Wase 8

“Ni Dikevi Au, na Noqu Kalou, ka Kila na Yaloqu”

O ira na Yalododonu Edaidai buladodonu era dau segata me tara cake na “ivakarau ni bula vua na Kalou ka rawa ni nuitaki ena gauna ni veivakatovolei.”

Mai na Bula Nei Lorenzo Snow

Ena ika 15 ni Tiseba, 1899, a vosa kina o Peresitedi Lorenzo Snow, ka Peresitedi tiko ni Lotu ena gauna oya ena veibulu vei Peresitedi Franklin D. Richards, ka a veiqaravi voli vaka-Peresitedi ni Kuoramu ni iApositolo Le Tinikarua. Ni voleka me tini na nona vunau, qai kaya vaqo o Peresitedi Snow, “Au kerea na nodra Turaga na Isireli me vakalougatataki ira na Yalododonu Edaidai ka me da vakarautaki ki na veika ena yaco ena dua na gauna lekaleka mai qo, ni donu tiko ena mata ni Turaga na yaloda.”

Ni vakaraitaka tiko na kena gadrevi me “[vaka] dodonutaki tiko na yaloda ena mata ni Turaga,” a tukuna kina o Peresitedi Snow e dua na ka erau a wasea vata kei Peresitedi Richards ena 1850 vakacaca, ni rau se qai iApositolo vovou. Ena gauna oya, a liutaka kina o Peresitedi Brigham Young e dua na veivakadodonutaki ena Lotu, ka ra kerei kina na Yalododonu Edaidai ena veivanua kecega me ra veivutuni ka vakavouya na nodra yalayala me baleta na bula dodonu.

E nanuma lesu kina o Peresitedi Snow, “Ni vakayadrati o Peresitedi Young me vunautaka vei ira na tamata me ra veivutuni ka veisau, e vosa sara vakaukauwa o koya ena veika me vakayacori me baleti ira eso na tamata—e dodonu me kau tani mai vei ira na Matabete, baleta na nodra sega ni qarava vinaka na kena itavi me vaka a dodonu me ra kitaka. O ira na turaga era a bula tiko ena siga oya era na nanuma tiko na nona a vosa sara vakaukauwa ena vuku ni tikina oqo. Ia, e lauta sara na yaloi Baraca Franklin, ka lauta talega na yaloqu; ka keirau mani veitalanoataka vakataki keirau na tikina oqo. Keirau tinia me keirau na lako vei Peresitedi Young ka solia vua na neirau Matabete. Kevaka e vakila o koya ena yaca ni Turaga ni keirau sega ni qarava tiko vakavinaka na neirau Matabete, keirau sa na vakasuka yani. Keirau lako yani vua, raici koya duadua ga, ka tukuna vua na veika oqo. Au kila ni a tonawanawa na wainimatana ena nona kaya, I‘Baraca Lorenzo, Baraca Franklin, o drau sa qarava tiko vakavinaka vua na Turaga na nomudrau matabete. Me vakalougatataki kemudrau na Kalou.’”¹

Ena nona gauna taucoko ni bula, sa dau vinakata ga o Peresitedi Snow me dodonu tiko ga na yalona ena mata ni Turaga, ka vakayaloqaqataki ira talega na Yalododonu me ra dau qarauna tiko na nodra bula kilikili. A vosa o koya ena “dua na kena ivakarau me vakalevutaka cake na kila ka” na kena gadrevi me da tauyavutaka e dua na ivakarau dodonu, me vaka ni da Yalododonu Edaidai, ena mata ni Kalou na Tamada.”² [Raica na vakatutu 1 ena tabana e 126.]

iVakavuvuli nei Lorenzo Snow

Kevaka eda sa tauyavutaka rawa e dua na ivakarau dodonu ni bula, sa rawa ni da sureta na Kalou ena yalodei me dikeva na yaloda.

Au vakila vakaukauwa sara, ni vakasama cecere duadua, ka yaga duadua vakalevu ni da sa lesu tale ki na vuravura ni yalo, sai koya na noda tara cake e dua na ivakarau ni bula dodonu ka vakaivakarau me vaka ni da Yalododonu Edaidai yalodina ka tudei ena itutu ni bula vakarau oqo.

Ena veigauna ni dua na tamata vulagi e kerea e dua na cakacaka, se dua na itutu ni veivakabauti, e dau gadrevi me solia yani na ivolavakadinadina eso ni tamata kilikili o koya, mai vei ira eso na tamata vakabauti, ivola ni veitokoni kei na ivakamacala ka me yaga vakalevu sara ena vukuna, me veivuke ena kena rawati na veivakadonui ka soli na dodonu ka dau dredre sara ni soli kevaka era sega. E dau rawarawa sara na noda rawata e dua na ivola veitokoni, me vaka e dau kilai tu, e dua na ivakarau ni bula ka rawa ni da tawana tu ena noda taga; ka, e dina sara, me vaka na veika au sa dikeva rawa e sega ni dau vakavudua ni ra dau kauta voli na tamata na kedra ivola veitokoni ka sega ni vakadinadinataka na nodra ivakarau dina ni bula.

Era tu maliwai keda eso ka ra kilai tu ni ra lewe ni Lotu era dau segata vakaukauwa me vinaka na kedra irairai vei ira era tu wavoliti ira, ia na nodra ivakarau dina ni bula e vunitaki se vakamatavulotaki. … Na masu au cavuta oqo—“Mo ni dikevi au, na Kalou, mo ni kila na lomaqu: mo ni vakatovolei au, ka kila na nanuma ni lomaqu; ka raica se sa dua na itovo ca vei au, ka tuberi au ena sala ni bula tawamudu” [Same 139:23–24]—e duatani sara; e dua na masu a rawa vei Tevita ena gauna cecere duadua ni nona bula me cavuta ena yalodei kei na yalodina vua na Turaga. Ia a tu eso na gauna a rawa ni vakila kina na tataivatia kei na sautanini ni malumalumu ena kena cabori e dua na mataqali masu vakaoqo.

Au rawa ni vakabauta ni vuqa na Yalododonu Edaidai, ena dua na iwase levu ni nodra gauna ni bula, e rawa ni ra goleva na Turaga ena sala vuni ka cavuta na qaqa ni masu vata oqo—“Mo ni dikevi au na Kalou, mo ni kila na lomaqu, ka raica se sa dua na itovo ca vei au;” ia o keda me vaka e dua na matatamata, e rawa ni da bula me rawa kina vei keda me da cuva vua na Turaga ena veigauna kece ka cabora e dua na masu vaqo, sa na dua na ka matalau, sa na dua na ka talei e rawata rawa ena buladodonu kei na caka vinaka! … Au na vakatura me da taura [na tamata yadua] na masu oqo nei Tevita, ka raica na kena voleka e rawa ni bula kina me vaka na rarama e tu vua, me vakayacora kina ena nona yalodina taucoko me tiki ni nona yalayala vua na Kalou. E vuqa era dau yaco koso ena ivakatagedegede oqo ni uasivi sara baleta ni ra dau cakava eso na ka vuni ka sega ni yacova rawa na rai ni mata vakayago, ka dau vakavuna na nodra tawase tani mai Vua sa Cecere Sara ka vakasava tani na Yalo ni Kalou. O ira na tamata vakaoqori era na sega ni rawa ni vakayagataka na masu oqo ena nodra loqi tabu, ena sega ni rawa vei ira vakavo kevaka era sa veivutunitaka na nodra ivalavala ca ka vakavinakataka na cala era sa vakayacora, ka ra nakita me ra vinaka cake ena veigauna e tu e matadra mai na veigauna sa oti, ka me ra tara cake e dua na ivakarau ni bula vua na Kalou ka ra na rawa ni vakararavi kina ena gauna ni veivakatovolei, ia oqori ena rawa kina vei ira me ra veimaliwai kei ira na veika bula savasava vakakina kei koya sara ga na Tamada vakataki koya ni ra sa toki yani ki na vuravura ni yalo.

… Sa dodonu me da tagane ka yalewa dina; sa dodonu me vakatorocaketaki vakalevu na noda vakabauta, ka me da kilikili kaya kei na veitokani ni Yalo Tabu me vukei keda ena cakacaka dodonu ena siga taucoko, me rawa kina vei keda me da solibulataka na lomada ki na lomana na Tamada, me veivala kei na keda ituvaki eda sa lutu tu kina, ka caka dodonu ni da taleitaka me da dau caka dodonu, ka me vakanamata tiko na noda rai ena nona rokovi ka vakalagilagi na Kalou. Me caka oqo sa dodonu me vakila tiko na vakasama na noda itavi, me kila tiko ni raici keda tiko mai na mata ni Kalou ka ni na tukunikataki na noda ivalavala kece sara kei na kena inaki; ka sa dodonu me dau [sala vata] na noda ivalavala kei na yalo ni Turaga.³ [Raica na vakatutu 2 ena tabana e 136.]

Na ivakaraitaki eso mai na ivolanikalou e vakavulica vei keda na sala me da vakavinakataka cake kina na noda ivakarau ni bula.

E vuqa na ka au dau vakasakita ena nodra ivakarau ni bula na parofita, ka vakauasivi ena nei Mosese. Au dau vakasakita na nona yalodina me vakayacora na Nona vosa kei na lomana na Kalou me baleti Isireli, kei na nona tu vakarau me cakava na veika kece ena nona kaukauwa vakatamata, kei na nona veivuke o Koya sa Cecere Sara; me kena ilutua au dau vakasakita na nona buladokai kei na nona yalodina vua na Turaga. …

E dau vakasakita na Kalou na tagane kei na yalewa ena gauna oqo era dau segata na ivalavala savasava kei ira e rawa ni ra kaya, veitalia na kaukauwa nei Setani sa tuvai tu me vorati ira, Lako tani ki dakuqu Setani [raica na Luke 4:8], ka dau bulataka e dua na bula dodonu, ka va-Kalou, o ira na tamata vaqori era dau vakauqeta na Kalou ka na levu na isau ni nodra masu [raica na Jemesa 5:16]. Taura mada, o Mosese, a levu sara na nona kaukauwa vaqori vei Koya sa Cecere Sara me veisautaka kina na Nona [Kalou] inaki ena vuku ni dua na gauna. Ena dau nanumi tu ni a cudruvi ira na Isireli na Turaga ena dua na gauna ka tukuna kina vei Mosese ni na vakarusai ira, ka na qai kauti Mosese ko Koya ka vakatubura vua e dua na matatamata cecere, ka na solia vua kei ira na nona kawa na veika a yalataka vei Isireli. Ia na iliuliu cecere ka dau solia na lawa oqo, ni yalodina tiko ki na veivakabauti sa soli vua, a tu ena maliwa oya ka vakatakekere vua na Turaga ena vukudra na nona tamata; ena kaukauwa e rawa ni vakayagataka ka mani vakayagataka, sai koya na sala era a vakabulai kina na tamata mai na veivakarusai sa cavuti ena vukudra. [Raica Na Lako Yani 32:9–11; iVakadewa nei Josefa Simici, Na Lako Yani 32:12.] Sa na vakaevei mada na vakaturaga kei na lagilagi kei Mosese ena mata ni Turaga, ka sa dua na ivurevure ni vakacegu Vua me kila ni liutaki ira tu na Nona tamata digitaki, ena dela ni nodra domodomoqa kei na nodra lecaika, e dua na tamata vakaoqo.

Eda raica talega vei Jona e dua na ivakarau ni bula taleitaki. Ena loma ni wasawasa cudrucudru, ni sa lutuki ira na dausoko na rere ni ra sa sega ni rawa ni vakabula na waqa, sa kilai yalona ko Jona ena nona sega ni muria na ivakaro ni Turaga me lako ki Ninive, sa lako mai kina ka vakatusai koya ni sai koya na vu ni kena sa vakarau lutuki ira na leqa levu oqo, ka sa tu vakarau me solia yani na nona bula ena vukudra era vodo tiko e waqa. [Raica na Jona 1:4–12.] Vakakina vei ira tale eso na parofita kei na tamata ni Kalou, e dina ena so beka na gauna, me vakataki Jona, era vakaraitaka na nodra malumalumu, e dua na ka talei ka vakasakiti e dau vakaraitaki ena nodra ivakarau ni bula.⁴ [Raica na vakatutu 3 ena tabana e 136.]

Na ivakarau ni buladodonu e dau buroro cake vei keda ena noda vakatovotovotaka na vakabauta ka veivutunitaka na noda caka cala.

Na ivakarau ni bula vaqori me vaka eda dau raica vakamatata ena nodra bula na tamata dau bula kilikili ena veigauna makawa era sega ni basika mai vakacala ka se sega ni nakiti, ka ra sega talega ni dau rawati ga ena dua na siga, dua na macawa, dua na vula, se dua na yabaki, ia era tarai cake tiko vakamalua e veigauna, era vua ni yalodina tikoga vua na Kalou kei na ka dina, ka sega ni rawa mai na veivakadonui se na veivakadiloi ni tamata.

… Sa ka bibi kina vei keda, me vaka ni da Yalododonu Edaidai, me da kila ka dau nanuma dei tiko ni veivakabulai e rawa mai na loloma soli wale ni Kalou kei na kena tarai cake e lomada ni veivakavuvuli era dau liutaki kina na tamata buladodonu sa cavuti oti. Na vakasama sai koya me da kakua ni caka vinaka me baleta na nodra veivakacaucautaki na tamata; ia me da caka vinaka baleta ni da caka vinaka eda na tara cake kina na bula vakalou e lomada, ia ni sa vakakina eda sa na duavata kina kei na bula vakalou, ka na yaco na gauna me tiki kina ni noda bula. …

Eda sega beka ni dau cakava ena so na gauna na veika eso eda dau qai veivutunitaka e muri na noda cakava? Ena rawa ni vinaka sara na veika kece kevaka eda muduka na noda cakava tiko na veika eda kila ni cala; ni da sa raica na ca ka da qai veisau, oqori na veika eda rawa ni cakava, oqori sara ga na veika e rawa ni kerei vua e dua na tamata. Ia e sega ni vakatitiqataki, ni dau vakavuqa vei ira eso ni ra dau vakasamataka vakalevu cake ka rerevaka na kena kilai raraba na cala era vakayacora mai na nodra cakava na cala; era dau vakataroga se cava era na kaya na tamata ni ra rogoca, kei na so tale. Ia, ena dua tale na yasana, eso era dau vakauqeti me ra cakava eso na ka me ra vakadonui ira kina o ira na nodra itokani, ia kevaka e sega ni tau na vosa era via rogoca se me kilai na veika era cakava, era na nanuma ni sega ni yaga na veika era cakava, ka sa sega kina na betena vei ira na veika vinaka cava ga era sa cakava rawa.

Ia, kevaka eda vinakata dina me da toro voleka yani vua na Kalou; kevaka eda gadreva me da biuti keda kei ira na veiyalo vivinaka ni veivuravura tawamudu, kevaka eda vinakata me da tara cake e lomada na vakabauta eda dau wilika ka ra a cakava kina na Yalododonu e liu na veicakacaka vakasakiti sa dodonu vei keda, ni da sa rawata na Yalo Tabu, me da vakarorogo ki na kena vakasolokakana ka veisau ki na kena vakatutu, ka me da kakua ni vakasava tani mai vei keda ena dua na ivalavala ni noda bula: E dina ni o keda na kabula malumalumu ka ivalavala ca ka dau rawa ni da vakacudruya na Yalo ni Kalou ena dua ga na gauna; ia ena gauna vata ga eda kila kina ni da sa cala, sa dodonu me da veivutunitaka sara na caka cala oya kei na kena levu ga eda rawa ni rawata me da vakavinakataka se vakadodonutaka na cala eda sa cakava. Ni da vakayacora na veika oqo eda sa vaqaqacotaka kina na noda ivakarau ni bula, eda sa toroya tiko ki liu na noda inaki, ka da viribaiti keda mai na veitemaki; ia ni toso na gauna eda na kurabuitaka na levu ni ka eda sa rawata ena noda liutaki keda, kei na noda vakavinakataki keda cake.⁵ [Raica na vakatutu 4 ena tabana e 136.]

Ni da taqomaka tiko na noda ivakarau ni bula dodonu, eda na voleka cake vua na Turaga.

Eda sa ciqoma e dua na Kosipeli e vakasakiti na kena cakacaka: ena noda talairawarawa ki na veika e gadrevi kina eda na rawa ni ciqoma na kena veivakalougatataki digitaki ka sa dau yalataki se soli vua na tamata ena veitabayabaki kecega ni vuravura. Ia, me vaka na gone kei na nona iyaya ni vakatatalo se ka ni qito, o keda talega eda dau vakaceguya na yaloda ena veika caca wale ni gauna, ka guilecava kina na madigi e tu vei keda me da tara cake e lomada na ka cecere, na ivakavuvuli tawamudu ni bula kei na dina. E gadreva na Turaga me tarā cake e dua na isema voleka ka taleitaki ni veiwekani mai Vua kei keda; e gadreva o Koya me laveti keda cake ni da tamata ka vakalevutaka cake na noda kila ka, ia oqo ena rawa duadua ga mai na Kosipeli tawamudu sa vakarautaki vakatabakidua tu me baleta na inaki oqo. E kaya kina na iApositolo o Joni: “Ia na tamata yadua sa tu vua na inuinui oqo vei Koya, sa vakasavasavataki koya, me vaka sa savasava ko Koya (Karisito).” [1 Joni 3:3.] Era sa vakayagataka tiko li ena nodra bula na Yalododonu Edaidai na ivakavuvuli ni Kosipeli, ka ra sa vakataucokotaka tiko kina na inaki ni Kalou?

… Na cava e rawa ni da cakava ena ituvaki oqori me da laveti keda cake tikoga ki na nona buladodonu na noda Kalou? Na cava soti na veivakalougatataki, kei na dodonu e solia vei keda na ivakarau ni veivakabulai oqo, eda sa talairawarawa kina, rawata kei na cava me da cakava me kilai kina? Kevaka e gadrevi me vakayacori e dua na solibula ena dua na madigi vinaka vei ira era gadreva me vulici na nodra lotu, kei ira era segata tiko me ra vakamuria na kena gagadre, ena nodra bulataka ena nodra bula ni veisiga, me ra vakaraitaka na nodra lomasoli me ra soli ira ki na lomai Jiova, ka vakadinadinataka na ligana ena veigauna dredre kei na veigauna vinaka.

… Ena vinaka kevaka eda dikevi keda, me da tarogi keda vakataki keda ena noda loqi tabu, me da vakadeitaka na noda itutu … ena mata ni Turaga, me rawa kina kevaka e gadrevi vakakina me da vakavouya na noda gugumatua kei na yalodina, ka vakalevutaka cake na noda cakacaka vinaka.

E sega ni vakatitiqataki, ni da raica tiko vakararaba na kawatamata, ni da sa vinaka cake tiko vakalevu ena mata ni Kalou. Ia e dina ni sega ni vakatitiqataki oqo, au kila ni ra tu ena keda maliwa eso na tamata ka ra sa vakalougatataki tu ena veisolisoli vakayalo ka rawarawa ni ra vakabulabulataki, rawa ni vakatovotovotaki, kevaka era digitaka, me sivia vakalevu sara na kedra ituvuka, ka rawa ni totolo na nodra toso ena bula savasava ka rawa ni ra voleka sara yani vua na Turaga. Ia na yalo ka dau sala vata kei na veika ni vuravura sa cakacaka tiko vei ira ki na ivakatagedegede oya me ra sega kina ni vakalevutaka rawa na kaukauwa vakayalo oya kei na veivakalougatataki; era sega ni biuti ira ena isema voleka ni veiwekani vua na Turaga me nodra dodonu kina me ra taukena.⁶

Na noda ivakarau ni bula, me vaka ni da Yalododonu Edaidai, sa dodonu me taqomaki me kua ni voroki, se cava ga e yaco mai. Na ivakarau ni bula, e vakadonuya na Kalou e dodonu me taqomaki, ena gauna taucoko sara mada ga ni bula eda cakitaki keda kina.

Ni da bula tu vaqori eda sa vakanamata ki na … , ka vakadeitaki vei keda ni … da na vakaisalataki me da luvena tagane ka yalewa na Kalou, ka da taukena na iyau kei na lagilagi ni matanitu Silesitieli⁷ [Raica na vakatutu 5 e ra.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Ni o raicalesu na itukutuku ena tabana e 127 kei na 129, na cava e rawa ni o vulica mai na nodrau ivakarau o Elder Lorenzo Snow kei Elder Franklin D. Richards? Taurivaka na sala e rawa ni o wasea kina na ivakavuvuli oqo kei ira na lewe ni matavuvale se so tale.
E kaya o Peresitedi Snow, “Sa dodonu me da tagane ka yalewa dina” (tabana e 130). Na cava o nanuma ni kena ibalebale me da tagane se yalewa dina?
Taurivaka na veika e dikeva rawa o Peresitedi Snow me baleta na nodrau ivakaraitaki o Mosese kei Jona (tabana e 131–32). Na cava e rawa ni o raica ena itukutuku eso oqo ka na rawa ni vukei keda me da vakavinakataka cake na noda ivakarau ni bula?
Vakasamataka vakatitobu na ikarua ni parakaravu taucoko ena tabana e 134. Na cava na vuna o nanuma ni da na gadreva kina me da kila tiko na noda cala me rawa ni da vaqaqacotaka na noda ivakarau ni bula? E rawa vakacava ni da vakatarai keda me da raica na noda dui malumalumu ka sega ni yalolailai kina?
Raicalesu na ivakasala nei Peresitedi Snow ena iotioti ni iwasewase ena iwase oqo (tabana e 134–36). Taurivaka mo solia na gauna mo dikevi iko kina ka raica se vakaevei tu na kemu ituvaki e matana na Turaga.

iVolanikalou Veisemati: Same 24:3–5; 2 Pita 1:2–11; Mosaia 3:19; Alama 48:11–13, 17; Ica 12:25–28; V&V 11:12–14; 88:63–68

Veivuke ena Veivakavulici: Kerei ira na vakaitavi tiko me ra digia e dua na iwasewase ena iwase ka wilika lo. Sureti ira me ra soqoni vata yarua se tolu vakaiwasewase vata ka veivosakitaka na veika era sa vulica.

Peresitedi Franklin D. Richards

E dina ni “vakaraitaka na nona malumalumu,” o Jona, e rawa ni da vuli mai na nona ivakarau “talei ka vakasakiti”.