Wase 19

Cakacaka ni Kaulotu: Me Yacova Yani na Yalo Yadua ni Tamata”

“Sa tiko e dua na sala me curumi kina na yalo yadua, ka sa nomu cakacaka mo kunea na sala ki na yalodra o ira ko sa kacivi kina.”

Mai na Bula nei Lorenzo Snow

A papitaiso o Lorenzo Snow mai Kirtland e Ohio, ka a vulica kina na ivalavala vaka Iperiu ena dua na kalasi vata kei Parofita Josefa Simici kei ira na iliuliu tale eso ni Lotu. A nuitaka tiko o koya me dua na siga me laki taura “e dua na vuli torocake” ena dua na koliji ena tokalau kei Amerika.¹ Ia ni sa cakacakataka yani na ilalawa oqo, sa tekivu me laki mua ki na dua tale na inaki. A tukuna kina o koya:

“Au a ciqoma [na dina ni kosipeli] ena yalo savasava, kau sa vakadeitaka meu kakua ni cava toka e kea. … Au sa tekivu meu lomaleqa vakalailai, ni kevaka meu sa na ciqoma na kila totoka oqo, sa dodonu kina vei au meu tiko ga kina ka kakua ni vakadinadinataka na kena itukutuku. O ira na cauravou era a vakau yani ki na vanua ni kaulotu era sa lesu mai ka vakadinadinataka na veivakalougatataki era sa sotava … , kau sa tekivu vakasamataka ni, noqu a sega ni vakarautaki au meu gole ki na dua na koliji ki na tokalau se univesiti, sa dodonu sara meu sa tekivu ka cavuta na noqu ivakadinadina me baleta na veika e taucoko sa solia mai vei au na Turaga meu kila. Ena gauna vata oqo au a sega ni via vakayalia na veika vinaka ni vuli, baleta niu sa vakasamataka sara tiko mai vakabalavu, ka sa tu vei au na madigi kei na sala meu rawata kina.

A vakasamataka sara tiko vakabibi, ka a kere ivakasala kina mai vua e dua na nona itokani: “Au a kaya vua na ka au vinakata, ka kaya mai, ‘Baraca Snow, au na sega ni vakasalataka vakaoqo e dua tale me vaka na kena au via solia vei kemuni, ena ituvaki vakaoqo. Kevaka me a o au o iko, au na vakayacora ga na ka sa nakita na lomaqu ka vuli.’ Oqori sara ga na veika au a gadreva tu me kaya mai, kau yalomarau kina. Au a yalovakacegu ga vakalailai, ia ena draki liliwa, niu rogoci ira na iTalatala qase ena nodra vakadinadinataka na gugumatua ni nodra vunautaka na Kosipeli, au sa tekivu meu vakasamataka sara vakalevu. Sa soli vei au na Turaga meu kila ni sa na lako tiko mai ki vuravura o Koya, ka sa dodonu kina me vakayacori e dua na vakavakarau: Sa solia vei au o Koya na veika kece sara au a kerea vua, ka vakalevu cake; ki na papitaiso kau a ciqoma kina na Yalo Tabu kei na kila sa uasivi sara mai na kena a soli vei au ni sa ka dina sara ka veivakauqeti cake mai na noqu a tabadromuci ena wai batabata; kau vakila kina ni sa vakataqari tu vei au e dua na itavi. Au sa qai sogota na noqu ivola [ka] biuta vakatikitiki na noqu vuli Latini kei na Kiriki.”²

Ni oti na nona vakatulewa oqo, a laki kaulotu sara o Lorenzo Snow ena dua na yasana mai Ohio ena 1837. E muri a laki kaulotu ki na so tale—na yasana vakatekivu mai Missouri, Illinois, Kentucky, kei Ohio, ka tarava sara yani i Igiladi, iTali, na Yatu Awai, na Ra ni Vualiku kei Amerika, kei na yasana o Wyoming. Ni sa tiko mai Igiladi, a volavola sara vei nona nei, ka vakamacalataka ni sa gadreva me sa biuta na nona vanua ka me laki kaulotu: “Au mai vakasamataka voli niu sa tu ena maliwa ni va ki na lima na udolu na maile mai na vanua au a tubu cake kina kei na vakatekivu ni noqu, veilasamaki, au sa taroga kina, Na cava na vuna au mai tu kina eke? … Au mai tu eke baleta ni sa vosa mai na Kalou, ka vakatubura e dua na Parofita, ka sa vakalesua kina vua o Koya na taucoko ni Kosipeli tawayalani, vata kei na kena isolisoli, kaukauwa, cakacakatabu vakalotu, kei na veivakalougatataki; kei na ivakaro raraba vei ira na tamata kecega, ‘Dou veivutuni ni sa voleka na matanitu vakalomalagi.’ Ena veivakarautaki ni Kalou, au a kacivi meu sa dua na italai, meu kaburaka na itukutuku oqo ki na veimatanitu e vuravura, kau raica ni solia vei au e dua na itavi cecere kau na sega ni cakava rawa ke sega kina na veivuke ni Kalou sa Cecere Sara.”³

E dau vakavinavinakataka o Peresitedi Snow na vakatulewa a vakayacora me qarava na Turaga ena kaulotu. Ena Sepiteba ni 1901, ni sa yabaki 87 kina, a kaya: “Au reki ena gauna talega oqo ni’u vakasamataka lesu na gauna ni noqu cakacaka ni kaulotu. Na yalo e vure mai na veika duatani au a sotava sa mai tiki ka ovica tu na noqu bula dina oqo.⁴ [Raica na vakatutu 1 ena tabana e 257.

iVakavuvuli nei Lorenzo Snow

Ni da sa ciqoma na taucoko ni kosipeli, eda sa gadreva kina meda vukei ira eso tale mera rekitaka na veivakalougatataki vata ga.

Ena gauna sa vakavukui kina e dua na tamata, sa na vakauqeti me wasea vei ira eso tale; ni gauna sa yaco kina e dua na tamata me bula marau, na yalo sa kovuti koya tu ena vakavulici koya me sasagataka me vakamarautaki ira eso tale. … Ena rawa beka vua e dua na tamata me bula marau ke sega tu ni kila na kosipeli i Karisito? … E dina ga era saga o ira na [tamata] e vuravura mera bula marau, era se sega ni gumatua rawa ki na veika era saga tiko mera vakayacora. Era na sega ni marau rawa, vakavo ga ena dua na ivakavuvuli, o ya ena nodra na ciqoma na taucoko ni kosipeli, ka vakavulica meda kakua ni waraka meda yaco sara ki na veigauna tawamudu meda qai laki bula marau kina, ia e vakavulica vei keda meda sasagataka eke meda vakayaco marau vei keda kei ira tale eso ena veivakalougatataki ni Kalou sa Cecere Sara.

O koya gona, me sa qai noda inaki ka ilalawa: meda vulica meda tamata yaga; meda veivakabulai yani vei ira na wekada; meda vulica na vueti ira; meda tukuna vei ira mera kila na ivakavuvuli sa yaga sara mera laveti cake ki na ivakatagedegede vata ga ni kila-ka sa tu vei keda.⁵

Mo ni gole yani ka laki veitokani kei ira na tamata yadua era sa vakavoliti iko; se digitaka e dua ka saga mo vakauqeta na yalona, nona vakabauta, na veika e sotava tiko kei na nona vakasama ka saga mo vakararamataki ira kevaka era tamata ivalavala ca, ka saga mo vakabulai ira mai na nodra ivalavala ca, ka kauti ira tani mai na nodra vanua ni vakabobulataki me ra mai vakaitavi ena rarama kei na bula galala o sa vakaitavi tiko kina, ni sala oqo ko na rawa ni caka vinaka kina mai na itukutuku sa solia vei iko na Turaga.⁶ [Raica na vakatutu 2 ena tabana e 257.]

Era dau gadreva na daukaulotu mera solibula mera vukei ira kina eso tale mera kila na dina.

E sega ni dede na nodra se qai mai vakaitikotiko walega na Yalododonu ena buca oqo [mai Utah] era sa maqusa tale na italai ni Turaga ki na cakacaka ni kaulotu sa vakacolati tu ki na Lotu.

Na gauna keimami a sotava tu na bula dravudravua kei na sasaga dredre a vakayacori ga me vuavuaivinaka na qele, ia keimami sega ni rawa ni vakanadakuya na itavi sa neimami o ya me vakatetei na Kosipeli ki na veivanua kecega; ni sa solia mai na Turaga na ivakaro ni sa dodonu me vunautaki yani ki vuravura taucoko. Oqo sa dua na ivakadinadina ni sa ka vakalou na cakacaka oqo ni gauna era sotava kina na cemuri ki na veivanua kei na nodra vakacacani era sa vakasaqara ga ena yalodina na Yalododonu Edaidai mera vakayacora na ivakaro oqo ni Turaga.

Ena koniferedi raraba ni Lotu a vakayacori ena Okotova, 1849—ni oti toka ga e rua na yabaki na nodra a tadu yani na painia ena buca [o Salt Lake]—era a kacivi e dua na ilawalawa iTalatala Qase mera laki tauyavutaka eso na tabana ni kaulotu ena veiyasai vuravura. E ratou a lesi e va vei ira na iApositolo Le Tinikarua mera liutaka. A kacivi o Erastus Snow me gole ki Scandinavia, o iApositolo John Taylor me gole ki Varanise, o au ki iTali, kei Apositolo Franklin D. Richards ki Igiladi, sa tauyavutaki rawa tu kina na tabana ni kaulotu. Ena loma ni veika dredre keimami a sotava tiko ena vanua keimami sa laki tiko kina, ka ra sa dravudravua mai na neimami matavuvale, sa icolacola dredre sara na neimami itavi oqo; ia sa kacivi keimami na Turaga, ka keimami sa na vakaio kina, se cava ga na solibula ena yaco kina.⁷

Kemami sa solia na neimami bula ka sa vaka me keimami sega tu ni kauwaitaka, me rawa ga ni kila vakavinaka o vuravura ni sa bula tiko e dua na Kalou ena vuravura tawamudu; me rawa ni ra kila vakavinaka ni sa na vakayacora tiko na Kalou ena gauna oqo e dua na ka me baleta tiko na nodra bula na luve ni tamata. Sa levu cake tikoga na vakasama kei na nanuma e vuravura ni sega ni cala na vakawati tawadodonu. Ena kedra maliwa mada ga na veitiki ni matavuvale ni kawatamata Vakarisito, e udolu ka vakatini na udolu, e dina ga ni ra sega ni vakatusa baleta ni sega ni kilai levu, era sega ni vakabauta ni Kalou sa sema bula tiko vei ira na levu ni tamata. E dodonu meda tu yani ka solibula me rawa kina ni yaco na vakabauta kei na kila-ka vei ira na luve ni tamata.⁸

Ena gauna eda kacivi ira kina na noda daukaulotu itabagone mera gole yani ki na veimatanitu e vuravura, era na vakasamataka vakatitobu na itavi oqo, ka da rogoca na veika era sotava o ira era kaulotu yani ki vuravura, ni oqo e sega ni dua na ka e taleitaki cake vua e dua na tamata me vinakata me curuma yani na veivakatovolei kei na veika dredre era na rawa ni raica mera bula curuma. Ia na bula dodonu ena kune ga ni sa lomadra mera tekivutaka, ka vakamuria na veika e lavaki kina.⁹

Oqo na veika e baleta na kaulotu ka na sega toka ni vinaka vei ira na noda iTalatala Qase. Era raica kina ni sa dodonu mena yali mai vei ira marautaki ni itikotiko, ka ra kila vakavinaka ni ra na veilakoyaki ena kedra maliwa na tamata era na sega ni marautaka na veika era na tukuna vei ira; ia, ena dua tale na yasana, era vakila ni sa tu vei ira na sorenikau ni bula, ni kevaka era na kunea rawa e dua na tagane se yalewa dina, ena cakacaka na Yalotabu ki yalodra ka na rawa beka mena ciqoma na itukutuku lagilagi era na solia tiko. Oqo ena solia vei ira na marau kei na vakacegu. E dua tale na ka, era na raica ena veika era sotava oqo na gauna donu mera maroroya kina na ka yaga cecere vei ira ki na nodra itavi ena veisiga ni mataka. E ka veivakurabuitaki toka ni udolu na ivola au a ciqoma mai vei ira era sa kacivi mera laki kaulotu—vakalevu ga o ira na cauravou—au vakabauta ni dua beka ga a sega ni vakadonui mai. Baleta na cava oqo? Sa baleta ga na yalo ni loloma kei na bula tale mai na mate, na Yalo ni Kalou sa Cecere Sara, sa tu vei ira na cauravou iTalatala Qase oqo, ka ra sa ciqoma na ivakatakilakila bula sa vakauqeti ira mera cakava na ka e vakainaki vei ira era sa vakauqeti kina mera cakava.¹⁰ [Raica na vakatutu 3 ena taba e 257.]

Mera kakua ni guilecava na daukaulotu ni ra sa italai kei lomalagi, ni sa tu vei ira na veika vinaka ka marautaki.

Eda talai ira na noda iTalatala Qase mera laki vunautaka na Kosipeli. O cei e talai ira tiko? … Sa talai ira na Kalou ni Isireli. Oqo na Nona cakacaka. E sega ni dua tale na tamata ena vuravura oqo me na taleitaka vakalevu cake na nona laki rawa-ka e dua na iTalatala Qase ena nona vunautaka tiko na Kosipeli me vakataka na Turaga a talai koya yani me vunau vei ira na tamata ni ra sa luvena na Turaga. Era sa luvena dina mai na dua tale na vuravura, ka ra lako mai eke baleta ni vinakata na Turaga mera lako mai.¹¹

Keimami kila ni o kemuni na [daukaulotu] o ni na rawa-ka vakalevu sara, baleta ni keimami vakila ka kila ni ko ni sa kacivi mai vua na Kalou. Na vuku ni tamata ena sega vakadua me na vakasamataka rawa na cakacaka vakaoqo. Au kurabui niu mai vakasamataka na kena cecere. Au sa rawa ni kaya ni oqo sara ga na cakacaka sa yaga dina ena gauna oqo: kau vakila ni sa rawa mo curuma yani ena yalomu taucoko. Mo vakatorocaketaki ena Yalo i Jisu ena nona kaya ni sega ni rawa me cakava e dua na ka vaka vo ga ni sa solia mai na Tamana vua me vakayacora [raica na Joni 5:30].

Kakua ni leqataka na dredre kei na veika o na dravudravua kina; kakua ni lomaleqataka na veika e baleti iko, ni na levu ka lagilagi sara na nomu rawa-ka, ka na vakila na Lotu na yaga ni nomu cakacaka.

Kakua ni leqataka na duidui ena tiko ena kedra maliwa o na cakacaka yani kina, kei na rarawa ko na sotava kaya; ena tiko vata kei iko na Yalo ni Turaga, ko na vakauqeta na yalodra o ira ko na veiqaravi tiko kina, ka mo valuta na nodra duidui oqo; … ko na kune vakacegu ni ko sa vakayacora rawa na cakacaka ko a talai mai kina mo cakava. …

Sa tu vei iko na lewa taucoko a vakatikori vei iko, ia e sega mada ga ni dodonu mo tukuna na ka oqo. Ko na raica ni sega ni gadrevi mo tukuna na ka oqo; ena vakadeitaka na ka oqo na Yalo ni Turaga, ka ra na vakila na tamata ni sa tiko vei iko, ni vakadeitaki kei na kila oqo sa nomu lewa.

Ko na raica ni so era na nanuma ni ra kila vakalevu cake mai vei iko, ia kevaka mo na cakava ga na nomu itavi me vaka sa vakatututaki, ni bera ni ko biuti ira, era na vakila ni sa tu vakalevu cake vei iko mai na kena e tiko vei ira, ko sa vakalougatataki ira kina ka vukei ira kina. …

Tovolea mo veiriti kaya kei ira ko sa talai kina. Ni ko yalomalua ka sa tiko vei iko na Yalo ni Turaga, ena vakatakila ni sa ganiti iko dina na nomu itutu ko sa kacivi kina mo vakatawana. Tovolea mo kila vakavinaka na ivakarau ni tamata ka cakacaka kina, me rawa kina mo vakamarautaka na tamata yadua ka veiriti kaya ki na ka kecega. …

E tiko e dua na sala me tarai kina na yalo yadua ni tamata, ka sa nomu cakacaka mo kunea na sala me tarai kina na yalodra na tamata ko sa kacivi kina. …

Au vakila e lomaqu meu kaya, me vakalougatataki kemuni na Kalou. Ko ni na tabaki ni bera ni ko gole yani, ka keimami na masulaki kemuni ka keimami na kauwaitaki kemuni vakalevu sara. Mo ni sa yalomalua ka yalomalumalumu tiko. Ni ko raica yani e dua e vakarorogo tiko, ena rawa ni ko vakauqeti ena rua na inaki; imatai, ko na rawa ni vosa vakavinaka ka ivakaraitaki vinaka kina vei koya e vakarorogo ni ko vosa vua; ikarua, na taro ena voqa mai, na cava au mai cakava eke? Me bucini na sorenikau ni bula ena yalodra o ira era vakarorogo tiko; sa dodonu mo masulaka e lomamu, “Kemuni Turaga, me sa yaco vakakina; meu sa vakaukauwataki ena Yalotabu meu tara kina na yalodra na nomuni tamata oqo?” Na masu lekaleka o ya sa gadrevi walega vua e dua na italatala qase me vakayacora. Oqori ga na ka mo vakayacora. “Meu na kaya mada eso na ka me ra vakabulai kina na yalo o ya?” Oqo na veika e ratou gadreva na Mataveiliutaki Taumada … kei ira taucoko na nomuni veitacini mo ni cakava.¹²

Vagolea na nomu vakasama ki na kena vakararamataki na nomu yaragi vakayalo. Au raica ni gauna era vagalalataki kina na noqu veika yago, sa vakanamata ga na mataqu ki na veika vakayalo. Ni masu kemuni na veitacini, ka nanuma tiko ni sa ka yaga na lolo. … Kakua ni veiwali vakasivia, [ka] qarauna mo kakua ni vakatala laivi na Yalotabu. Au raica niu se kaulotu kina, ni oti ga e dua se rua na macawa au sa guilecava na noqu itikotiko, ka sa tokoni au cake na Yalo ni Kalou. Na Yalotabu e veivagalalataki ka veivakamarautaki, ia mo kakua ni marau vakasivia … Mo dau masu vagumatua me rawa ni tiko vata kei iko na Yalo ni Kalou tekivu mai na buradelamu ki na qeteqete ni yavamu.¹³

Me ra kakua ni yali mai na nodra vakasama na iTalatala Qase na dina ni ra sa italai kei lomalagi, era sa dau solia na itukutuku vinaka kei na veika talei kivei ira na tamata era sega tu ni kila na Turaga. …

Ena gauna sa talai ira kina o Parofita Josefa Simici na isevu ni iTalatala Qase ki na dua na matanitu tani, sa raica oti tu o koya na veika era na kidavaki mai kina, ka tukuna kina vei ira o koya ni na lewevica walega era na ciqomi ira ni ra sa italai ni Kalou, era na lewevuqa cake era na vakanadakui ira, ka ra na sega ni rogoca na nodra itukutuku. Oqo na veika era sa sotava tiko mai na italai ni Kalou mai na ivakatekivu ni gauna, ka meda sa marautaka ga na veika sa yaco mai na cakacaka ena yalodina, ke mani vica wale sara ena vukuda era sa kila kina na dina. …

Au nuitaka ka sa noqu masu ni sega ni dua na iTalatala Qase … mena laki guilecavi koya yani ki na veitemaki ni vuravura oqo. E tiko e dua ga na sala meda muataki keda tani mai kina, o ya meda lako tani mai na veika butobuto, ena gauna mada ga ni ra se qai tekivu laurai mai kina na veika butobuto. Na veitemaki sai koya na ituvaki se eso tale era na vakasagai kina. Sai koya oqo na cakacaka ni meca baleta na noda vakabulai; ia sa nodra cakacaka na iTalatala Qase ni Isireli mera vorata rawa na veitemaki, ni gadrevi me vakayacori rawa na ka oqo e dodonu mera sa savasava mai na duka ni vuravura oqo. … Ia ni ra sa gumatua tiko ena vakabulabulataka ka vakamareqeta na yalo ni kaulotu, ka kila tiko na bibi ni nodra veikacivi cecere vei Jisu Karisito, ka bula voli ena kena yalo, sa rawa mera tudei tu me dauniveidusimaki ka nodra ivakabula na tamata, ka vakararamataki ira ena rarama kei lomalagi, ka mera sa tamata duatani sara; ia kevaka mera butu cala yani ki na vanua ni meca ka ciqoma na ivakarau ni vuravaura oqo, ena kau tani mai vei ira na kaukauwa ka yaco mera vakataki ira na tamata tani, ka sa vinaka ga mera sa lesu mai ki vale ka rarawa na lomadra me vakataki ira era sa lutu vakakina, ka vakavuna mera tagi o ira na nodra lomani baleta na kedra ituvaki. … Ia ni ra sa gumatua tiko mera sa vakasaqara tikoga na Turaga ena yalomalua, ka raica vakatabakidua tiko na Nona dokai kei na lagilagi, ka gadreva na lomadra mera vakabulai na yalo ni tamata, ka cakava na veika e rawa ni ra vakabulai kina, era na kune marau e sega ni tukuni rawa ena nodra cakacaka eke, ka yaco mera na votai vata kei na Tamana kei na Luvena ena veika e cecere cake ka lagilagi vei ira na tamata mera kila vakavinaka se vakanananu kina.¹⁴ [Raica na vakatutu 4 kei na 5 ena tabana e 257.]

E reki na yaloda ni da vukei ira eso mera ciqoma na taucoko ni kosipeli.

Eda na namaka tiko … sa noda itavi, ena vakayacori rawa ni cakacaka oqo, e vuqa sara na vosota, vakabauta, gugumatua, kakavaki, kei na vosota vakadede meda na cakava ka sotava yani; ia ena veisiti … ka udolu era na rawa ni ciqoma kina na Kosipeli, ka vica na gauna a vakayagataki kina e vuqa na vula ena cakacaka sega na vuana ni bera ni vakayacori me vagolei donu ka vakamuri na ivakavuvuli o ya. … Ena so na [cakacaka] ena sega walega ni vakavula na noda vakayacora, ia e rairai vakayabaki sara; ia eda sa vakadeitaki tiko, ena vakabauta, masu, cakacaka, kei na veivakalougatataki ni Turaga, ena yaco ga meda uabaleta yani ka qaqa vei ira na veika dredre kece oqo ka me dokai ka vakalagilagi ga kina na Kalou; ka yaco talega, vei keda na yalovakacegu ni da sa mai vakayacora rawa na noda itavi, ka vakasavasavataki na noda isulu mai na dra ni tamata kecega.¹⁵

Ena [dua] na gauna, ni bera na ilakolako ki Itali, au a gole yani ki Manchester, Macclesfield, Birmingham, Cheltenham, Lodoni, Southampton kei South Conferences [mai Igiladi]. … A ka talei na noqu sotavi ira e vuqa kau a cakacakataka na nodra kau mai ki na Lotu [ena walu na yabaki yani e liu]; ka sega ni gadrevi meu tukuna tale eke ni noqu sotavi ira tale na tamata oqo sa ka rekitaki dina kau na dau taleitaka tu niu vakasamataka. A kaya kina o Joni na iApositolo ena nona gauna, “Eda sa kila ni da sa lako tani mai na mate ki na bula ni da sa lomani ira na veiwekani.” 1 Joni 3:14.] Na loloma oqo sa vakatuburi tiko ena yalodra na iTalatala Qase daukaulotu ni noda Lotu me baleti ira na tamata ena vuravura oqo, sa ka vou vakakina vei ira, kei na yalodra na tamata sa vakatakila vei ira na iTalatala Qase na Kosipeli, ka sai koya oqo na ivakadinadina sa veirauti vinaka me vakauqeta na yalo sa dina ni sa ka vakalou, ka sa tiko vata kei keda na Kalou. Na yalo tabu ka savasava oqo, sa dau vakayadrati keda kina na Yalo Tabu, sa vakaituvakitaki keda oti meda sa dua na itikotiko raraba vakatikitiki mai na matavuvale ni kawatamata; ka sai koya oqo na yalo me na qai veisautaka yani na vuravura taucoko, ka vakauqeti ira na tamata tawa-vakabauta ni Kalou sa sega walega ni Tamada kece na tamata, ia eda sa Nona itokani ka dauveiqaravi.¹⁶

Au sa solia na noqu bula ki na veiqaravi ni Turaga; sa tevuki na noqu ka kecega ena icabocabo ni soro, meu dokai koya kina, vakayacora na nona lewa ena dodonu, ka vakatetea na ivakavuvuli ni bula ena kedra maliwa na luve ni tamata. Niu vakananuma na gauna sa oti, ka vakadigova lesu na liga ni Turaga ni tadolava vakamaqosa na noqu salatu, ka vakalougatataki au ena veika kecega e semati ki na kaulotu oqo ena kena cecere au sega ni vakasamataka rawa, ka vakabibi meu mua yani ki na veisiga ni mataka; sa sega na vosa me vakamacalataka rawa na titobu ni vakavinavinaka ni yaloqu baleta na nona veivakalougatataki. Na yalodra kei na nodra gagadre na veitacini kei na Yalododonu o ya me baleta na cakacaka ni Kalou a matanataki vakatabakidua kivei ira ena kaulotu oqo, ka me sovaraki vei ira ena loloma vakatautauvata na veivakalougatataki nei Koya sa Cecere Sara, ni ra na rogoca ena veiyabaki e tarava na domodra kamica e udolu, ka tini vakaudolu ni veimatanitu o ya ni ra kailavaka na vakacaucautaki na Kalou sa Cecere Sara me baleta na rarama ni ivakatakila, ka na reki talega na yalodra ni ra sa kila ena marau ni ra a vakaitavi talega ena kena vakayacori rawa na veivueti lagilagi.¹⁷ [Raica na vakatutu 6 ena tabana e 257.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Wilika na tabana e 247–49, ka taurivaka na isau ni taro nei Lorenzo Snow ki na taro oqo “Na cava au mai cakava eke?” Ena sala cava ena rawa me veivakauqeti na taro oqo vei ira na lewe taucoko ni Lotu me madigi ni noda wasea yani na kosipeli?
Vakasamataka vakatitobu na ivakasala nei Peresitedi Snow ena wase tekivu mai cake ena tabana 249. Vakasamataka na sala o na rawa mo muria kina na ivakasala oqo mo vukea kina e dua me marau dina.
E talanoataka o Peresitedi Snow na solibula era a vakayacora kei na so tale mera wasea rawa kina na kosipeli (tabana e 249–52). Na ivakaraitaki cava ni solibula o sa raica era vakayacora na tamata mera wasea kina na kosipeli? Na cava o nanuma era tuvakarau kina na tamata mera vakayacora na solibula oqo?
Ena veivuke vakacava vua e dua na daukaulotu tudei na veivakadeitaki era tiko ena tabana e 252–54? Era na vukei keda vakayadudua vakacava ni da wasea yani na kosipeli? Ena sala cava eda na rawa ni vakayagataka kina na ivakavuvuli oqo meda vukea kina e dua ka lomalomaruataka tiko na nona laki kaulotu?
Ni ko raicalesu na ivakasala nei Peresitedi Snow ena tabana e 252–57, vakasamataka mada na kena rawa ni vakayagataki ena nodra bula na lewe taucoko ni Lotu. Me vakataka: Na cava na kena ibalebale mo “kakua ni lomaleqataka na veika e baleti iko”? Na cava eso na sala eda rawa ni kunea “me tarai kina na yalo yadua ni tamata”?
Wilika na iotioti ni parakaravu ena wase ni ivola, ka tukuna tiko kina o Peresitedi Snow na reki tawayalani ni cakacaka ni kaulotu. Na gauna cava mada o a vakila kina na rekitaki ni cakacaka ni kaulotu? Na cava na vuna e gadrevi kina ena so na gauna meda vosota mada ni bera ni da vakila na taucoko ni reki oqo?

iVolanikalou Veisemati: Alama 26:1–8, 35–37; V&V 12:7–8; 18:10–16; 84:88

Veivuke ena Veivakavulici: “Kerei ira na vakaitavi mera digitaka e dua na tikina ka wilika vakanomodi. Sureti ira mera vakailawalawa yarurua se yatolu era digitaka na tikina vata ga ka veivosakitaka na veika era sa vulica” (mai na tabana e vii ni ivola oqo).

“Ena gauna sa vakavukui kina e dua na tamata, sa na vakauqeti me wasea vei ira eso tale; ni gauna sa yaco kina e dua na tamata me bula marau, na yalo sa kovuti koya tu ena vakavulici koya me sasagataka me vakamarautaki ira eso tale.”

“Kakua ni lomaleqataka na veika e baleti iko, ni na levu ka lagilagi sara na nomu rawa-ka, ka na vakila na Lotu na yaga ni nomu cakacaka.”