua na koroi na masita ni filosifi kei na koroi cecere vakavuniwai ena veiwekani raraba ena veimatanitu mai na Univesiti e Okosivote ena 1981, na vanua ka gonevuli (Rhodes Scholar) kina. Ena 1985 a ivukevuke digitaki tiko o koya vei karua ni sekeriteri ni vanua ena Tabana ni Vanua kei Amerika, kei na 1987 a cakacaka vaka-ivukevuke digitaki vua na mata ni Amerika e Beijing, Jaina. Tekivu ena 1989, a veiqaravi ena vica na itutu ena Center for Strategic and International Studies e Washington, D.C. A ivukevuke o koya vua na peresitedi baleta na tuvaka kei na kena dikevi ena Univesiti na Brigham Young me yacova na Epereli 2010.

Rau a toki na tubui Elder Gong ki Amerika mai Jaina. A sucu o Gerrit W. Gong e Redwood City, Calfornia, Amerika ena 1953. A vakamautaki Susan Lindsay ena Janueri 1980, ka rau nodratou itubutubu e va na gone ka tolu na makubudrau.

Na veika kece e yaga ka tawamudu e yavutaki ena dina bula ni Kalou, na Tamada Tawamudu dauloloma, kei na Luvena, o Jisu Karisito, kei na Nona Veisorovaki, ka vakadinadinataka na Yalo Tabu,” e kaya o Elder Gong ena koniferedi oqo. “Au vakadinadinataka ena yalomalumalumu ka vakalou na Karisito bula—a tiko vata … kei keda o Koya mai na ivakatekivu, ena tikoga vata kei keda o Koya ki na ivakataotioti.”