Luhngseyuck Yohk sin Leum
In pacl in upac ac suhpwacr tiacna ekuhllah ngwetngwetiyacl Leum ke ngweti liye kuht ke luhngse, ac ahkinsewowoye kuht.
Sie lwen ke yac pucspucs met ah, nga misinacri fuhsr se ac orekma ke pracns srihsrihk ke tuhka srihsrihk pahngon Amami Oshima, Japan, tahfweyuck ac nga rahrah nuh pwacye in lotwelah Prestuhn Spencer W. Kimball el ac som muhtwacta ke acn Asia ac mempucr ac misinacri nuhkwewa ke acn Japan suliyuck in lohng mwet pahluh se ingacn ke toeni luhn eria uh. Ke mempucr luhn pracns, tahfweyuck ac nga rahrah in muhtwacwacack orek plwacn nuh ke toeni sac, tuh fuhfahsryucsr enenuh lusen ao 12 kuht in wi oak soko in tuhpallah inkof East China nuh mainland Japan, wi pac ao 15 kuht wi train in som nuh Tokyo. Tuhsruhktuh, ke mwe ahsor, tiacna ohinge. Ke srihpen kuht sruokyac kahs tuhkuh sin misin prestuhn lasr lah nga ac tahfweyuck, ke srihpen loes inmahsrlo ac pacl, kuht ac tiac kuh in wi toeni se orek acn Tokyo ah.
Ke mempucr luhn pracns srihsrihk lasr muhtwacwacack fahsr lalos nuh ke acn Tokyo, kuht muhta na. Lwen ekahsr tuhkuh ah arulacna mihs ac suhpwacr. Kuht muhkwena kuhfa luhn Leum ke lohm alu srihsrihk sac, na mwet luhlahlfongi ac misinacri fin acn Japan som wi toeni sacn.
Suhpwacr luhk uh yohkwelihk ke nga finne ke lohng ke pwacr ke mempuhr ah fohlohkoh liki toeni sac ac sruhmuhn ke Prestuhn Kimball el fahk muh tempuhl se in Tokyo uh. Elos sesseslah ke pwacr ke elos akacsruhi ke mwemwe lalos ac oreklac uh. Elos ahkuhtweyac lah ke, elos lohng fahkwack ke tempuhl sac, mempuhr ac misinacri tiac kuh in sruok engan lalos ac elos nohfohnna tuhkweni na pahspahs ke pacl sac.
Yac ekahsr tohkoh, ac nga srwackna esam suhpwacrlac luhk suc nga puhlakihn ke nga tiac kuh in wi toeni wolacna se ingen.
Ke mahlwem na ekahsr somlah ah nga esamwack ma se inge, ke nga tuni mwet sahyac ke elos puhlakihn kain suhpwacr puhkantwen—loal ac upac liki yuc ke nga tuh ekihn sie misinacri fuhsr ah, ke srihpen COVID-19 se ma fahsrwelihk fin facluh nohfohn inge.
Met kuhtuh ke yac se inge, ke fahsrwelihk se inge el pihsrpihsr uh. Prestuhnsi se met fahk ac olwelah, “Alu uh ac mempuhr efah ahkkahlwemye moniyuck ke luhlahlfongi in ekihn mwet wo elah ac mwet tuhlan wowo”1 ac efah “yohk sensen lasr.”2 Ohinge, kuht puhlakihn tui luhn alu fin facluh nohfohn, fohlohkoh luhn yohk liki na tahfuh misinacri nuh lohm selos, ac kauli luhn tempuhl ke alu uh. Tausin suwohs ahkoo in utyak nuh tempuhl in oraclah akwuck in moul—wi pac sil in tempuhl. Kuhtuh suwos ahkfalyelah misin lowos kuh fihliyucklac ke kihtin pacl sifilpac pac pahngonyuck.
Ke puhluhn pacl se inge, kafucrmacn ac mwet kol luhn lutlut kaliyac lutlut—suc ekuhllah sro luhn tuhlihk lutlut ac oruh in tui sritacl, tuhkweni nuh kwewa luhn acn uh, ac kuhtuh pac ohiyac ma kuhpahsr nuh ke lutlut ac tuhkweni. Puhkantwen suwos ahkolah in wi mwe ahkpwacr ac mwe siai ma muh tiac lohngyuck kuh pacl in sritacl ma tiac ahkfahsryeyucklac.
Mwe nuhnak yohk pac ke sucu suc wacngihnlac mwet lalos ke puhluhn pacl se inge; inkaiyac uh tiac kuh in oruh kuhfwen mas kuh kuhtuh toeni oacna ke elos finsraki in oruh.
In ahkfototoye, puhkantwen, puhkantwen suwos puhlakihn elyah yohk, suhpwacr, ac wacngihn finsrak. Oruh kuht ac fuhkah kwelac, kampare, ac fahsr nuh met ke ma nuh kwewa luhman muhsahllah?
Mwet pahluh Nephi el muhtwacwacack sihm ke puhlwet srihsrihk nahtuhl ke el mwet mahtuh se. Ke ngwetlah esamwack moul lal ac lutlut lal, el oraclah fahk na yohk srihpac se ke muhtwacwacackiyacn fohs se emeet ke Puk luhn Mormon. Fuhs se inge sruok ip yohk se nuh sesr in nuhnkuh ke pacl lasr uh. In oacna kahs lal, “Nga, Nephi, suc isuslac sin ninac ac pahpah wowo … ,” el sihmihs, “ac ke nga liye ma koluk puhkantwen ke pacl se luhk inge, ne ohinge, luhngseyuck yohk sin Leum ke moul luhk nohfohn.”3
Ke ekihn tuhlihk lutlut se Puk luhn Mormon, kuht etuh ke ma upac puhkantwen ma Nephi el fahk inge. Tuhsruhk tukun ma upac ma sikyak nuh sel Nephi inge, Nephi el fahk liye lal lah el luhngseyuck yohk sel Leum ke lusen moul lal nohfohn. In pacl in upac ac suhpwacr tiacna ekuhllah ngwetngwetiyacl Leum ke ngweti liye kuht ke luhngse, ac ahkinsewowoye kuht.
Lesa ac nga tuhfahna tari ah ohsun ke ohiyac virtual yurin misinacri 600 an ke acn Australia, inkaiyacn selos moulkihn sie ohiyacn sef kuh tiac kuh in mukwikwi ke srihpacn COVID-19, puhslac selos orekma ke apartment lalos. Tuhkweni kuht nuhnkuh ke mwet ke Olweacng Sasuc, Puk luhn Mormon, ac Doctrine ac Covenants suc ma Leum El ahkinsewowoye in oraclah ma yohk ke pacl in upac lalos. Nohfohn ahkuhtweyucki yohk ke ma elos kuh in oraclah ke kahsruh luhn Leum liki na ke ma elos tiac kuh in oruh ke pacl in upac ac kohs lalos.
Kuht riti kacl Paul ac Silas, ke elos kauli, elos pruhe, on, luti, ac fahkwack—finne in pacptaisi mwet suc kauli oasr ke acn in kaclpous.4
Sifilpacna kacl Paul, acn Rome, el kaclpous lun lohm ke yac luo, suc ke lusen pacl se ingacn el kalweni na in “ahkyohkyelihk ac fahkwelihk ke tohkohsrahi luhn God,”5 luti ma muh kuhpahsr nuh sin Leum Jisus Kraist.”6
Ke Nephi ac Lehi, tuhlihk mukul nahtuhl Helaman, suc tukun acnwuck ac kaclpous lalos, elos rauniyucklac ke ke sie e fihrihr ma karihngihnuhlos ke puhsrwen Leum El fakihs mwet sruokuhltahluh ah finne in fakihs ne ke nguhnalos.7
Kacl Alma ac Amulek fin acn Ammonihah, suc sokwack lah “puhkantwen selos suc luhlahlfongi … ac muhtwacwacack in auliyak, ac lutlut ke ma suhmuhslah,”8 finne ke isruhnyuck eltahl, ac itucklac mongo nwaclos, kof, kuh nuknuk, kapihri ac utucklac nuh in kaclpous.9
Ac sahflahiyac ah kacl Joseph Smith, suc kweok lun kaclpous luhn Liberty, puhlakihn muhlkihnyucklac ac sifacnalac, na lohng kahs luhn Leum: “Ma inge, … efah ma ac wo nuh sum”10 ac “God elac fah wi kom ne tok ma pahtpaht.”11
Kais sie selos kahlwem ma Nephi el etuh: finne elos liye ma upac pucspucs ke moul lalos, elos luhngseyuck yohk sin Leum.
Kuht kuh in sruhlwaclah sie lain suwohs in ekihn mempuhr ac sie alu suc ma kuh in luhngseyuck yohk sin Leum in pacl in upac ma kuht puhlakihn ke mahlwem puhkantwen tari ah. Ke nga fahk mwe srihkasrak inge, lwelah elos in ahkfokokoye pac luhlahlfongi lom ke kol luhn mwet pahluh moul lasr, suc ahkoekuhtlac ke ma fal met liki ma etweyuck ke mas ac fahsrwelihk inge, oruh kuht kuh in kuhtanglah ma upac ma ac tuhkuh inge.
Ma se met, muhtwacwacack in lohacng nuh lohm ah ac ahkkweyeyuck ke Alu.
Yac luo met ah, Prestuhn Russell M. Nelson el fahk: “Ke Mwet Luhlahlfongi ke Lwen-Sahflah, kuht nuhnkuh pacl pucs lah ‘alu’ pa ma se ma sikyak fin acn lohm alu lasr muhkwena, ahkkweyeyuck ke ma sikyak lohm ah. Kuht enenuh in eklac atac se inge. … Sie alu ma orek ke lohm se, ahkkweyeyuck ke ma muhta sikyak lun … lohm lasr.”12 Fuhkah pahluhiyacn eklac se inge! Wosasuc ma ahkyohkyeyuck lun lohm se el muhtwacwacack in orek ke kauli fototo luhn lohm in toeni inge. Finne facluh muhtwacwacack in fohlohklac oacna met ah ac kuht fohlohklac nuh ke lohm in alu, kuht ac ke sruokyac na lutlut ke alu lasr uh in lohm sesr ac lutlut kapwack ke puhluhn pacl se ma mas se inge fahsrwelihk uh.
Mwe srihkasrak se ahkluo pa in luhngseyuck yohk sin Leum pa fwackyuck luhn karihngihn mwet uh ke ohiyac fuhlwact ac muhtahl yohk liki na met ah.
Ke 2018, Prestuhn Nelson el ahkkahlwemye forfor kahsruh lah el eklac se nuh ke “ohiyac kuht akarihngihni sie sin sie.”13 Mas se ma fahsrwelihk inge ahkkahlwemye pacl wowo puhkantwen in orekmakihn etuh lasr ke karihngihn lasr. Tamuhlwel ac tahmtahel karihngihn, muhtwacn fuhsr ac mukul fuhsr, ac mwet sahyac ma saplaklac in kahsruh ke muhtwacta, sramsram, inkucl, mongo, mwe sahp ke technology, ac akwuck ke kuhfa luhn Leum in ahkinsewowoyeyuck nuh sin mwet enenuh. Alu uh sifacna el wi pac kahsruh nuh sin mwet sahyac ke puhluhn pacl se luhn fahsrwelihk se ke mas se inge ke kihsaclah luhn mwe kahsruh nuh ke bank in mongo, lohm luhn mwet wacngihn lohm se, lohm in kahsruh luhn mwet sahyac ac orekma ma ac som nuh ke masrinsrwacl upac emeet fin facluh. Tamuhlwel ke Rilif Sosaiti ac sucu lalos kahsruh ke oraclah luhn mwe afyucf muhtah million luhn mwet orekma ke lohm ono.
Mwe srihkasrak sahflah se ke ahkinsewowoyeyuck inmahsrlon ma upac pa in sokwack engan luhlahp ma fohlohk ke akwuck luhn tempuhl.
Ma se inge el ahkuhtweyucki wo emeet ke sie sramsram. Ke Tahmtahel Kaitlyn Pakmer el sruokyac pahng in kunohkohn lal ke Eprel tari ah, el rahrahlac in pahngonyuck in ekihn misinacri se tuhsruhk puhla muh yohk srihpac ac spesruhl in som nuh ke tempuhl in eis olwelah lal ac oraclah akwuck muhtahl lal. Tok kuhtuh ke el oraclah pacl in eis olwelah lal, mwe fahkwack se tuhkuh fahk lah tempuhl nuhkwewa ac kauli ke pacl fototo ma ke srihpen mas se ma fahsrwelihk fin facluh nohfohn inge. Tukun el lohng ma suhpwacr inge, el etwacack lah elac wi missionary training center (MTC) ke ohiyac virtual in wi muhta na lun lohm sel. Finne el suhpwacrlac, Kaitlyn el lohacng na in oruh puhlah nguhn muhtahl lal uh in yohk.
Ke ma sikyak ke mahlwem inge, Tahmtahel Palmer el tiacna fuhlweack ke finsrak lal in som nuh ke tempuhl. Sucu lal ah lalo ac pruhe tuh tempuhl uh ac ikacklah met liki som lal uh. Kaitlyn el kwacna muhtwacwacack MTC lohm sel ke litutacng ngwe in fahk, “Kuh misenge pa lwen se ma kuht ac eis sie ma usrnguck ac tempuhl uh el sifilpac ikacklah uh?”
Ke August 10, Prestuhnsi se met fahkwack lah tempuhl se oruhl Kaitlyn ah el sifilpac ikacklah in oreklac akwuck in moul ke lwen se pacna ma elac wi oaksohk uh som ke litutacng sac. Elac tiacna kuh in wi som nuh ke tempuhl ac sa nuh ke oaksohk soko elac wi ah. Ke finsrak srihsrihk lal muh el ac oraclah, sucu lal ah pahngonwack prestuhn luhn tempuhl Michael Vellinga in liye lah acna oasr atac se ma muh mwe usrnguck se elos pruhekihn ah kuh in sikyak. Sisi mongo lalos ac pruhe lalos topukyucklac!
Ke ao 2:00 a.m., ke tahfuhn litutacng ah, met liki som lal, Tahmtahel Palmer ac sucu lal, suc tuhng, elos painyuck ac ke sruhnguhl luhn tempuhl sin prestuhn suc isrwacsr ac fahk, “Tuwo sucu Palmer. Pain kowos nuh ke tempuhl uh!” Ke el ahksahfyelah mwe sang muhtahl lal lun tempuhl, elos pahtokyuck in mukwikwi sa ke srihpen oasr pac sie sucu tu pac tuhpan ke sruhnguhl luhn tempuhl ah. Elos kahsruhsr suwohswohs na nuh ke acn oaksohk ah falyang na nuh ke oaksohk soko elac wi som nuh ke misin lal.
Akwuck luhn tempuhl ma kuht tiac eis ke mahlwem puhs somlah ah oacna in muh arlac sacohk liki na ma kuht nuhnkuh met ke tempuhl fin facluh inge sifilpac ikacklah uh.
Ke nga ac kaliyac uh, nuhnak muhnahs lohng ke kahs, pahtok, oaru, ac kahs in kahsruh lal Mwet Pahluh Joseph Smith. Sie ac tiac nuhnkuh muh el suhmuhslah ma inge ke el muhta in kweok ac muhkwena, ahkkolukyeyuck ac sruokyucki ke lohm se fin acn Nauvoo, wihkihn mwet suc suk in sruokilyac ke wacngihn srihpac.
“Inge, meac kuht lohng ke wosasuc suc kuht eis inge? Puhsra pwacr se! Puhsra pahkotwen se tuhkuh inkuhsrao me; ac puhsra pwacye se liki facluh; mwe fahkwack pwacr nuh sin mwet misac; puhsra in engan se nuh sin mwet moul ac misac; mwe fahkwack ke engan yohk. …
“… Yac kuht in tiac fahsr nuh met ke srihpac yohk? Fahsr nuh met ac tiac nuh tok. Puhlaik, … ac som na, som na ke kuhtanglah! Lwelah insiowos in enganwack, ac in arulacna pwacr. Lwelah facluh in on.”14
Tamuhlwel ac tahmtahel, nga luhlahlfongi muh sie lwen, kais sie suwos ac ngwetlah esamwack toeni ma fosyackihnyucklac, ma suhpwacr, finsrak ma tiacna oreklac, ac muhkwena ke pacl mas se inge fahsrwelihk in liye losrweyucklac ke mwe insewowo ac yohkwelihk luhn luhlahlfongi. Nga luhlahlfongi lah ke moul se inge, ac ke moul se fahsruh inge, lah ma upac lom, Ammonihah lom, Liberty Jail lom, ac fah ahkmuhtahlyeyucklac tuh in mwe kapwack lom.15 Nga pruhe lah, welal Nephi, kuht kuh in akihlen mwe kweok ke lwen lasr ac oacyacpacna akihlen kuht pa luhngseyuck yohk sin Leum.
Nga kaliyac ke luhlahlfongi luhk ke Jisus Kraist, suc El sifacna tiac nihkihn ma upac ac kweok mweyen El puhla ac etwaclah ma nuh kwewa ke ip luhn Iwaclah ma pahtpaht Lal.16 El kahlwem mwe ahsor, kweok, ac finsrak lasr. El pa Mwet Lahngo lasr, Mwet Iwaclah lasr, finsrak lasr, ahkkweye lasr, Aholyacsr yurun Pahpah. Ke ma inge nga fahkwack ke Inel muhtahl, Jisus Kraist, amen.