Wase 22

Caka Vinaka vei Ira na Tani

“Bucina na yalo ni loloma cecere; vakarau mo cakava vei ira na tani na veika ko na gadreva mera cakava vei iko kevaka de na mani veisau na matanicagi.”

Mai na Bula nei Lorenzo Snow

O Lorenzo Snow kei iratou na nona matavuvale eratou a tiki ni ilawalawa ni Yalododonu Edaidai ka ra a biubiu taumada mai Nauvoo, Illinois. Era a naulu vata yani ki na ra kei na so tale na matavuvale mai na yasana ko Iowa ena Feperueri 1846. E a dredre na nodra itosotoso ena vuku ni draki—ka ra lakova e veisiga na uca, na ucacevata kei na soso.

Ena dua na siga ni ratou lako tiko na matavuvale na Smith, sa lako mai e dua na lewe ni ilakolako me kere veivuke vei iratou. Vola vakaoqo o Lorenzo Snow ena nona ivola ni veisiga ni dua na tamata “e mai kerea me usa na nona kato ena neitou qiqi levu, ka ni sega tale ni dua na vanua ena rawa ni usa tiko kina.” Na qiqi levu sa“bau oso vinaka sara tu ga ka sa veirauti sara ga na kena iusana ena neitou sa lako tu yani,”e a nanuma lesu o Lorenzo, ia, “au tukuna ga vua me biuta mai loma ka mai tomani keitou.”

Ena bogi ka tarava e a sotava na matavuvale na ka e vakatoka o Lorenzo me “dua na ka dredre sara”: e a ramusu na isema-kaukamea (axle) ni nodratou qiqi levu. Tomana ka kaya: “E a taubi sara toka na uca ka sa bau batabata sara toka ga. Keitou sa mai vakaduria yani na neitou valelaca ka vakawaqa buka sara. … Sa bau titobu sara toka na wai ni uca kei na soso ka sega ni rawa me keitou yaco kina qiqi levu ka sega ni suasua. … Keitou sa rauta qo ni tinikalima na maile mai na keba ka via toka ena ciwa kina tini mai na imatai ni vale, ka sega ni dua vei keitou e dauniripea, ka kena irairai ni sa na taura toka e dua na gauna me qai ripea rawa na neitou qiqi levu.”

E a sega ni namaki ni na yaco mai na veivuke mai vua na tamata ka keitou a vukei koya ena siga yani ki liu. “Au a vakanauma sara tiko vakabibi na ka sa mai yaco,” kaya o Lorenzo, “sa basika mai ka kaya ni nona cakacaka sara ga na caka kareti ka rawa ni na ripeataka tale na neitou qiqi levu. … Ni sa na veisau ga na draki, sa na tekivu me ripeataka o baraca Wilson (ni o ya na yaca ni tamata ka keitou a vukea taumada) ena nona sa cakava e dua na isema kau ka vinaka cake sara mai na kena kau a sa musuka. Ni sa ripea oti na neitou qiqi levu, keitou sa biubiu sara ga, ni keitou sa mai tu eke ena vuku ni uca kei na soso.”

E a sotava o Lorenzo Snow e dua na lesoni, me baleta na veiqaravi kei na veivakaitokanitaki. Vola ena nona ivola ni veisiga, “Ni ko veivukei, ko na vukei lesu tale mai.”¹ [Raica na vakatutu 1 ena tabana e 290.]

iVakavuvuli nei Lorenzo Snow

Eda luvena kecega na Tamada Vakalomalagi, ka da sa vakau mai ki vuravura meda mai caka vinaka vei keda kece sara.

E dua ga na Tamada ena vuravura vaka-silesitieli. … Kevaka meda sa veikilai tu me vaka na ka e a vinakati, … na noda yalololoma ena laveti cake sara mai na kena sa tu ena gauna oqo, ka na levu sara vei keda yadua ena gadreva me na sasaga me caka vinaka vei ira na wekana, na ka mera cakava me lailai kina na rarawa ka saga me ra dina vakalevu cake, ka saga talega mera na vakaseyavutaka na butobuto mai na nodra vakasama. Kevaka meda na veikilai vakavinaka kei na noda sa mai veiwekani sara e dodonu meda na duatani toka mai na ka eda sa cakava tiko; ia na kila oqo ena qai rawa walega ni da sa rawata na Yalo ni bula, kei na noda sa sasagataka meda veivuketaka na buladodonu.²

Eda sa talai mai ki vuravura meda mai caka vinaka vei ira na tani; ia ni da sa caka vinaka vei ira na tani eda na caka vinaka vei keda. Meda sasaga meda na raica tu ga na veika oqo, na tagane vakawati vei watina, na yalewa vakawati vei watina, o ira na gone vei ira na nodra itubutubu, kei ira na itubutubu vei ira na luvedra. Ena dau tu ga na gauna meda na caka vinaka kina vei ira na tani.³

Au masu vua na Kalou, ena yaca i Jisu, ni o kemuni kei au e daru na tovolea ena veisiga meda na tara cake na noda vakabauta, ka tovolea meda na vinaka cake vakalailai nikua mai na siga ena noa, ka sasagataka meda na lomani ira cake vakalevu na wekada, me vaka sa tukuni ni oqo era vakarurugi kece kina na parofita, “mera na lomana na Turaga na Kalou, ena noda kaukauwa taucoko, ena noda nanuma kecega, kei na noda igu taucoko, vakakina o ira na wekada me vakataki keda.” Raica na Maciu 22:37–40.] “Meda cakava vei ira na tani me vaka era cakava mai veikeda.” Oqo me vaka sa tu ena lawa kei ira na parofita. Raica na Maciu 11:28.] Oqo na ivakavuvuli meda na vulica vakaidina sara. … Meda na veitokani kei ira na tamata ena veivanua kecega. E sega ni dua na Yalododonu Edaidai ena cata na vuravura; ia, eda sa itokani ki vuravura, ka sa noda ivotavota o ya, me vaka na ka sa kilai tu. Meda vulica meda vakatetea na yalo ni loloma ka saga meda veivuke vei ira na tamata kecega. Oqo na inaki ni Yalododonu Edaidai—meda kakua ni maroroya tu ga vei keda, ia meda vakatetea yani, me vaka ni na gadrevi tu mai vei ira na tamata kecega.⁴

Mo buladodonu, yalovinka ka yalololoma, ka bulataka e dua na bula e vakalou ena roka kece ni nomu bula—kei na veika kece o cakava ka vakayacora. Bucina cake e dua na yalo ni loloma; vakarau mo vakayacora vei ira na tani na veika ko na gadreva mera cakava vei iko de na mani veisau na matanicagi. Sasagataka mo vakairogorogo, sega ena veika vakavuravura, ia ena mata ni Kalou, ka mo vakairogorogo ena nomu, “Lomana na Turaga na nomu Kalou ena lomamu taucoko, vakasama kei na kaukauwa kecega, vakakina o ira na wekamu.” Sa dodonu mo lomani ira na tamata baleta ni ra tacimu, ka luvena na Kalou. Masulaka na yalo ni yalololoma, na kena vakatetei na yalo kei na vakilai, kei na kaukauwa vakakina na kena rawa na veiqaravi me baleta na nona matanitu na Mesaia.⁵ [Raica na Vakatutu 2 ena tabana e 290.]

Ena toso cake na noda marau ni da vukei ira na tani mera sotava na bula marau.

Me tiko vei keda na gagadre ni vinakata na caka vinaka vei ira na tani. Kua soti ni da vakasamataki keda vakalevu. Na veika vinaka ena yaco mai ni da vakasamataki ira tiko era tu ena taudaku ni noda bula, vaka kina na noda sassga meda vakamarautaki ira na tani kei na noda sasaga mera vukei me ra toro voleka vua na Turaga. … Ni ko sa via yalolailai mai, vakararai wavoki mo raica e dua e ca sara vakalevu na ka e sotava tiko mai vei iko; lako vua ka taroga se cava e leqa, ka qai sasagataka mo walia me vaka na yalomatua sa vakalougatataki iko kina na Turaga, ka ko na qai kila, ni nomu yalolailai sa seyavu ko sa yalovinaka sara mai, sa ovici iko mai na Yalo ni Turaga ka sa vaka me serau wavokiti iko na veika kecega.⁶ [Raica na vakatutu 3 ena tabana e 290.]

Ni da raica yani na veika me baleti ira na tani, eda na tosoya cake sara vakatotolo na noda ituvaki ni bula.

Dua na ka talei vua e dua na gonetagane se dua na goneyalewa me na saga me raica, ena nona vinakata me vakairogorogo, o ya me na saga me ra vakairogoro talega na tani, ka me na saga me ra na vinaka cake na tani. Na sala vinaka duadua meda na vinaka cake kina sa ikoya meda na caka vinaka vei ira na tani. Dau nanuma tikoga na ka oqo.⁷

Ena nona sasaga me vuli e dua na tamata e dodonu me na cakacaka tikoga, ia ni sa cava na nona vuli me na saga me vulica tale, ka cakacaka tikoga me rawa ni na kena dau na cakacaka o ya, ka na sega ni rawa ni na vakadewataka yani na kila oqori ena nona saga tikoga me rawata. Laivi koya me lako yani ki cakacaka kei ira na nona itokani ka saga mera na kila na veika sa vulica o koya, ko na qai raica ni na via vinaka na nodra ivakarau ni ciqoma na ka era na vulica mai vua, ni na sega soti ni taucoko na veika era na vulica kevaka me na cakacaka tikoga ka sega ni vakavulica na veika e sa vulica mai o koya. Ni dua e sa qasenivuli oti ena kila vinaka tiko na ka au via vakaraitaka tiko yani. …

Me nanumi tiko ni ra tiko na tamata era se bera ni vakatorocaketaki ena nodra kila-ka, vuku, kei na yalomatua, ka qai laivi koya me wasea na kila-ka kei na kaukauwa o ya vei ira na nona itokani kei na tacina, me vaka na nodra sa vakatorocaketaki o ira na vakaoqori, ka ni sa cakava oqori sa na qai raica ni sa na vakarabailevutaki na nona vakasama, vakakina na rarama kei na kila-ka e a sa rawata sa na vakatorocaketaki sara vakatotolo. …

Kevaka o vinakata mo vakadeitaka na veitokani kei na veilomani mai vei ira na nomu itokani, vakayagataka ga na rarama ni veika o sa vakalougatataki kina, ena nomu nanuma ni kalougata qori e lako mai vua na Kalou, ka nanuma ni o sa cakava tiko e dua na ka e dodonu me cakava na tamata kece sara. …

Ni gadreva e dua me rawata na veivakalougatataki cecere, kei na nona veivakadonui na Kalou sa Cecere, vakakina na nona vakatorocaketaka tiko na yalododonu, sa dodonu me cakava na veika kece ena yalovinaka. Laivi koya me cakacaka ena yalodina ni solibula me baleti ira na nona itokani. Kevaka e gadreva me tosoi koya cake, na ivakavuvuli vinaka duadua me na tara cake kina sa ikoya vukei ira na nona itokani. …

… Vakarabailevutaka na nomu vakasama mo kila kina na veika era na gadreva na nomu itokani, ka o na kila na ka era na gadreva na nomu ilawalawa mera na vukei kina, kei na nomu sa cakava na veika oqori ko na raica ni veika sara ga o gadreva tiko sa na lako mai vakarawarawa sara vei iko, kevaka ena mani vakacava sara na veika ko sa na cakacakataka vakataki iko me baleta na nodra tiko vinaka na nomu itokani. Au kila ni oqo e dua na ivakavuvuli vinaka ka bibi sara.⁸[Raica na vakatutu 4 ena tabana e 290.]

Ni da na solibula ena vukudra na tani, eda na rawati lomalagi e lomada.

Meda na saga meda vakila… ni so na tamata ka sega ni o keda; ka dodonu meda raica e yaloda na ka era na gadreva, ka da na qai vakalou mai na veika eda sotava tiko nikua.

… Ena vinakati na solibula yadua me baleti ira e gadrevi tiko meda na veimaliwai. Eda raica oqo vua na iVakabula, vakakina vei tacida o Josefa, ka da raica talega vua na noda Peresitedi [Brigham Young]. O Jisu, na tacida o Josefa, kei tacida o Brigham eratou a sa dau tu vakarau me ratou solia na veika kece e tu vei iratou baleti ira na tamata; o ya na ka e solia na kaukauwa vei Brigham mai vua na Kalou, vakakina mai vei ira na tamata, na veika ga e dau vakaraitaka ena veigauna ena nona solibula. Ena vakakina vei ira na tani; me vaka na nodra rawa ni solibula baleti ira na tani, me ra rawa ni voleka vua na Kalou, kei na kalougata ni vuravura tawamudu me nodra, o ira sara ga era na rawata na kena kalougata ena bula qo ka vakakina ena bula sa bera mai. Me vaka ga o a cakava … nomu solibula baleta e duatani tale, me na vaka sara ga o ya na nomu toso ena veika ni Kalou. Oqo kevaka o vinakata me mai tiko vei iko o lomalagi kei na nomu sasaga mo rawati lomalagi, mo na saga me vakataki ira na agilosi mai lagi. Kevaka o vinakata mo kila se cava mo cakava mo tosocake kina, au na tukuna vei iko, sa i koya qo, mo na saga mo bula vakalou.

… Na tamata yadua ena rawa ni marautaka na draki kei lomalagi ena vanua cava ga e tiko kina. Oqo na ka meda sa na cakava; me da sa na cakacakataka meda sa tauyavutaki lomalagi e vuravura, kua soti ni kauwaitaki na veika ca e vakavolivoliti keda, na vuni ca ni wavokiti keda, kei na ivalavala ca sa tu oqo, meda sa na sasagataka ga me tauyavu o lomalagi e vuravura.

Ena sega ni marautaki lomalagi e dua na tamata me yacova ni sa vulica na kena icakacaka me na rawata, ka muria na kena ivakavuvuli. Vakasamataka mada e so na tamata ka qai nanuma na nodra ituvaki ni bula ena 20 na yabaki sa oti, … ena gauna era a yalomarau tu kina, bula vakacegu, bula marau tu ena gauna o ya ka dina ga ni ra a sega ni tu vinaka kina. Ena gauna oqo era sa na rawata na veika vinaka mera rawa ni bula marau ka bula vakacegu kina, ia kevaka mera sega ni rawata na vakaitokani, na veivakalomavinakataki mai vei ira na tacidra, era na bula rarawa voli ga mai na loma ni 20 na yabaki sa oti.

… Me vakalougatataki kemuni na taciqu kei na ganequ na Turaga, ka mo ni nanuma tiko veika oqo ka mo ni na veilomani, ka bula me na rawa ni vakalougatataki keda na Turaga ena yalomatua kei na igu meda na veidinadinati vakalevu sara.⁹ [Raica na vakatutu 5 ena tabana e 290.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Raicalesu na italanoa ena tabana e 283 kei 285. Na gauna cava o raica kina ni “soli e dua na veivuke ena dolava na katuba ni vukei lesu”?
Vakananumi keda o Peresitedi Snow ni o keda kece eda luvena na Kalou (tabana e 285–86). Ena vakayarayarataki keda vakacava kina noda veimaliwai kei ira na tamata na kila na veika vakaoqo? Na isolisoli cava e tiko ena iSoqosoqo ni Veivukei ena solia vei ira na marama mera caka vinaka vei ira na tani? Na isolisoli cava e tiko ena kuoramu ni matabete ena solia vei ira na turaga mera caka vinaka vei ira na tani?
Vakasamataka na iotioti ni parakaravu ena tabana e 286. Cava na vuna e toso cake kina noda marau ni da vukei ira e so mera marau? Era na vukei ira vakacava na luvedra na itubutubu mera vulica na dina oqo?
Na cava o nanuma kina ni tosocake na noda yalomatua ni da wasea noda kila-ka vei ira na tani? (Ena so na ivakaraitaki, raica na tabana e 286–88.) Na cava o sa bau sotava ka sa vakaraitaka vei iko na dina ni veika e vakatavuvulitaki tiko eke?
Vulica na iwase ka tekivu ena tabana e 289. Na cava na vuna o nanuma kina ni tiko ena dua na itavi rawarawa e qaravi na kaukauwa me kauti keda yani vakavoleka ki lomalagi? Ena nomu vakananuma na itukutuku e tiko ena iwasewase oqo, vakasamataka na nomu rawa ni cakava na nomu vuvale me vakataki lomalgi.

iVolanikalou veisemati: Maciu 25:31–45; Luke 6:36–38; Mosaia 2:17; 4:14–27; V&V 81:5; 82:3

iVukevuke ni Veivakavulici: “Ena vinaka cake me tauri ga mai e vica na vakasama ka veitalanoataka sara vakavinaka—ka vulica vinaka—mai na vuli vakariri, ena vakavulici ni veivosa kecega ena ivolavakarau. … Ena gadrevi me qaravi vakamalua sara kevaka mo na vinakata me tiko na Yalo ni Turaga ena nomu kalasi” (Jeffrey R. Holland, “Teaching and Learning in the Church,” Ensign, June 2007, 91).

Eratou a vukei na matavuvale na Smith mai vua e dua eratou a vukea taumada ena gauna eratou a takosova tiko kina na yasana o Iowa.

“Vakarabailevutaka na nomu vakasama me rawa ni ko na kila, ka raica na veivuke era na gadreva tiko na nomu itokani era bula vakavolivoliti iko.”