Wase 2

Papitaiso kei na iSolisoli ni Yalo Tabu

“Oqo … sa ikoya na ituvatuva ni Kosipeli ena nodra gauna na iapositolo, vakabauti Jisu Karisito, veivutuni, papitaiso ena tabadromuci e wai me bokoci kina na ivalavala ca, kei na isolisoli ni Yalo Tabu ena veitabaki ni liga. Ena kena sa kilai ka muri vakavinaka na ituvatuva oqo, ena salamuria sara ga mai na kaukauwa, isolisoli, veivakalougatataki, kei na dodonu ni lagilagi.”

Mai na Bula nei Lorenzo Snow

Ni oti mada ga na nona ciqoma na ivakadinadina ni o Josefa Simici e dua na parofita, e a sa bau dredre sara ga vakalevu vei Lorenzo Snow na nona vakatulewataka me lewena na Lotu i Jisu Karisito ni Yalododonu Edaidai. A kila ni kevaka me yaco me lewe ni Lotu, e sa na dodonu vua me biuta laivi eso na nona ivakarau taleitaki vakavuravura. Ia ena nona vakatulewataka ena nona “sasaga dredre duadua ni loma kei na yalo,” a vakadonuya me papitaiso. A nanuma lesu tale: “Mai na veivuke ni Turaga—ena noqu vakila vakaidina ni a vukei au o Koya—au sorovaka noqu dokadoka, viavialevu kei na kilai vakavuravura, ka, yalomalumalumu me vaka e dua na gone, lako ki na wai ni veipapitaisotaki, ka ciqoma na cakacaka vakalotu ni kosipeli. … Au ciqoma na papitaiso kei na cakacaka vakalotu ena veitabaki ni liga mai vua e dua ka vakaitavi ena kaukauwa vakalou.”¹

Ni oti nona ciqoma na veivakalougatataki oqo, a lomatarotarotaka na nona wasea vei ira tale eso. A vola e dua na ivola ena nona kaulotu tiko mai Itali, ka kaya: “Ena vuqa na veivanua e sala vata mai kei na levu sara na leqa kei na lomatarotaro na dola ni katuba ni matanitu ni Kalou. Eda sotava vakai keda e levu sara na veika vakaoqo. Sa ikoya gona, sa levu na noqu marau ena noqu a lako sobu kina ki wai vata kei na imatai ni tamata e vinakata na bula tawamudu. E sega ni rogo kamikamica vei keda na vosa vaka Itali me vaka na gauna taleitaki oqo, ena noqu qarava na cakacaka tabu vakalotu oqo, ka kunea e dua na gauna donu ka sega ni rawa vua e dua na tamata me sogota.”² [Raica na vakatutu 1 ena tabana e 61.]

iVakavuvuli nei Lorenzo Snow

Eda ciqoma na veivakalougatataki mai vua na Kalou ena noda vakamuria na ivakavuvuli a tauyavutaka o Koya.

Era tu eso na ivakavuvuli ka tauyavutaka na Kalou, ka ra sa kilai ka rokovi, ka ra na rawata kina na tamata me ra taukena na kila ka vakayalo, isolisoli, kei na veivakalougatataki. Ena veigauna taumada ni vuravura, ena nodra gauna tale ga na iapositolo, o ira na tamata era taukena na kaukauwa vakayalo kei na veimataqali dodonu ena nodra rawata na kila ka ka talairawarawa ki na veilawa dina a tauyavutaka na Turaga. Vakakina, o Epeli, e dua vei ira na luvei Atama, a taura na itukutuku ni kena cabori na isoro sa ikoya e dua na kena ivakarau a tauyavutaka na Kalou, ka rawa me ra rawata kina na tamata na veivakalougatataki, a vakarautaki koya me cakacaka, vakamuria na lawa, vakacabora na isoro, ka rawata rawa kina na ivakaraitaki lagilagi nei koya sa Cecere Sara [raica Nai Vakatekivu 4:4; Iperiu 11:4].

Vakakina, o ira na Antediluvians [na tamata ni bera na ualuvu vakaitamera] era vakaleqai ira vakataki ira, ni gauna e qai yaco mai kina me na mai vakarusai ira, e vakatakila na Turaga e dua na sala me ra dro rawa kina na yalosavasava; o koya gona, o ira kece era kila ka raica na sala era vakadeitaka nodra rawata na veivakalougatataki a yalataki [raica na Nai Vakatekivu 6–8].

O Josua, ni bera nona rawata me taukeni Jeriko, a vakamuria na kena ilakolako dina a vakarautaka na Kalou. Ena kena muri vakavinaka na kena veikalawa, me vaka na ivakaro, a rawata rawa kina na koro ko Jeriko. [Raica na Josua 6.]

E dua tale na ivakaraitaki: na kisi nei Neamani, na kapiteni ni nona ivalu na tui Siria;—e rairai, a tauvimate ena vukavuka kei na nona rogoci Ilaisa, na parofita, a kerekere vua me kauta tani na tauvimate o ya. Me vaka ni tiko vua na parofita, na Yalo Tabu, ka [dauveitaratara] kei na Vakasama ni Kalou, a tukuna vua me laki sili vakavitu ena Joritani, ena qai bula tale mai na lewena. Taumada, a nanuma o Neamani ni cakacaka oqo sa rui rawarawa sara ga ka sega ni taleitaka ka gadreva me kakua ni vakaio—kakua ni vakayagataka e dua na ka ka rawarawa sara. Ni oti e vuqa na vakanananu, ia, vakayalomalumalumutaki koya, a lako sara ki liu ka vakamuria na lawa; sa qai raica! ni dau salamuria mai vakadodonu na veivakalougatataki. [Raica na 2 Tui 5:1–14.] …

Na gauna a vakamacalataki kina na Kosipeli ni itabagauna, na isolisoli kei na veivakalougatataki era rawati mai na ivakavuvuli vata ga; sa ikoya, mai na talairawarawa ki na lawa viri era sa tauyavutaki tu. E se vakamatatataka tiko ga na Turaga na veika me caka, ka yalataka kivei ira kece era na cakava, na dodonu duatani dina; kei na kena vakayacori na veicakacaka oqori—dikevi na kedra bibi vakayadudua—ka yaco me ra qai kilai vakavinaka kina na veivakalougatataki sa yalataki tu.³

Na taudaku ni cakacaka tabu ni papitaiso kei na veivakadeitaki era sega ni rawa ni tawasei tani mai na cakacaka e loma ni vakabauta kei na veivutuni.

Eso era sega ni raitayaloyalotaka ni ena ruku ni Kosipeli ni itabagauna, ni ra a rawati, sega mai na kena dikevi e taudaku na isolisoli kei na veivakalougatataki, se ena cakacaka mai taudaku, ia mai na vakabauta wale ga kei na veivutuni, mai na cakacaka ni vakasama, ka sega na tikina me vakayago. Ia, ni biu vakatikitiki na ivakarau makawa, vakabauta makawa, kei na vakabauta vakatamata, ka da na rai ki na vosa ni Kalou, eda na kunea kina ni cakacaka e taudaku, se na cakacaka vakalotu e taudaku, ena ruku ni Kosipeli ni itabagauna, era sega ni rawa ni tawasei mai na cakacaka e loma, ni vakabauta kei na veivutuni. Me vakadinadinataka oqo, au vakamacalataka na vakadidike e salamuria:—

A kaya na i Vakabula, “Ia ka vakaevei ni dou sa vakatokai au me Turaga, Turaga, ka sega ni cakava na ka kau sa kaya?” [Luke 6:46.] Vakakina; nona kaya, “Ko koya yadua sa rogoca na noqu vosa oqo, ka cakava, kau na vakatautauvatataka kei na tamata vuku, sa tara na nona vale ena dela ni vatu.” [Raica na Maciu 7:24.] Ia,“O koya sa vakabauta ka papitaisotaki, ena bula.” [Marika 16:16.] Vaka talega kina, nona kaya, “Kevaka sa sega ni sucu e dua ena wai kei na Yalo Tabu, ena sega ni curu rawa ki na matanitu ni Kalou.” [Joni 3:5.] Na veivosa ni noda i Vakabula oqo e gadrevi kina vei ira na tamata me ra vakayacora na veicakacaka e taudaku me rawa ni ra vakabulai.

Ena siga ni Penitiko, kaya o Pita, kivei ira na veimataqali tamata, “Dou veivutuni, ka papitaisotaki, koi kemudou yadua, ena yaca i Jisu Karisito, me bokoci kina na nomudou ivalavala ca, ka dou na rawata na Yalo Tabu me isolisoli.” [Raica na Cakacaka 2:38.] Ena vosa vakaparofita oqo, eda vulica ni o ira na tamata me ra vakayacora e dua na cakacaka e taudaku, papitaiso ena wai, me rawa ni ra ciqoma na vakabokoci ni ivalavala ca, ni oti o ya na isolisoli ni Yalo Tabu. Ia, ni bera ni qaravi na cakacaka e tautuba, na cakacaka e loma e dodonu me vakayacori—vakabauta kei na veivutuni. Na vakabauta kei na veivutuni e lako mai ni bera na papitaiso; kei na papitaiso ni bera na vakabokoci ni ivalavala ca kei na ciqomi ni Yalo Tabu. …

Eso e vakasamataka ni cala na okati ni papitaiso ena kedra maliwa na ivakavuvuli yaga a bulia na Kalou, me qaravi ena kena rawati na vakabokoci ni ivalavala ca. Me isaunitaro, eda kaya ni iVakabula kei ira na iapositolo era sa cakava vaka kina ni bera o ikeda; o koya gona, eda vakila ni noda itavi me da muria na nodra ivakaraitaki. … Papitaiso … e kauta tani na yaloda mai na ivalavala ca kei na dukadukali, mai na vakabauta ena veisorovaki cecere. …

E sa vakaraitaki vakamatata ni veicakacaka e taudaku e sa dodonu me qaravi, vaka kina na vakabauta kei na veivutuni, me rawa ni ciqomi kina na dodonu ni Kosipeli.⁴ [Raica na vakatutu 2 ena tabana e 61.]

Na papitaiso e vakayacori mai na tabadromuci ena wai, kei na isolisoli ni Yalo Tabu e vakatikori mai na veitabaki ni liga.

Na papitaiso ena wai, baleta ni dua na tiki ni Kosipeli i Karisito, o koya gona eda raica kina ni o ira na dauveiqaravi ni Kalou ena nodra bula vagone era kauwaitaka sara me ra cakava na kena veiqaravi. …

Ena gauna oqo eda na vakayagataka e dua na gauna ena kena tovolei me rawati e dua na irairai matau ni kena ivakarau me qaravi kina na papitaiso. Sa ikoya na ivakadinadina ni a dua wale ga na sala se ivakarau me qaravi kina na cakacaka vakalotu oqo, kei na kena ivakarau oqori a vakamacalataki kivei ira na iapositolo ka vakamuri vakadodonu ena nodra veiqaravi taucoko sara. Me rawa ni da rawata e dua na taucoko ni vakanananu ena iulutaga oqo, ena yaga me da rai ki na ituvaki a qaravi kina na papitaiso.

E tukuni Joni [na Dauveipapitaisotaki] ni a papitaiso e Inoni, baleta ni sa levu kina na wai [raica na Joni 3:23]; ia kevaka me a kena ivakarau na vakamiraki, eda sega sara ga ni nanuma me na lako ki Inoni, baleta ni sa levu na wai ena vanua o ya, ka na lailai walega na wai, sa dina sara, e gadrevi me vakamiraki e Jiutia taucoko, ka rawa me rawati, ka sega ni gadrevi me vakayacori na ilakolako ki Inoni. E tukuna tale ga vei keda, ni a papitaiso ena Joritani, ka ni oti na kena qaravi na cakacaka vakalotu kivua noda i Vakabula, a cabe sara mai na wai, vakamacalataka na vakaibalebale ni nona a tu e loma ni wai, me rawa ni qaravi kina ena kena ivakarau dodonu na cakacaka vakalotu [raica na Maciu 3:16]. Vakadua tale; na vosa me baleti ira na Matanivanua, ni ra lako sobu ki wai vata kei Filipi, ka qai cabe sara mai na wai [raica na Cakacaka 8:26–38]; ena gauna oqo e dodonu me ra vakatusa o ira era kaya ni vakamiraki tu ga na wai ena yadredra o ira era papitaiso, ni ke me a vaka oya, sa qai sega kina ni yaga mera a lako kina i loma ni wai o ira mera ciqoma na cakacaka vakalotu oqori. O Paula, ena nona volavola kivei ira na yalododonu, e solia vei keda e dua na ivakadinadina matata ni tokona na tabadromuci. … Era kaya na iapositolo ni o ira na yalododonu era sa bulu vata kaya na Karisito ena papitaiso [raica na Roma 6:4; Kolosa 2:12].

E sa ivakadinadina matata ni sega ni rawa me ra bulu mai na papitaiso kevaka era sega ni tabadromuci se ubi ena wai. E sega ni rawa me tukuni ni sa bulu e dua na ka ni sega tu ni ubi e dua na tikina cava ga; ia, vaka tale ga kina, e dua na tamata e sega ni bulu ena wai mai na papitaiso vakavo ga ni sa ubi ena wai na yagona taucoko. Na ivakamacala ni iapositolo oqo ena ivakarau ni papitaiso e totoka vakaoti ka ni rau salavata kei na kena a solia na noda i Vakabula, Kevaka sa sega ni sucu e dua ena wai, vkts. Na sucu ena dua na ka e vakaraitaka na veivakatikori ena ka o ya; kei na kena basika mai, se lako mai ena ka o ya, na sucu ena wai, e dodonu tale ga me vakaraitaka na kena vakatikori ena katonigone ni wai ka qai kau tale mai.

Au vakabauta ni yaga na veika sa tukuni oti me vakadinadinataka na vakaibalebale kei na vakadodonu ni vakasama yadua ni tabadromuci sa ikoya na ivakarau a qaravi kina na cakacaka vakalotu ni veipapitaisotaki ena bula va-Karisito ena gauna e liu, ena kena vunautaki na Kosipeli ena kena savasava ka taucoko, o koya gona, au sa na sogota noqu vakadidike ena vanua oqo.

Eda vulica mai na ikaono [ni iwase] ni Iperiu ni a vakamatatataki sara ga na veitabaki ni liga ena kedra maliwa na ivakavuvuli ni Kosipeli. Era kila na tamata taucoko ni cakacaka vakalotu oqo, vaka kina na papitaiso me bokoci kina na ivalavalaca, mai na tabadromuci ena wai, sa vakawaletaki sara ga vakalevu ena veilotu va-Karisito ena gauna oqo; o koya gona, e vica na vosa, ena iulutaga oqo, au nuitaka, ni na yaga vakalevu sara. E vica na ivakaraitaki vei keda nona veitabaki ni liga na Karisito kivei ira na tauvimate ka vakabulai ira; kei na nona veikacivi kivei ira na iapositolo, ena iotioti ni wase ni ivola nei Marika, e kaya, Na veivakatakilakila oqo ena muri ira era vakabauta; era na tabaki ira tale ga sa tauvimate ena ligradra, a ra na bula kina, vkts. O Ananaiasa a tabaki Saula ena ligana, a sa rai rawa sara ni oti na veiqaravi ni cakacaka vakalotu oqo [raica na Cakacaka 9:17–18]. Na kasa ni waqa ena yanuyanu o Melita, o Paula a tabaka na ligana kivei tamai Pupiliu, na kovana ni yanuyanu, ka vakabulai koya mai ena dua na katakata (tauvimate) [raica na Cakacaka 28:8]. Ena vica na vosa oqo era na vakaraitaka vakamatata ni veitabaki ni liga e sa lesia na Kalou me dua na [inaki] me rawa ni rawati kina na veivakalougataki vakalomalagi.

E dina ga ni vakabulai ni tauvimate a semati vata kei na veiqaravi ni cakacaka vakalotu oqo, ia, ena noda vulica vakavinaka cake na iulutaga, eda na kunea e dua na veivakalougatataki maravu ka levu cake a semati vata kei na cakacaka vakalotu oqo. A tukuni vei keda, ena siti o Samaria, era a papitaisotaki kina na tagane kei na yalewa mai vei Filipi, ka vakavuna nodra marautaka vakalevu sara o ira era a papitaiso. E rairai era a marautaka na ka a yaco ena nodra ciqoma na vakabokoci ni ivalavala ca, mai na vakabauta, veivutuni, kei na papitaiso, kei na kena ciqomi eso na kena iwase ni Yalo Tabu ni Kalou, kei na kena muri ira yani vakayago, ni oti nodra rawata na nodra vakatulewa e loma mai na bokoci ni nodra ivalavala ca. Mai na kena iwase ni Yalo Tabu oqo, ka ra lako mai ni ra taukeni tu, sa tekivu me ra raica na matanitu ni Kalou. Ena dau nanumi ni noda i Vakabula e sa vakaraitaka, Kevaka sa sega ni sucu tale na tamata, ena sega ni raica rawa na matanitu ni Kalou; kei [na] tikina e tarava, e kaya, E sega ni curu rawa kina, vakavo kevaka sa sucu vakarua; imatai ena wai, kei na Yalotabu [raica na Joni 3:3–5].

Ena gauna oqo o ira na tamata mai Samaria era a sucu ena wai—era a ciqoma na imatai ni sucu, o koya gona, era sa tu ena dua na itutu ni raica na matanitu ni Kalou, na kena vakasamataki vata kei na vakabauta ka namaka tiko na kena veimataqali veivakalougatataki, dodonu, kei na lagilagi; ia ni ra se bera ni sucu tale vakarua, sa ikoya, ena Yalotabu, era se bera ni curu ki na matanitu ni Kalou—era se bera ni ciqoma na veika vivinaka ni dodonu ni Kosipeli ena kedra taucoko. Ena nodra sa rogoca ko ira na iapositolo mai Jerusalemi na rawa-ka nei Filipi, era sa talai Pita kei Joni ki Samaria, me baleta na inaki ni veiqaravi ena veitabaki ni liga. O koya gona, ena nodrau sa yaco yani ki Samaria, erau sa veitabaki ena ligadrau kivei ira era sa papitaiso, ka ra sa ciqoma na Yalo Tabu. [Raica na Cakacaka 8:5–8, 12, 14–17.]⁵ [Raica na vakatutu 3 ena tabana e 61.]

Na veivakalougatataki kei na veivakadeitaki e lako wale ga mai ena gauna era qarava kina na cakacaka vakalotu oqori o ira e tu vei ira na dodonu ni lewa.

Vakavo kevaka na [cakacaka vakalotu] a qarava e dua a lesi mai vua na Kalou, ena sega ni salamuria mai na veivakalougataki vata ga. O ira na iapositolo kei na vitusagavulu era a lesi mai vei Jisu Karisito me ra qarava na cakacaka vakalotu ni Kosipeli, ekeri gona na isolisoli kei na veivakalougatataki ni vuravura tawamudu e dodonu me ra marautaka. O koya gona, e kaya na Karisito kivei ira na iapositolo, Na ivalavala ca ni tamata yadua dou sa bokoca ena bokoci; na ivalavala ca ni tamata yadua dou sa sega ni sereka, ena sega ni sereki [raica na Joni 20:23]: sa ikoya, na tamata yadua ena lako mai ena yaloraramusumusu, veivutunitaka ena yalodina na nona ivalavala ca, ka ciqoma na papitaiso mai vei ira na iapositolo e dodonu me vosoti na nodra ivalavala ca mai na dra ni veisorovaki nei Jisu Karisito, kei na veitabaki ni liga e dodonu me ciqomi kina na Yalo Tabu; ia o ira era na cata na ciqoma na ituvaki ni veika oqo mai vei ira na iapositolo ena tu vata ga kei ira na nodra ivalavala ca. … Na kaukauwa kei na lewa ni veiqaravi ni Kosipeli oqo a vakatikori kivei ira eso mai vei ira na iapositolo; baleta ni sega wale ga ni o ira na iapositolo era taura tiko na itavi vakacakacaka oqo. … Ena gauna oqo, vakavo ke sa kunei e dua ni taura tu na itutu vakaoqo, e dua ka tu vua na kaukauwa me veipapitaisotaki kei na veitabaki ni liga, ena sega ni rawa vua e dua e vakaitavi me ciqoma na cakacaka vakalotu oqori, me namaka na veivakalougatataki, vakavo ga kevaka era sa qaravi ena kedrai ivakarau vakalawa.

… Na kaukauwa ni veiqaravi ena cakacaka vakalotu ni Kosipeli [a sa] yali ena vuqa na senitiuri. … Na lotu era a tauyavutaka na iapositolo a lutu yani vakamalua, lako sese ena vanua liwalala, ka yali na kena kaukauwa, na kena matabete, ka veisau mai na ituvatuva ni Kalou, na lotu a vakayalia talega na kena isolisoli kei na loloma soliwale; era sa talaidredre ki na ivunau ka ra sa vakatanitaka na ilesilesi ni Kosipeli; veisautaki na tabadromuci ki na vakamiraki, ka vakawalena taucoko sara ga na veitabaki ni liga; sega ni taleitaka na parofisai ka sega ni vakabauta na veivakatakilakila. …

O Joni, ena nona iVakatakila, nona raica ka vosataka na lako sese ni lotu ena vanua butobuto, … e kaya, ena [wase 14, tikina e 6], ena vakalesuimai ni Kosipeli. “Ia kau a raica e dua tani tale na agilose sa vuka ena maliwa kei lomalagi kei vuravura, a sa taura na itukutuku vinaka e sega ni oti rawa, me vunautaka vei ira era sa tiko e vuravura;” e sa kena ivakadinadina ni parofisai e dodonu me vakayacori ena so na gauna e liu ni bera na ikarua ni nona lako mai na noda i Vakabula.

… Au wasea oqo na ivakadinadina, noqu veivakadeitaki cecere ena ivakatakila mai vua na Kalou, ni parofisai oqo a sa vakayacori oti, ni dua na Agilosi ni Kalou a sikovi ira mai na tamata ena iotioti ni gauna oqo ka vakalesuya mai kina na ka sa yali tu vakadede, na matabete mada ga,—na idola ni matanitu,—na taucoko ni Kosipeli tawamudu.⁶ [Raica na vakatutu 4 ena tabana e 61.]

Ena salamuria vakaidina mai na veivakalougatataki yalataki, na noda taqomaka na veiyalayalati ni papitaiso ka vakasaqara na veidusimaki ni Yalo Tabu.

Oqo gona sa ikoya na ituvatuva ni Kosipeli ena nodra gauna na iapositolo, vakabauti Jisu Karisito, veivutuni, papitaiso ena tabadromuci e wai me bokoci kina na ivalavala ca, kei na isolisoli ni Yalo Tabu ena veitabaki ni liga. Ena kena sa kilai ka muri vakavinaka na ituvatuva oqo, na kaukauwa, isolisoli, veivakalougatataki, kei na lagilagi e dodonu e salamuria sara ga mai; kei na veiyabaki yadua kei na gauna, kei na [kena] muri vakavinaka na veikalawa ka dikevi ena nodra vanua kei na ituvatuva, ena salamuria vakaidina mai na veivakalougatataki vata ga; ia ni vakawaletaki, taucoko se vakatikina ga, e sa na rawa me yali vakadua na veivakalougatataki oqori, se vakalailaitaka sara ga vakalevu na kedra bibi.

O Karisito, ena nona ivakaro kivei ira na iapositolo, e kaya me baleta eso na isolisoli vakalou ni o ira era ciqoma e vua mai kina na talairawarawa ki na ituvatuva ni veika oqo [raica na Marika 16:15–18]. O Paula … e vakamacalataka taucoko sara na veimataqali isolisoli ka tiko kina na taucoko ni Kosipeli; e cavuta e ciwa vei ira ka tukuna vei keda ni ra mawe se vua ni Yalo Tabu [raica na 1 Koronica 12:8–10]. Ena gauna oqo na Yalo Tabu sa yalataki kivei keda kece, me vaka mada ga e lewe vuqa e dodonu me kacivi ira na Turaga [raica na Cakacaka 2:37–39]. Na isolisoli oqo, sega ni veisautaki rawa na kena ibulibuli kei na kena icakacaka, ka sega ni rawa me wasei na kena isema mai na yalayala vata kei na inaki oqo se ituvatuva ni veika, e yaco me vakaibalebale, tautauvata, ka Vakaivolanikalou me namaki kina na isolisoli vata ga kei na veivakalougatataki; ia kevaka o Noa, nona taya oti e dua na Waqa, e rawa me taura ka rawata nona vakabulai vakayago me vaka na yalayala [raica na Mosese 7:42–43]; se o Josua, nona kabasitaki Jeriko vakavica na kena tukuni tiko, e rawa me kabata cake na bai ka ra sa rawata na koro [raica na Josua 6:12–20]; se o ira na Isireli, nodra kauta mai na nodra imadrali e vakaroti, ena qai rawa, me vaka na yalayala, [e rawa] me vosoti nodra ivalavalaca [raica na Na Vunau Ni Soro 4:22–35]; se o Neamani, ni oti na nona vakamuria na veika a tukuna o Ilaisa, me laki sili vakavitu ena Joritani, e rawa me kerea ka rawata na nona vakabulai [raica na 2 Tui 5:1–14]; se me kena iotioti, na tamata mataboko, ni oti na nona laki tavoi ena isilisili o Sailoama, kevaka me a rawa ni qai taura ka vakasamataka na isau ni yalayala [raica na Joni 9:1–7], au na qai kaya, ena dodonu ni kena ivakarau kei na kena tautauvata, ni gauna e biuta kina vakatikitiki e dua na tamata na nona lewa vakatani, kei na vakanananu vakailawalawa, kei na ivakarau lasu, ka vakatautauvatana ki na ituvatuva taucoko ni Kosipeli i Jisu Karisito, ia e sega ni dua na ka ena ruku ni vuravura vakasilesitieli ni rawa me cakacaka me saqata na tauri kei na ciqomi ni isolisoli ni Yalo Tabu kei na veivakalougatataki kece era semati vata kei na Kosipeli ena yabaki vakaiapositolo.

Me rawati na vakabauta vakalotu ka na vakabulai keda ena mata ni Kalou, e dodonu me da rawata na Yalo Tabu, kei na kena rawa me rawati na Yalo Tabu, e dodonu me da vakabauta na Turaga o Jisu, oti qai veivutunitaka na noda ivalavala ca, sa ikoya, vakanadakui ira, ka toso ki liu ka tabadromuci ena wai me baleta na bokoci ni ivalavala ca, qai ciqoma na veitabaki ni liga.⁷

Ena noda ciqoma na Kosipeli oqo, eda veiyalayalati e mata ni Kalou ni da na liutaki, ni da na lewai, ka da na muria na vakatutu ni Yalo Tabu, ni da na muria na vakatutu ni ivakavuvuli ka solia na bula, ka solia na kila ka, ka solia na kila ena veika va-Kalou, ka dau veitaratara kei na vakasama ni Kalou; ka da na cakacakataka me da rawata na veinaki ni Kalou ena vakabulai ni matavuvale vakatamata, ka cakava me dua na ibole ni bula, na “Na Matanitu ni Kalou, se sega ni dua na ka.” Sa vakacava na vinaka ni noda maroroya tiko na veiyalayalati oqo … ka vakamuria na vosa ni Yalo Tabu, o ikeda vakataki keda e dodonu me da vakatulewa. Me vaka na levu ni noda cakava oqo, eda na ciqoma na veivakalougatataki mai vei koya sa Cecere, ka vakararamataki na noda vakasama, vakarabailevutaki na noda kila, ka da sa toso ki liu ena sala vakalou, ena sala ni veivakataucokotaki. … Me vaka na levu ni noda guce ena noda vakabauta, … eda sa qai druka ena itaviqaravi oqo ka da sa vakaitavitaki keda me da rawata na bula tawamudu, me da rawata na vuku kei na kila-ka kei na vakalou ni kila vakacakacaka ena kena levu me vorata na ivalavala ca kei na veivakatovolei ka ra tu vakavolivoliti keda. Ena noda sa vakamuria tiko na vakatutu ni Yalotabu vakalou oqo, eda sa sotava beka na vakacegu kei na reki e yaloda, eda sa valuta na meca, eda sa binia vei keda na noda iyau ka sega ni rawa me vakarusa na sarasara kei na veveka, ena gauna oqo eda sa toso ki liu ena gaunisala ni matanitu vakasilesitieli.⁸ [Raica na vakatutu 5 e ra.]

Vakatutu ni Vuli kei na Veivakavulici

Taurivaka na veivakasama oqo ni ko vulica na veiwase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

Ena nomu wilika na itukutuku ena tabana e 49–51, raitayaloyalotaka na nomu papitaiso vakai iko se e dua na gauna nomu raica e dua tale e ciqoma na veicakacaka vakalotu oqo. Na veiyalayalati cava o cakava ena nomu ciqoma na veicakacaka vakalotu oqo? E vakayarayarataka vakacava na nomu bula na veiyalayalati oqo?
Na cava na vuna e sega ni veirauti kina na vakabauta kei na veivutuni ni sega na cakacaka vakalotu? Na cava na vuna e sega ni veirauti kina na cakacaka vakalotu ni sega na vakabauta kei na veivutuni? Ena nomu vakananuma se veivosakitaka na veitaro oqo, raicalesu na ivakavuvuli nei Peresitedi Snow me baleta na cakacaka e loma kei na cakacaka vakalotu e tautuba (tabana e 51–52).
Vulica na ivakavuvuli nei Peresitedi Snow ena tabana e 52–55, vola na ivolanikalou a vosa kina o koya. Ena veigaunisala cava e vakatorocaketaka na ivolanikalou oqo na nomu kila na kena gadrevi na tabadromuci? Na cava na vu ni nomu nanuma ni veitabaki ni liga me baleta na isolisoli ni Yalo Tabu sa ikoya e dua na “veivakalougatataki levu cake” mai na veitabaki ni liga me baleta nodra vakalougatataki na tauvimate?
Wilika na iwasewase e tekivu ena tabana e 57. Na “isolisoli kei na yalololoma” cava e tu ena nomu bula me baleta na kena sa vakatikori oti na matabete?
Vulica na iotioti ni rua na parakaravu ni iwase. Na cava na kena ibalebale vei iko mo liutaki ka lewai mai “na vakatutu ni Yalo Tabu”?
E rau semati vakacava na Vunau kei na Veiyalayalati 68:25–28 ki na ivakavuvuli ena iwase oqo? Na cava e rawa me ra cakava na itubutubu me vukei ira na luvedra me ra kila na vakabauta, veivutuni, papitaiso, kei na isolisoli ni Yalo Tabu?

iVolanikalou Veisemati: 2 Nifai 31:12, 17–20; Mosaia 18:8–10; Alama 5:14; V&V 20:37; 36:2; 39:6; 130:20–21

Veivuke ena Veivakavulici: “[Dau levea] na veitemaki ni kena kovuti e dua na iwase levu ni lesoni. … Eda vakavulici ira tiko na tamata, e sega ni levu ni lesoni e rawa ni da vakavulica ena dua na gauna; kei … na ituvatuva yadua ni lesoni au sa raica oti e dau tu ga kina levu cake na ka e tu me vakavulici mai na noda rawa ni kovuta ena dua na gauna” (Jeffrey R. Holland, “Teaching and Learning in the Church,” Ensign, June 2007, 91).

E vakarautaka vei keda e dua na ivakaraitaki o Jisu Karisito ena Nona a papitaiso mai na tabadromuci.

Ena siga ni Penitiko, e rauta ni 3,000 na tamata era a papitaiso.

Eda ciqoma na isolisoli ni Yalo Tabu mai na veitabaki ni liga.