Wase 15

Na Veiqaravi Yalodina, ka Kaukauwa ena Matanitu ni Kalou

“Ni da sa kila ni sa dina na noda lotu sa dodonu kina meda tamata yalodina duadua ena delai vuravura oqo ki na inaki eda sa mai ciqoma oqo.”

Mai na Bula nei Lorenzo Snow

Ni vakarau cava na yabaki 1852, e ratou a tabaka na Mataveiliutaki Taumada e dua na ivola ka ratou kerea tiko kina na lewe taucoko ni Kuoramu ni iApositolo Le Tinikarua mera “tuva vinaka na veika me baleta na nodra dui ilesilesi ni kaulotu” ka lesu mai ki Salt Lake City ni bera na vula o Epereli 1853.¹ Sa roro mai na gauna me cava na kaulotu nei Elder Lorenzo Snow mai Itali. Ena Feperueri 1852, a biuta tu yani na cakacaka e kea me liutaka o Baraca John Daniel Malana, e dua na curuvou ena lotu, ka gole vata yani kei Elder Jabez Woodard ki na yanuyanu o Malta. Mai Malta, sa nuitaka tiko o Elder Snow me soko yani ena waqa ki Idia. Rau a vakarurugi tiko ena nona veiliutaki na isevu ni daukaulotu e kea, ka sa gadreva dina sara me tomani rau. Mai kea sa tuvanaka o koya me “sokota wavokita yani na vuravura” ka lesu i nona vanua ena Wasa Pasivika ka yaco ki na ra kei Amerika.²

Sa laki veisau na ituvatuva oqo nei Elder Snow ni rau sa yaco yani kei Elder Woodward e Malta. Sa raica o koya ni sa na vakaberaberataki me vica na macawa ena yanuyanu oqo baleta ni sa laki ca tu e dua na waqa sitima ena Wasa Damudamu. Ia ni sega ni kudruvaka na nona vakaberai oqo, a gole yani me laki cakacaka. Ena ivola ni ika 10 ni Maji, 1852, a vola kina, “Au vakila ni levu sara na veika vinaka ena yaco mai ena ivakarau e veidusimaki kina na Turaga ni kena vakayagataki na gauna oqo ena noqu lewa, niu sa mai solegi tu oqo mai vei ira na tamata taleitaki, kei na dua na vanua bibi duadua ni cakacaka, na vanua ena vakayacori rawa kina e dua na cakacaka cecere, ka sema yani kina veivanua veivolekati.” A tukuna o koya ni a vakauta e dua na itukutuku vei Elder Thomas Obray, e dua na daukaulotu mai Itali, “me lako sara mai vakatotolo, ka kauta tiko mai e levu na tikidua kei na ivola.” A sega tu ni kila o Elder Snow na veika cava sara me rau na cakava kei nona itokani e Malta, ia rau sa gadreva sara me rau tauyavuytaka e kea e dua na tabana ni Lotu. Na cakacaka oqo, a kaya o koya, “ena voroka na veika vakayalo era a vakataotaki tu kina e vuqa na veimatanitu, me vaka na nodra veiwekani vakabisinisi na kai Malta, sa teteva yani na veibaravi kei Iurope, Esia, kei Aferika.”³

Ena 1 ni Me, 1852, a vakauta o Elder Snow e dua na ivola ka tukuna tiko kina na toso ni cakacaka mai Malta. A vola vakaoqo: “Era sa yaco tiko ga mai na lewenivanua ena nodra vakataroga tiko na veika me baleta na ‘lotu duatani oqo;’ ena vica na yakavi sa oti, ena dua na gauna, ena neirau itikotiko, era a yaco mai eso na turaga ni walu na veimatanitu, mai na nodra dui tiki ni taoni lelevu me keimami mai veivosakitaka na veika me baleta na noda uto ni kosipeli: ka so vei ira era tadu sara mai Poladi kei Kirisi, ka ra sa wilika tiko na noda veivola oqo ni ra taleitaka vakalevu sara. Rau na veivuke tiko ena kena muataki na cakacaka oqo eda sa mai umani tiko kina, e rua na cauravou vuli vinaka ka gugumatua sara; e dua vei rau keitou sa mai tabaki koya me iTalatala Qase ka cameme sara ena vica na mataqali vosa eso.”⁴

A sega ni vakasamataka rawa o Elder Snow na nona tadra me laki kaulotu i Idia ka soko takosova na vuravura. Ia, a vakamuria ga na lewa ni Turaga ena nona laki tiko sega ni namaki e Malta, ka tara cake kina e dua na yavu ni cakacaka ni kaulotu e kea. Ni sa yaco mai na gauna me sa vodo kina ena waqa ena Me ni 1852, a gole vaka ki na ra ka sega ki na tokalau, me vakamuria ga na nodra ivakasala na nona iliuliu o ya me lesu ki na Salt Lake City. Voleka toka ni oti e rua na vula, rau a tauyavutaka o Elder Woodard kei Elder Obray e dua na tabana ni Lotu mai Malta.⁵ [Raica na vakatutu 1 ena tabana e 211].

iVakavuvuli nei Lorenzo Snow

Ena vuku ga ni da sa ciqoma na taucoko ni kosipeli, eda sa matataka kina na Karisito.

Eda sa vakadinadinataka kina ki vuravura ni da sa kila, mai na ivakatakila vakalou, sa vakakina ena ivakadinadina ni Yalo Tabu, ni o Jisu na Karisito, na Luvena na Kalou Bula, ka sa vakaraitaki koya vakatamata vei Josefa Simici me vaka a vakayacora vei iratou na nona tisaipeli ena gauna makawa, ni oti na nona tucake mai na bulubulu, ka sa vakatakila vei koya [na] dina vakalomalagi ni sa rawa duadua ga mai kina na vakabulai ni kawatamata. Oqo … eda sa taura kina e dua na itutu bibi ka sa ilesilesi, ni da kila, ni da cakava, ena tarogi keda kina na Kalou me baleta na ivakarau eda qarava kina na cakacaka vakalou sa solia mai vei keda o koya.

Ena nodra sa tucake yani na iapositolo ki na vuravura oqo, ni oti na nodra ciqoma na nodra ilesilesi mai vua na Dauveivueti, mera vunautaka na kosipeli ni matanitu ki na veimatanitu taucoko, ka yalataka vei ira sa vakabauta na nodra vosa, na iSolisoli ni Yalo Tabu ena veitabaki ni liga, meda sa na tucake yani vakakina. Mai na nodra sa vakaraitaka yani ena dodonu ni nodra ilesilesi, ena veivakadeitaki taucoko, ena loma ni veivakacacani kei na veisaqasaqa, ni kosipeli sa kaukauwa ni Kalou mera vakabulai kina o ira taucoko era sa vakabauta ka talairawarawa kina, meda sa na vakaraitaka vakakina. Mai na nodra sa vunautaka na vakabauta na Turaga o Jisu Karisito, na papitaiso ni veibokoci ni ivalavala ca, kei na veitabaki ni liga, mai vei ira sa tu vei ira na lewa, me ciqomi kina na Yalo Tabu, ni sa ka yaga sara ki na veivakabulai, meda sa na vunau yani. Mai na nodra sa ivakadinadina bula ni Turaga o Jisu Karisito ena kaukauwa ni Yalo Tabu, ka ra sa kauta ena yalodina na itukutuku ni kosipeli kivei ira na Kai Matanitu Tani e vuravura, ia ena Yalo Tabu vata ga oqo, eda sa yaco me nona ivakadinadina bula, ka me vaka ni da sa kacivi mai na veikacivi vakalou ka tabu oqo, meda sa qai taura na itutu vata ga oqo.

Ni oti, na noda sa mai taura na itutu oqo, eda sa taura vakakina na itavi taucoko ni nona mata na Karisito, eda na saumi taro baleta na noda ivakarau yadua kei na ivakarau eda vakayagataka kina na noda taledi kei na rawa-ka sa solia vei keda na Turaga.⁶ [Raica na vakatutu 2 ena tabana 211.]

Na noda lewena na Lotu sai koya e dua na veikacivi meda vukei ira na tamata mera ciqoma na veivakabulai.

Ena gauna e kaciva tani mai kina na Turaga e dua na tamata se dua na ilawalawa tamata mai vuravura, e sega ni kena inaki tiko me yaga ga vei koya se ilawalawa o ya. E sega ni inaki ni Turaga mera vakabulai e vica walega na tamata era vakatokai tiko na Yalododonu Edaidai … , ia mera vakabulai na tamata kecega, o ira na bula kei ira na mate. Ena gauna sa kacivi Eparaama kina na Kalou a solia vua eso na yalayala me baleta na lagilagi ena yaco mai vua kei ira na nona kawa, ka da raica ena yalayala oqo na malanivosa totoka oqo: ni na vakalougatataki na veimatanitu kecega e vuravura ena vukuna kei ira na luvena [raica na Nai Vakatekivu 22:15–18; Eparaama 2:9–11]. … Na ituvatuva ni Turaga o ya me sega ni vakalougatataki koya walega kei na nona kawa, ia ki na matavuvale taucoko e vuravura. …

… Ena gauna sa tadu mai kina o Jisu, a tadu mai o Koya me solibula sega walega mera vukei kina o ira na Isireli, se o ira na kawa ni Eparaama, Aisake, se Jekope, ia mera vukei talega na matavuvale kawatamata taucoko e vuravura, ka rawa ena Vukuna ga mera vakalougatataki na tamata taucoko, ena Vukuna ga me rawa ni ra vakabulai na tamata taucoko; ka sa Nona ilesilesi me vakarautaka na veika era na rawa ni ciqoma kina na matavuvale kawatamata taucoko na mana ni Kosipeli tawayalani, sega, niu kaya, me ko Isireli walega, ia na kawatamata taucoko; ka sega walega o ira era bula tiko e na vuravura oqo, ia ko ira talega era tiko ena vuravura ni yalo. …

… Sa tu vei keda na matabete vata ga a taura tu o Jisu, ka sa dodonu kina meda cakava na veika a cakava o Koya, meda solibula yani ena noda gagadre kei na lomada me vaka a vakayacora o Koya, ka rairai sega sara ni gadrevi meda mate me vakataki Koya, ia sa dodonu ga meda solibula yani me rawa kina ni da vakayacora na inaki ni Kalou, de da na sega ni kilikili kaya ki na Matabete tabu oqo, ka sega ni dauveivakabulai ena vuravura oqo. Sa inaki ni Kalou me vakatikori keda meda dauveivakabulai sega walega kivei ira na vuqa era bula tiko ena vuravura oqo, ia sa vakakina vei ira na vuqa era tiko ena vuravura ni yalo: ena sega walega ni biuti keda ki na dua na ituvatuva meda vakabulai keda duaduaga, ia ena vakayacora o Koya meda gugumatua sara meda veivuke ena nodra vueti e vuqa vei ira na luvena na Kalou sa Cecere Sara.⁷ [Raica na vakatutu 3 ena tabana e 211.]

Na veikacivi kei na ilesilesi yadua sa ka bibi sara ki na cakacaka ni Turaga.

Ia na taro oqo, eda sa vakila tiko beka na noda itutu, eda sa kila vakavinaka tiko beka na inaki ni cakacaka eda sa mai taura meda vakacavara vakavinaka? Eso na gauna au dau vakabauta tu ni so vei ira na tacida, o ira na iTalatala Qase kei Isireli, era sa vakarautaki ira oti tu ka lomadra sara mera sa vakanadakuya na nodra itavi era sa lesi kina sa virikotori tu ena nodra veiyalayalati, ka sa vaka me luluqa mai na nodra vakabauta a tu vei ira, ka sa vaka mera sa laki tiko vakacegu me vaka e dua ga na lewe ni Lotu.

Eso vakaoqo era nanuma ni sega sara tu ni kilai vakalevu tu na yacadra, baleta talega ni ra rairai … sega sara ni veivakauqeti vakalevu vei ira na tamata, ni sega sara ni dua na betena na cakacaka era vakaitavitaki tiko kina, se mataqali ivakaraitaki cava era vakayacora tiko vei ira na tacidra vakalotu. Ia kevaka, mera taura tu na itutu cecere eso, me vakataka na Mataveiliutaki ni Lotu, se dua na kena Daunivakasala, se mera lewena na Kuoramu ni Le Tinikarua, se me Peresitedi ni Matabose e Cake, se lewe ni Bete Levu se Vitusagavulu, era sa na qai raica me sa ka bibi sara na ivakarau ni nodra bula. Eke gona era sa qai vakaraitaka kina na nodra malumalumu levu se tawa vakabauta, sa kataremoremo mai na nodra cina se ra sega ni vakila na itutu era sa taura ena nodra vakatikora vei ira na ilesilesi ni kosipeli.

E tukuna vei keda na vosa vakaibalebale ni iVakabula ni matanitu vakalomalagi sa vaka e dua na itaukei ni vale sa kauta na iyau eso vei ira na nona tamata cakacaka ni sa vakarau gole yani ki na dua na vanua yawa. Kivua e dua sa solia kina e lima na taledi, vua e dua tale e rua, kei vua e dua tale e dua. Kivua a soli kina e lima na taledi a lako ka laki veivoli kina, ka rawata mai kina e lima tale na taledi, ni sa vakaruataka na nona iwasewase a soli vua, ka sa vakakina vei koya a soli vua e rua na taledi ni sa lako ka rawata mai kina e rua tale na taledi. Ia kivei koya a soli vua e dua na taledi, a lako ka laki kelia e dua na qara, ka vunia kina na ilavo ni nona turaga. Sa vakabauta sara ga o koya ni sa ka lailai sara na nona ilesilesi ka sa sega ni cakava rawa kina e dua na ka, sa yaco kina me sega ni cakacakataka rawa e dua na taledi lailai vakaoqo. (Raica na Maciu 25:14–30.] E sega beka ni yaco tiko vakaoqo ki na nodra bula eso na noda italatala qase? E dua a kaya, “Oi au e dua walega na dautara vale, se dauculacula, se rairai dua beka na daucola iyaya [ivukevuke ni dautuvabuloko], o koya gona ena sega ga ni dua na ka ke’u vakacava sara na levu ni veika au cakava, se meu cakava ena dodonu se sega na noqu itavi ena kequ ituvaki malumalumu oqo. Ia ena rawa me duidui sara kevaka meu na laki taura e dua na itutu cecere.”

Muduka, taciqu; kakua ni vakatara mo lawakitaki ena veika ni gagadre ni vakasama vakaoqo. E dina sara ni ko rairai dua beka ga na daucola iyaya, ia mo nanuma tiko ni ko dua na italatala qase kei Isireli, o iko o matataka tiko na Turaga o Jisu Karisito, ni kevaka mo na vakayacora tiko na nomu itavi ko sa na taukena dina na ka ena sega ni solia rawa se kauta laivi; ni ko na soli itukutuku vua na Kalou me baleta na nomu vakayagataka vakadodonu na taledi sa qisi iko o koya mo kena ivakatawa, se ka levu se ka lailai.

Me tukuni tale, ko sa vakayacora tiko e dua na veivakauqeti kaukauwa, se cava ga na kena lailai sa vakayaco-ka tiko vua e dua se so na tamata, ia mai na vua ni nomu veivakauqeti oqo sa na nomu itavi tiko mo na soli tukutuku kina. Sa yaco kina vei iko, o vinakata se sega, ko sa mai taura kina e dua na ka bibi e mata ni Kalou kei ira na tamata ka na sega ni rawa ni vakawaleni ka ko na sega ni vagalalataki rawa mai kina kevaka o gadreva mo tokona na yaca sa tu vei iko.

Sa qai cava beka na ka ena rawa ni yaco vei koya oqo? Au sa kaya eke ni kevaka mena rokova na nona veikacivi, ka kunei ni sa yalodina ki na cakacaka sa soli vua, na ka ena rawa ni yaco vua me baleta na nona vakabulai ka vakacerecerei ena matanitu ni Kalou ena vaka ga na kena e yaco vua e dua tale. Kevaka mena kila vakavinaka na nona itutu ka bula vakakina, ena rawa ni yaco vata ga vua na veika ena yaco vua e dua tale na tamata e mai bula voli vakatekivu mai na gauna i Atama me yacova na gauna oqo; ka sa bibi vakakina vei koya me bulataka vakadodonu tiko na veivakauqeti sa lakovoli kina, me vaka ga e dodonu me vakayacora e dua tale, ena rawa ni kacivi me laki veiqaravi ena dua na itutu cecere cake; se dua tale na kena itukutukuni, ena rawa vei koya a vakatawa tu e liu ni vuqa sara na taledi. …

… E sega ni gadreva na Turaga e vuqa sara na ka mai vei koya sa tu vua e dua na taledi, me vakataki koya a soli vua e vica; ia, me vaka ga na kena sa tu vua, ni sa gadrevi oqo vua. Meda sa qai, yaloqaqa yani, ka vakasaqara meda vakatorocaketaka na taledi sa tu vei ira; ka me qai vakayagataka o koya sa tu ga vua e dua na taledi ka kakua ni vunia ena qara; o ya, me sa tu yani ka vakatorocaketaki koya sa vakaedaumenitaki ga vakalailai ena gugumatua, ka kakua ni kudruvaka baleta ni na rairai sega ni caka vinaka vua na ituvaki ni bula me vaka a yaco vei tacina a kalougata cake kina. Meda sa qai yalo vakacegu ena veika sa tu vei keda ena bula oqo, ka me kakua ni da gadreva sara vakalevu me vaka eda diva tiko, ka meda vakasaqara na vuku meda vakatorocaketaka kina, meda na rawa ni vakavinavinakataka na noda bula vakatamata e vuravura, ka vaka bibi cake vua na Yalo ni Kalou eda sa ciqoma ni da talairawarawa ki na Kosipeli. …

Au nanuma sara na noqu a wilika tiko na italanoa … ni dua na tamata, ka a kilai vakalevu sara o koya, ena vuku ni nona vuku kei na nona tutaka na vanua, ia ena yalovuvu a lesi ki na dua na itutu ka nanumi tu ni lolovira sara. Ena gauna sa tekivu qarava kina na nona itavi, a tukuni ni a cavuta na malanivosa cecere oqo: “Kevaka e sega ni dokai au na ilesilesi oqo au na doka na ilesilesi oqo.” Ena tarovi e vuqa sara na leqa, ka na veivakayaloqaqataki sara vakalevu na keda ituvaki kei na veika e sotavi kevaka meda doka na ilesilesi taucoko eda sa kacivi meda cakacaka kina. E tukuni ni Turaga sara ga vakai koya a cula na nodrau isulu na isevu ni noda itubutubu, se, dua tale na kena itukutukuni, ena ituvaki o ya, a dua na dauculacula; ka a mataisau talega vakakina o Jisu Karisito. Ia, e a dua sara beka ga na mataisau dokai ka dina na iVakabula, ke sega oqo a sega ni rawata rawa na itutu a mai taura ena gauna e muri. Kevaka meda na vakaraitaka vei ira na tacida kei na ganeda na kena bibi mera cakacaka dina ka yalodina ena nodra dui veikacivi, ena rawa me tarovi na yalo e veivakacudrui kei na leqa eda sa sotava tiko oqo, ka na toso na cakacaka ni Kalou ena kena totolo duadua, ka vakayacori rawa na nona inaki taucoko ena kaukauwa ka rawati vakatotolo; ia kivei keda na tamata, eda na vakavakarau vakavinaka cake mai na kena oqo me baleta na itabagauna ni nona lewa. …

Me vakalougatataki kemuni na Kalou, kemuni na taciqu kei na ganequ, ka mo ni rawa ni cakacaka me vakataki ira na ivakatawa vuku ni veika ko ni sa nuitaki kina.⁸ [Raica na vakatutu 4 ena tabana e 211.]

Ni da qarava na Kalou ena vakabauta, kaukauwa, kei na yalomamarau, ena vaqaqacotaki keda o Koya ka vukei keda meda rawata rawa.

Au kaya kina, na tamata me qarava na Kalou ena yalodina kei na kaukauwa, ka me yalomamarau tiko. … E tiko eso na gauna e dau sotava na tamata na ituvaki eso ka dau dredre sara kina, me rawa, ni rawata na yalomamarau. Ia e dau vica walega ga na gauna vakaoqo.⁹

Ni da sa kila ni sa dina na noda lotu meda sa qai tamata soli keda dina duadua ena delai vuravura oqo ki na inaki eda sa mai ciqoma oqo. Na noda sa kila na veika eda cakava tiko, se e dodonu meda kila, ni kosipeli eda sa mai ciqoma oqo sa yalataka tiko ki na yalo kecega, sa rawa vua me vinakata se gadreva, kevaka eda sa yalodina tiko, meda sa qai yalodina sara, dina, ka kaukauwa ka gugumatua ena noda vakayacora na inaki kei na gagadre ni Turaga ena Nona vakatakila mai ena veigauna yadua mai vei ira na Nona italai. Meda sa qai kakua ni batabata se katakata se vakawalena na noda itavi, ia meda sa qai saga ena noda igu, kaukauwa kei na yaloda taucoko meda kila vakavinaka na yalo ni veikacivi kei na ituvaki ni cakacaka eda sa mai vakacolati kina.

Ena gauna a tiko kina o Jisu e vuravura, a vakaroti iratou na Nona tisaipeli mera lako ka vunautaka yani na kosipeli ka kakua ni kauta e dua na ilavo ena taga se taga ni vaqa, me ratou kakua ni lomaocaocataka na veika me ratou kania, se gunuva, se na cava me ratou na vakaisulu kina; ia me ratou lako ga yani ka tukuna na veika sa vakatakilai vei iratou. Ni ratou sa cakava oqo e ratou sa mai taukena kina na veivakalougatataki ni Kalou sa Cecere Sara, ka ratou na rawata rawa na nodratou cakacaka. E ratou sa na vakayacora rawa; sa sega na kaukauwa me takosova rawa na nodratou salatu ka tarova na nodratou tatamusuki rawa-ka sa nuitaki tu baleta ga ni ratou a gole yani ena kaukauwa ni Kalou sa Cecere Sara me ratou vakayacora na Nona lewa, ka sa Nona cakacaka me na tokona ka totaki iratou ka solia vei iratou na ivurevure kece sara ni rawa-ka. Mai na nodratou talairawarawa ki na ivakaro ni Turaga e ratou sa mai taukena kina na veivakalougatataki ni bula oqo ka nodratou na madigi ni lamata cake mai ena mataka ni imatai ni tucaketale, ka sa vakadeitaki vei iratou ni sa sega ni rawa ki na dua na kaukauwa e vuravura me saqata rawa na nodratou cakacaka. Oqo na veika e rawa ni yaco e dodonu meu a taleitaka keu a taura tu vakakina na nodratou itutu, se ena dua tale na itutu cava ga, se kivua e dua sa vakanananu kina vakabibi ni sa ka talei sara na vakasama ni rawa-ka cecere ena cakacaka cava ga.

Ia ke yaco vei iratou na iapositolo, me ratou sega ni cakava na veika sa vakaroti vei iratou, ka raitayaloyalotaka me vakayacori e duatani tale na ka, sa rawa me ratou vakayacora rawa na kena inaki vata ga, e ratou na sega ni rawata rawa vakavinaka na nodratou veiqaravi, ka sega talega ni ratou rawata na veivakadeitaki ni rawa-ka o ya ena veivakatovolei kei na veivakacacani taucoko e ratou na sotava ni ratou sa vakabauta sara ni sa dua na ivurevure tudei ni marau kei na kune vakacegu vei iratou.

… Ke ra raitayalotalotaka na iapositolo se vitusagavulu ena gauna i Jisu ni sa rawa mera vakayacora rawa na ilesilesi sa soli vei ira ena nodra tara e dua na waqa me vaka a cakava o Noa, se tara na ilololo ni qereni ka vakatawani qereni me vaka a cakava o Josefa ena cala sara na nodra nanuma.

Ena vanua o Ijipita a kacivi kina o Josefa me vakayacora e dua na mataqali itavi duatani, ka sa gadrevi sara vua. A sega ni kacivi o koya me vunautaka na kosipeli ka me kakua ni kauta na taga ni ilavo se taga ni vaqa; ia me tara na ilololo ni qereni, ka me vakauqeta vakalevu sara na Tui, ka mera maroroya o ira na turaga dokai kei ira na lewenivanua e Ijipita na qereni ka taqomaki mai na dausiga. … Ia vakacava beka ke a lako i cakacaka o Josefa me laki taya e dua na waqa, ena sega ni ciqomi koya na Turaga, ena sega talega ni vakabulai ira na lewenivanua e Ijipita se vale nei tamana. Ena gauna sa vakaroti kina o Noa me taya e dua na waqa, vakacava beka ke a gole me laki tara na ilololo ni qereni, sa na sega kina ni vakabulai o koya kei na nona matavuvale. Ia me baleti keda, ni da sa gadrevi meda cakava na noda itavi, … se cava ga na veika sa gadrevi meda na cakava ena loma ni matanitu ni Kalou sa Cecere Sara, sa dodonu sara meda lako tu ena yalo ni gagadre oqo ka vakayacori ira kevaka meda rawata na kaukauwa kei na veivakauqeti ni noda Kalou.¹⁰ [Raica na vakatutu 5 ena tabana e 211.]

Na cakacaka ni Turaga e dau dredre ena so na gauna, ia e dau kauta mai na reki cecere.

Eda sotava na veika e vuqa e veiwekani kei na cakacaka oqo ka ra sega ni vinaka, ia era semati tu kina na marau cecere. Ni da raicalesu na veika eda sa gugumatua mai kina meda sa soli keda ki na inaki dina ka maroroya tiko na noda veiyalayalati, eda na reki vakalevu, baleta na yalo ni noda veikacivi sa ka bibi sara vei keda, ni sega na yalo oqo eda na sega ni rawa meda lako vata tiko kei na matanitu ni Kalou.¹¹

E dodonu meda vakavouya na noda veiyalayalati e mata ni Kalou kei ira na agilosi tabu, ni da na cakava, ni sa noda dauveivuke na Kalou, ka meda yalodina vakalevu cake ena qaravi Koya ena veiyabaki mai oqo mai na kena eda a cakava taumada, ka yaco ki na noda bula yadua, noda ivalavala kei na yalo kei na veivakauqeti eda vakayacora tiko me sa muavata tiko ki na ibole oqo, “Na Matanitu ni Kalou se sega.” Au sa nuitaka … meda sa soli keda taucoko ki na cakacaka ni Kalou ena kena tauyavutaki na Nona Saioni ena vuravura oqo, ka cakacaka vagumatua yani ena vuku ga ni dina kei na valavala dodonu ena vuravura oqo, me yacova ni sa ka ni reki vei keda meda vakaitavi kina, ka me sa yaco me ivakarau tudei vei keda meda qarava na Kalou ka maroroya na Nona vunau, ka muria na lawa vakasilesitieli ena noda vakasama kei na veika eda cakava; ka meda vakila na Yalo Tabu e yaloda ka da rawai vuravura rawa kina ka tauyavutaka ena noda vakasama na lawa vakasilesitieli ka me da dau bulataka talega; ka me rawa nida kilai keda vakakina na noda madigi vinaka eso ka me rawa kina ena bula oqo meda taukena e dua na iwase levu ni veivakalougatataki e umanaki tiko ena lawa vakasilesitieli, ka na laki marautaki ena lagilagi vakasilesitieli.¹² [Raica na vakatutu ena tabana e 212.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Raicalesu na itukutuku ena tabana e 201. Na vosa cava beka mo na vakayagataka mo vakamacalataka kina na ivakarau ni nona qarava na Turaga o Lorenzo Snow? Vakasamataka mada na veika o rawa ni cakava mo muria kina na nona ivakaraitaki.
Taurivaka na wase e tekivu tiko ena tabana e 202. Na cava o nanuma kina ni noda lewena na Lotu ena kauta mai e levu na itavi cecere? Na cava na kena ibalebale vei iko mo dua e matataka na Karisito?
A vakavulica o Peresitedi Snow ni noda veikacivi ena Lotu sa gauna vinaka meda “veivuke ki na veivakabulai” vei ira na luve ni Kalou (tabana e 203–05). Ena rawa vakacava ki na kila oqo me veisautaka na sala ni noda veiqaravi ena Lotu?
E kaya o Peresitedi Snow ni dodonu meda veiqaravi vagumatua sara, se cava ga na lailai ni noda itavi (tabana e 205–8). Ena gauna cava beka o a raica kina e dua ni a doka na nona veikacivi se ilesilesi lailai?
Wilika na iwasewase e tekivu tiko ena tabana e 209. Ena sala cava e dau vakauqeta kina na noda veiqaravi na vakabauta, kaukauwa, kei na yalomamarau?
Wilika na iotioti ni iwasewase ena wase (tabana e 210–11). Ena gauna cava o sa bau rekitaka kina na veiqaravi ki na matanitu ni Turaga? Eda na kunea vakacava na marau ena noda veiqaravi ena gauna mada ga e sega ni ka marautaki na noda cakacaka? Na cava e rawa ni da cakava meda vukei ira kina na gone kei ira na itabagone mera qarava na Turaga ena yalodina?

iVolanikalou Veisemati: Same 100:2; 1 Korinica 12:12–31; Jekope 1:6–7;2:3; Mosaia 4:26–27 Mosaia 4:26–27; V&V 64:33–34; 72:3; 107:99–100; 121:34–36

Veivuke ena Veivakavulici: “Mo dau vakarorogo vinaka ki na nodra soli vakasama na nomu lewenikalasi’. Na nomu ivakaraitaki ena vakauqeti ira mera dau vakarorogo vakavinaka vei ira e so. Ke sega ni matata vei iko na nona vakasama e dua na lewenikalasi, mo dau taro. O na rairai kaya vakaoqo, ‘Au sega ni kila. E rawa beka ni o vakamacalataka tale mai?’ se ‘O rawa beka ni o solia e dua na ivakaraitaki ni ka o nanuma tiko?’” (Veituberi, Me iLutua ni Noda Bula, 74).

Elder Lorenzo Snow

“Kevaka ko sa tu ena ituvatuva ni nomu itavi ko sa taukena tu na ka e sega ni solia rawa se kauta tani rawa mai vei iko o vuravura.”