Wase 4

Vaqaqacotaki ena Kaukauwa ni Yalo Tabu

“Ni vakatulewataka mo ni bula ena yalomalua vakakina ena dua na sala ka rawa me nomuni itokani tu ga kina e veigauna taucoko na Yalo Tabu.”

Mai na Bula nei Lorenzo Snow

Me vaka ni Peresitedi ni Lotu, na imatai ni nona vosa ena koniferedi raraba, a vakatavulica o Lorenzo Snow, “Eda vakararavi tu vua na Yalotabu ni Turaga me vukei keda me da vakaraitaka e veigauna taucoko na cava e yaga vei keda me da rawata ena veigauna sega ni namaki ka ra vakavolivoliti keda.”¹ O Peresitedi Snow e rawa me a sega ni bula me cakava na itukutuku o ya kevaka me rau a sega ni vakararavi e rua nona itokani vua na Yalotabu ni Turaga ena dua na gauna sega ni namaki ena 34 na yabaki taumada.

Ena 1864, o Elder Lorenzo Snow kei Elder Ezra T. Benson ena Kuoramu ni iApositolo Le Tinikarua erau a lako ena kaulotu ki na veiyatu-Yanuyanu e Hawaii. Erau a veitokani vata kei iratou na lewe tolu tale na daukaulotu: O Elders Joseph F. Smith, William Cluff, kei Alma L. Smith. Ena gauna a kele yani kina na nodratou waqa ena baravi ni yanuyanu o Maui, o iratou taucoko vakavo ga o Joseph F. Smith eratou a vodoka e dua na waqa lailai me ratou lako yani ki matasawa. Ni ratou sa voleka yani ki na yanuyanu, tubu cake mai na ua lelevu,vakavuna me sega ni ulia rawa na waqa o daunitauriuli. A tavuki na waqa, ka ra viritaki taucoko ki wai na lewe ni waqa. Oti ga vakalailai era sa basika vakayadudua mai vakavo ga o Elder Snow. E totolo sara nodra veivuke e dua na ilawalawa lewe ni yanuyanu, kauti William Cluff kei Alma L. Smith ena dua na waqa ni veivueti ka vakasaqara na nodrau itokani. Tukuna o Elder Cluff:

“Na imatai ni ka au raica vei Baraca Snow sa ikoya na uluna ni ciri koto e wai vakavolivolita na mua ni waqa a tavuki. Ena gauna ga keimami biuti koya kina waqa, keimami tukuna vua na kaiwaqa me gole ki matasawa ena kena gauna totolo duadua e rawa. Sa wakakau tu na yagona, ka sa rairai mate.

“Keirau a dabe vata toka kei Baraca A. L. Smith. Keirau vakotori Baraca Snow vakababa ena durui keirau, ia, na ilakolako ki matasawa, keirau qaravi koya ena vakadirorogo ka kerea vua na Turaga me vakavotaka na nona bula, me rawa ni lesu tale ki nona vale kei na matavuvale.

“Ni keitou yaco yani ki matasawa, keitou kauti koya ki na dua na sala lailai ki na so na saqa lelevu era davo tu ena baravi nukunuku. Keitou vakotori koya ena dua vei ira na saqa me matana sobu tu, ka vaqiqici koya ki muri ki liu me yacova ni sa rawa me biuta laivi mai na wai a tiloma tu. …

“Ni oti e dua na gauna neirau cakacaka tiko me vakabulai koya, sega ni dua na ivakatakilakila ni lesu tale mai na bula, era kaya na tucake tu ni sa sega ni rawa ni dua tale na ka me caka vua. Ia keirau sega ni vinakata me keirau sa yaco e kea, ka keirau se masu tiko ga ka qaravi koya tiko, vaka kina na veivakadeitaki ni Turaga ena rogoca ka sauma na neirau masumasu.

“Me kena itinitini keirau a vakauqeti vakaukauwa me keirau ceguva na gusuna ka sasagataka me uvuci ni nona yatevuso, veivuke ena kena uvuci ki loma ka biutani mai tuba na cagi, ka vakatotomuria, ena kena levu ga e rawa, ena icakacaka ga ni cegu. Keirau tomana na ka oqo me yacova ni keirau rawata na kena uvuci nona yatevuso. Dede vakalailai, keirau raica na ivakatakilakila malumalumu sara ena lesu tale mai ni bula. E dua na toso vakalailai ni mata, me yacova na gauna o ya, a tadola ka vaka na mate, kei na dua na rorogo malumalumu sara mai na itilotilo, era sa imatai ni ivakatakilakila ni vakalesuimai ni bula. Era toso cake tiko ga na veika oqo ena kedra ivalavala tudei, me yacova ni sa taucoko na vakasukai ni kilai yalona.”

Raici lesu na veika a sotavi oqo, a kila o Elder William Cluff na vuna a rawa kina vei rau o Elder Alma L. Smith kei koya me rau vakabulai Elder Snow. “Keirau sega wale ga ni cakava me vaka na kena ivakarau ni veika vakaoqo,” a kaya, “ia me vaka tale ga na ka a rairai vakasolokakanataka vei keirau na Yalotabu.”² [Raica na vakatutu 1 ena tabana e 87.]

iVakavuvuli nei Lorenzo Snow

Mai na isolisoli ni Yalo Tabu, eda sa liutaki ki na dina taucoko kei na vaqaqacotaki ni noda vakabauta.

E [tu] na veivakalougatataki dina ka semati wale ga vata kei na talairawarawa ki na kosipeli, oqori [sa ikoya] na isolisoli ni Yalo Tabu. … Na i Vakabula, ena nona sega ni vakatitiqataka na nona kila uasivi me baleta na ivakarau kei na itovo ni isolisoli oqo, a kaya ni na tuberi kemudou ena ka kece ga e dina ka na vakatakila vei kemudou na veika ena yaco mai muri [raica na Joni 16:13]. Na isolisoli ni Yalo Tabu e dodonu me levu cake sara mai na yalo o ya ka lako mai vua na Kalou, vakatawana na vakaitamera ni vanua ka vakararamataki ira vakayadua na tamata kece ga e vuravura [raica na V&V 84:46]; na isolisoli ni Yalo Tabu e dodonu me veituberi ki na dina taucoko, ka vakaraitaka vei ira na veika era na lako mai.

Me kena ikuri, na tukuni ni kena ivakatakilakila, na iApositolo o [Paula] e kaya: “Sa soli vei ira na tamata yadua na Yalo Tabu me yaga kina. Vua tale e dua na vakadinata.” [Raica na 1 Korinica 12:7, 9.] Sega ni dua na vakabauta, e ka wale tu ga, ka so na tamata era sa veidabuitaka ena gauna oqo; ia e dua na vakabauta ka rawa vei ira era taukena tu mera sa varomusuki rua, me ra sa biu ki na qara ni laione, loma ni lovo ni bukawaqa, ka vakararawataki ena kena ivakamacala yadudua. Sa ikoya oqo na mataqali vakabauta ka vakatikora na Yalo Tabu kivei ira era taukena tu, rawa kina vei ira era taukena tu me ra tudei ena maliwa ni dredre vakayadua, bolea na veisaqasaqa yadua ka solia nona bula, kevaka e ganita, ka vakavuna kina vua me tokona. E dua tiko na kaukauwa cecere veivakauqeti ena vakabauta oqo, a solia na Turaga mai vua na Yalo Tabu, ka sega ni dua tale na ivakavuvuli e rawa me vakadewataka. Kivua e dua a soli vua na vakabauta, kivua tale e dua na vosa ni kila ka [raica na 1 Koronica 12:8], sega ni rawati mai na wili ivola wale ga, ia na kila ka mai vua na Kalou Cecere. A tu vei ira e dua na ivakavuvuli ni veivakauqeti-vakaikoya, ka sa malumu, solia vei ira e dua na kila ka vakavuna me ra tokona kina. Era kila ena ivakatakila mai vua na Kalou ka vakavuna na nodra talairawarawa kina ka dina, a vakatakilai kivei ira ena kena ivakarau e sega ni rawa me ra saqata, ka ra sa kila vakataki ira. Era sa qai vakataudeitaki … ena dela ni yavu ni ivakatakila.³

Ena nona vunau tiko o Pita kivei ira na tamata a kaya, “Dou veivutuni, ka papitaisotaki, ko ikemudou yadua, ena yaca i Jisu Karisito, me bokoci kina na nomudou ivalavala ca, ka dou na rawata na Yalo Tabu me isolisoli. Ni sa caka vei kemudou na vosa ni yalayala, vei ira tale ga na nomudou gone, kei ira vakayadua ga era sa vakayawa, io, vei ira vakayadua ga ena kacivi ira vua na Turaga na noda Kalou.” [Cakacaka 2:38–39.] Na isolisoli ni Yalo Tabu oqo e duidui na kena ivakavuvuli mai na cava ga eda raica ka vakaraitaki ena veimatalotu e vuravura. Sa ikoya e dua na ivakavuvuli ni vuku, kei na ivakatakila. Sa ikoya e dua na ivakavuvuli ni vakatakila na veika sa oti, ena gauna oqo kei na gauna sa bera mai, kei ira na isolisoli ni Yalo Tabu oqo era a ciqomi mai na talairawarawa ki na veika e gadrevi ena kosipeli me vaka a vunautaki ena gauna e liu ka vunautaki mai vei ira na iTalatala Qase ni Lotu i Jisu Karisito ni Yalododonu Edaidai ena gauna oqo. E dodonu me tauyavutaki na nodra vakabauta ena dela ni vatu oqo; mai na ivurevure oqo e dodonu me ra ciqoma na kila ka ni ivakavuvuli era a tokona, ka tukuna na i Vakabula vei keda “ia ena sega ni rawata na matamata ni koro ko etesi.” [Raica na 3 Nifai 11:39.] …

… Na yavu a tara kina na Lotu i Jisu Karisito ni Yalododonu Edaidai sa ikoya na vatu ni ivakatakila—a kaya o Jisu ni na tara o Koya na Nona lotu ena dela ni vatu, ia ena sega ni rawata na matamata ni koro ni etesi [raica na Maciu 16:17–18]. Eda sega ni ciqoma na kila ka oqo mai na lewe kei na dra, eda sega ni ciqoma na ivakadinadina oqo mai vua na tamata, eda sega ni ciqoma mai na wiliki ni i Vola Tabu … se Ai Vola i Momani, ia eda a ciqoma mai na veivakauqeti ni Yalo Tabu, ni vakavulica na veika va-Kalou, na veika sa oti, ena gauna oqo kei na gauna sa bera mai, ka na vakavulica na veika va-Kalou, ka vakamatatataka na kena ivakaraitaki kivei keda. E sega ni rawa mo kauta tani mai vei keimami na kila ka oqo mai na biu ki na valeniveivesu se dua na mataqali veivakacacani. Keimami na tudei tu kina me yacova na mate.⁴ [Raica na vakatutu 2 ena tabana e 87.]

Na Yalododonu Edaidai vakayadua e rawa me nona itokani na Yalo Tabu ka soli ivakasala vua.

E tiko e dua na sala e rawa kina vei ira na tamata me ra vakasavasavataka nodra vakasama ena iserau ni Kalou kei na tamata, ka sa ikoya na kena maroroi e lomadra na Yalotabu ni Kalou, sa ikoya na yalo ni ivakatakila kivei ira vakayadua na turaga kei na marama. Na Yalo Tabu ena vakatakila kivei ira na tamata, ena veika rawarawa duadua mada ga, na cava era na cakava, mai na kena vakatututaki kivei ira. E dodonu me da tovolea me da vulica na ivakarau ni Yalotabu oqo, ka rawa me da kila na kena vakatutu, ena qai rawa me da na caka dodonu e veigauna. Sa ikoya oqo na dodonu cecere vakayadudua ni Yalododonu Edaidai. Eda kila ni sa noda dodonu me vakaraitaki vei keda na Yalotabu ena veisiga yadua ni noda bula.

Era lako mai vei au na tamata ena nodra nuiqawaqawa vakalevu me ra ciqoma na ivakasala ena so na veimataqali iulutaga. E sega ni yaga me ra lako mai vei au vakawasoma (ena so na gauna, e dina, e na yaga sara vakalevu), ni Yalotabu e tiko vei ira me ra kauta mai na vinaka kei na kena vakayacori na inaki ni Kalou. … E sega ni yaga vei ira me ra lako vakawasoma kivua na Peresitedi ni Lotu, se kivei ira na Le Tinikarua, se kivei ira na iTalatala Qase ni Isireli, me ra laki vakasalataki; o ira vakataki ira e rawa me ra rawata na ka era gadreva; e tiko e dua na itokani ka kila vakavinaka sara tu ga na veika me kaya vei ira. Mai na gauna eda ciqoma kina na Kosipeli, lako sobu ki na wai ni veipapitaisotaki kei na veitabaki ni liga ni oti o ya me baleta na isolisoli ni Yalo Tabu, sa na dua na noda itokani, oya kevaka eda sega ni vakasavi koya tani ena noda caka cala. Na itokani o ya sa ikoya na Yalo ni Turaga, na Yalo Tabu, ka vakaivotavota ena veika va-Kalou ka na vakaraitaki ira vei keda. Oqo e dua na ka vakaibalebale cecere ka vakarautaka na Turaga me baleti keda, me rawa ni da kila na rarama, ka sega ni da tomana tiko ga noda veiqasiyaki ena butobuto.⁵ [Raica na vakatutu 5 ena tabana e 87.]

Na Yalo Tabu e rawa me kauta mai vei keda na marau kei na vakacegu ni vakasama.

A tauyavutaka na Turaga na dina ni gagadre vakatamata kei na kena vakilai e lomasereda, ka sa vaka kina vei ira na tamata taucoko, vata kei na matatuvale vakatamata taucoko. Era tu na gagadre dina kei na levu ni mamarau ka vakatikori veicurumaki tu ena nodra bula, na gagadre me baleta na veika dina ena nodra ivakarau ni bula ka nakiti me toroi keda cake kina na noda vakacegu kei na tu vinaka, ka na sotava na veika era dau vakila ka tosoya cake nodra mamarau, ia na kena rawati vakacava na vakavinavinakataki ni kena levu kei na kena gagadre [e sega] ni kilai se matata e vuravura, ia na Turaga e sa raica ni veirauti me biuti keda ena itutu kei na gaunisala me matata vei keda na veika oqori ena noda yalodina ka lako ena rarama ni Yalo ni Turaga ka ciqoma na dina.⁶

Sa dodonu vei ira na Yalododonu Edaidai me ra bulataka na Kosipeli ena kena sala me ra na vakila kina nodra vakadonui mai vua na Kalou. E dina, eso na gauna eda cakava eso na ka eda maduataka ni da vakasamataka, ia me da veivutunitaka e lomada na veika eda maduataka ka vakadeitaka me da kakua tale ni qai cakava tale. Sa ikoya ga oqori e kerea vei keda na Turaga; vakina o ira na turaga kei na marama era bula tiko, meda kakua ni bula ena bula dau vakacacani tu ga. Era tu na bula savasava kei na reki ena Yalo Tabu.⁷

Kevaka eda maroroya e lomada na rarama ni Yalotabu, e rawa me da lako ena kosipeli ni rawa me da vakarautaka na marautaki ni vakacegu kei na marau ena vuravura oqo; kei na toso tiko ki liu ni noda ilakolako, segata na vakacegu kei na marau ka koto ena noda gaunisala, ena kena balavu, eda na rawata na vakacegu ni vakasama ka sega tale ni rawa vua e dua me rekitaka ia o ira ga era sa vakasinaiti tu ena Yalo Tabu.⁸ [Raica na vakatutu 3 ena tabana e 87.]

Eda gadreva na veivuke ni Yalo Tabu ena noda vosota na veivakatovolei, vakayacora na noda itavi, ka vakavakarau kina lagilagi vakasilesitieli.

E vuqa na veika bibi era gadrevi mai vei keda, ka vuqa na ka e rawa me da cakava, ena noda vukei mai vua na Yalo ni Turaga, ka so na gauna e rawa me dredre sara na kena rawati.⁹

Au gadreva meu taleva lesu vei kemuni na taciqu kei na ganequ … ni da vakararavi me baleta na noda itukutuku kei na vuku vua na Yalo ni Kalou, ka rawa me tu vei keda, kevaka eda samaka vakavinaka, e dua na yalo ni veivakauqeti, i vakatakila, na caka ni ivakaraitaki matata ki na noda kila na vakasama kei na lewa ni Kalou,vakavulica na noda cakacaka kei na itavi, kei na veika e gadrevi mai vei keda. … Eda gadreva na veivuke. E na rawa ni da dau cakava na veika ka na liutaki keda ki na leqa kei na butobuto, ka ra na sega ni tokona na noda vinaka, ia ena veivuke ni dau veivakacegui o ya ka sa yalataka na Turaga vei ira na nona Yalododonu, kevaka eda qarauna noda vakarorogo ki na kena vakasolokakana, kei na kila na ivakarau ni nona dau vosa, ena rawa me da levea e vuqa na leqa kei na veidredre lelevu.¹⁰

Eda vakararavi vakatabakidua ki na yalo ni veivakauqeti, ia kevaka me a dua na kena gauna, me tekivu mai na gauna a vakatawana kina o Atama na Were kei Iteni, ka gadrevi vakalevu sara kina na Yalo ni Kalou mai na gauna oqo, au sega mada ni kila. Na ivakatakilakila ni gauna, kei na basika vakatotolo ni veika e yaco ka ra na vakatovolei kina na yalodra kei na nodra dina na Yalododonu Edaidai, era gadrevi vakalevu kina ena gauna oqo me da vakasaqara vagumatua na Yalo ni Kalou, kei na veivuke va-Kalou, ni ra na gadrevi vakaidina sara ena veika sa basika vakatotolo tiko mai ena gauna oqo. Eda kila ni da a sa gadrevi ira mada ena gauna sa oti. E rawa me da raica vakarawarawa ni kevaka me da a sega ni taukena tu na Yalo ni Kalou me dusimaki keda ki na vuqa na ka e yaco eda sa lako sivita yani, eda na sega ni rekitaka na noda vakanuinui ni gauna oqo ena bula vakalou kei na lagilagi, kei na noda ituvaki e rawa me na lailai sara na kena taleitaki. Kevaka me da a gadreva na Yalo Tabu ena gauna sa oti, e rawa me da kila vakaidina ni na gadrevi ena gauna sa bera mai.¹¹

E dodonu me da kila—kau nanuma ni vaka kina vei keda vakararaba—ni cakacaka me da mai vakayacora ena bula oqo e sega ni rawa me caka ki na lagilagi ni Kalou se me baleta na noda vakacegu ga vakaikeda ena noda dui vuku vakatamata. Eda vakararavi vua na Yalo ni Turaga me vukei keda ka vakatakila vei keda ena veigauna se cava e yaga vei keda me da rawata me baleta na ituvaki dua tani e rawa me vakavolivoliti keda tu.¹²

E sa na bau lialia vakaidina sara ga nodra namaki na Yalododonu Edaidai ena gauna oqo me ra vakamuria na lawa vakasilesitieli, vata kei na lawa a lako mai vua na Kalou,vata kei na nona inaki me vakacerecerei ira na tamata ena nona iserau, vakavo me ra tokoni mai na dua na kaukauwa [vakalomalagi] vakalou. Na kosipeli e yalataka oqo. E yalataka na isolisoli ni Yalo Tabu, ni sa vakalou na kena ivakarau, ka sa sega ni marautaki mai vei ira eso tale na mataqali tamata, ka sa kaya vei keda na i Vakabula, e dodonu me tuberi kemudou ena ka kece ga e dina, ka uqeti ira era taukena tu, ka solia vei ira e dua na kila ka nei Jisu, e dua na kila ka nei Tamada, kei na veika me baleta na vuravura vakasilesitieli ni dodonu me uqeti ira era taukena tu vata kei na dua na kila ka ni veika era na lako mai, kei na veika era sa sivi yani; ka uqeti ira ni dodonu me ra rekitaka ena kena levu na isolisoli vakalou—na isolisoli ni duivosavosa kei na parofisai, na veitabaki ni liga kivei ira na tauvimate, e dodonu me ra vakabulai kina.

O ira era ciqoma na kosipeli oqo a yalataki vei ira na kaukauwa vakalou oqo kei na isolisoli, kei na kila ka me baleti ira, me ra kakua ni vakararavi vua e dua na tamata cava ga se ituvaki cava ga ni tamata, me baleta na dina ni vakabauta vakalotu era a ciqoma; ia e dodonu me ra ciqoma na kila ka mai vua na Tamada ni lako mai vua na vakabauta vakalotu o ya, ni kosipeli a lako mai vua, kei na nona dauveiqaravi e tu vua na dodonu kei na kaukauwa me qarava na cakacaka vakalotu oqori, me kakua ni dua na cagi ni ivakavuvuli e dodonu me kureitaki ira se kauti ira laivi mai na gaunisala era lakova tiko; me rawa ni ra vakavakarau me baleta na lagilagi e dodonu me vakatakilai, ka ra yaco me ra vakaitavi ena lagilagi; me rawa ni ra vosota eso na veivakatovolei se veivakalolomataki ni sa dodonu me lewa ni Kalou me kau mai vei ira, me taucoko na nodra vakarautaki ira vakalevu cake sara me baleta na lagilagi vakasilesitieli e sega ni dodonu me ra lako ena butobuto, ia ena rarama kei na kaukauwa ni Kalou, ka laveti cake sara mai na veika vakavuravura, ka uasivi cake sara ki na veika e vakavolivoliti ira, me rawa ni ra lako sega ni vakararavi ena ruku ni vuravura vakasilesitieli kei na mata ni Kalou kei na lomalagi, me vaka na tamata galala, biuta tani na inaki o ya ni dodonu me vakatakilai tani mai vei ira mai vua na Yalo Tabu, na inaki o ya me rawa ni laveti ira cake ki na kila ka kei na kaukauwa, ka ra vakavakarautaki ira me ra ciqoma na lagilagi ni Kalou a vakatura me solia kivei ira, ka me ra vakatawana na itutu vakalou a nakita na Kalou me susugi ira.¹³

E dodonu me da bula me da na rawa ni kila na inaki ni noda bula ka vinakata na Kalou. E dodonu me da kila na domo kei na vakasolokakana ni Yalo Tabu. Ena siga e sega ni vakabuwawataki kina na macawa mai na o, eda kunea na veika e vakavolivolita, ena kedra totoka kei na kedra inaki. Ia eda vakararavi tiko li ena Yalo ni Kalou me baleta na rarama ena ivakavuvuli ni dina kei na veivakabulai. E sega ni dua na vakabauta ni Yalododonu Edaidai e rawa me rekitaka e dua na iyalayala cecere ni marau vakavo ga me bulataka, e sa na qai tu o koya ena veidusimaki vakalou.¹⁴ [Raica na vakatutu 4 ena tabana e 87.]

Ni da bula ena yalomalua, e vukei keda na Yalo Tabu ena noda ilakolako ki liu.

Vakatulewataka ena nomu vakasama mo bula ena yalomalua kei na dua na kena sala me na tiko vei iko ka veitokani vata kei na Yalo ni Turaga ena veigauna kece, me vakatututaka vei iko e veigauna me vaka e ganita ena ituvaki dua tani e rawa mo tu kina. …

… Cava beka na dede ni noqu bula, au sega ni kila, kau sega ni lomaleqataka. Au gadreva, ka dodonu tale ga mo gadreva, ena so na gauna me da yaloraramusumusu, ka yalomalumalumu, vakakina na bula rawarawa tu ga me da rawa ni rekitaka kina na yalo ni ivakatakilai. Sa nomuni na dodonu, kemuni vakayadua, me tiko vakarauta vei kemuni na yalo ni ivakatakila me vakamatatataki kina na ka e dodonu mo ni cakava. Sa nomuni na dodonu mo ni taukena me vaka tale ga ni noqu na dodonu meu kila na cava meu cakava ni mataka, ni sa yaco mai na mataka, baleta na kena yaga uasivi duadua ena Lotu vakararaba.¹⁵

E dodonu me da tovolea, na kena levu duadua e rawa, me da guilecava na veika vakavuravura e veivakararawataki ka vakaleqai keda, ka vakanamata noda vakasama kivua na Turaga, me vaka na levu ni Nona Yalo Tabu sa tu vei keda ka rawa me da ciqoma na kila ka kei na vakatutu me na vukei keda ena noda itosotoso ki liu.¹⁶ [Raica na vakatutu 5 e ra.]

Vakatutu ni Vuli kei na Veivakavulici

Taurivaka na vakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Ena nomu raicalesu na itukutuku ena tabana e 77–79, vakasamataka na veigauna o sa vakalougatataki kina baleta ni dua tale na tamata e vakamuria na veivakauqeti ni Yalo Tabu. Vakasamataka tale ga baleta na veigauna nomu vakamuria na veivakauqeti mo vukea kina e dua tale na tamata.
Wilika na wasewase e tekivu ena tabana e 79. Na cava o nanuma ni kena ibalebale na “vakataudeitaki … ena dela ni yavu ni ivakatakila”? (Ena so na ivakaraitaki, raica na tabana e 79–82.) E rawa vakacava me vakaukauwataki keda na noda ivakatakila yadua me da “tucake tu ena maliwa ni veidredre vakayadua” ka “bolea na veisaqasaqa vakayadua”?
Kaya o Peresitedi Snow ni rawa me vukei keda na Yalo Tabu ena “marautaki ni vakacegu kei na marau ena vuravura oqo” (tabana e 84). Gauna cava e sa bau vukei iko kina na Yalo Tabu mo marau ka vakila na vakacegu? Na veisala cava soti tale e rawa me vukei keda kina na Yalo Tabu? (Ena so na ivakaraitaki, raica na veitabana e 84–87.)
Ena nomu vulica na itekitekivu ni wasewase ena tabana e 84,vakasamataka nomu vulica mo kila vakacava na veivakauqeti ni Yalo Tabu. E rawa vakacava mo vukea e dua na lewe ni matavuvale se itokani me vulica ka kila na veivakauqeti ni Yalotabu?
E okati ena wase oqo e rua na kena vakaibalebale ki na Yalo Tabu me vaka e dua na itokani (tabana e 83) kei na 86). Na cava na vu ni nomu nanuma ni da gadreva na yaloraramusumusu kei na rawarawa ni bula meda ciqoma kina na Yalo Tabu me noda itokani?

iVolanikalou Veisemati: Luke 12:12; Joni 14:26–27; Roma 14:17; 1 Koronica 12:4–11; Kalatia 5:22–25; 1 Nifai 10:17–19; 2 Nifai 32:5

Veivuke ena Veivakavulici: “Me vakaukauwataka na veivosaki, vakayagataka na veitaro ena wase yadua. … E rawa tale ga mo vakarabailevutaka nomu taro vakataki iko vakabibi vei ira o vakavulica tiko” (mai na tabana e vi ena ivola oqo).

Cakacaka taumada ni kaulotu ena Yatuyanuyanu e Awai.

Ena nona kaulotu o Elder Lorenzo Snow ena Yatuyanuyanu e Awai, a taqomaki nona bula mai na nodra veiqaravi veivakauqeti na nona itokani.

Sa noda dodonu me noda na veivakamataliataki ni Yalotabu ena veisiga kece ni noda bula.”