Wase 6

Yaco me da Uasivi Sara Vua na Turaga: “Vinaka Cake Vakalailai ena Veisiga Yadua”

“Kakua ni namaka mo yaco mo uasivi sara ena dua ga na gauna. Ke vakakina, ena mosi na yalomu. Mo vinaka cake nikua mai na siga ena noa, ka mo vinaka cake ni mataka mai na kemu ituvaki nikua.”

Mai na Bula nei Lorenzo Snow

A tiko ena dua na gauna o Peresitedi Lorenzo Snow ena dua na soqoni ni matabete ka ra a tucake kina e yadua na mata ni veikuoramu ni italatala qase ka tukunikataka na cakacaka era sa cakava oti na nodra kuoramu. Ni vakarorogo tiko o Peresitedi Snow vei ira na cauravou oqo, a nanuma lesu kina o koya na nona veiyabaki taumada. Ni tu me vosa, qai kaya vaqo:

“Au via tukuna e dua na ka, kevaka e rawa, o ni na sega ni guilecava rawa, au vakabauta ni rawa meu kitaka vakakina.

“Au raica rawa, me vaka au dau raica, voleka ni veigauna kece era soqoni vata kina na iTalatala qase gone sobu, ka vakakina ena veigauna kece era soqoni vata kina na iTalatala qase uabula, e dua na mataqali vakataratutu ena vosa e matanalevu. Au raica eke ena mataka nikua vei ira na cauravou era sa tucake me ra vakaraitaka na lomadra ka solia na itukutuku ni cakacaka era cakava tiko.

“Ena sega ni yali, kevaka meu na tukuna vakalailai vei kemuni na veika au sa sotava mai, ena noqu tekivu dau vosa e matanalevu, ni se bera mada ga niu iTalatala qase. Au nanuma na imatai ni gauna au kacivi kina meu wasea na noqu ivakadinadina. … Qo e dua na ka au dau rerevaka, ia ena gauna vata oqori au vakila ni sa noqu itavi meu duri cake, ia au qai waraka tiko vakabalavu. E wasea e dua na nona ivakadinadina, ka solia e dua tale na nona, ka dua tale, sa voleka ni ra sa oti kece, ia au se rere tikoga na duri. Au se bera vakadua ni vosa e matadra na lewe levu. … [e muri] Au sa qai lewa ni sa kena gauna meu duri cake kina. Au mani kitaka vakakina. Ia, na cava nomuni nanuma ena balavu ni noqu vosa? Au nanuma ni rauta ni veimama ni miniti—e sega ni rawa ni sivia na dua na miniti. Oqori na imatai ni noqu sasaga; kei na kena ikarua, au nanuma, ni via tautauvata ga. Au a madua, … ia au sa vakadeitaka vakaukauwa sara e yaloqu, ni ena gauna kece au kacivi kina meu qarava e dua na itavi vaqo se dua tale na itavi, au na cakava veitalia ga se cava e qai basika kina. Oqori e dua na tiki ni yavu ni noqu qaqa vaka iTalatala qase e Isireli.”

A tukuna o Peresitedi Snow vei ira na cauravou ni sega ni dede mai na gauna oqori, a tiko kina ena imatai ni nona soqoni vakadaukaulotu tudei. “Au sega vakadua ni se bau rerevaka vakalevu cake e dua na ka ena noqu bula me vaka ena soqoni oya,” e nanuma lesu o koya. “Au a masu ena siga taucoko, au lako taudua ka laki masu vua na Turaga. Au se bera vakadua ni bau vosa [e matanalevu] e liu, ena gauna ga ni soli ivakadinadina oya. Au rerevaka dina. Au sega ni vakabauta ni dua na tamata me a sa bau rerevaka vakalevu cake e dua na ka mai vei au ena gauna oya. A vakayacori na soqoni, ka tawa vinaka sara na rumu oya. … Au tekivu vosa kau nanuma niu a taura e rauta ni tolu na ikava ni dua na auwa.”¹ Ena dua tale na itukutuku ni soqoni vata oya, a vola kina: “Niu tu e matadra na ivavakoso oya, e dina niu sega ni kila e dua na vosa meu tukuna, niu dolava ga na gusuqu meu vosa, a tiko vata kei au vakaukauwa sara na Yalo Tabu, ka vakasinaita na noqu vakasama ena rarama ka vakadewa mai na vakasama kei na vosa matau me tukuni yani kina. Era a kurabui na tamata ka kerea me dua tale na soqoni.”²

A wasea o Peresitedi Snow na lesoni e vinakata me ra vulica na cauravou mai na veika a sotava: “Kemuni na noqu itokani gone, e tiko na madigi mo ni qaqa kina—qaqa ena kena levu ga o ni gadreva. Ni tekivu na nomuni bula o ni sa vagolea beka na yalomuni ena so na veika dredre mo ni rawata, ia e rawa ni o ni yacova yani. Na imatai beka ni sasaga me rawati na nomuni gagadre ena yaco koso, ia na nomuni sasaga tikoga ena sega beka ni yacova sara na ivakatagedegede e rawa ni vakatokai me qaqa. Ia kevaka e dina tiko na nomuni sasaga, ka kevaka e yavutaki tiko na nomuni gagadre ena buladodonu, ena yaga sara vei kemuni na veika o ni vulica rawa ena gauna o ni segata tiko kina na gagadre ni yalomuni, kei na nomuni cala sara mada ga, kevaka o ni cakava eso na cala, ena yaco me yaga vei kemuni.”³

Oqo e dua na nona iulutaga taleitaki o Peresitedi Snow. E dau vakananuma wasoma tiko vei ira na Yalododonu me baleta na nona ivakaro na Turaga me da vinaka sara, ka vakadeitaka vei ira ni ena nodra gugumatua kei na nona veivuke na Turaga, ena rawa ni ra talairawarawa kina ki na ivakaro oqori. E vakavuvulitaka o koya, “Ni dodonu me da vakila e yaloda ni Tamada na Kalou, ia eda dau caka cala ka malumalumu mai, ia kevaka eda bula me volekata sara yani na kena vinaka duadua eda rawa ni rawata ena vinaka vei keda na veika kecega.”⁴

iVakavuvuli nei Lorenzo Snow

Ena gugumatua, vosota vakadede, kei na veivuke vakalou, eda rawa ni talairawarawa kina ki na nona ivakaro na Turaga me da vinaka sara.

“Sa ciwasagavulu ka ciwa na yabaki i Eparaama, sa qai rairai vei Eparaama ko Jiova, a sa kaya vua, Koi au na Kalou Kaukauwa; me dodonu na nomu ivalavala vei au, ka mo kakua ni cala.” [Nai Vakatekivu 17:1.]

Me isema ni tikina oqo au na cavuta eso na tiki ni nona vosa na iVakabula ena nona ivunau mai na Ulunivanua, me vaka e kunei ena iotioti ni tikina ni ika 5 ni wase ni Maciu.

“O koya mo dou qai vinaka sara, me vaka sa vinaka sara na Tamamudou sa tiko mai lomalagi.” Maciu 5:48.] …

Eda sa vulica ni a rairai na Turaga vei Eparaama ka solia vua eso na yalayala cecere, ia ni vakavakarau me ciqoma a gadrevi vua eso na ka, oya me vinaka sara ena mata ni Turaga o [Eparaama]. Na veika vata oqori a gadreva na iVakabula vei ira na nona Tisaipeli, oya me ra vinaka sara, me vaka ni rau sa vinaka sara o Koya kei na Tamana sa tiko mai Lomalagi. Oqo au vakabauta ni dua na ulutaga e baleti ira na Yalododonu Edaidai; kau vinakata meu tukuna e vica na malanivosa me noqu vakatutu kina, me ra dau vakananuma tu o ira e baleti ira.

Sa vakatura na Turaga me solia na nona veivakalougatataki cecere duadua vei ira na Yalododonu Edaidai; ia, me vakataki Eparaama, sa dodonu me da vakarautaki keda kina, ia me rawa oqori sa soli kina vei keda me da vakamuria na lawa vata ga a soli vua. Sa gadrevi talega vei keda me da yacova yani e dua na ivakatagedegede ni vinaka sara ena mata ni Turaga; ia na Turaga ena vuku ni ka oqo, me vaka ena veika kecega, e sega ni dau gadreva e dua na ka eda na sega ni rawata, ia ena yasana tale kadua, sa biuta tu ko Koya me ra vakayagataka na Yalododonu Edaidai na sala me ra muria rawa kina na Nona ivakarau tabu. Ni gadreva na Turaga na veika oqo mai vei Eparaama, a solia vua na sala me rawata kina me talairawarawa ki na lawa ko ya ka taucoko ena veika e gadrevi. A tu vua na dodonu ki na Yalo Tabu, me vaka sa tukuni vei keda ni a vunautaki vei Eparaama na kosipeli, ia mai na kosipeli oqori ena rawata kina na veivuke vakalou me rawa kina vua me kila na veika ni Kalou, kevaka e sega ena sega ni rawata e dua na tamata; kevaka e sega ena sega ni rawata e dua na tamata na ivakatagedegede ni vinaka sara vua na Turaga.

Ia me baleti ira na Yalododonu Edaidai; era na sega ni yacova rawa yani na mataqali ivakatagedegede ni bula savasava kei na bula vakayalo vakavo mai na veivuke kei na veituberi ni kaukauwa e sega ni vakatamata [vakalomalagi]. Eda sega talega ni namaka ni na rawa vei ira na Yalododonu Edaidai, me ra rawata ena dua ga na gauna me ra muria na lawa oqo ena veika kece sara. E gadrevi kina na gauna; e gadrevi kina na vosota vakadede ka me vakaivakarau na vakasama kei na yalo me rawa kina na talairawarawa ki na ivakaro oqo. E dina ni da na yaco koso beka ena imatai ni noda sasaga, ia oqori me kakua ni vakayalolailaitaki keda na Yalododonu Edaidai ena noda segata me da tovolea ena yalodina me da muria na gagadre cecere oya. O Eparaama, e dina ni a tu beka vua na vakabauta me lako e matana na Turaga me vaka na lawa vakalou oqo, ia ena so na gauna a vakatovolei sara kina vakaukauwa na nona vakabauta, ia a sega ni yalolailai baleta ni a vakaraitaka tiko na nona gadreva me muria na loma ni Kalou.

Eda na nanuma beka ni da na sega ni yacova rawa na lawa ni vinaka sara, ni sa rui dredre na cakacaka ni noda vakavinakataki keda sara. Ena dina beka vakatikina, ia ena sega ni yali kina na dina ni oqo na nona ivakaro o Koya sa Cecere Sara ka na sega ni rawa ni da vakanadakuya. Ni da sota kaya na veigauna dredre eso, oqori na gauna me da soli keda kina ki na dodonu cecere oya me da masuta na Turaga me solia na kaukauwa kei na kila ka, na vuku kei na loloma soli wale me da lako sivita kina na malumalumu vakayago ka da dau veivala vata tiko e veigauna kece.⁵ [Raica na vakatutu 1 kei na 2 ena tabana e 113.]

Ni da muria e dua na nona gagadre na Turaga, eda sa vinaka sara ena noda ivalavala oya.

A kacivi o Eparaama me biuti ira na kai nona kei na nona vanua [raica na Eparaama 2:1–6]. Kevaka beka me a sega ni muria na gagadre oqo, ke a sega ni vakadonui koya na Turaga. Ia a muria; ia ni biuta na nona vale e sega ni vakatitiqataki ni sa talairawarawa tiko ki na lawa vakalou oqo ni vinaka sara. Kevaka me a sega ni rawata oqo ke a sega dina ni rawa ni talairawarawa ki na nona gagadre o Koya sa Cecere Sara. Ia ni biuta na vale nei tamana, ni soli koya ki na veivakatovolei oqo a vakayacora tiko kina na veika e vakadonuya na lomana kei na Yalo ni Kalou, ka sega ni dua na tamata me na vinaka cake mai vua na ka e cakava, kevaka e sega ni dua na nona cala ena gauna e cakava tiko kina na cakacaka oqo.

Ni ra ciqoma na kosipeli ena veivanua vakayawa na Yalododonu Edaidai, ni tukuna vei ira na domoi Koya sa Cecere Sara me ra biuta na nodra vanua na nodra qase, me ra biuti ira na kai nodra me vaka a kitaka o Eparaama, ni ra talairawarawa tiko ki na gagadre oqori, era sa talairawarawa tiko ki na lawa oqo, ka ra sa vinaka sara kina ena kena ivakatagedegede duadua e cake ena ituvaki kei na nodra veiqaravi, ia era sega ni vinaka sara ena kila ka se na kaukauwa, se so tale.; ia e lomadra, ena nodra bula dokai, inakinaki kei na nodra gagadre. Ni ra kosova tiko na wasawasa levu, kevaka era sega ni vosa kudrukudru se kudrukudruiramo, ia me ra talairawarawa ga ki na ivakasala e soli vei ira ka vakaitovo ena itovo kilikili, era na vinaka sara me vaka e gadreva vei ira na Kalou.

Sa nona inaki na Turaga me kauti keda cake ki na matanitu silesitieli Sa vakaraitaka o Koya ena ivakatakila ni o keda na Luvena, ka da mai vakasucumi ena veivuravura tawamudu, ni da sa lako mai ki vuravura oqo me baleta na inaki digitaki me da mai vakarautaki keda me da rawata na taucoko ni Nona lagilagi na Tamada ni da lesu yani ki na Nona iserau. O koya, sa dodonu kina me da vakasaqara na kaukauwa me da maroroya kina na lawa oqo me vakasavasavataka na noda inaki, gagadre, na lomada kei na noda gagano me ra savasava kina ka tabu kei na lomada ena veika kecega me duavata kei na loma ni Kalou, ka me kakua ni dua na ka ni lomada ia me da cakava ga na lomai Tamada. Na tamata e vakaoqori na nona ivalavala sa vinaka sara, ka na kaciva na veivakalougatataki ni Kalou ena veika kece sara e cakava kei na veivanua e lakova.

Ia e dau yaco mai vei keda na bula yalowai ena so na gauna, ena vuku ni malumalumu vakayago kei na vakawelewele, ka dau rawarawa kina ni da lako cala. Io, ia e sega ni iulubale ni noda sega ni gadreva me da muria na ivakaro oqo ni Kalou oqori, vakauasivi ena noda raica ni sa solia tu mai vei keda na sala me da rawata kina na cakacaka oqo. Oqo au vakabauta ni ibalebale ni vosa vinaka sara, me vaka erau tukuna na iVakabula kei na Turaga vei Eparaama.

E rawa ni vinaka sara e dua na tamata ena vuku ni veika eso ka sega ena so tale na ka. Na tamata e talairawarawa ena yalodina ki na vosa ni vuku sa vinaka sara ena vuku ni lawa oya. Ni da veivutunitaka na noda ivalavala ca ka papitaiso me baleta na kedra vakabokoci, eda a vinaka sara ena vuku ni ka oya.⁶ [Raica na vakatutu 3 ena tabana e 113.]

Me da kakua ni yalolailai ni da yaco koso, sa rawa ni da veivutuni ka kerea vua na Kalou na kaukauwa me da vinaka cake kina.

Sa tukuna vei keda na iApositolo o Joni, ni da “qai luve ni Kalou: ia sa sega ni rairai se da na vakaevei mai muri: oqo ga eda sa kila, ni na rairai mai ko Koya, eda na tautauvata kaya; ni da na raica na matana dina. Ia na tamata yadua sa tu vua na inuinui oqo vei Koya, sa vakasavasavataki koya, me vaka sa savasava ko koya.” Raica na 1 Joni 3:2–3.] Era namaka na Yalododonu Edaidai me ra yacova yani na itutu ni vinaka sara oqo; eda namaka me da yaco me vaka na Tamada kei na Kalou, me da gone qaqa ka kilikili me da tiko ena nona iserau; eda namaka tiko ni ena gauna ena rairai mai kina na Luve ni Kalou, eda na ciqoma na yagoda sa vakavoui ka vakalagilagi, ia ni na “vakamataliataki na yagoda sa malumalumu, me vakatauvatani kei na yagona sa vakaiukuukutaki.” [Raica na Filipai 3:21.]

Oqori na veika eda namaka. Mo ni tarogi kemuni ena taro oqo oi kemuni kece na tiko oqo: Sa yavutaki vinaka li na veika eda namaka? Ena dua tale na vosa, eda sa segata tiko li me da vakasavasavataki keda? Ena rawa ni vakadonui koya beka vakacava e dua na Yalododonu Edaidai vakavo kevaka e segata tiko me vakasavasavataki koya me vaka ni sa savasava sara na Kalou, vakavo kevaka e segata tiko ena nona bula e veisiga me kakua ni vakacalai na lewa ni lomana vua na Kalou kei ira na tamata? Au sega ni vakatitiqataka, ni vuqa vei keda, era lako voli ena veisiga yadua kei na veimacawa yadua, kei na veivula yadua, ena mata ni Kalou, ka sega ni vakacalai, ka da vakaitovotaki keda vakavinaka ka segata vagumatua ena yalomalua sara na Yalo ni Kalou me lewa na noda ilakolako e veisiga; ia ena yaco beka ena dua na gauna se so na gauna ena noda bula, eda na vakatovolei kina vakaukauwa ka rawai sara beka, ia kevaka sara mada ga e yaco dina oqo, e sega ni iulubale me da sa kakua ni tovolea tale oqori, ia me vakaruataki na kena igu kei na kena yalo me da rawata na noda sasaga.⁷

E vinakata na Turaga me vosoti ira na Luvena e vuravura, ia e gadreva vei ira o Koya na veivutuni dina ni ra ivalavala ca se ra yaco koso ena nodra itavi. E namaka vei ira o Koya me ra talairawarawa ka ra tovolea me ra biuta vakatikitiki na nodra ivalavala ca kece sara, me ra vakasavasavataki ira ka yaco vakaidina sara me ra Nona tamata, Nona Yalododonu, me rawa kina ni ra vakarau me ra lako yani ki na Nona iserau, me ra yaco me ra vakataki Koya ena veika kecega ka tiko vata Kaya ena Nona lagilagi. Me rawa oqori sa dodonu me ra na lako ena sala qiqo ka rabailailai, me ra vakaserautaka na nodra bula ka me vinaka cake, ka vakasinaiti ena vakabauta kei na loloma cecere, sai koya na loloma savasava i Karisito, ka vakaitavi ena yalodina ena itavi kece sara ena Kosipeli.⁸

Kevaka e rawa ni da wilika vakamatailalai na bula nei Eparaama se na nodra bula eso tale na tamata cecere ka savasava e sega ni vakatitiqataki ni da na raica ni sega ni dau vakaisalataki ena qaqa e veigauna kece na nodra sasaga ni buladodonu. Sa sega kina ni dodonu me da yalolailai kevaka eda rawai ena dua na gauna ni noda malumalumu; ia, ena kena veibasai, me da veivutunitaka sara ena gauna vata ga na mosisiri se na caka cala eda cakava, ka da vakavinakataka ena kena levu duadua e rawa, oti me da qai rai vua na Kalou me baleta na kaukauwa vou me da toso tikoga kina ka vinaka cake.

A rawa vei Eparaama me lako vakavinaka sara ena mata ni Kalou ena veisiga yadua ena gauna e biuta kina na vale nei tamana, ka vakaraitaka na ivakadinadina ni dua na vakasama qaqa ka vakaivakarau ena nona vakatura na veika me caka ena gauna era veileti kina na nona ivakatawa ni manumanu kei ira na nona ivakatawa ni manumanu na vugona o Loti [raica na Nai Vakatekivu 13:1–9]. A yaco e dua na gauna ena bula nei Eparaama, e dua na gauna ni veivakatovolei dredre sara; e sega tale beka ni dua na ka dredre cake eda na rawa ni vakasamataka; oya ena nona tukuna vua na Turaga me laki cabora na luvena daulomani e duabau me isoro, o koya sara ga ka sa nanamaki tu kina me na vakataucokotaki mai vua na yalayala cecere a vakayacora vua na Turaga; ia ena nona vakaraitaka e dua na ivakarau ni vakasama dodonu a rawa kina vua me lakosivita na veivakatovolei, ka vakadinadinataka na nona vakabauta kei na nona buladokai vua na Kalou [raica na Nai Vakatekivu 22:1–14]. Ena dredre sara me nanumi ni a rawata o Eparaama na ivakarau ni vakasama vakaoqori mai vei rau na nona itubutubu dau qaravi matakau; ia ena vakaibalebale kevaka eda vakabauta ni a rawata ena veivakalougatataki ni Kalou, ni oti na nona veivala vata kei na yagona me vakataki keda, ka sega ni vakatitiqataki ni a rawai ena so na gauna ka qai rawā tiko me yacova ni sa rawa vua me vorata na veivakatovolei dredre vakaoqo.

“Me tiko ena lomamudou na yalo oqo,” e kaya na iApositolo o Paula, “ka tiko talega vei Karisito Jisu: o koya ni sa itovo vata kei na Kalou, sa sega ni vakasama ni sa butako ni sa vakatauvatani kei na Kalou.” [Raica na Filipai 2:5–6.] O koya yadua na tamata sa tu e matana na sasaga oqo ena vakasavasavataki koya me vaka ni sa savasava na Kalou, ka na tovolea me vinaka sara e matana. E dui tu na noda yalowai lalai kei na noda malumalumu; sa dodonu me da tovolea me da rawā ena kena totolo ga e rawa, ka dodonu me da tea na yalo oqo e lomadra na luveda, me na tubucake vata kei ira mai na nodra gauna ni gone na rerevaka na Kalou, ka me ra vulica me ra vakaitovotaki ira vakadodonu Vua ena veigauna kecega.

Kevaka e rawa vua na tagane vakawati me bula vata kei na watina ena dua na siga ka rau sega ni veileti se sega ni vakayacora e dua na itovo tawakilikili vua e dua se sega ni vakararawataka na Yalo ni Kalou ena sala kecega, sa vinaka tiko oqori; sa na vinaka sara kina o koya ena gauna oya. Me qai tovolea me vakakina ena siga ka tarava. Ia taura mada ke mani sega ni rawata vakakina ena nona sasaga ena siga ka tarava, e sega ni kena ibalebale oqori me na sega talega ni rawata vakakina ena ikatolu ni siga. …

Sa dodonu vei ira na Yalododonu Edaidai me ra dau vakabulabulataka e veigauna na sasaga oqori ka a vakatakilai vakamatata mai vei ira na iapositolo ena veigauna taumada. Sa dodonu me da dau segata me da lakova na veisiga yadua ka galala tu na lomada mai na noda vakacudruya na tamata kecega. Ka sa biuti ira tu kina ena Lotu na Kalou na sala me da vukei kina, o ira na, iApositolo kei ira na Parofita kei na Dauvunau kei na so tale., “me ra vakavinakataki kina ko ira sa lotu,” vkts. [Raica na Efeso 4:11–12.] Ka sa solia talega vei keda ko Koya na nona Yalo Tabu na dauveituberi tawacala, e tucake tu, me vaka na agilosi ni Kalou, e yasada, ka tukuna tiko vei keda na veika me da cakava ka solia vei keda na kaukauwa kei na veitokoni ni tubu mai ena noda sala na veika dredre. Me da kakua sara ni vakatara me da yalolailai ena gauna eda kila kina na noda malumalumu. Ena dredre sara me da raica e dua na gauna ena veivakaraitaki lagilagi era sa biuta no vei keda na parofita, makawa kei ira ena gauna oqo, me ra vakatara kina vua na Vunica me vakayalolailaitaki ira; ia ena yasana kadua era dau segata e veigauna me ra rawā, me ra rawata na icovi ka vakarautaki ira ki na lagilagi e taucoko.⁹ [Raica na vakatutu 4 ena tabana e 113.]

Ena veivuke vakalou, sa rawa ni da bula sivia kina na veika yalowai kei na veika wale ni vuravura.

Ni da sa biuta rawa ena noda vakasama ni tu dina vei keda e lomada na kaukauwa mai na kosipeli eda sa ciqoma, me da lewa na gagadre ni lomada, ka da soli keda ena veika kecega ki na nona lewa na Tamada Vakalomalagi, ka da sega ni dau vakavuna na yaloca ena noda matavuvale, kei ira eda dau veimaliwai kaya, ia eda veivuke vakalevu sara ena kena tauyavu e dua na tiki ni lomalagi e vuravura, sa na rawa ni tukuni ni sa rawati vakaveimama na ivalu. E dua vei ira na dredre levu duadua era dau sotava e vuqa vei keda, ni sa rui dau rawarawa na noda guilecava na inaki cecere ni bula, na nona inaki na Tamada Vakalomalagi ena nona talai keda mai ki ke me da mai vakayago, ka vakakina ena veikacivi tabu eda sa kacivi kina; o koya, ni da sa sega ni ulabaleta rawa na veika dau yaco vagauna, eda sa dau vakatara talega kina vakavuqa me da sudrai sobu mai ki na ivakatagedegede ni vuravura ka sega ni soli keda ki na veivuke vakalou sa vakarautaka tu na Kalou, ka na rawa kina vei keda me da rawata na veika oqori. Eda sega ni vinaka cake mai vei ira na vo ni vuravura kevaka eda sega ni vakabulabulataka na yalo me da vinaka sara, me vaka ni sa vinaka sara na Tamada mai lomalagi.

Oqo na nona veivakauqeti na iVakabula vei ira na yalododonu ena gauna e liu, o ira na tamata ka tu talega vei ira na gagadre vata ka ra dau temaki talega ena veitemaki vata ga eda temaki tiko kina, ka kila tu o Koya kevaka e rawa ni ra veisau kina se sega; na Turaga e sega vakadua, ka na sega sara ni gadreva mai vei ira na Luvena na veika era na sega ni rawata. O ira na iTalatala Qase kei Isireli era namaka tiko me ra lako yani ki vuravura me ra vunautaka na kosipeli ni veivakabulai ki na dua na itabatamata yalovakatani ka dauvakauyalona, ena kedra maliwa e dua na matatamata sinai ena ca kei na caka ca e dodonu me ra vakabulabulataka na mataqali yalo vakaoqo. E sega walega ni o ira, ia na tamata kecega, na cauravou kei na goneyalewa kece era lewena na Lotu oqo ka kilikili me ra vakatokai me yalododonu sa dodonu me ra vakabulabulataka na yalo ni bula ki na gagadre oqo me savasava kina na lomadra ena mata ni Kalou. Sa dua na ka totoka me tu e matada na ka oqo ni da gone se da sa qase; ia e vakasakiti cake sara me da raica ni ra lakova na noda itabagone e dua na ilakolako me rawa ni serau mai kina ena kedra irairai na rarama kei na vuku va-Kalou, me donu kina na nodra rai me baleta na bula ka me rawa kina ni ra bula sivita na yalowai kei na veika wale ni vuravura vakakina na ivakavuvuli cala kei na caka ca ni tamata.¹⁰

E sega ni dodonu vei ira na Yalododonu Edaidai me ra lomaleqataka na veika ni vuravura oqo. Ni ra na oti kece mai. Sa dodonu me dei na yaloda ena veika mai cake; me da segata na vinaka sara ka a tu vei Jisu Karisito, o koya ka a talairawarawa vakavinaka sara vei Tamana ena veika kecega, ka rawata kina na Nona bula vakalou cecere ka yaco me ivakarau vei ira na wekana. Na cava me da dau rarawataka ka lomaleqataka kina na veika vakayago oqo ni sa rui cecere ka lagilagi na vanua eda na cava kina? Kevaka eda na tautauri matua vua na Turaga, muria na Nona ivakaro, vinaka sara me vakataki Koya ka dolele yani ki na veika dina tawamudu ni Nona matanitu vakalomalagi, eda na daumaka kina ka rawata na qaqa mai muri.¹¹

Ena nomu veicakacaka kece kei na nomu ivalavala mo dau nanuma tikoga ni o sa vakarautaka ka cakava tiko vei iko e dua na bula me na laki tomani ena veigauna tawamudu; kakua ni bulataka e dua na ivakavuvuli o na laki madua se sega ni taleitaka mo cakava mai lomalagi, kakua ni segata mo rawata e dua na ka ena sega ni laki vakadonuya na lomamu sa cilavi ena rarama vakasilesitieli. Ni dau vakauqeti na noda ivalavala mai na gagadre ni yaloda kei na lomada, laiva me veituberi ka veiliutaki na ivakavuvuli e savasava, dokai, tabu, ka dodonu.¹²

E sega ni rawa ni da vinaka sara ena dua ga na gauna, ia e rawa ni da vinaka cake vakalalai ena veisiga yadua.

Ena tubu na gonelailai me gonetagane mai na gonetagane me tamata bula, ena toso tikoga vakamalua na nona tubucake; ia ena sega ni kila o koya na gauna e tubu tiko kina. E sega ni kila o koya ni sa tubu tiko; ia ena nona rokova na lawa ni bula kei na nona yalomatuataka na nona itosotoso sa yaco kina me uabula. Ena noda raici keda me da Yalododonu Edaidai. Eda na tubu ka levu cake. Eda sega tiko ni se raica rawa ena gauna oqo, ia ni oti e dua na yabaki eda na qai kila, meu kaya mada, ni da sa toka sara e cake ka voleka yani ki na dela ni ulunivanua. Eda vakila ni da vakabauta na Turaga; ni sa dau yaga tikoga na veika e solia; ni da semati tu Vua; ka ni sai Koya na Tamada, ka ni sa dau liutaki keda tiko ena bula oqo.¹³

Kakua ni namaka mo yaco mo vinaka sara ena dua ga na gauna. Ke vakakina, ena mosi na yalomu. Mo vinaka cake nikua mai na siga ena noa, ka mo vinaka cake ni mataka mai na kemu ituvaki nikua. Na veitemaki a rawai keda beka vakalailai nikua, me kakua tale ni rawai keda ni mataka. O koya mo tomana tiko mo vinaka cake vakalailai ena veisiga yadua; ka kakua ni laiva me oti yani na nomu bula ka sega ni o cakava eso na ka vinaka vei ira na tani ka vakakina vei keda.¹⁴

Na veiotioti ni siga yadua se iotioti ni macawa e dodonu me kena e vinaka duadua eda sotava, oya, me da tosoi keda vakalailai e veisiga, ena kila ka kei na yalomatua, kei na noda rawata me cakava na ka vinaka. Ni da sa qase cake sa dodonu me da bula voleka cake vua na Turaga ena veisiga yadua.¹⁵ [Raica na vakatutu 5 ena tabana e 113.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

E vakadinadinataka o Peresitedi Snow ni ra a kauwaitaka eso na Yalododonu Edaidai na ivakaro me da vinaka sara (tabana e 103–5). Ni o vulica na wase oqo, vakasaqara na ivakasala ena solia na vakacegu vua e dua e vakaleqai tiko ena ivakaro me da vinaka sara.
Ena iwase ka tekivu ena tabana e 103, na malanivosa “veivuke vakalou” e vakaibalebaletaki ki na nona veivuke na Turaga. Na sala cava e vukei keda kina na Turaga me da vinaka sara?
Ena tabana e 103, dikeva na nona vosa o Peresitedi Snow me baleti Eparaama kei ira na ivuvu ni Yalododonu Edaidai. Na cava o nanuma ni kena ibalebale me da vinaka sara “ena [noda] veiqaravi”? Vakananuma na veika e rawa ni o cakava mo vinaka cake sara kina ena “loma [mu], … bula dokai, inakinaki kei na gagadre.”
E kaya o Peresitedi Snow, “Me da kakua sara ni vakatara me da yalolailai ena gauna eda kila kina na noda malumalumu” (tabana e 110). Ena rawa vakacava ni lako sivita na yalolailai? (Me baleta eso na kena ivakaraitaki, raica na tabana e 107–10.)
Ena vukei iko vakacava na nomu kila ni sega ni dodonu mo “namaka mo vinaka sara ena dua ga na gauna”? (Raica na tabana e 105.) Vakasamataka na veisala eso e rawa ni o muria kina na ivakasala nei Peresitedi Snow mo “vinaka cake vakalailai ena veisiga yadua.”
Vakaraica e dua se rua na iyatuvosa ena iwase oqo e veivakauqeti vakalevu cake vei iko. Na cava o taleitaka me baleta na iyatuvosa e rua oqo?

iVolanikalou Veisemati: 1 Nifai 3:7; 3 Nifai 12:48; Ica 12:27; Moronai 10:32–33; V&V 64:32–34; 67:13; 76:69–70

Veivuke ena Veivakavulici: “Era na vakauqeti na tamata ni vakadinadinataki na nodra cau. Mo na taura beka na gauna mo vakadinadinataka na nodra cau yadua na tamata ka, kevaka e rawa, cakava me tiki ni veivosaki vakalasi na cau” (Na Veituberi, Me iLutua ni Noda Bula, 35–36).

Ena Vunau mai na Ulunivanua, e kaya kina na iVakabula, “O koya mo dou qai vinaka sara, me vaka sa vinaka sara na tamamudou sa tiko mai lomalagi” (Maciu 5:48).

Sa vakaroti Eparaama na Turaga, “Me dodonu na nomu ivalavala vei au, ka mo kakua ni cala” (Nai Vakatekivu 17:1).

Sa dodonu me da dau segata ena veisiga yadua me da vakavinakataka cake na keda isema vei ira yadua na lewe ni matavuvale.