Wase 3

Saumaki Mai ena Bula Taucoko: Tomani Tiko na Toso ki Liu ena iVakavuvuli ni Dina

“Na noda vakabauta vakalotu e dodonu me da cokonaki tu kina vaka ikeda, me dua na tiki ni noda bula ka sega ni rawa me biu laivi.”

Mai na Bula nei Lorenzo Snow

A papitaiso ka vakadeitaki o Lorenzo Snow ena June 1836. Nanuma lesu tiko na tubu ni nona ivakadinadina, a qai kaya: “Au vakabauta o ira [na Yalododonu Edaidai] e tu vei ira na vakabauta vakalotu dina, kau mani lewena na Lotu. Me yacova mai oqo noqu saumaki mai sa baleta wale ga e dua na vuna.”¹ A vakananuma, “E taucoko na vakacegu ni yaloqu niu a cakava na ka vuku me baleti au ena ka sa yaco.”² E dina ga ni a yalovakacegu tu me dua na gauna vata kei na kila oqo, a gadreva tale tu ga e dua na ivakaraitaki kilai tani ni Yalo Tabu. A kaya, “A sega vei au na ivakaraitaki, ia au namaka e dua.”³

“Na ivakaraitaki oqo a sega ni salamuria mai na noqu a papitaiso, me vaka au namaka,” a nanuma lesu. “Ia, e dina ga ni a lokuyarataki na gauna, ia ena noqu ciqoma, e taucoko vakalevu cake sara na kena matata, na kena malumu kei na kena caka mana ena noqu kaukauwa duadua mada ga ni vakanuinui ka tuberi au meu duavata kina. Dua na siga ena noqu a vuli lesoni tiko, rauta ni oti e rua se tolu na macawa noqu a papitaiso, sa tekivu meu vakasamataka tiko na dina niu a sega ni rawata e dua na kila ka ena dina ni cakacaka—niu a sega ni kidava na kena vakayacori na yalayala: ‘Kevaka e dua na tamata sa via cakava na loma i koya, ena kila se sa ka mai vua na Kalou na ivakavuvuli;’ [raica na Joni 7:17] kau sa tekivu vakila vakalevu sara na dredre.

“Au biuta vakatikitiki na noqu ivola, biubiu mai vale ka lako wavokita na lomanibai ena veivakasaurarataki ni veivakayarayarataki ena dua na butobuto, vakila na rarawa, ka vaka me vakavolivoliti au e dua na yo butobuto. E dau noqu ivakarau, ni mai cava e dua na siga, meu gole ki veikau ena dua na masu vuni, e sega ni yawa mai noqu itikotiko, ia ena gauna oqo au vakila ni sega saraga ni lomaqu meu vakayacora.

“Sa yali na yalo ni masumasu, kei na lomalagi sa vaka e dua na parasa e delani uluqu. Kena itinitini, e kidavi ni sa yaco mai na kena gauna ni masu vuni, au nanuma sara meu kua ni vorata na noqu masumasu ena yakavi bogi, ka, me vaka e dau kena ivakarau, tekiduru me vaka niu dau cakava, kei na noqu ivakarau ena vanua ni masu, ia au na sega ga ni vakila sara na veika me vaka au dau vakila.

“Taumada au sega ni dolava na tebenigusuqu ena sasaga meu masu, ena gauna au rogoca kina e dua na rorogo, e uluqu ga e cake, me vaka na rorogo ni kote silika balavu, ka vakasauri na lako sobu mai vei au na Yalo ni Kalou, vakavolivoliti au taucoko saraga, vakasinaiti au mai na buradelaqu ki na qeteqete ni yavaqu, ia Oilei, na reki kei na marau au vakila! E sega ni dua na vosa me vakamacalataka na veiveisau ena gauna vata ga oya, mai na kaukauwa ni kena vakilai na butobuto ni vakasama kei na yalo ki na dua na rarama ni cina kei na kila ka, me vaka e liu ena gauna e semati mai kina ki na noqu kila. Au a qai ciqoma na taucoko ni kila ka, ni bula tiko na Kalou, ni o Jisu Karisito na Luve ni Kalou, kei na vakalesuimai ni Matabete Tabu, kei na taucoko ni kosipeli.

“A dua dina na veipapitaisotaki—e dua na tabadromuci vakayago ena ivakavuvuli vakalomalagi se yavudei, na Yalo Tabu; ka dina sara na kena revurevu ena veitiki kece sara ni kequ ibulibuli mai na kena ena tabadromuci ena wai; vakaseyavutaka vakadua, me yacova sara na kena dau rawa ni kasa tikoga na ka ena vakasama, na vakatitiqa kece sara e tu me baleta na dina levu ka sa veisolitaki sobu mai ena gauna makawa na nona, Luve dina ni Kalou na ‘Peipei mai Peceliema’; vakakina na dina ni Sa mai vakaraitaki kivei ira na luve ni tamata, ka vakadewataka tale tiko ga mai na kila ka, ena sala ka tautauvata ena gauna vakaiapositolo. E taucoko na vakacegu ni yaloqu, me vaka ni dodonu me vaka kina, me baleta noqu sa mai kila matata oqo, kau nanuma ni rawa meu doudou meu kaya kina, ena dua na ituvaki tawayalani.

“Au sega ni kila na cava na dede ni noqu tu ena taucoko ni reki kei na veivakamarautaki vakalou oqo, ia ena vica ga na miniti ni bera ni vakilai vakasilesitieli, ka vakasinaiti au ka vakavolivoliti au, ka sa tekivu me seyavu vakamalua tale yani. Noqu duri cake mai ena noqu a tekiduru tiko, ka veitubuyaki ena vakavinavinaka vua na Kalou na lomaqu me uasivia na ka e tukuni rawa, au vakila—au kila ni a solia vei au na ka e rawa me solia duadua ga e dua na Kalou Tawayalani—na ka ka uasivi cake sara na kena yaga mai na iyau kei na dokai kece sara e rawa me solia ko vuravura.”⁴

A tudei tu ga na vakabauta nei Lorenzo Snow ki na ivakadinadina a ciqoma ena siga o ya, ka cakacaka vagumatua sara me vakarabailevutaka na nona kila ka vakayalo ka vukei ira eso me ra cakava vaka kina. “Mai na gauna o ya ka lako yani,” a kaya, “Au sa tovolea tiko meu bulataka e dua na sala me kakua ni yali na Nona Yalo Tabu, ia me tomani tiko na veidusimaki ni Yalotabu, tovolea tiko meu biuta tani na noqu kocokoco kei na so na gagadre cala, ka tovolea tiko meu cakacaka me baleta na Nona inaki.”⁵ A vakaraitaka, “Me vakacava ga na balavu ni gauna ena dau nanumi tu kina na ka, ka tekivu kilai mai na ibalebale ni vakatataro, sa dredre sara vei au meu vakagaluiya tiko ga na ivakadinadina kaukauwa kei na kila ka a vakatakilai vei au.”⁶ [Raica na vakatutu 1 ena tabana e 74.]

iVakavuvuli nei Lorenzo Snow

Rawati ni dua na ivakadinadina sa ikoya e dua na i-dusi ni itekitekivu vinaka vei ira na Yalododonu Edaidai.

Na yavu eda sa biuta kina na noda vakabauta e sa totoka ka lagilagi. Au kila oqo vakataki au. Au a qai lewena ga na Lotu oqo ena gauna au sa mai ciqoma kina me noqu na kila ka e taucoko oqo ni dua tiko na Kalou, ni dua tiko na Luvena, o Jisu Karisito, kei ni a kilai vaka Nona parofita o Josefa Simici. Sa ikoya e dua na kila ka ka sega ni rawa vua e dua na tamata me vakatakila. A lako mai ena dua na ivakatakila mai vua sa Cecere. Sa ikoya oqori e dua na itekitekivu vinaka duadua vua e dua na Yalododonu Edaidai, ka sa ikoya eso na ka ni veitamata yadua, ka tu vua na igu cava ga me toso kina ki liu ena gaunisala oqo, ka na dau gadreva ena so na gauna se so tale. Na tamata yadua ena lako ki na ka sa yaco vakatamata ni na gadreva na kaukauwa, kei na kaukauwa o ya ena lako mai ena dua na kila ka ena dina ni gaunisala e lakova tiko ka na tuberi koya ki na taukeni ni nona gagadre cecere ka uasivi duadua.⁷

Kemuni na taciqu kei na ganequ, e tu eso na veika e dodonu vei kemuni kei au me da vakasamataka. Sa yaco mai na gauna ni sa nona itavi na turaga kei na marama vakayadua me ra kila vakai ira na isema ki na yavu era tu kina. E dodonu me da sasaga taucoko me da voleka yani vua na Turaga. Sa ikoya e yaga vei keda me da toso vakalailai yani ki liu ka rawata na taucoko ni kila ka ena veika oqori ni dodonu me da kila vakalevu cake sara. Sa ikoya na dodonu vakayadua ni Yalododonu Edaidai.⁸ [Raica na vakatutu 2 ena tabana e 74.]

E rawa me da vakarabailevutaka na noda vakabauta kei na kila ka vakayalo.

E rawa me ra vakarabailevutaka na turaga kei na marama na nodra kila ka vakayalo; e rawa me ra tubu vakavinaka cake ni ra sa qase mai.⁹

Au vakila ni o ira na Yalododonu Edaidai era sa toso tiko ki liu; ka ra sa ciqoma tiko e dua na vuli. Eda sa toso cake tiko ka toso cake tiko ga. Eda sa toso tiko ki liu ki na dua na itutu kei na vanua cecere cake kei na dua na itagede cecere cake vakayalo, ka da sa ciqoma tiko na vuli ni vuku vakavuravura vata kei na veika kece sara e rawati kina kei na ivunau kei na ivakavuvuli lasu, era na sega ni mana kivei ira na Yalododonu Edaidai, ni ra sa tubucake tiko ena vuli kei na ivakamacala e kunei vakatamata kei na cabe cake ni veika e dina ni vakatubura na vakasama, vakacerecerei na kila, ka tauyavutaki [ira] vakalevu ka vakalevu cake sara ena ivakavuvuli dina ni bula kei na lagilagi. E sa vakasinaiti na lomada ena dina oqo ka sega ni rawa vei keda me da na tukuna na siga se na auwa e sa vakarabailevutaki kina na noda vakabauta, ia eda vakila, ena noda raicalesu tale ena macawa sa oti, vula se yabaki, ni sa rabailevu na noda vakabauta kei na kila ka ni vakabauta kei na kaukauwa ni Kalou; eda sa kila ni da voleka cake sara yani vua na noda Kalou ka da vakila ni da sa veitokani vata kei na Kalou na Tamada.¹⁰ [Raica na vakaktutu 3 ena tabana e 74.]

Kevaka eda gadreva me da vakarabailevutaka na noda vakabauta kei na kila ka vakayalo, e dodonu me da sasagataki keda.

Na tamata yadua e dodonu me vulica me vakararavi ena nona kila ka vaka ikoya; e sega ni rawa me vakararavi vua na wekana; na tamata yadua e dodonu me tu vakataki koya; e dodonu me vakararavi vua nona Kalou me baleti koya vakataki koya. Ena vakatau sara ga vua nona raica kevaka ena vorata na leqa ka vorata na tarovi ni kena biu ena gaunisala ni bula me taqomaka na nona itosotoso. E rawa me rawata e dua na tamata na itukutuku mai na cakacaka ni Yalo Tabu, ka torova na Kalou ka vakarabailevutaka na nona vakabauta vakaiwasewase me vaka na nona gugumatua.¹¹

E sega ni rawa na toso ki liu ena ivakavuvuli ni dina, me vakarabailevutaka na kila ka vakalomalagi, [vakavo] me da cakacakataka na noda rawata na vuna ka sasagataki keda ena dua na kena ivakarau dodonu. E dua noda ivakaraitaki ka volaitukutukutaki tu ena Vunau kei na Veiyalayalati ena dua na nanuma cala nei Oliver Cowdery, na kena tarai na ivakavuvuli oqo. A yalataka vua na Turaga na isolisoli me vakadewataka na ivolatukutuku makawa. Me vaka e vuqa vei keda nikua, a cala nona vakanananu me baleta na cakacakataki ni isolisoli. A nanuma ena veika kece e yaga vua me cakava, me vaka na levu ni isolisoli sa yalataka vua na Kalou, sa nanuma me laiva tu mada nona vakasama me wawa ena vucesa ka sega ni sasaga, me yacova ni sa dodonu me cakacaka vakaikoya. Ia ni qai biu e matana na ivolatukutuku oqori, sa sega na kila ka me solia rawa, era se dregati vata tu ga, me vaka ga na kena itukutukuni, ni sega ni lako mai vua na kaukauwa me vakadewataka.

E dina ga ni sa soli mai na isolisoli ni ivakavakadewa, a sega ni rawa me vakacavara na cakacaka, baleta wale ga ni sega ni sasagataki koya vua na Kalou ena rai me vakatorocaketaki na isolisoli e tu vua; ka yaco me vakararawataki koya vakalevu, kei na Turaga, ena nona yalovinaka kei na loloma veivueti, a tukuna vua na nona cala, ena nona vakayagataka na vosa oqo—

“Ia ko sa sega tiko ni kila na bibi ni ka oqo; ko a sega mada ni vakasamataka; ia ko a nanuma ga mo rawata na ka ko sa kerea vei au; ia, au sa kaya vakaidina vei iko, a dodonu sara mo vakasamataka vakavinaka taumada; kevaka sa dodonu vei iko, mo qai kerea; ia kevaka au kila ni ganita, au na qai uqeta na yalomu ka na katakata mai na lomamu,” vkts. [Raica na V&V 9.]

Ia me baleti keda, me da doka na veika eda sa cakava tiko. Kevaka eda namaka me vakatorocaketaki, me toso ki liu ka vakatotolotaki na cakacaka e tu e matada, ka kena itinitini noda rawata na taukena na isolisoli kei na lagilagi oqori, ena lako mai ki na ivakarau vakalou eda vakayacora oqori, e dodonu me da vakasamataka ka vakananuma, e dodonu me da sasagataka vakataki keda, kei na cecere duadua tale ga ni ka eda rawata.¹²

E dodonu me da … rawata vakataki keda na Yalotabu, ka sega ni da vakacegu ni da lako ena nodra rarama eso tale; e dodonu me tiko vei keda na Yalotabu me okati vata kei na dui yaloda vaka ikeda. …

Nona se qai vulica vakadua e dua na tamata na ivakatagi e kunea na dredre ena nona cakava tiko na rorogo ni ivakatagi, kei na kena vakatagitaki vakadodonu e dua na rorogo ka gadrevi kina vakalevu na gumatua kei na vosota. E dodonu me lako tikoga, dua na cegu, me vuki lesu ka tekivu tale, ia ni sa oti e dua na gauna ka sa sega ni rawata, mai na levu ni dua na sasaga, me yaco me kenadau ni rorogo o ya. Ni oti nona kacivi me vakatagitaka na rorogo o ya, sa sega ni yaga me nanumi na vanua me biuta kina na iqaqalo, ia e sa matau ga nona tabaka. A sega ni matau ena kena imatai; a vinakati na levu ni vosota kei na cakacaka, ni bera ni qai yaco me matau na kena vakatagitaki na rorogo.

E vaka tale ga kina ena veika me baleta na veika va-Kalou. E dodonu me da sasagataka vaka ikeda ka rawata na loloma e vakaikuritaki, me da rawata na lawa ni cakacaka e okati vei keda, ni rawa me matau me da cakava na veika oqori ni ra sa gadrevi vei keda.¹³ [Raica na vakatutu 4 ena tabana e 74.]

Ena noda kelia vakatitobu na veika va-Kalou ka tudei ena vakabauta, ena yaco me dua na tiki ni noda bula na noda vakabauta vakalotu.

E tiko e dua na leqa ena noda vakacegui ena dua na toso ki liu vakavuravura, eda na toso wale tikoga ena dela ivuravura. Eda tukuna na noda lako ena rarama ni Yalotabu kei na noda vakila vei keda, ia eda vakayacori tiko li na veika oqo? E dodonu me da vulica vakatitobu na veika va-Kalou, vakotora na noda yavu ena dela ni vatu, me yacova noda lako mai ki na wai bula ka na tu vei keda me mataniwai tawa yalani ni bula tawamudu.¹⁴

Era tu ena keda maliwa eso na tamata ka vakacegu kaukauwa taumada tu vei ira na Yalotabu nei Koya sa Cecere Sara, na nodra inaki taumada mera vinaka ka savasava me vakataki ira na agilosi, ka ra cakava na veiyalayalati vata kei na Kalou ni ra na qaravi Koya ka taqomaka na Nona ivakaro ena veivanua vakayadua kece sara. … Ia sa vakacava tiko ena gauna oqo vei ira eso na iTalatala Qase oqori? Sa sega vei ira nikua na ivakadinadina vata ga. Na veika era taleitaka sa tu ena veika vakavuravura ka sa vakarautaka vei ira na Turaga me ra rawata, ni ra sa wawa tu oqo me yaco ni ra sa kacivi, ka vuqa na gauna ena nodra kacivi, era talairawarawa vakalevu cake ena nodra gagadre me ra tu ena itutu oya, mai na kena mositi ira dina e yalodra na cakacaka era sa mai kacivi kina.

Sai koya oqo na ituvaki ni tamata taucoko, veitalia ga na vinaka ni nodra tekivu, o cei e vakatara nodra vakasama kei na nodra taleitaka me ra vakamuria na vuravura kei na kena gaunisala, ka sa ikoya e dua na ivakadinadina matata ka sega ni vakatitiqataki ni gauna sa yaco kina vei ira na tamata me ra lomana vakalevu cake sara na vuravura mai na nodra lomana na Turaga kei na Nona cakacaka ena dela ivuravura. Na kena ciqomi na rarama ni Kosipeli tawa vakaiyalayala, ka vakayagataka na veika vinaka ni matanitu, kei na sorenikau kei Isireli ka taukena na yalayala cecere ka lagilagi, e dodonu me da cakacaka ena yalodina kei na gugumatua me da rawata kina na veika e sa tuvalaka tu na Kalou vei keda; e dodonu me da turaga ka marama ni vakabauta kei na kaukauwa kei na cakacaka vinaka, kei na noda kunei keda ni da vakawelewele se sega ni taleitaka na kena lailai, e dodonu me sa veirauti kei keda na noda kila me rawa ni da veivutuni ka lesu tale ki na sala ni itavi.¹⁵

E sega ni dua na ka e lialia vakalevu cake sara mai na vakasama ni dua na tamata me biuta vakatikitiki nona vakabauta vakalotu me vaka e dua na kote balavu se qameni. E sega ni dua na ka me vaka nona biuta vakatikitiki nona vakabauta vakalotu e dua na tamata vakavo ga kevaka e sa via biuti koya tale tu ga vakatikitiki. E dodonu me semati vata kei keda na noda vakabauta vakalotu, e dua na tiki ni noda bula ka sega ni rawa me biu laivi. Kevaka e rawa vua e dua na tamata me biuta vakatikitiki nona vakabauta vakalotu, na gauna e cakava kina, e tu sara ga ena dua na vanua e sega ni kila, e sa soli koya ki na kaukauwa ni butobuto, e sa sega ni tu ena nona vanua vaka ikoya, e sega ni dua nona bisinisi e kea. Nodra vakasama na iTalatala Qase ni Isireli me ra vosa ca, lasu ka mateni e sa vakalolovirataki ira; e dodonu me ra dau ulabaleta tu na veika oqori. Me da sa biuta tani sara na ka ca kece ga ka bula mai na vosa kece ga sa lako mai na gusu ni Kalou [raica na V&V 98:11]. Me da taura matua na itavi yadua sa lesi kivei keda vata kei na gagadre kei na kaukauwa me rawa ni da rawata kina na yalo ni noda Kalou, na rarama ni dina kei na kena tomani tiko ga e lomada na ivakatakila nei Jisu Karisito.¹⁶

Tiko ga ena waqa ni Saioni. Kevaka era lako mai na velovelo e yasada, totoka na rokadra kei na caka ni veiyalayala totoka, kakua ni sobu mai na waqa mo lako ki matasawa ena dua tale na velovelo; ia mo tiko ga ena waqa. Kevaka era vakayagataki iko vakaca eso ka ra tiko ena waqa, ka sega ni tiko vei ira na yalo dodonu, nanuma ni sa daumaka tu na waqa. E sega ni dodonu me da vakatara me vakacudrui na noda vakasama ena dua beka na ka era na cakava vei keda na tamata era tiko ena waqa; e daumaka tu na waqa, ka ra daumaka tu na kena vakailesilesi, ka da na dodonu kevaka eda tiko ga ena waqa. Au rawa ni vakadeitaka vei kemuni ni na kauti kemuni vakadodonu sara na waqa ni Saioni ki na vanua ni lagilagi.¹⁷

Au na [tukuna e dua] na ivakaraitaki me baleta na kena kau mai kei na noda taukena na yalo oqo, ena kena yaco me da vakaitavitaki keda ena gauna ni veitemaki, ka na sega ni rawa me ra ceburaki laivi. Biuta e dua na kiukaba ena dua na saqa ni wai wiwi ka na lailai sara na kena ivakatakilakila ena imatai ni auwa, vakakina ena imatai ni 12 na auwa. Vakadikeva o na qai kunea ni ivakatakilakila e vakaraitaki wale ga ena kulina, baleta ni gadrevi e dua na gauna balavu me maroroi tu kina. E dua na tamata me papitaiso ena lotu oqo ena tu vua e dua na ivakatakilakila, ia e sega ni ivakatakilakila me maroroi koya yani kina vakatotolo. E sega ni tauyavutaka na lawa ni dodonu kei na nona itavi ena imatai ni gauna ena 12 se 24 na auwa; e dodonu me tiko ga ena lotu, me vaka na kiukaba ena wai wiwi, me yacova ni sa yaco me vakasinaiti ena yalo dodonu, me yacova na gauna e sa maroroi kina ‘Vakamomani,’ ena lawa ni Kalou; e dodonu me ra semati vata na veika oqori ena noda ivakarau.

… Kemuni na taciqu kei na ganequ, au … sa laiva na iulutaga ki na nomuni qaqarauni matua, vakasama kei na vakanananu, masulaka na Turaga na Kalou na tamada me sovaraka mai na Nona Yalotabu kivei ira na Nona tamata. Sa ikemuni oqo a digitaka na Turaga mo ni vakalagilagi Koya ena Nona i Serau, ka me vakalougatataki kemuni ka vakasinaiti kemuni na Turaga ena Nona Yalotabu, ka me savasava na matamuni mo ni raica vakamatata kina na veika me baleta na nomuni vakabulai. Ia kevaka e dua na turaga se marama e sega ni yadra vakavinaka, me lako vakatotolo mai na gauna ni Yalotabu kei na kaukauwa ni Yalo Tabu e rawa me tiko vata kei ira, ka me rawa ni vakavulici ira ena veika ni gauna sa oti, ena gauna oqo kei na gauna sa bera mai, kei na veivuke ni Turaga, tauyavutaka na bula savasava kei na ivakavuvuli ni dina ena nodra ivakarau, ni rawa me ra vakavakarau tu me baleta na veidredre era lako mai.¹⁸ [Raica na vakatutu 5 ena tabana e 74.]

Vakatutu ni Vuli kei na Veivakavulici

Taurivaka na vakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Raicalesu na veika a sotava o Lorenzo Snow ka volaitukutukutaki ena tabana e 60, 65–66. E yaco vakacava me dina vei iko na nomu ivakadinadina? Taurivaka na veika o sotava mo wasea vata kei na dua na lewe ni matavuvale se itokani, me vaka e dua o qarava me dua na dauveituberi vakavuvale se dua na dauveisiko.
A kaya o Peresitedi Snow ni kena rawati e dua na ivakadinadina sa ikoya “e dua na itekitekivu vinaka duadua vua e dua na Yalododonu Edaidai” (tabana e 67). Na cava na vuna e dua wale ga na itekitekivu na ivakadinadina—sega ni dua na icavacava ni ilakolako?
Ena iwasewase e tekivu ena boto ni tabana e 67, e vakaduiduitaka o Peresitedi Snow na vuli vakavuravura vata kei na “cecere”ni vuli e solia na Turaga. E rawa vakacava me da rawata na “vuli cecere”oqo? Na veivakalougatataki cava sa lako mai vei iko ena nomu cakava vaka kina?
Wilika na iwasewase e tekivu ena tabana e 69. Ena gauna cava o sa bau gadreva kina mo “vakararavi ena [nomu] kila ka vakataki iko”? Na cava e rawa me ra cakava na itubutubu kei na qasenivuli me ra vukei kina na gone kei na itabagone me ra vakararavi ena nodra kila ka vakataki ira?
Raicalesu na ivakasala nei Peresitedi Snow ena iotioti ni wasewase ni wase (tabana e 72–73). Na cava o nanuma me kena ibalebale na “vulica vakatitobu na veika va-Kalou”? Na cava o nanuma me kena ibalebale na noda vakabauta vakalotu me “semati vata kei keda”?

iVolanikalou Veisemati: 2 Nifai 31:20; Mosaia 5:1–4, 15; Alama 12:9–10; 3 Nifai 9:20; Moronai 10:5; V&V 50:24

Veivuke ena Veivakavulici: “E vica na tiki ni ivakavuvuli e caka ena Lotu e sa rui kaukauwa, sa ikoya na ivunau. E sega ni da rogoca vakavinaka na ivunau ena veivalenivuli. Eda rogoca vinaka ena soqoni ni sakaramede kei na veikoniferedi, ena ivakavuvuli ka rawa me rua na kena sala me rawa ni o taroga eso na taro. E rawa mo taroga vakarawarawa na veitaro ena dua na kalasi” (Boyd K. Packer, “Principles of Teaching and Learning,” Ensign, June 2007, 87).

“E dodonu me da vulica vakatitobu na veika va-Kalou, vakotora na noda yavu ena dela ni vatu, me yacova noda lako mai ki na wai ka na tu vei keda me mataniwai tawa yalani ni bula tawamudu.”

Ni oti ga nona papitaiso ka vakadeitaki o Lorenzo Snow, a ciqoma na ivakaraitaki lo ni Yalo Tabu, ka veisautaka na bula.

“E rawa me ra vakarabailevutaka na turaga kei na marama na nodra kila ka vakayalo; e rawa me ra tubu vakavinaka cake ni ra sa qase mai.”