Wase 13

iSoqosoqo ni Veivukei: Na Loloma Cecere Dina kei na Lotu Savasava

“E sega tale ni dua na isoqosoqo a tauyavutaki ena dua na inaki vakaturaga. Na kena yavu na loloma cecere, sai koya na loloma savasava i Karisito.”

Mai na Bula nei Lorenzo Snow

Ena vulaikatakata ni 1901, eratou a tuvalaka kina na mataveiliutaki ni iSoqosoqo ni Veivukei e dua na itaviqaravi me caka ena siga taucoko me baleti ira na marama ena iSoqosoqo ni Veivukei ena Bucabuca na Salt Lake. A vakadonuya o Peresitedi Lorenzo Snow e dua na veisureti me vosa ki na ilawalawa. A tekivuna na nona vosa ena nona kaya: “Au marautaka na gauna vinaka oqo meu mai tiko vata kei kemuni ena dua se rua na auwa ena yakavi nikua, kau vakabauta ni o ni marau tiko ena yakavi nikua. Na veivakabulabulataki kei na veivakamarautaki dodonu era ka vinaka, kau marau niu raici kemuni na marama ni o ni vakacegu ka vakabulabulataki kemuni tiko vakalailai, o kemuni o ni sa dau cakacaka sara vakaukauwa ena veisiga yadua ena nomuni veivale kei na iSoqosoqo ni Veivukei sa ganiti kemuni vakavinaka sara na marau kece sara o ni na rawata.”

A vakaraitaka o Peresitedi Snow, na ganei Eliza R. Snow ka sa veiqaravi oti vakaikarua ni Peresitedi ni iSoqosoqo ni Veivukei na vakavinavinaka me baleta na cakacaka ni iSoqosoqo ni Veivukei. Ni vosa me baleti ira na marama ena Lotu, e kaya kina vaqo, “E dredre me da vakaraitayaloyalotaka na ka e dodonu me da a cakava, se na tubu cava e na rawata na cakacaka ni Turaga, kevaka e sega o ira.” Meu cavuta e dua na kena ivakaraitaki, a tukuna o koya me baleta na parokaramu ni kaulotu ni Lotu ena gauna oya, ka vakavuqa ni ra dau kacivi kina na tagane vakawati me ra laki kaulotu tudei: “Ni keimami lako tu ena veiqaravi ni kaulotu ki veivanua tani, e sega ni dau rawarawa cake na nodra veiqaravi e vale mai na neimami ena veivanua tani; ia ena loma ni veivakatovolei kei na bula dravudravua era sa dau vakaraitaka na vosota vakadede, e dua na isasabai kei na vukei ira vakataki ira sa veivakauqeti dina. Me vakavinavinakataka na Kalou ena vukudra na marama ena Lotu! Oqori na ivakarau ni noqu nanuma nikua ena noqu tiko vata kei kemuni ena soqoni oqo.”¹ [Raica na vakatutu 1 ena tabana e 188.]

iVakavuvuli nei Lorenzo Snow

Era vakaraitaka na iSoqosoqo ni Veivukei na loloma cecere dina kei na lotu savasava.

A tauyavutaki na iSoqosoqo ni Veivukei … mai vua na Parofita o Josefa Simici, ena veivakauqeti ni Turaga. … Nikua sa kilai tu me dua na kaukauwa mana ni vinaka ena Lotu. …

Na itavi ni iSoqosoqo ni Veivukei me vakayaloqaqataki ira na vakaleqai tu, me qaravi ira na tauvimate kei ira na malumalumu, me vakani ira na dravudravua, me vakasulumi ira na luvaiwale, ka me vakalougatataki ira na luvena tagane kei na luvena yalewa na Kalou. E sega ni dua tale na isoqosoqo a tauyavutaki ena dua na yavu e vakaturaga cake. Na kena yavu na loloma cecere, sai koya na loloma savasava i Karisito [raica na Moronai 7:47], ka sa vakatakilai na yalo oqori ena nodra veiqaravi kece na iSoqosoqo vei ira na tamata. E kaya na iApositolo o Jemesa ni “lotu savasava ka sega ni cala e mata ni Kalou kei na Tamada sa vakaoqo: Me sa dau raici ira na luveniyali kei ira na yada ni ra sa rarawa, me sa qarauni koya talega me kakua ni tauvi koya na duka ni ka vakavuravura.” [Jemesa 1:27.] Ni ra ciqoma me dina, era sa vakaraitaka dina sara ena nodra bula na lewe ni iSoqosoqo ni Veivukei na lotu savasava ka sega ni vakacacani, ni ra sa dau qaravi ira era kune rarawa, era sa dau mokoti ira na luveniyali, na yada ena ligadra ni loloma ka ra vakasavasavataki ira tiko mai na duka ni veika vakavuravura. Au rawa ni vakadinadinataka ni sega na marama savasava cake ka dau rerevaka na Kalou e vuravura mai vei ira era na kune ena iSoqosoqo ni Veivukei.² [Raica na vakatutu 2 ena tabana e 188.]

Era dau cakacaka vata kei ira na matabete o ira na marama ena iSoqosoqo ni Veivukei me ra tosoya ki liu na veika ni matanitu ni Kalou.

Sa dau ivurevure ni marau vei au meu raica na nomuni yalodina na marama ena iSoqosoqo ni Veivukei ena nomuni dau tu e yasadra na tamata ni Turaga ena veigauna kece sara. O ni sa dau kune ena yasadra na Matabete, ka vakarau tu me vaqaqacotaka na ligadra ka cakava na nomuni itavi ena veivuke me tosoi ki liu na veika ni matanitu ni Kalou; ia ni o sa dau veivuke ena veicakacaka oqo, o na vakaivotavota talega ena marautaki ni qaqa ena cakacaka kei na bula vakalou kei na lagilagi ena solia na Turaga vei ira na luvena yalodina.

… E sega ni dua na bisopi yalomatua me na sega ni vakavinavinakataka na nodra cakacaka na iSoqosoqo ni Veivukei ena nona tabanalevu. Na cava e rawa ni cakava e dua na Bisopi kevaka e sega ni dua na iSoqosoqo ni Veivukei? Au na rawa ni kaya vei ira kece na Bisopi ena Lotu, ni vakayaloqaqataki ira na marama ena iSoqosoqo ni Veivukei, ka tokoni ira ena nodra cakacaka ni loloma cecere kei na gagadre ni caka dodonu, ka ra na vakadeitaka na veivakalougatataki vei iko kei ira na tamata.³ [Raica na vakatutu 3 ena tabana e 189.]

E vinaka me tiko na veivakauqeti ni iSoqosoqo ni Veivukei ena veivale yadua.

Au na vakasalataki ira na tagane me ra vakayaloqaqataki ira na watidra me ra [vakaitavi ena] isoqosoqo … ; ni na dua na ka vinaka me tiko na veivakauqeti ni isoqosoqo oqo ena veivale yadua. Au kerei kemuni, na ganequ, ena nomuni veisiko ki na nodra veivale na Yalododonu Edaidai, mo ni kauta tiko na veivakauqeti oqo ena veivanua kecega o ni lako kina. Sa vakaraitaka vakamatata vei kemuni na Turaga na ivakarau ni nomuni veiwekani vata kei Koya kei na veika e namaki vei kemuni me vaka ni o yalewa vakawati ka tina. Vakavuvulitaka na veika oqo vei ira o dau sikova, vakabibi vei ira na goneyalewa. …

Oi kemuni, na ganequ, me vaka o ni lewena na iSoqosoqo ni Veivukei ka tina e Isireli, sa dodonu mo ni dau cakacakataka na nomuni veivakauqeti kece sara … me baleta na bula vakatina savasava kei na yalodina ki na veiyalayalati ni vakawati.⁴ [Raica na vakatutu 4 ena tabana e 189.]

Ni tubu tiko na Lotu, ena basika vei ira na marama na veimadigi cecere cake me ra veiqaravi.

E sega ni gadrevi vei au meu vakamatailalaitaka na veika era sa cakava na iSoqosoqo ni Veivukei ena veigauna e liu; sa kuruseti Saioni kei na vuqa na veiyasai vuravura, na vakasakiti ni kena cakacaka. Sa rauta ga me tukuni, ni sa dinata na kena itavi, ka na sega ni voroki na kena isausau, kevaka e dua e tautauvata, mai vei ira kece tale na vo ni isoqosoqo ni loloma. Era sa sakitaka na Yalododonu Edaidai kei na veika sa qarava oti, ka ra vakavinavinaka vei Tamada mai Lomalagi ena Nona vakauqeta na Nona tamata na Parofita me tauyavutaka e dua na isoqosoqo vaqo. E sinai ena veika yalataki na vunilagi ni iSoqosoqo. Ni sa tubu cake tiko na Lotu, ena vakalevutaki vata kaya kei na lomananibai ni kena yaga, ka na levu cake na kena vinaka mai na veigauna sa oti. Kevaka era na duavata na marama kece sara me ra tokona na isoqosoqo, ena rawati e dua na cakacaka vakaitamera ka na veivakalougatataki tikoga ki na Lotu. Ena vakavinavinakataki me da raica na nodra taleitaka na isoqosoqo na marama uabula ka vakakina o ira na qase, ia ni yaco me vakakina era na raica ni na vaqaqacotaka na nodra vakabauta, ka vakarabailevutaka na vakasama me baleta na bula kei na kena itavi, ka na tosoi ira ki liu ena veika vakayago ena sala ni toso kei na vinaka sara.⁵

Mai na itekivu ni nodra cakacaka sa soli vei ira na [marama ena Lotu] na veivakalougatataki ni Kalou, kau sa sarava toka ena marau kei na vakavinavinaka kei na noqu taleitaka vakalevu sara na nodra toso. …E kurabuitaki na nodra qaqa, ka vakasakiti na nona vakalougatataki ira na Kalou ka sovaraka mai vei ira na nona Yalo Tabu. Sa yaco me ra, e voleka sara meu kaya ena veidokai, vaka na agilosi ena kedra iserau na tamata i vuravura.⁶ [Raica na vakatutu 5 ena tabana e 189.]

O ira na marama ena iSoqosoqo ni Veivukei era vakabauta na Kalou ka qaravi Koya era na vakalougatataki ena bula oqo kei na veigauna tawamudu.

“Oqo na ka eda gadreva me da teivaka ki yalodra na marama—me ra yaga ena nodra iyalava ka kua ni yalolailai ena vuku ni veika dredre e basika mai, ia vakabauta na Kalou ka raici Koya, kei na nona veivakalougatataki vakasakiti, au yalataka vei iko ni na sovaraki yani vei iko.” Oqo na veika o na sotava. … Meu taleva tale mada, kakua ni yalolailai, ia lako yani ka cakava na veika vinaka, cakacakataka na vakabauta, ia na madigi kece e basika mai segata mo vakavinakataka cake. Keimami vinakata mo ni cakacakataka na taledi kece sara sa solia vei kemuni na Kalou. Ia sai koya beka oqori na veika me baleta na veika me rawa kina na qaqa vei iko. Ni sa tekivu me lakova e dua na tamata e dua na gaunisala sa vakatakilakilataka tu na Turaga, me rawa kina na veika e vinaka Vua, ena qaqa vakaidina. Sa tu o koya ena vanua donu sara ga e vinakata na Kalou me tu kina, ka sai koya oqori na vanua mo na, ena dodonu cecere sara, kerea kina na Nona veivakalougatataki na Kalou.⁷

Au nanuma meu tukuna, me vakalougatataki ira na vakaitutu kei na lewe ni iSoqosoqo ni Veivukei na Kalou. O ni vakayacora tiko e dua na itavi bibi, kau na vakauqeti kemuni mo ni kakua ni oca ena caka vinaka [raica na V&V 64:33]. Eda nanamaki kece tiko ki na lagilagi vakasilesitieli ia na cecere ni veika e tu e matada ena sega ni vakamacalataki rawa ena vosa vakatamata. Kevaka o ni na yalodina tikoga ena cakacaka o ni sa vakaitavi kina, o ni na vakaivotavota ena lagilagi oqo, ka o ni na reki me tawamudu ena iserau ni Kalou kei na Lami. E yaga me da sasagataka oqo, ena kilikili me da solibulataka, ia me kalougata na tagane se na yalewa ena yalodina tiko me rawata. Me vakalougatataki kemuni kece na Kalou.⁸ [Raica na vakatutu 6 ena tabana e 186.]

Vakatutu ni Vuli kei na Veivakavulici

Taurivaka na veivakasama oqo ni ko vulica na wase ni ivola oqo se ni ko vakavakarau mo veivakavulici. Me ikuri ni veivuke, raica na tabana e v–vii.

E kaya o Peresitedi Snow ni na dredre sara me raitayaloyalotaka na toso ni cakacaka ni Turaga kevaka era sega na marama ena Lotu (tabana e 184). Na sala cava era cau tiko kina na marama ena cakacaka ni Turaga nikua?
Vakasamataka vakatitobu na vosa nei Peresitedi Snow me baleta na itavi ni iSoqosoqo ni Veivukei (tabana e 184). Vakasamataka mada e dua na gauna era a qarava vakavinaka kina na itavi oqo na iSoqosoqo ni Veivukei ena nodra vukei iko se na nomu matavuvale. Sa vakayarayarataki vakacava na nomu bula na ivalavala oqori?
Raicalesu na iwasewase ka tekivu ena boto ni tabana 184. Ena sala cava era tosoya kina na marama ena iSoqosoqo ni Veivukei na veika me baleta na matanitu ni Kalou”? Na ivakaraitaki cava soti o sa kena ivakadinadina bula me baleta na nodra cakacaka vata na marama ena iSoqosoqo ni Veivukei kei ira ena matabete?
Vakasamataka vakatitobu na kerekere nei Peresitedi Snow me ra veivakauqeti na marama “me baleta na bula vakatina kei na yalodina ki na veiyalayalati ni vakawati” (tabana e 185). Na cava e gadrevi kina e vuravura nikua na veivakauqeti oqo? Na sala cava e rawa ni ra veivuke kina na iSoqosoqo ni Veivukei vei ira na goneyalewa me ra vakavakarau ki na vakamau ena valetabu kei na bula vakatina?
A kaya o Peresitedi Snow, “Ni sa tubu cake tiko na Lotu, ena vakalevutaki vata kaya kei na lomananibai ni kena yaga, [na iSoqosoqo ni Veivukei] ka na levu cake na kena vinaka mai na veigauna sa oti.” (tabana e 185). Ena vuravura nikua, na cava e rawa ni ra cakava na iSoqosoqo ni Veivukei me levu cake kina na nodra veivakauqeti ni vinaka?
Vulica na iwasewase ka tekivu ena tabana e 186. Vakasamataka vakatitobu na sala eso o sa tuberi kina mo ni “tiko ena vanua e vinakata na Kalou [mo ni] tiko kina.” Sa vukei iko vakacava na Kalou ena sasaga oqori?

iVolanikalou Veisemati: Aisea 1:17; Maciu 25:34–40; Mosaia 4:26–27; Alama 1:29–30; Moronai 7:44–48

Veivuke ena Veivakavulici: “Ni o vakavakarau mo veivakavulici, raica mo vakayagataka na iwalewale duidui ni veivakavulici mai na dua na lesoni ki na dua tale. E rawa ni kena ibalebale oqo na kena vakayagataki e dua na ka rawarawa me vaka e dua na iyaloyalo duiroka rawarawa se ivolakabi e lalaga ena dua na lesoni kei na dua na lisi taro ena papanivolavola ena dua tale” (Na Veituberi, Me iLutua ni Noda Bula, 89).

Mai na veisiga taumada ni Lotu, era sa dau cakacaka vata na marama ena iSoqosoqo ni Veivukei ena Lotu ka ra veivaqaqacotaki vakayago ka vakayalo.

“Era sa dau vakaraitaka vakaidina sara ena nodra bula na lewe ni iSoqosoqo ni Veivukei na lotu savasava ka tawacala.”