Wase 7

Yalodina ena Gauna ni Veivakatovolei: “Mai na Rugurugua ki na Rarama Lagilagi ni Matanisiga”

“Na tagane kei na yalewa yadua e qarava na Kalou, se vakacava na nodra yalodina, ena yaco mai na nodra veiauwa butobuto; ia kevaka era yalodina tiko, ena sikabotei ira na rarama ka na kauta mai na vakacegu.”

Mai na Bula nei Lorenzo Snow

Ena Feperueri ni 1846 era a vakasaurarataki na Yalododonu Edaidai me ra biuta na nodra veivale mai Nauvoo, Illinois. Ni ra vakavakarau me ra lako ki na ra ki na nodra vanua yalataki vou, era muria na ivakasala nei Peresitedi Brigham Young me ra tara na veitikotiko eso ena nodra ilakolako. Era tiko ena veivale vakawawa ka teivaka na kakana me baleti ira na Yalododonu era na muri yani. Ni oti na nona a tiko vakalailai ena yasana ko Iowa ena dua na itikotiko ka vakatokai na Garden Grove, eratou a toki o Lorenzo Snow kei na nona matavuvale ki na dua na vanua era dau vakatoka na Yalododonu o Mount Pisgah, ka tiko talega mai Iowa. E vakatokayacataki na itikotiko oqo ki na ulunivanua ka a raica mai kina o Mosese na nodra vanua yalataki na nona tamata.

Ni oti e vica na vula ena nona yaco yani ki Mount Pisgah, a kacivi o Lorenzo me vakatulewa ena itikotiko. “Ena gauna oqori,” e qai vola e muri, “era sa tu kina na Yalododonu mai Pisgah ena dua na ituvaki dravudravua sara vakaca, e sega walega ena kakana kei na isulu, ia ena manumanu kei na qiqidreti me tomani kina na nodra ilakolako. E vica na matavuvale sa sega sara ga ni dua na kakana e vo, ka ra sa vakararavi voli ga ki na nodra veivuke na wekadra era veivolekati, o ira oqori, ena vuqa na gauna, era sa sega ni dau tu vakarau me ra vakatovotovotaka na ivalavala dodonu oqori. Ia, mai na veika kece oqori, qai robota na itikotiko e dua na mate veitauvi, sa sega ni veirauti kina na kedra iwiliwili na bula vinaka me ra qaravi ira na tauvimate; ka qai muria yani na mate, era bale mate na tama, tina, gone, tacidra, ganedra kei ira na itokani lomani ena mate veivakarusai oqo, ka ra bulu ena veisoqoni dravudravua ni veibulu, ka so e sega na isulu dodonu mera bulu kina. Sa vaqori na kena vakaikuritaki na bula dravudravua ena yaluma kei na tagiyaso.”

A kila vakavinaka sara tu ga o Lorenzo na veivakatovolei oqo. Eratou vakila o koya kei na nona matavuvale na tauvimate, na rarawa, kei na mosi ni yalo, oka kina nona mate na luvena yalewa se qai sucu wale o Leonora. A vola vaqo o koya, “A tauvimate o Leonora lailai ka mate, ia ena rarawa titobu keitou kauta ena vakadigagalu na yagona ki na nona ivakavakacegu, me laki davo duadua no, yawa sara mai vei tamana kei na tinana ka a vakasucumi koya mai.”

Ena ruku ni ituvaki oqori, a vukei ira na Yalododonu o Lorenzo me ra sotava na nodra vakatovolei ena vakabauta. Qai vola vaqo na ganena o Eliza, “Ena sasaga ni yalodina—e dua na vakasama e yavala tikoga, kei na inaki tudei ka sega ni rawa ni vakayalolailaitaki, a vakadinadinataki koya ena nona sotava e dua na leqa vakasauri ka rawa ni vakarerei ira na tagane yalani nodra kaukauwa.” E nanuma lesu o koya, “Taumada a vakauqeti ira ka cokota vata na nodra igu na tamata.” A cokonaki ira na tagane ki na veilawalawa vakacakacaka. Eso era lako yani ki na veitauni voleka me ra rawa ilavo ka voli mai na kakana kei na isulu. Eso tale era tiko voli ga ena keba, ka vakatawani ira na veimatavuvale e kea, tei kakana, ka ra cakava ka vakavinakataka na iyaya ka na rawa ni laki vakayagataki ena veitikotiko voleka.

Me ikuri ni nona vukei ira na Yalododonu me ra cakacaka vata, a vakayaloqaqataki ira o Lorenzo me ra vakani ira vakayalo ka me ra marau ena ivalavala ni veivakamarautaki e taucoko. “Ena veivula babalavu ni batabata,” e kaya o koya, “Au segata meu laveta cake tiko na yalodra kei na nodra yaloqaqa na Yalododonu mai Pisgah, sega walega ena kena tuvalaki na veisoqoni ni sokalou kei na kedra vakatovotovotaki, ena veiyasa eso ni itikotiko, ia ena kena vakarautaki talega na veika me baleta, kei na kena vakayaloqaqataki na ivakarau ni veivakamarautaki dodonu eso. …

“Me kena ivakaraitaki, au na tovolea meu vakamacalataka mada e dua, kau bulia me baleta na nodra vakamarautaki na kena levu ga e rawa niu vakacuruma ki na neitou vale vakatui vakaciriloloma ni matavuvale, na vale tabadua, ka rauta ni tinikalima na kena raba ka tolusagavulu na kena balavu [rauta ni va veimama na mita ka ciwa na mita], tara ena tolonikau, delavuvu qele ka qele talega na buturara, e tu mai na dua na yasana e dua na ikuvukuvu vakarauta na kena balavu, ka caka mai na qele kei na co e ta mai na Dela ni Qele. Me baleta na soqoni oqo keitou conaka vakamamare na buturara ena co savasava, ka ubia na lalaga ena siti vulavula ka kau mai na neitou idavodavo sega na kena ivakamalumu.

“Na kena vakararamataki na neitou olo me ganita na soqo e vakarautaki tiko e sega ni lailai wale na kena vakasamataki, ka gadrevi vakalevu kina na cau mai na neitou dui maqosa. Ia keitou a mani rawata. Mai na qara era bulu tu kina, keitou digitaka mai na tunipi lelevu duadua ka rairai vinaka—kelia tani na lomana, vakacobara kina na kadrala leleka ka biuta vakaiyalayala e lalaga, era lili eso mai na siligi e cake, ka caka mai na qele kei na kau. Era kauta mai na rarama oqori e dua na veivakauqeti … sautu ka vakadirorogo, e curubasikata na qa ni tunipi na rarama ka solia e dua na irairai vakaiyaloyalo.

“Ena soqoni ena yakavi, e vica vata na noqu itokani, era vakaraitaka ena sala talei duadua era rawata, na nodra vakacaucautaki au kei na noqu matavuvale ena irairai totoka kei na maqosa ni cakacaka e vakaraitaki ena iukuuku vakasakiti ka sega ni sau levu oya.”

E qai nanuma lesu vaqo o Lorenzo “ni ra bulabula na veiauwa, ka vakayagataki ena mamarau.” Era veivakamarautaki vakataki ira na nona vulagi ena vosa, na sere, kei na serekali. E kaya o koya, “Ni mai cava, e vaka ni ra sa mamau kece vakavinaka, ka ra vakasuka yani, ena mamarau ka sega ni vaka me sega tu na nodra vale.”¹ [Raica na vakatutu 1 ena tabana e (125).]

iVakavuvuli nei Lorenzo Snow

Na veivakatovolei kei na veika dredre e vukei keda me da vinaka cake vakayalo ka vakavakarau ki na lagilagi vakasilesitieli

Ena sega ni rawa vei keda me da cakacakataka na noda vakabulai ka rawata na inaki ni Kalou ke sega na veivakatovolei se sega na solibula.²

Na veivakatovolei kei na veigauna rarawa sa tiki ni veika era dau sotava na Yalododonu Edaidai. Sa lewa tu na Kalou me vakakina. Au vakabauta ni ena [bula taumada] ena vuravura ni yalo, ena gauna e vakaturi kina vei keda me da lako mai ki na bula vakavakarau oqo, ka mai lakova na veika eda sa sotava tiko oqo, a sega beka ni taleitaki taucoko ka da vakadonuya; a sega soti ni marautaki kece sara na veika e tu mai liu me vaka na veika eda gadreva. Ia e sega ni vakabekataki ni da a raica ka kila vakamatata ni, me da laki rawata na noda bula vakalou kei na lagilagi, ena gadrevi me da sotava yani na veika oqo; se vakacava tu beka na kena sega ni donu vei keda na kena irairai, eda sa tu vakarau me da muria na loma ni Kalou, o koya eda sa mai tu kina oqo.³

Sa vakadeitaka oti e Yalona na Turaga ni na vakatovolei keda me yacova ni sa kila ko Koya na cava me cakava vei keda. A vakatovolea na Luvena o Jisu. … Ni se bera ni lako mai ki vuravura o Koya [na iVakabula] a sa vakadikeva tu o Tamana na Nona itosotoso ka kila ni rawa ni nuitaki Koya ena gauna me vakabulai kina na veivuravura; a sega ni rarawa kina. Me baleti keda. Ena vakatovolei keda o Koya, ka na dau vakatovolei keda tikoga, me rawa kina ni biuti keda o Koya ena itutu cecere duadua ni bula ka biuta vei keda na itavi bibi duadua.⁴

Kevaka eda na qaqa ena noda lako sivita na veivakatovolei dredre oqori ka sega ni yavalati na noda yalodina kei na noda bula dokai, eda na rawa ni namaka ni oti na noda vakatovolei, e dua na sovaraki vakayauyau ni Yalotabu kei na kaukauwa ni Kalou—e dua na edaumeni cecere vei ira kece era na tudei tu ena nodra veiyalayalati. …

Eso vei ira na itokani era dau vakataroga se rawa ni ra kilikili kaya ni oti na bula oqo me ra veimaliwai vinaka sara kei ira na Parofita kei ira na Yalododonu ena gauna e liu, era a vosota rawa na veivakatovolei kei na veivakacacani; vata kei ira na Yalododonu … ka ra a vakararawataki mai Kirtland, mai Missouri kei Illinois. Era a vakaraitaka na turaga era tukuni tiko eke na nodra veivutunitaka ni ra a sega ni okati ena veigauna oya ni kune rarawa. Kevaka e dua vei ira oqo e tiko oqo, au na kaya, me ra vakayalovinakataki kina o ira oqo, mo ni wawa ga vakalailai ka na qai basika vei kemuni na veimadigi vata oqo, me mamau kina na yalomuni. Ena sega ni rawa ni daru vakavinakataki sara kevaka e sega na kune rarawa: A sega ni rawa vei Jisu [raica na Iperiu 2:10]. Ena nona masu kei na yaluma ena Were mai Kecisemani, a vakaraitaka kina o Koya na iwalewale ni veivakasavasavataki e gadrevi ena nodra bula o ira e vakauqeti ira na nodra sasaga me ra rawata na lagilagi ni matanitu vakasilesitieli Me kakua ni dua e tovolea me drotaka ena nona muria e dua na sala tawa kilikili.⁵

E sega tale ni dua na sala e rawa ni ra vakavinakataki ira kina vakayalo ka vakarautaki ira me dua na nodra ivotavota ena matanitu vakasilesitieli ena veivakatovolei duadua ga. Oqori na iwalewale ena vakalevutaki kina na ka eda kila, ka tauyavutaki e vuravura raraba na sautu. A tukuni ni kevaka a sautu ka vuavuai vinaka na veika kece e tu vakavolivoliti keda ena gauna oqo, ena sega ni yaco me da vinaka mai. Ena dua na ituvaki ni veika era na gadreva e levu na tamata; era na sega ni kakavaka na veika tawamudu.⁶

Ni taura vakatamata yadua se taura vakalewelevu, eda sa kune rarawa ka da na kune rarawa tale, na cava na vuna? Baleta ni gadreva mai vei keda na turaga me da vakasavasavataki kina.⁷ [Raica na vakatutu 2 ena tabana e 125.]

Ni da yalodina tikoga ena noda vakatovolei kei na noda temaki, eda vakaraitaka kina ni da lomana vakalevu cake na Kalou mai na noda lomani vuravura.

Ena loma ni noda vakatovolei sa koto kina na veitemaki, eda sa rawata kina me da vakaraitaka na levu ni noda vakamareqeta na noda lotu. Eda sa kila tiko na veika a sotava o Jope ena gauna oya. A soli vua me kila na veika e baleta na tucake tale, kei na Dauveivueti, ka kila o koya e dina ni dodonu me mate ia e dodonu beka vua, ena veisiga e muri oqo, me raica na nona Dauveivueti e vuravura [raica na Jope 19:25–26]. Na veitemaki a sotava e vakaraitaka ni a dau vakamareqeta o koya na veika vakalomalagi oqo mai na veika kecega. …

… Baleta ni noda iTokani na Kalou eda na sega ni rere. Ena dodonu beka me da dau sotava tikoga na veika eso e sega ni da duavata kina. Mai na veika oqori sa rawa kina vei keda me da vakaraitaka vei ira na agilosi ni da lomana vakalevu cake na veika ni Kalou mai na veika ni vuravura.⁸ [Raica na vakatutu 3 ena tabana e 125.]

Ni da yalodina tikoga, ena vakaukauwataki keda na Turaga me da lako sivita na veitemaki ka vorata na veivakatovolei.

E vuqa beka vei kemuni ena sotava na veivakatovolei dredre, me vinaka cake sara kina na nomu vakabauta, me levu cake kina na nomu yalodei, me vakaikuritaki na veika o ni kila me baleta na kaukauwa vakalomalagi; ia oqo ni se bera ni o vueti. Kevaka e basika mai na vunilagi e dua na o loaloa … ; kevaka e cabori mai na bilo wiwi ni veivakararawataki, o qai vakasaurarataki mo gunuva; sereki o Setani me lako voli ena kemuni maliwa, kei na nona kaukauwa kece ni veicavilaki kei na ivadi qaseqase vakailawaki; ka laveti tu me tau vei iko na liga sega ni loloma ni veivakacacani;—ia, ena auwa oqori, laveta cake na ulumu ka reki ni o okati mo vakararawataki vata kei Jisu, o ira na Yalododonu, kei ira na parofita tabu; ka kila ni sa yaco mai na nomu gauna ni veivueti.

Au nanuma, kemuni na taciqu kei na ganequ meu vakauqeti kemuni ena ivakaraitaki mai vu ni yaloqu. Ni marau—kakua ni yalolailai; ka ni dina sara ni sa yaco kusa mai na siga me na tavoi kina na wainimatamuni, vakalogavinakataki na yalomuni, mo ni qai kania na vua ni nomuni cakacaka. …

Ni dau dina, dau ivalavala dodonu, dau dokai, dau yalomalua ka yalomalumalumu, yaloqaqa ka doudou, tara cake na bula rawarawa, mo vaka na Turaga; taura matua na dina ena bukawaqa se seleiwau, veivakararawataki se na mate.⁹

Mai na gauna eda ciqoma kina na Kosipeli ki na gauna oqo, sa dau solia vei keda na Turaga ena veigauna eso na veivakatovolei kei na veivakararawataki, kevaka eda na vakatokai ira kina; ia ena so na gauna sa dau vaka sara ga oya na veivakatovolei oqori ka sa dredre sara kina vei keda me da ciqoma ka sega na kena kudrukudruiramo se vosakudrukudru. Ia ena veigauna vakaoqori sa dau vakalougatataki keda na Turaga ka solia vei keda na Yalona e veirauti me rawa kina vei keda me da lako sivita na veitemaki ka vosota na veivakatovolei.¹⁰

Na tagane kei na yalewa yadua e qarava na Turaga, veitalia na levu ni nodra yalodina, e tu na nodra veigauna butobuto; ia kevaka me ra bula yalodina tikoga, ena basika vei ira na rarama ka soli na vakacegu.¹¹

Na ka ga e gadrevi vei keda me da taqomaki vinaka sara kina mai na veigauna kece ga ni leqa se veivakacacani, sai koya me da cakava na loma ni Kalou, me da tamata dina, yalodina ka me da tudei tikoga ena ivakavuvuli eda sa ciqoma; caka dodonu vei keda vakataki keda; kakua ni butukosova na nona dodonu e dua na tamata; bula ena veivosa kecega sa lutu mai na gusuna na Kalou ena qai vukei keda na nona Yalo Tabu ena veigauna kecega, ka da na qai basika ena maliwa ni veika kecega oqo ka da sa vakalougatataki vakalevu ena noda veivale, ena noda veimatavuvale, ena noda qele ni manumanu, ena noda veibuca—ia ena veika kecega ena vakalougatataki keda na Kalou. Ena solia vei keda o Koya na kila ka ena kila ka, na vuku ena vuku, yalomatua ena yalomatua.

Me vakuria na Kalou na nona veivakalougatataki vei ira na tamata oqo. Me da dui yalodina tiko vei keda vakataki keda, yalodina ki na ivakavuvuli kece eda sa ciqoma, segata e vuniyaloda na noda dui tiko vinaka yadua, ka na sovaraka mai vei keda na Yalona na Kalou, ena qai tinia ni da na qaqa.¹² [Raica na vakatutu 3 ena tabana e 125.]

Ni da raica lesu na veigauna dredre, eda raica ni noda veivakatovolei sa kauti keda voleka yani vua na Kalou.

Ni da vakasamataka na veika sa cakava vei keda ena veigauna sa oti na Turaga, na veika e tu wavoliti keda ena gauna oqo, kei na veika vuavuai vinaka eda nanamaki kina ena veigauna mai muri, sa qai dua na matatamata vakalougatataki o keda! Au dau vakasamataka ena so na gauna ni dua na ivalavala cecere duadua e rawa ni ra vakaitovotaki ira kina na Yalododonu Edaidai oya na vakavinavinaka vua na Tamada Vakalomalagi ena veika sa solia mai vei keda kei na sala sa tuberi keda mai kina o Koya. E rawa ni noda lakova na sala oya e sega soti ni dau logavinaka sara vei keda; ia eda sa qai kila e muri ni veigauna dau dragali sara vei keda oqori sa dau vakadinadinataki ni uasivi sara vakalevu na kena yaga vei keda.¹³

Ena veivakatovolei kece e curuma e dua na tamata, kevaka e yalodina tiko ena veivakatovolei oqori ka vakarokorokotaka kina na Kalou kei na lotu sa digitaka, ena mua ni veivakatovolei se na gauna ni rarawa oqori sa na voleka cake kina vua na Kalou na tamata oqori, voleka cake ena vakasama ni na tubu me levu cake nona vakabauta, yalomatua, vuku kei na kaukauwa, ka yalodei cake ena nona kerea vua na Turaga na veika e gadreva. Au kilai ira eso na tamata era a sautaninini ena nodra vakasamataka na nodra curuma eso na gauna dredre ia ni sa oti na veivakatovolei era kaya ni sa rawa me ra lako vua na Turaga ena yalodei ka kerea na veivakalougatataki era gadreva. …

Sa dodonu me da reki ka vakasinaiti ena marau kei na vakacegu, veitalia na veika dredre e wavoliti keda tu. Ia sa vakaevei beka na yawa ni vanua eda sa lakova mai, sa vakaevei beka na levu ni ka eda sa kila ka na vakaevei tale na levu ni ka eda rawa ni ciqoma ena gauna oqo ni vakatauvatani kei na dua, rua se lima na yabaki sa oti, ka sa rawa beka ni da tu vakalevu cake ena gauna oqo mai na vica na yabaki sa oti? Sa vaqaqacotaki keda na Turaga ka vakalevutaka cake na noda tubu. Me vaka na gonedramidrami, ni sa tubu cake tiko e sega ni kila se a rawata vakacava na igu kei na ivalavala a tubu cake tiko kina na kena levu. Sa levu cake sara ena yabaki oqo mai na yabaki sa oti. Io ena noda itosotoso vakayalo. Eda sa kaukauwa cake nikua mai na dua na yabaki sa oti.¹⁴

Na solibula o ni sa vakayacora, na dredre eda sa vosota oti kei na bula logalogaca o sa sotava ena … oti yani na kena nanumi, ia ko na reki ni o sa sotava rawa na veika era kauta mai. … Eso na ka eda vulica mai na veika rarawa eda sotava, kei na kila ka e rawati mai na veisala oqori, e dina ni na mosimosi beka na kena iwalewale, ena yaga sara vakalevu vei keda ena bula kadua. …

…Au kila ni a sega ni rarama kece tu ga na nomuni bula; e sega ni vakabekataki ni o ni a sotava mai e vuqa na veivakatovolei, ka rairai ko ni sa curuma mai e vuqa sara na veigauna dredre; ia ni ko ni bula dodonu tikoga ena sega ni dede o ni sa na curu yani mai na rugurugua ki na rarama lagilagi ni matanisiga ni vuravura vakasilesitieli.¹⁵ [Raica na vakatutu 4 e ra.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Vakasamataka vakatitobu na itukutuku ena tabana e . A rawa vakacava vei ira e vuqa na Yalododonu ena itukutuku oqo me ra marau tiko e dina ga ni ra kune rarawa tu? Na cava e rawa ni da cakava me da vakayaloqaqataki ira kina era sotava tiko na veivakatovolei?
Vulica na ivakavuvuli nei Peresitedi Snow me baleta na vuna me da vakatovolei kina (tabana e 119–20). Na cava o nanuma ni kena ibalebale mo “kakavaka na veika tawamudu”? Na cava na vuna o nanuma ni ra sega ni dau “kakavaka [kina]na veika tawamudu” ka sega na kena veivakatovolei e vuqa na tamata?
Na ivakarau cava e dodonu me da sotava kina na veivakatovolei kei na veitemaki? (Me baleta eso na ivakaraitaki, raica na tabana e 122–24) E dau vukei keda vakacava na Turaga ena gauna ni veivakatovolei?
Wilika na iotioti ni iwasewase ena wase oqo. Na cava o sa rawata mai na veibolebole o sa sotava?
Vakaraica e dua se rua na iyatuvosa mai na iwase oqo e solia vei iko na inuinui. Na cava beka o taleitaka me baleta na iyatuvosa o sa digitaka? Taurivaka na sala eso mo wasea kina na dina oqo vua e dua na lewe ni matavuvale se itokani e gadreva na veivakayaloqaqataki.

iVolanikalou Veisemati: Nai Vakarua 4:29–31; Same 46:1; Joni 16:33; Roma 8:35–39; 2 Korinica 4:17–18; Mosaia 23:21–22; 24:9–16; V&V 58:2–4

Veivuke ena Veivakavulici: Vakasamataka mo tarai ira rawa eso na vakaitavi, kerei me ra vakavakarau me ra mai wasea na veika era sa sotava ka semati ki na wase oqo. Me vaka beka oqo, ni bera ni o veivakavulici mai na wase oqo, ena veivuke beka mo kerei iratou e lewe vica me ratou vakarau mai me ratou mai tukuna na veika eratou sa vulica mai na nodra veivakatovolei.

Ni ra sa vakasavi tani mai na nodra veivale na Yalododonu Edaidai mai Nauvoo, Illinois, e vuqa era kune marau ena loma ni nodra vakararawataki.

A drointaka na droini oqo ena nona ivolaniveisiga e dua vei ira na Yalododonu Edaidai a mai vakaitikotiko e Mount Pisgah.

“Ena gauna ni veivakatovolei, e rawa ni da gole vei Tamada Vakalomalagi me baleta na vakacegu kei na kaukauwa.