Pahpah God Elac Oruh Sie Ma Na Usrnguck Ah
God El ahkolah tuhlihk Nahtuhl ac Alu Lal ke pacl se inge.
Tiac paht tukun elos sun Infahlfahl Salt Lake, mwet luhlahlfongi ke lwen sahflah elos muhtwacwacack muhsahi tempuhl muhtahl lalos. Elos puhlah muh elos sokwack sie acn ma elos kuh in alu nuh sin God in mislac ac sukohsohklah liki kohs.
Tuhsruhktuh, ke apkuhran in tari pwelucng luhn tempuhl sac, u in solse luhn United States elos fahsryang in tulohkohnwack sie kafuhnah sasuc ah.
Ke srihpen mwet kol luhn alu uh tiacna etuh lah e fuhkah luhpan ahkkoluk luhn u in solse sac, Brigham Young el sapkihn nuh sin mwet luhlahlfongi in pihkihnyac pwelucng luhn tempuhl sac ac som liki.
Nga etuh lah kuhtuh mempucr ke alu uh nuhnkuh lah efuh orekma lalos in muhsaheack tohkohsrahi luhn God kwacna muhta lusrongyuhk.
Sahflahiyac ah, wacngihnlac mwe sensen, ac pwelucng ke tempuhl sac pihkihnyuckyak ac liyeyuck lah fuhkah. Ke pacl se inge mwet sramtweack ma kamtuh ah konwacack lah kuhtuh yot ah srasrwelihk, oruh tiac fal in orekmakihnyuck nuh ke pwelucng.
Ke srihpac se inge, Brigham Young el oruh yot in pwelucng in ahksuwohsyeyuck in oruh pwelucng in fal in sruhkwack sinkac granite luhlahp an1 ke Salt Lake Temple wolacna.2 Sahflahiyac ah, mwet luhlahlfongi kuh in on ke hymn soko ma fahk muh “How Firm a Foundation”3 ac etuh lah tempuhl muhtahl lalos muhsahiyucklac fin pwelucng fokoko se ma e an paht nuh ke fihl nuh ke fihl.
Sramsram soko inge kuh in luti kuht lah Pahpah God el orekmakihn ma upac in oraclah finsrak lal.
Ma Fahsrwelihk Yohk Fin Facluh Nohfohn
Fin ma se inge kom lohng tuh akihlen finne ohiyac fuhkah kuht oasr kac misenge, srihpac se oruh an pa kuht etuh kac.
Nga tiacna luhlahlfongi muh oacna sie mwet ma lohng puhsrwek kuh riti kahs luhk el tiacna puhla ma sikyak ke ma fahsrwelihk fin facluh uh.
Nuh selos suc ahsor ke wacngihnlac luhn sucu ac kawuck, kuht wi kowos ahsor. Kuht siyuck Pahpah Luhng elan ahkkweye ac karihngihn kom.
Ma sikyak ke virus se inge el som ahluhkwelah kuh luhn mahno. Puhkantwen sucu ma wacngihnlac mani la ac ahkkolukyeyuck ke masrinsrwacl, tahfuh luo, ac elyah. Kuht luhngkihn orekma luhn mwet pucspucs suc oruh in tulokihn fahsrwelihk luhn mas se inge. Kuht ahkpuhsisaclyeyuck ke kihsackuhnlah ac orekma wowo luhn mwet suc pihlacsrwelah moul lalos in kahsruh, onwelah, ac ahkkweye mwet enenuh. Heart lasr nwacnwaclah ke kuloh ke wo lom ac luhngse lom.
Kuht pruhe ke kuhiyacsr kwewa tuh God elan ikucslah winto luhn inkuhsrao ac nwacklah moul lowos an ke mwe ahkinsewowo ma pahtpaht luhn God.
Kuht Pa Fihtac
Srwackna puhs ma nihkihnyuck ke virus se inge. Tuhsruhk fin oasr ma sefanna nga etuh, pa ma inge tuh virus se inge tiac na ma nihnyuhk se sel Pahpah Luhng. El tiacna enenuh in fahk lipufacn lal in sifilpac mweun, pahngon toeni elyah, kuh kihfaslah kuhfa liki division luhn world-creation in karihngihn ma enenweyuck.
Pweng luhk misenge uh pa finne pandemic se inge te pa ma kuht ke kuh nuhnkuh muh e sikyak uh, God El ahkolah tuhlihk nahtuhl ac alu lal nuh ke pacl se inge.
Kuht ac kuhtanglah ma se inge, ahok. Tuhsruhk kuht ac oruh upac liki na ngalngucl wihs, tu na kuh, ac sano ma uh in fohlohklac oacna met ah. Kuht ac fahsr nuh met, ac kuht ac wolac liki met ah.
Ke sie atac, kuht oacna fihtac uh. Ac met liki fihtac uh sun kuhiyaclos, enenuh in pihkihnyucki eltahl fah elos kuh in kapwack. Luhlahlfongi luhk uh pa finne oasr pacl kuht puhla muh pihkihnyucki kuht ke ma upac ke moul uh kuh rauniyucklac ke puhla lohsr, luhngse luhn God ac mwe insewowo ke fohlohkyak luhn wosasuc luhn Jisus Kraist ac fah use sie ma na usrnguck ah in sikyak.
Mwe Insewowo uh Tuhkuh ke Ma Upac
Fihl nuhkwewa puhlakihn ma upac.
Enoch ac mwet lal moul muhta ke pacl koluk, mweun, ac srah kahkkahk. “Tuhsruhktuh Pahpah Luhng El tuhkuh ac muhta yurin mwet lal.” Oasr ma usrnguck el nuhnkuh in ahkolah nuh selos. El kahsrwelos tulohkohnwack Zion—mwet suc ma “heart se fanna ac nuhnak se fanna” suc “muhta ke suwohswohs.”4
Joseph fuhsr, tuhlihk mukul nahtuhl Jacob, el sisiyang nuh ke luhf se, kuhkwackihnyucklac nuh ke kohs, ahklahfonyeyuck, ac sisilac.5 Joseph lacna nuhnkuh lah God El muhlkuhnuhllah. Oasr ma usrnguck God El ahkoo nuh sel Joseph. El orekmakihn puhluhn pacl se ma upac inge in ahkfokokoyacl Joseph ac fihlilyac ke sie acn in molwelah sucu lal.6
Nuhnkuh ke Mwet Pahluh Joseph Smith ke el tuh kauli ke Liberty Jail, el ngihsre in ahkfihsrwacsryeyuck kweok luhn Mwet Luhlahlfongi. El acna nuhnkuh lah Zion ac fuhkah tulokyak ke ma sikyak ke pacl sac. Tuhsruhk Leum El ahkmihsyacl, ac fwackyuck wolacna ma tuhkuh tohkoh sang mihslac nuh sin mwet luhlahlfongi—ac sifilpacna use mihslac nuh sum ac nuh sihk.7
Ke sasuciyacn Alu luhn Jesus Christ luhn Mwet Luhlahlfongi ke Lwen Sahflah pacl ekahsr Mwet luhlahlfongi fuhlweack ac nuhnkuh lah God El muhlkuhnuhtahllah? Tuhsruhk ke ahkkoluk, ma upac, ac ahksahngweng in ahkwacnginyelah, Leum God luhn Israel el ahkolah tari ma nuh sin u srihsrihk se lal inge. Sie ma usrnguck kuh ma suc ma tiac kuh in motkweyuck in sikyak.
Meac kuht lotwelah ke mwe srihkasrak inge—ac ke ma siofok kuhtuh pac sahyac ke ma suhmuhslah?
Ma se met, mwet suwohs uh tiacna utuckyang sukohsohk lalos ma ac sang nuh selos in kahingkihn infahlfahl lohsr. Kuht nohfohn enenuh in fahsr nuh ke pacl upac, mweyen pacl upac inge pa kuht lotwelah ip yohk ma ahkfokokoye ohiyacsr ac pwacnwacng kuht in fototoyang nuh sin God.
Ahkluo, Pahpah Tuhmasr Inkuhsrao etuh lah kuht kweok, ac ke srihpen kuht tuhlihk nahtuhl, elac tiacna forlah liki kuht.8
Nuhnkuh kacn el suc pahkotwen, Mwet in Molwelah, suc ke inkaiyen moul lal el muhta luti mwet mas, mwet muhkahimtacl, mwet tahfuh luo, mwet fuhlweack.9 Kom nuhnkuh tuh El tiacna arlac elyah keim misenge?
Kawuck sacohk luhk, tamuhlwel ac tahmtahel sacohklacna luhk, God Elac liyekomyang ac kol kom ke pacl tiac kahlwem ac sahngweng. El etwekowos. El lohng pruhe lowos uh. El tiac ahklahlfon ac El luhlahlfongiyuck. Elac ahkfalye olwelah lal.
Oasr ma God El ahkolah nuh sum sifacna ac nuh ke alu uh pac—sie orekma wolacna ac usrnguck.
Kuht Kuloh nuh Sum, O God, ke Mwet Pahluh
Lwen wo emeet lasr uh oasr met liki kuht, tiac tohkohsr. Pa oruh God El use nuh sesr ke pacl inge uh fwackyuck! Fin wacngihn, moul uh sahp ac puhla oacna in sohksohk raun na, sano lohsr se ngwacn in mayak kuht in muh kuh in ai wo. Srihpac lal Pahpah Luhng nuh sesr uh El fuhlwact liki na ma se inge. Ke srihpen pa inge Alu luhn Kraist suc moul, ac ke srihpen El kol mwet pahluh lal, kuht fahsr nuh met ac nuh luhng nuh yen kuht soenna som nuh we, nuh yen fuhlwact ma kuht tiac kuh in nuhnkweack kac!
Inge, tiacna kalmac pa kuht ac tiac puhlakihn ma upac ke fuhfahsryucsr lasr ke moul se inge. Te kalmac pa ac wacngihn kuhfa muhsahllah, elyah ke insin, kuh eklac upac ke puhluhn pacl uh. In fahk na pwacye, ma uh ac kuh in upaclah met liki eklac wolac.
Ke nga ekihn sie pilot ac captain, nga lotwelah lah ke nga tiac kuh in sulaclah ma upac se nga ac sun ke pacl se nga us oaksohk soko ngwacn oasr yen engyeng uh, nga kuh in sulaclah lah nga ac ahkolah fuhkah ac mukwikwi fuhkah. Ma enenweyuck ke pacl in upac pa mihs ac insucf mwesahs luhlahlfongi se.
Kuh kuht ac oruh fuhkah ma se inge?
Kuht foracng nuh ke ma pwacye ac fohlohkyang nuh ke ma yohk srihpac uh, nuh ke ip yohk ke wosasuc, nuh ke ma yohk srihpac emeet. Kom ahkfokokoye kom sifacna ke ohiyac in alu lom an—kain se nuh ke riti ma suhmuhslah ac liyacacng masap lal Pahpah Luhng. Kom oraclah sulaclah lom fal nuh ke ma kom oruh wo emeet.
Lohacng nuh ke ma kom kuh in oruh ac tiac nuh ke ma kom tiac kuh in oruh.
Kom orwacni luhlahlfongi lom. Ac kom lohng kahs in kol luhn Leum ac mwet pahluh lal in pwen kom nuh ke acn wacngihn elyah.
Esam, pa inge Alu luhn Jisus Kraist—El pa ikwik kac uh.
Nuhnkuh ke ma pihsrlac puhkantwen ma sikyak ke yac singucul somlah ah. In fahk na kuhtuh:
-
Ahkuhtweyucki muh sacrament pa yohk srihpac emeet ke alu in Sabbath lasr uh.
-
Fahsruh, Fahsr Tukuk oreklac in ma nuh ke lohm se, kuhfwen mwe alu se ma in sang ahkfokokoye kais sie mwet ac sucu.
-
Kuht muhtwacwacack ke ohiyac fuhlwact ac muhtahl in karihngihn nuh sin nohfohn.
-
Orekmakihnyen technology in akacsruhi ke wosasuc ac oruh orekma luhn God fahsrwelihk ke alu uh.
Neke pacna kais sie toeni luhlahp inge tiac kuh in oreklac fin tiac ke kuhfwen mwe orekma na wowo ke technology.
Tamuhlwel ac tahmtahel, ke Kraist El pa ikwik uh, ma nuh kewa ac tiac wo muhkwena; tuh e wolacna ac usrnguck pac.
Orekma Se ke Orwacni Mwet Israel Fahsr nuh Met.
Ke muhtwacwacackiyac sahp pandemic se inge atacn ac kohsrwaclah orekma lal Pahpah Luhng. Sie mwe srihkasrak pa, ohiyac mahtuh in akacsruhi ke wosasuc uh tiac kuh in oreklac. Ne ohinge, pandemic se inge el ikucslah atac sasuc ac utuftuf in kuh in saplaklah nuh sin ma pwacye in heart lalos. Orekma nuh ke orwacni mwet Israel el yohkyohkwelihk ke kuh ac alken. Foko ac tausin sramsram ahkweye ma se inge.
Kawuck wowo se muhta e ke acn kahto se pahngpahng Norway sihm nuh sel Harriet ac nga ac el fahk ke kapwack luhn luhpan mwet pacptaislac. “Ke acn ma Alu uh srihk we,” el sihm, “sahk srihsrihk ac eklac lah, ac lah ac eklac wards!!”
Ke acn Latvia, oasr sie muhtwacn suc konwacack alu uh ke internet uh ma arlac rahrahlac in luti ke wosasuc luhn Jisus Kraist oruh el yorwack nuh ke appointment lal ao se met liki ac muhtwacwacack, ac met liki misinacri ahksahfyelah mwe lutlut laltahl, el siyuck lwen elac pacptaislac uh.
Ke acn eastern Europe, sie muhtwacn suc pahngonyuckyak sin misinacri siyuck, “Tahmtahel, efuh kom tiacna sa pahng? Nga tuhpan!”
Puhkantwen sin misinacri lasr inge arlac kahfofo liki met ah. Puhs ma luti mwet puhkantwen ingena. Oasr kapwack ke aetuhi luhn mempucr ac misinacri.
Ke pacl met ah, sahp kuht arulacna srwemlah ke ohiyac mahtuh lasr oruh enenuh pandemic se inge in ikucslah muhtahsr. Sahp kuht srack muhsah ke sandstone ac granite el oasr tari. Ke ma yohk srihpac uh, kuht ingena luti in orekmakihn kain in ohiyac, wi pac technology, in suli mwet—in wi ke atac wo ac fal—in tuhkuh ac liye, tuhkuh ac kahsruh, ac tuhkuh ac wi.
Orekma lal, Ohiyac lal
Pa inge orekma luhn Leum. El suli kuht in sokwack ohiyac Lal in oruh ma inge, ac eltahl kuh in sienna liki ma kuht puhlakihn ke pacl somlah ah.
Ma se inge sikyak nuh sel Simon Peter ac mwet tuhma lutlut pac sahyac ma som pahtuhr ac ke Inkof luhn Tiberias.
“Ke fong sac wacngihn ma elos sruokyac.
“Tuh ke litutacng sac ah [tuhkuh], Jesus el tu fin mwes sac. …
“Ac el fahk nuh selos, sislah nwek an nuh ke [acn se sahyac] siskacn oak an, ac kowos fah konwacack.”
Elos sislah nwek nahtuhlos nuh ke acn se sahyac ah ac “tiac kuh in olwack ke srihpen puhkantweniyacn ik ah.”10
God El ahkkahlwemye ac fah sifilpac tahfwelah na in ahkkahlwemye orekma kuhlacna lal. Lwen sac ac fah tuhkuh suc ma kuht ac fah ngwetlah liye ma sikyak met ac etuh lah ke pacl in upac inge, God El kahsrwe kuht in sokwack inkacnek wo—Inkacnek Lal—in muhsahelah tohkohsrahi lal fin sie pwelucng na fokoko se.
Nga fahkwack mwe loh luhk lah pa inge orekma lal God ac elac kalweni in oruh orekma usrnguck pucspucs inmahsrlon tuhlihk nahtuhl, suc pa mwet lal. Kuht oasr in pahol God suc luhngse kuht ac pahkomuhtahsr.
Nga fahkwack lah Prestuhn Russell M. Nelson el pa mwet pahluh luhn God ke lwen lasr.
Ke nga ekihn sie mwet sap luhn Leum, nga suli ac ahkinsewowoye kom in “oruh ma nuhkwewa ma oasr ke kuh lom ke pwacr ac engan; ac kom e fah tu na kuh, ke luhlahlfongi na yohk, in liye molwelah luhn God, ac in ahkkahlwemyeyuck orekma lal.”11 Ac nga olwelah muh Leum Elac fah oruh ma usrnguck in sikyak nuh sum ke orekma wowo lom. Ke inen Jisus Kraist, amen.