Muhta in Liye
Ke kuh luhn Nguhn Muhtahl, Kraist El ac ahkkweye kuht in liye kuht sifacna ac liye mwet sahyac oacna ke El oruh.
Liye Poun God
Nga luhngse sramsram se ke Wuhlweacng Mahtuh kacn sie mukul fuhsr suc kuhlwacnsapacl mwet pahluh Elisha. Toang na ke sie lututacng ah mukul fuhsr se inge tuhkahkack, illac nuh lihk ah, ac liyacack lah siti sac rauniyucklac sin un mwet mweun puhs suc kena kuhnaosuhloslac. El kahsruhsr nuh yohrohl Elisha: “Pakomuta, kut ac lalna! Mea kut ac oru?”
Elisha el topuk, “Nimet sangeng. Pus mwet wi kut lukelos.”
Elisha el etuh lah mukul fuhsr sac enenuh yohk liki na in ahkwoyeyuck ke mislac; el enenuh aruhruhma. Na Elisha “el pre, … Leum, … ikasla mutal elan ku in liye. Leum God El topuk pre lal, ac mwet kulansap lal Elisha el ngetak ac liye lah pe eol uh sessesla ke horse ac chariot e, raunella Elisha.” 1
Sahp ac oasr pacl ke kom, oacna mwet kuhlwacnsap sac, in liye lah kom sifacna tihkuclkucl in liye lah God El orekma fuhkah in moul lom an—ke pacl ma kom puhlakihn muh kom rauniyucklac—ke ma upac luhn moul suhkawihl uh iskowi in puhtati sikuckmuhtuhnte. Sano ac luhlahlfongi God ac ke pacl Lal an, ke srihpen kom kuh in luhlahlfongi Insiacl ke insiom nohfohn. Tuhsruhk oasr pac mwe luti ahkluo se inge. Tahmtahel ac tamuhlwel sacohk wiyuck, kom kuh pac in pruhe nuh sin Leum in ikacslah motom in liye ma suc kom tiac kuh in liye.
Liye Kuht Sifacna Oacna ke God El Liye Kuht
Sahp ma yohk srihpac emet nuh sesr in liye in kahlwem an pa lah suc God ac suc kuht na pwacye uh—wen ac acn nuhtin ninac ac pahpah inkuhsrao, ke ohiyac muhtahl ac acn ma pahtpaht. 2 Siyuck sin God in ahkkahlwemye ma pwacye inge nuh sum, weacng pac fuhkah puhlakihn Lal keim. Ke yohk kahlwem lom ke ohiyom ac srihpac na pwacye lom, lihksreni liye nuh ke nguhn, ma inge ac mokle yohk ma nuhkwewa ke moul lom an.
Liye Mwet Sahyac
Ke [kuht] kahlwem kac lah God El liye kuht fuhkah ac ahkolah inkacnek uh in kahsre kuht in liye mwet sahyac oacna El oruh. Mwet sihm nuh ke newspaper kuh magazine David Brooks el fahk muh: “puhslac ma elyah yohk luhn acn pucspucs uh tuhkuh me sin mwet ma tiac puhlakihn muh liyeyuck kuh etweyuck elos. … [Oasr sie] ma wo yohk srihpac … ma kuht nuhkwewa enenuh in eis … wo liki na[, ac ma ingacn] pa ma wo se in lihksreni liye sie sin sie ac in lihksreni liyeyuck.” 3
Jisus Kraist El liye yohk mwet uh. El liye kais sie mwet, enenuh lalos, ac suc elos kuh in eklac oacna. Ke mwet sahyac liye mwet pahtuhr, mwet koluk, kuh mwet esacni tax, Jisus El liye mwet tuhma lutlut; ke mwet sahyac liye sie mwet. 4
Finne ke moul kahfofo lasr, kuht kuh in fahsr tukun mwe srihkasrak luhn Jisus ac liye kais sie mwet—enenuh lalos, luhlahlfongi lalos, tihkuclkucl lalos, ac suc elos kuh in eklac oacna. 5
Ke nga pruhe nuh sin Leum in ikacslah muhtuhk in liye ma suc nga tiac kuh in liye, nga kwacna siyuck sihk kihsensiyuck luo ac lohacng nuh ke nuhnak mokleyuck ma tuhkuh suc pa: “Meac nga oruh ma nga enenuh in tui tilac oruh?” ac “Meac ma nga tiac oruh ma nga enenuh in muhtwacwacack in oruh?” 6
Mahlwem ekahsr somlah ah, ke toeni in kuhfa luhn Leum, nga siyuck sihk sifacna kihsensiyuck inge ac tuh lut ke nuhnak mokleyuck ma tuh tuhkuh ah. Tui nimet ngwetwacng nuh ke phone nuhtum an ke kom tu tahklac tuhpan an. Ngwetwacng liye phone nuhtihk uh ke nga tu tahklac uh apkuhran in liyac se; nga sokwack lah pacl wowo se in oraclah ma puhs, riti email, liye news, kuh liye ma sulkackihnyuck ke social media.
Lututacng tok ah, nga liye lah nga tu tahklac ke lain na loeloes se ke stoh ah. Nga olwack phone nuhtihk ah na esamwack nuhnak mokleyuck ma nga tuh eis ah. Nga fihliyac phone nuhtihk ah ac ngwetngwet raunweack acn uh. Nga liyacack sie mukul mahtuh tu met likiyuc ke tahk soko ah. Cart se lal ah wacngihn koano sahyacn na tin ekahsr na ke mongo nwacn kihsrihk. Nga motok kuhtuhsrihsrihk tuhsruhk nga fahk sie ma arulacna puhlaik oacna, “Nga kuh in liye lah oasr kihsrihk nuhtum.” El fahk lah eng upac ac tuhkuh, ac el tiac ke langyak a wacngihn mongo nwacn kihsrihk uh. Kuht sramsram ke kihtin pacl, ac na el forma nuh yuruk ac fahk ohinge, “Kom etuh, nga soenna fahk nuh sin kuhtwena mwet ke ma se inge, tuhsruhk lwen luhk misenge.” Suhpwacrlac insiuck. Nga fahk happy birthday nuh sel ac pruhe mislac ke kihsen kuloh lah nga tiacna ngwetwacng nuh ke phone nuhtihk uh, ac luhkuhn nga tiac eis pacl wowo in liye na pwacye ac kuhpahsryang nuh sin siepacna mwet suc enenuh.
Ke insiuck kwewa nga tiacna ke ngacn oacna prist sac kuh mwet Levi se suc fuhfahsryucsr nuh Jericho—sie mwet suc liye na fahlac pahselah. 7 Tuhsruhk puhs pacl nga motko muh nga oruh ohingacn.
Liye Srihpac luhn God nuh Sihk
Nga etwaclah ke kihtin pacl somlah ah sie mwe luti na yohk srihpac in lihksreni liye uh sin sie muhtwacn fuhsr suc inel pa Rozlyn.
Sramsram se inge tuh sruhmuhnyuck nuh sihk sin kawuck se luhk suc tuh inse muhsahl ke mukul tuhmwacl ke lusen yac 20 el tuh sahf tuyak som. Tuhlihk nahtuhl ah pakiyac pacl lalos inmahsrlon kwewana ninac ac pahpah, finne plwacn muhkena in som wi alu uh oacna in arulacna upac. El sruhmuhn:
“Ke sie alu ma sucu uh arulacna yohk srihpac, kuh in upac ke muhkwena muhta uh. Sacnri se emet ah, nga utyak ac pruhe tuh in wacngihn mwet sramsram nuh sihk. Nga kampare na, ac sronin muhtuhk luhluhyak. Nga muhta ke acn se nga kwacna muhta we ah, finsrakkihn tuh in wacngihn mwet liye lah arlac mwesahs siyah loeloes se nga muhta kac ah.
“Muhtwacn fuhsr se ke ward lasr ah forma ac liyeyuc. Nga srihke isrwacsr. El isrwacsr pac. Nga kuh in liye elyah ke muhtahl. Nga mihslac kwacfe tuh elan tiac tuhkuh sramsram nuh sihk—wacngihn ma wo ngac fahk ac nga etuh na lah ngac tuhngyak. Nga kuhi ngwetngwet nuh ten ac suhnakihn angwetwacni.
“Ke ao se tohkoh ah, nga liye lah nuh tahpuhl na liyeyuc. Ke na miting sac sahflah ah, el suwohswohs me na ne yuruk. Nga mahmah fahk ‘Hi Rozlyn.’ El apihsyucwi in pahol ac fahk ‘Tahmtahel Smith, nga etuh na lah misenge tiac lwen wowo se nuh sum. Nga arulacna pahkomuhta. Nga luhngse kom.’ Oacna ke nga palyei ah, sronin muhtuhk kahklah ke el sifilpac apihsyucwi ah. Tuhsruhk ke nga fahlac ah, nga motko nuh sihk sifacna muh ‘sahp nga kuh in oruh ma se inge tukun ma inge kwewa.’
“Muhtwacn fuhsr matwac yac 16 wowo sac, tahfuhn matwuck, sukyucyak ke Sacnri nuhkwewa tohkoh fahlac ke yac sac in apihsyucwi ac siyuck lah, ‘nga fuhkah?’ Arulacna yohk kahsruh kac ke ohiyacn ma nga puhlakihn ke som wi alu uh. Ma pwacye uh pa nga muhtwacwacack in tuhpan apihsyucki ingacn. Oasr sie mwet suc liyeyucyak. Oasr sie mwet suc etuh lah nga oasr we. Oasr sie mwet lohme.”
Oacna mwe sang nuhkwewa ma Pahpah El engan in use, lihksreni liye uh enenuh kuht in siyuck Sel—na fah mukwikwi. Siyuck in liye mwet sahyac oacna ke El oruh—oacna wen ac acn pwacye Nahtuhl ke ohiyac ma pahtpaht ac muhtahl. Na mukwikwi ke [kom] luhngse, kuhlwacnsap, ac ahkkweye srihpaclos ac ohiyac wo ma elos kuh in sun oacna ke mokleyuck [kom] uh. Ke ma se inge fahfahlac in oacna moul lasr uh, kuht ac fah liye lah kuht sifacna in eklac oacna mwet “fahsr na pwacye tukun … Jisus Kraist.” 8 Mwet sahyac ac fah kuh in luhlahlfongi insiacsr ke insiaclos. Ac ke ohiyac se inge kuht ac fah sokwack lah suc kuht sifacna uh na pwacye ac srihpac na pwacye lasr uh.
Kawuck se luhk ah sruhmuhn siepac ma sikyak ke el muhta ke siyah mwesahs sacpacna, muhkwena muhta, motko lah fin lusen yac 20 ke kampare lal in muhta na ke wosasuc ke lohm sel ah ac wacngihn srihpac. El enenuh yohk liki na ahkkweyeyuck mislac; el enenuh aruhruhma se. El puhlakihn sie kihsensiyuck ma fakihsyac na art lal ah: “Efuh kom oruh ma ingacn? Kuh kom oruh ma ingacn nuh ke opi kac an, ke kaksak luhn mwet sahyac, kuh ke ma finsrakkihnyuck ma tuhkuh sahflah kac an?” El ahlohloh ke kihtin pacl, suk ke insiacl, ac na el fah kuh in puhlaik in topuk, “Nga oruh ma ingacn ke srihpen nga luhngse Mwet Lahngo. Ac nga luhngse wosasuc Lal.” Leum El ikacslah muhtahl in kahsrel in liye. Ma fihsrwacsr se tuhsruhk fokoko ke eklac luhn liyactwen uh kahsrel in ahkwot na nuh met ke luhlahlfongi in Kraist, finne ke ohiyac ma el oasr kac.
Nga loh kac lah Jisus Kraist El luhngse kuht ac kuh in use muhtah in liye—finne ke upac, finne ke kuht tohtohlah, finne ke kuht muhkuh, ac finne ke sahflahiyac an tiac oacna ma kuht finsrakkihn. Ke luhngkuhlwacng Lal, El ac fah ahkinsewowoye kuht ac ahkkapye moul lasr uh. Ke kuh luhn Nguhn Muhtahl, Kraist El ac fah ahkkweye kuht in liye kuht sifacna ac liye mwet sahyac oacna ke El oruh. Ke kahsruh Lal, kuht kuh in etuh lah meac ma enenweyuck emet uh. Kuht kuh in muhtwacwacack in liye poun Leum ke ac orekma kac ac ke ma oacyac na ke moul lasr—kuht ac fah lihksreni liye.
Ac na, ke lwen yohk sacn “ke Elac fah sikme kuht fah oacna El, tuh kuht fah Liyacl oacna El uh; tuh in oasr finsrak se inge yohrohsr” 9 pa pruhe luhk ke inen Jisus Kraist, amen.