Wase 5

Nodra iCavacava Lagilagi na Yalodina

“Sa dua na marau veivakurabuitaki noda tukuna na veika cecere e nakita tu na Kalou me solia vei ira na Luvena tagane kei na yalewa, ka da na rawata kevaka eda yalodina.”

Mai na Bula nei Lorenzo Snow

Ena vulaitubutubu ni 1840, a tu mai Nauvoo, Illinois o Lorenze Snow, vakavakarau me biubiu ena kaulotu ki Igiladi. A sikova na vale nei nona itokani o Henry G. Sherwood, qai kerei Baraca Sherwood me vakamacalataka e dua na iyatuvosa ni ivolanikalou. “Ni rogoca vakamatua toka nona ivakamacala,”sega ni dede a nanuma lesu tale o Peresitedi Snow, “na Yalo ni Turaga e cegu vakaukauwa sara toka ga vei au—na mata ni noqu kila ka e sa tadola, kau raica na kena matata me vaka na matanisiga ena sigalevu tutu, ena kurabui kei na kidacala, na gaunisala ni Kalou kei na tamata. Au bulia e rua na ka oqo me vakamacalataka na ivakatakila, me vaka a vakaraitaki vei au. …

“Me vaka na tamata ena gauna oqo, a vaka kina na Kalou e liu:

“Me vaka na Kalou ena gauna oqo, e rawa me vaka kina na tamata.”¹

Nona vakila ni a ciqoma “e dua na veitaratara tabu”ni dodonu me qarauna vakavinaka, o Lorenzo Snow a sega ni vakavulica vakararaba na ivunau me yacova nona kila ni sa vakatavulica oti na Parofita o Josefa Simici.² Nona sa qai kila ni ivunau sa ikoya e dua na kila ka raraba, a yaco me vakadinadinataka e veigauna.

Me kena ikuri nona cakava na dina oqo me dua na iulutaga ena vuqa nona ivunau, a maroroya me iulutaga ni nona bula. A kaya na luvena tagane o LeRoi, “Na vakatakilai ni dina oqo e vakurabuitaki Lorenzo Snow vakalevu cake mai na veika kece tale beka eso; na dina oqo e tarai koya sara vakabibi ka yaco me vakauqeta nona bula ka solia vua nona kila raraba vaka ikoya na nona gauna cecere sa tu ki liu kei na kaukauwa ni kaulotu kei na cakacaka ni Lotu.”³ Sa ikoya na nona “cina ka idusidusi e veigauna” kei na “dua na kalokalo serau, vakararamataki koya e veigauna taucoko—e lomana, e yalona, ka curumi koya taucoko tu.”⁴

Ena wase oqo, e vakatavulica o Peresitedi Snow na ivunau ni rawa me da yaco me da vaka na Tamada Vakalomalagi. Ena wase 6, e solia na ivakasala e rawa ena noda cakava rawa vakacava ena noda bula na ivunau oqo.

iVakavuvuli nei Lorenzo Snow

Baleta ni tu vei keda na ilesilesi vakalou, e rawa me da yaco me da vaka na Tamada mai Lomalagi.

Eda a sucu ena ivatuka ni Kalou na Tamada; ka buli keda o koya me da vakataki koya. E dua tiko na ituvatuva vakalou ena ituvatuva ni noda inaki vakayalo; ena noda sucu vakayalo e vakadewataka mai vei keda na Tamada sai koya na rawa-ka, kaukauwa kei na veika e taukena o koya vakataki koya, na kena levu me vaka ga e taukena e dua na gone ena ketei tinana, e dina ga ni dua na ituvaki e sega ni taucoko, na veika, ena kaukauwa kei na kena malumalumu vakaitubutubu.⁵

Au vakabauta ni da luvena tagane kei na yalewa na Kalou, ka solia vei keda o Koya na levu ni vuku kei na kila ka tawa yalani, baleta ni solia vei keda o Koya e dua na kena iwase Vakaikoya. A tukuni vei keda ni da a buli ena Kena ivatuka, ka da kunea ni dua na itovo kilai tani ni tawa mate rawa ena yalovakatamata. E dua na ituvatuva vakayalo ena loma ni valecavu oqo [na ituvaki vakayago], kei na ituvatuva vakayalo oqori e tiko kina na kena vakalou vakaikoya, dina ga ni rairai vagonegonea na kena ituvaki; ia e tiko ga vakaikoya na rawaka me vakatorocaketaki ka toso ki liu, me vaka na gone dramidrami ka ciqoma na bula mai vei tinana. E dina ga ni gone dramidrami e rawa me lecaika vakalevu, ia era tu eso na ka e rawa kina me lako sivita yani na veimataqali veivakatovolei ni gone, ki na yalomatua me rawa kina ni tubu ki na dua na ka uasivi cake ka sa taucoko na kena qoroi, vakatauvatani vata kei na lecaika ni vagonegonea.⁶

E noda na bula vakalou, e tiko vei keda na bula ni tawa mate rawa; tawa mate rawa na keda ituvaki vakayalo; e sega ni rawa me vakarusai; e sega ni rawa ni vakaqeyavutaki. Eda na bula mai ena tawamudu taucoko ki na tawamudu taucoko.⁷

E sa dua na marau veivakurabuitaki me tukuni na veika cecere e vakatura na Kalou me solia kivei ira na Luvena tagane kei na yalewa, ka na tu vei keda kevaka eda yalodina. … Na noda ilakolako ena gaunisala ni bula vakacerecerei ena kauta mai vei keda na taucoko ni noda Turaga o Jisu Karisito, ni da tu ena iserau nei Tamada, ni da ciqoma na Nona taucoko, ni da marautaka noda vakalevutaki ira na noda kawa era muri mai me tawamudu, me ra rekitaka na isoqosoqo taleitaki oqori ka da a taukena tu ena bula oqo, noda vakaluveni tagane kei na yalewa, na turaga watida kei na marama watida, vakavolivoliti ena taucoko ni marau ka rawa me solia o lomalagi, e vakalagilagia na yagoda kivua na i Vakabula, galala mai na mate kei na tauvimate kece ga ni bula, ka galala mai na yalorarawa kei na veivakasosataki kei na solibula sega ni taleitaki eda cakava tiko eke.⁸

Ena kena tomani na inaki ni gugumatua sa ciqoma kina o Tamada Vakalomalagi na bula vakalou kei na lagilagi ka dusimaki keda ena gaunisala vata ga oqori, dina ga ni sa lako mai ena kaukauwa kei na iukuuku levu, e kaya, “lako cake mai ka kauta vata mai na lagilagi kei na marau vata ga au taukena.”⁹

O ira na tamata ni Kalou era vakamareqeti ena Nona iserau; Nona lomani ira ena vosota e veigauna, kei na Nona igu kei na kaukauwa kei na veikauwaitaki, era na qaqa ka rawa na ka kece ga. Era sa Luvena, buli ena Nona ivatuka ka lako ena talairawarawa ki na Nona lawa ka yaco me ra vakataki Koya. …

… Oqo na nodra icavaca cecere na luve ni Kalou, o ira era na dau vorata rawa na ka, o ira era talairawarawa ki na Nona ivakaro, o ira era vakasavasavataki ira me vaka ni o Koya e savasava. Era yaco me ra vakataki Koya; era na raici Koya me vaka ga ni o Koya; era na raica na Matana ka vakacegu vata kei Koya ena Nona lagilagi, yaco me vakataki Koya ena kena imatailalai kece.¹⁰ [Raica na vakatutu 1 ena tabana e 90.]

E vakavulica na ivolanikalou noda rawa ni rawata vakalou.

Sa biuta vei keda na Turaga na veivakauqeti ena kena ivakarau kece sara. Ena ivakatakila a solia vei keda na Kalou, eda kunea na ka e rawa me rawata e dua na tamata ena nona lakova na gaunisala ni kila ka oqo ka dusimaki mai na Yalo ni Kalou. Noqu lewena na Lotu oqo e se bera[ni dede] sa vakamatatataki vei au na cava e rawa ni yaco vei dua na tamata ena kena tomani tiko na talairawarawa ki na Kosipeli ni Luve ni Kalou. Na kila ka oqori e sa kalokalo ni mataqu e veigauna, ka sa vakavuna noqu tovolea meu qarauna na veika au cakava ni sa dodonu ka veidonui mai vua na Kalou. … Kena irairai, ni cava taucoko na vuli eda cakava ena veika me baleta na vuravura vakasilesitieli ni so na Yalododonu Edaidai era sa vakacegu sara ga ena nodra kila walega ni cakacaka e dina, ena gauna o tukuna kina vei ira me baleta na gauna cecere sa tu ki liu e vaka me ra kidroa, ka nanuma ni sega ni vakaibalebale vei ira. O Jone na Daunivakatakila, ena ikatolu ni wase ni nona ivola, e kaya:

“Eda sa qai luve ni Kalou.” [1 Joni 3:2.]

… Ka toso sara:

“Ia sa sega ni rairai se da na vakaevei mai muri: oqo ga eda sa kila, ni na rairai mai ko Koya, eda na tautauvata kaya; ni da na raica na matana dina.

“Ia na tamata yadua sa tu vua na inuinui oqo vei Koya, sa vakasavasavataki koya, me vaka sa savasava ko Koya.” [Raica na 1 Joni 3:2–3.]

… A vakadewataka vei keda na Yalo ni Kalou ni sa tu na dina kaukauwa ka bibi ena mataqali ivakamacala oqo. Nona vosa tiko o Paula, kivei ira na kai Filipai, a vakatututaka me ra teivaka na gagadre ka sa duatani vei ira na tamata ena gauna oqo, ia e sega kivei ira na Yalododonu Edaidai, vakabibi kivei ira era sega ni vakacegu me ra vaka kina ia me ra vaka na gonelalai ena kila ka me baleta na Kalou. E kaya:

“Me tiko ena lomamudou na yalo oqo ka tiko tale ga vei Karisito Jisu:

“O koya, ni sa itovo vata kei na Kalou, sa sega ni vakasama ni sa butako ni sa vakatauvatani kei na Kalou.” [Filipai 2:5–6.]

… Sa ikoya [oqo] na ka a vakatavulica o Paula, ka kila na veika e tukuna tiko. Sa kau cake mada ko koya ki na ikatolu ni lomalagi ka rogoca na vosa, e tukuna vei keda, ni sa sega ni tara me tukuna na tamata [raica na 2 Koronica 12:1–7]. … Ena cala beka vei keda me da kerei ira na tamata eke me ra teivaka na gagadre ni itovo oqo? Era tu na iwiliwili ni vosa ena i Vola Tabu, vakabibi ena Veiyalayalati Vou, ni rairai dua tani kivei ira na tamata era sega ni taukena na Yalo ni Turaga.

“O koya sa gumatua ena rawata na ka kece ga oqo.” [Ai Vakatakila 21:7.]

Na ivakamacala cava oqori? O cei e vakabauta? Kevaka e dua na tama me kaya vua na luvena tagane, “Na luvequ, mo yalodina, ka muria noqu ivakasala, kei na gauna o sa qase cake kina o na taukena na veika kece au rawata,” ena dua na kena ibalebale, se sega? Kevaka e tukuna na tama na ka dina, na luvena tagane o ya ena tu vua e dua na ka me vakayaloqaqataki koya me dau yalodina. A via vakaisini keda o Jisu ena Nona vakayagataka na ivakamacala oqo? Au na vakadeitaki kemuni ni sega ni dua na veivakaisini ena vosa. E vakadinata na ibalebale ni ka e kaya o Koya. A kaya tale, o Jisu:

“Au na solia vua sa gumatua sara me itko vata kei au ena noqu itikotiko vakaturaga, me vaka kau sa gumatua, ka tiko sobu ena itikotiko vakaturaga nei Tamaqu.” [Ai Vakatakila 3:21.]

Oqori e sa dua na ivosavosa qoroi. E tiko beka kina na dina? E dina taucoko. Sa ikoya na Turaga Cecere a kaya. E tukuni vei keda ena iVolanikalou nei Paula na iApositolo:

“Ni keitou sa kila, kevaka sa rusa na neitou vale vakavuravura o koya sa vakacevaceva, sa dua na neitou mai vua na Kalou, a vale sa sega ni caka ena liga, sa sega ni rusa rawa, mai lomalagi.” [2 Koronica 5:1.]

Au vakabauta oqori. Ena nona kaya ni o Jisu “ena vakamataliataka na yagoda sa malumalumu, me vakatauvatani kei na yagona sa vakaiukuukutaki” [Filipai 3:21] Au vakabauta tale ga oqori. O ni vakabauta li na Yalododonu Edaidai na veika au tukuna tiko? E dodonu, e dina, mo ni vakabauti ira. Vakadua tale:

“Raica ko koya sa vakabauti ira noqu tamata, sa vakabauti au;

“Ia ko koya sa vakabauti au sa vakabauti Tamaqu;

“Ia ko koya sa vakabauti Tamaqu, ena rawata na matanitu i Tamaqu, io ena soli vua na ka kece ga sa tu vei Tamaqu.” [V&V 84:36–38.]

E rawa me dua e vakasamataka eso na ka e levu cake ka rawa me soli? … E kila vakavinaka sara o Paula na veika oqo, baleta nona kaya ni a “ciciva na cere, meu tauca na cere sa kacivi au kina mai cake na Kalou ena vukui Karisito Jisu.” [Raica na Filipai 3:14.]

Ena vosa au sa cavuta oti e rawa me da raica eso na ka me baleta na ivakarau ni veikacivi cecere oqo i Karisito Jisu. …

… Au sega ni kila se lewe vica era tiko oqo ka ra sa rawata na kila ka dina ni veika oqo e lomadra. Kevaka o sa rawata, au na tukuna vei iko na cava ena yaco me kena revurevu. Me vaka a kaya o Joni:

“Ia na tamata yadua sa tu vua na inuinui oqo vei Koya, sa vakasavasavataki koya, me vaka sa savasava ko koya.” [Raica na1 Joni 3:3.]

… Sa dusimaka oti na Kalou na isau ni ilakolako ena gaunisala ni lagilagi kei na bula vakalou oqo kei na yalayala ni ra dina. E kila vakamatata tu na Turaga na cava e rawa me na cakava o Koya. E kila na iyaya cava me cakacakataka kina o Koya, ka kila vakavinaka o Koya na cava e kaya tiko. Kevaka me da cakava na itavi a lesia vei keda o Koya, kei koya sa yalodina ena bula oqo, eda na vakadeitaka ni da vakayacora na veiyalayalati oqo ena veitikina yadua, kei na kena levu cake e rawa me daru vakayacora.¹¹ [Raica na vakatutu 2 ena tabana e 99.]

Ena noda nanuma na veivakalougatataki e vakarautaka vei keda na Turaga, eda kunea na reki ena kedra maliwa ni veicolacola kei na veivakasosataki ni bula.

O ira vakayadua na Yalododonu Edaidai e rawa me ra rogoca noqu vosa e rawa ni rawata me lako mai vakamataka ena imatai ni tucaketale mai na mate ka vakalagilagi, bula vakalou ena iserau ni Kalou, taukena na dodonu ni veivosaki vata kei na Tamada ena noda veivosaki vata kei na tamada vakavuravura.¹²

E sega ni rawa me vakatikori vei ira na tamata e levu cake na ka lagilagi me vakatauvatani kei na kena e vakatikori vei ira na Yalododonu. E sega ni dua na tamata vakayago e rawa me gadreva e dua na ka e levu cake se me vakadeitaka vakalevu cake ena kena cecere duadua na vakacegu. Na veika kece me baleta na taucoko ni vakacegu, mamarau, lagilagi kei na bula vakacerecere era sa tu e matadra na Yalododonu Edaidai. E dodonu me da rekitaka na kena yalo, ka vakabulabulataka tiko veikeda. E sega ni dodonu me da vakabutobutotaka vakalailai mada ga na veika sa noda oqo ena vakayacori ni veika e sega ni vakadonui ena mata ni Turaga.¹³

Na noqu vakanuinui me baleta na bula sa bera mai e cecere sara ka lagilagi, kau tovolea meu tomana na taqomaki ni veika oqo; ka sa ikoya oqori na dodonu kei na itavi vakayadua ni Yalododonu Edaidai.¹⁴

Eda na sega ni kila taucoko sara na veika me baleta na veivakalougatataki kei na madigi vivinaka ka ra vakarautaki tu me da ciqoma ena kosipeli. Eda na sega ni kila na veika taucoko ka ra se sega ni tu e matada na veika era waraki keda tu ena vuravura tawamudu, se na veika era waraki keda tu ena bula oqo ka ra nakiti me ra toroya cake na noda vakacegu kei na mamarau ka sauma na gagadre ni lomada. …

E vakawasoma, e vuqa na veika era vakavolivoliti keda, eda dau guilecava kina vakakina na veika era se sega ni tu e matada, oti eda qai sega ni kila tu ni kosipeli e tuvai ka nakiti ena kena ivakarau me soli vei keda na veika oqori ka na kauta mai na lagilagi, na rokovi kei na bula vakacerecerei, ka na kauta mai na mamarau, vakacegu kei na lagilagi. E vaka me da guilecava na veika oqo ena kedra maliwa na veika eso kei na lomaleqataki ni bula, ka sega ni taucoko noda kila ni sa noda madigi, ka sa vakatikora na Turaga me da yacova ka muria na kosipeli o ya me rawa kina ni da kunea vei keda e veigauna na vakacegu. …

E tiko evei na vu ni rarawa? E tiko evei na vu ni nodra mata rarawa na Yalododonu? E tiko evei na vu ni tagi kei na sega ni yalovakacegu? E sega na vuna; ia sa tuvai tu e matada na bula se mate; kevaka eda tomana tiko noda yalodina eda na taukena na kaukauwa kei na lewa ni matanitu; na rarawa kei na totogi kevaka eda biuta tani na kosipeli.

Na cava ga eda na gadreva vakalevu cake mai na ka era tu ena noda vakabauta vakalotu? Kevaka eda tudei tu ena uluvatu ka da na vakamuria na Yalotabu a vakatikori e lomasereda, eda na cakava vakadodonu na sala ni noda itavi, eda na caka dodonu kivei ira era vakatikori mai vei keda, eda na caka dodonu se da tiko ena rarama se ena butobuto.

E evei na tamata e na vuki vakatikitiki me viritaka laivi na veika oqori era umani tu ena kosipeli eda a ciqoma? E tiko kina na veivakacegui, e tiko kina e dua na reki, e tiko kina na kaukauwa, e tiko kina e dua na ka me vakaceguya na yavada, e tiko kina e dua na yavu tudei me da taratara cake ka vakakina me kadre mai kina na veika e gadrevi vei keda.¹⁵

Me da kakua sara ni vakatara me buwawa na veika oqo; me ra vakabulabulataki tiko veikeda ena veisiga kei na veibogi, kau na vakadeitaka vei kemuni ni kevaka me da cakava oqo ena vakasakiti na noda tubu ena veisiga yadua kei na veiyabaki yadua ka na uasivi sara.¹⁶

Eda vakanamata kece tiko ena lagilagi valasilesitieli kei na cecere ni veika e tu e matada e sega ni vakamacalataki rawa ena vosa vakatamata. Kevaka mo na tomana tiko ena yalodina na cakacaka o vakaitavi kina, o na rawata na lagilagi oqo, ka tawamudu nomu rekitaka ena mata ni Kalou kei na Lami. Oqo e yaga me sasagataki; e yaga me solibulataki, ka na vakalougatataki na turaga se marama e yalodina ena kena rawati.¹⁷ [Raica na vakatutu 3 ena tabana e 99.]

Vakatutu ni Vuli kei na Veivakavulici

Taurivaka na vakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

E dau vakatavulica vakawasoma o Peresitedi Lorenzo Snow ni o ikeda eda luve ni Kalou (tabana e 91–93). E rawa ni tara vakacava na sala eda dau vakila kina na ka me baleti keda kei ira na tani na dina oqo? E rawa vakacava me da vukei ira na gonelalai kei na itabagone me ra nanuma ni ra luvena tagane ka luvena yalewa na Kalou?
Na cava o nanuma me baleta na ivolanikalou a cavuqaqataka o Peresitedi Snow ena noda vulica na keda ituvaki vakalou? (Raica na tabana e 93–96.)
Wilika na wasewase tekivu ena tabana e 93. E rawa vakacava kina “veika dau yaco kei na veivakasosataki ni bula” me liutaki keda me da guilecava kina na veivakalougatataki tawamudu ni kosipeli? Na cava e rawa ni da cakava me “vakabulabulataki” ka “taqomaki tikoga kina na veika sa tu e matada”? Na veisala cava soti e rawa me tara kina na ivakarau ni noda bula na noda dau nanuma tiko na noda icavacava?
Ena nomu sa vulica oti na iwase oqo, na cava o sa vulica me baleti Tamamu Vakalomalagi? Na cava o sa vulica me baleta nomu icavacava me vaka e dua na luvena yalewa se tagane na Kalou?

iVolanikalou Veisemati: Roma 8:16–17; 1 Koronica 2:9–10; Alama 5:15–16; Moronai 7:48; V&V 58:3–4; 78:17–22; 132:19–24

Veivuke ena Veivakavulici: “Solia na nomu ivakadinadina ena veigauna e vakauqeti iko kina na Yalo Tabu, me kua ni qai yaco ga ni sa tini na lesoni. Mo dau vakarautaka tale ga na gauna vei ira na nomu lewenikalasi me ra solia kina na nodra ivakadinadina” (Na Veituberi, Me iLutua Ni Noda Bula, 45).

“E sa dua na marau totoka na tukuni ni veika cecere e vakatura na Kalou me solia kivei ira na Luvena tagane kei na yalewa.”

Ena noda vulica na ivolanikalou, eda vulica na noda itovo vakalou.

Ena nona ivola, e vakadinadinataka o Paula na iApositolo noda rawa ni rawata me da yaco me da vaka na Tamada Vakalomalagi kei Jisu Karisito.