Oasr Fuhlao
Ke kuht suk in ahkolah ke kihtihn pacl, kuht kuh in lain ma upac ke moul se inge ke luhlahlfongi kapwack.
Met liki tulokihnyucki forfor ke srihpen mas e fahsrwelihk fin facluh inge, nga fohlohk nuh lohm sihk liki orekma se luhk ma, ke srihpen elyah ke pacl, oreklac ke Sacnri se. Oasr pacl luhk inmahsrlon pacl in oacyak luhn oaksohk inge in som wi toeni luhn sackruhmacn, suc nga akacsruhi sie sramsram fototo. Tukun toeni sac, deacon se fahsruh nuh yuruk ac sifuhk lah nga etwacl Prestuhn Nelson ac lah nga acna usrukyac pahol tari. Nga topukuhl fahk muh nga etwacl, lah nga nga usrukyac pahol tari, ac lah, ke nga wi mempuhr ke Presiding Bishopric uh, asr pacl luhk luhk in ohsun nuh sel Prestuhn Nelson ac counselors lal ke pacl ekahsr ke kais sie wik.
Na deacon fuhsr sac el pihtucki muhta ke siyah soko, sruhlwack pahol nuh luhng, ac wowo fahk, “Lwen se inge pa lwen na wowo se ke moul luhk uh Tamuhlwel ac tahmtahel, nga tena sruhlwack pouk nuh luhng ac wowo, tuhsruhk nga kulohlacna ma pahtpaht ke mwet pahluh moul se ac ke kolyuck kuht eis sin mwet pahluh, seers, ac mwet in fahkwack fwackyuck, finne nuh ke pacl upac uh.
Ke muhtwacwacackiyacn pacl uh, Leum el use kolyuck in kahsruh mwet Lal in ahkolah in nguhn ac nuh ke mwe ongaiyac ac ma upac ma el etuh muh e tuhkuh wi ma kuht puhlakihn ke moul in mahno se inge. Mwe ongaiyac inge kuh in lasr sifacna kuh kuh in ma nuh sin facluh nohfohn, tuhsruhktuh kolyuck luhn Leum e fah use karihngihnyuck ac ahkkweyeyuck ke pacl kuht lohng ac mukwikwi fal nuh ke kahs in kahsruh lal. Sie me srihkasrak na wowo el utuckuh ke puk luhn Genesis, suc kuht lotwelah kacl Joseph fin ac Egypt ac ke lweng mokleyuck lal ke mwemwe lal Pharaoh.
“Ac Joseph el fahk nuh sel Pharaoh, … God el ahkkahlwemye nuh sum Pharaoh ma el ahkolah in oruh. …
“Liye, yac itkuhsr e tuhkuh tuh e kahsruhp kasrpacn acn Egypt:
“Ac tohkoh e oasr srwacl in mongo ke yac itkohsr; ac kahsruhp nuhkwewa fah muhlkihnyucklac kuh wacngihnlac fin acn Egypt.” 1
Pharaoh el lohngohl Joseph, topuk ma God el ahkkahlwemye nuh sel ke mwemwe lal, ac silahklahk na mukwilac in ahkolah nuh ke ma e tuhkuh uh. Ma suhmuhslah uh fahk:
“Ac ke yac kahsruhp itkohsr ah infohk uh use ma puhkantwen.
“Ac el orwacni nohfohn mongo ke yac itkohsr ingacn. …
“Ac Joseph el orwacni corn ah oacna puhkpuhk ke inkof uh, … ne ke na el tui ke wekyac; ke sripen wacngihn nuhmpuh.” 2
Ke tari yac kahsruhp itkohsr ingacn, fwackyuck nuh sesr lah “yac itkohsr in srwacl ah muhtwacwacack in tuhkuh, oacna ke Joseph el tuh fahk: ac srwacl se inge acn nuhkwewa puhlakihn; tuhsruhk fin acn Egypt nohfohn oasr fuhlao.” 3
Misenge kuht ahkinsewowoyeyuck in kolyuck sin mwet pahluh suc kahlwem ke enenuh lasr in ahkolah in lain mwe ongaiyac “suc e tuhkuh” 4 ac suc oacyacpac akihlen ma kuht e fototolac kac ma e kuh in tuhkuh sun kuht ke kuht e srihke in ukwe kahs in kahsruh lalos uh.
Oasr kahlwem na upac se lah ma tuhkuh ke COVID-19, ac oacyacpac ma upac sikyak ke facluh se inge, tiac ahkfuhlwactye mwet ac kahs, inmahsrlo, ac alu ke muhtuhnfacl nuhkwewa. Mwet uh tillac orekma ac molin mwet uh srihkweni ke ohiyacn orekma el wakreyuhk ke fihliyucklac luhn mwet in tillac orekma ac kuh in orekma ma puhlakihn elyah ke mas ac atuhkweni.
Nuh sin nohfohn suc puhlakihn ma inge, kuht akacsruhi kahlwem lasr ac elyah lasr ke ma kom oasr kac an, ac oacyacpac sie fahk kuh a fokoko lah lwen wo uh oasr met. Kom ahkinsewowoyeyuck ke bishop ac prestuhn ke branch suc suk mempuhr alu uh ma oasr enenuh la ac suc oasr ikacklah nuh se nuh ke kuhfa ac mwe kahsruh ma kuh in kahsrwekom in ahkwoyelah moul lom ac fihlikomi ke innek nuh ke kuh in sifacna ke kom e orekmakihn akwuck ke ahkolah.
Ke ma rauni kuhtlac misenge uh, wi mas se fahsrwelihk inge ma kuhnahoslah inkacnek in sruh mani wi pac moul luhn kais sie, e tiac pacl nuhkwewa Mwet in Molwelah pahkotwen e tiac lohacng ke ma sikyak nuh sin mwet puhkantwen ma kweok ac siyuhk selos in muhtwacwacack muhsahi lohm nuh ke mongo ac mani nuhke pacl fahsruh uh. Tuhsruhk, tiac kalmeac pa kuht in tiac lohacng nuhke akwuck nuhke ahkolah—suc akwuck inge enenuh in orekmakihnyuhk “ke lahlmwetmwet ac suwohs” 5 in muh pacl fahsruhkuht kuh in fahk, oacna ke Joseph Egypt el fahk, “Oasr fuhlao.” 6
Leum el tiacna tuhpan kuht in oruh upac liki ma kuht kuh in oruh, tuhsruhk el tuhpan kuht in oruh ma kuht kuh in oruh, ke pacl kuht kuh in oruh uh. Oacna ke Prestuhn Nelson el ahkacsmakihnye kuht ke toeni luhlahp se lasr tari ah, “Leum el luhngse insacnweacng.” 7
Mwet kol luhn Alu uh kwacna kwacfe Mwet luhlahlfongi ke Lwen Sahflah “in ahkolah nuh ke ma upac ke moul uh ke oasr mongo ac kof ac mani an ahkolah yol.” 8 Ke pacl sac pacna, kuht kwacfeyuck in “lahlmwetmwet” ac “in tiac som ahluhkwelah kuhiyacsr” 9 ke kwacfweacng lasr in oraclah sie lohm in fihl ma ac mani in an sef. Sie puk ma taituhl kac uh pa Personal Finances for Self-Reliance,oreklac ke 2017 ac oasr ingena ke website luhn alu uh ke kahs 36, muhtwacwacack ke sie sramsram sin Prestuhnsi se met, ma fahk:
“Leum el fahk, ‘Sripac luhk uh pa in sang enenuh luhn mwet luhlahlfongi luhk’ [Doctrine and Covenants 104:15]. Fwackyuck se inge el olwelah se sin Leum muh elac use mwe insewowo ac ikucslah sruhnguhl nuh ke kuh in sifacna. …
“… Insese kac ac moulkihn akwuck inge e ahkwoyelah kom in kuh liki met ah in eis mwe insewowo ma olweyuhklac sin Leum.
“Kuht suli kom in insacnweacng in lutlut ac orekmakihn akwuck inge ac luti nuh sin mwet ke sucu lom an. Ke kom e oruh uh, moul lom e fah ahkinsewowoyeyuck … [mweyen] kom tuhlihk nuhtin Pahpah Tuhmasr Inkuhsrao. El luhngse kom ac wacngihn pacl elac fah som liki kom. El etwekom ac el ahkolah in tahfuh nuh sum mwe insewowo ke nguhn ac ke kuh in sifacna.” 10
Puk se inge oasr sapta sruhmuhn yohk ke oraclah ac moulkihn fal nuh ke sacn oreklac, karihngihn sucu lom liki ma upac, orekma nuh ke elyah ke mani, sef nuh ke pacl fahsruh uh, ac ma pohs pac ac ma se inge el oasr nuh sin mwet nuhkwewa ma sroacng nuh ke website luhn alu kuh sin mwet kol lom an.
Ke kuht nuhnkuh akwuck nuh ke ahkolah, kuht kuh in ngwetlah nuhnkuh kacl Joseph Egypt ke mokleyuck. Etuh ke ma e sikyak e tiac fal in usacltahl liki yac in “srwacl” fin wacngihn kihsackuhnlah ke yac puhkantwen mongo ah. Liki na in kanglah nohfohn ma mwet lal Pharaoh kuh in yuki, oreklac sahflahiyacn ma ac elos ukwe, sang ma fal nuh ke enenuh lalos ke pacl sac na, acoacyacpac enenuh lalos ke, pacl fahsruh uh. Tiac fal in etuh muhkwena lah pacl upac e tuhkuh. Enenuh elos in mukwikwi, ac ke srihpen insacnweacng lalos, “oasr fuhlao.” 11
Ma se inge som nuh ke kihsensiyuck yohk srihpac se: “ohinge, meac?” Acn wowo se in muhtwacwacack kac pa in kahlwem kac lah ma nuhkwewa muhtahl sin Leum, “ac tiac ke oacna sie pacl” el use nuh sesr “sie masap suc ma na nuh ke pacl se na.” 12 Ma nuhkwewa srihsrsrihsr nuh sel Jisus Kraist muh pwelucng se ma kuht enenuh in muhsahelah finne ahkoo nuh ke moul in ikoac lasr uh.
In ekihn ahkolah ke moul in ikoac ac kuh in sifacna pa “luhlahlfongi muh ke luhngse, kuh ke kuh, luhn Jisus Kraist ac ke insacnweacng lasr sifacna,kuht kuh in eis nohfohn mwe enenuh ke nguhn ac moul in ikoac ke moul uh ma kuht enenuh nuh sesr sifacna ac luhn sucu lasr.” 13
Kuhtuh pac ip ke sie pwelucng muhtahl nuh ke ahkolah ke moul in ikoac pa in orekma “ke lahlmwetmwet ac suwohs,” 14 suc pa in kais kuhtuh sefiyac mongo ke yen in fihl an ac sef mani ke pacl loeloes, weacng pac sruhikihn ma srihsrihk, 15 suc pa mwe ahkkahlwemye ke luhlahlfongi lah Leum elac ahkyohkyelihk insacnweacng srihsrihk tuh kwacna lasr inge.
Ke pwelucng luhn nguhn oasr, kuht kuh in moulkihn ma yohk srihpac luo nuh ke ahkolah ke moul in ikoac—karihngihn mani ac acn in fihl ke lohm.
Akwuck yohk nuh ke kuh in karihngihn mani lom pa in moli sie tahfuh singucul ac afuhring, ahkwacngihnyelah ac kahingkihn soemoul, ahkoo ac moulkihn luhpan mani oreklac in moulkihn, ac sef nuh ke pacl fahsruh uh.
Ip yohk ke sef ke lohm pa sef mongo, sef kof, ac sef ke mwe enenuh sahyac oacna ke enenuh luhn kais sie ac enenuh luhn sucu, ke srihpen lohm in fihl” 16 pa lohm uh, suc pa “acn se ma fihsrwacsr emet kuht in som nuh kac ke pacl in enenuh.” 17
Ke kuht sruokyac akwuck muhtahl in suk mokleyuck sin Leum, kuht e kolyuck in etuh luhngse luhn Leum nuh sesr, kais sie ac ekihn pac sucu, ac in orekmakihn fuhkah akwuck yohk srihpac nuh ke ahkolah ke moul in ikoac. Step se ma yohk srihpac emet uh pa in muhtwacwacack.
Elder David A. Bednar el luti ip yohk se inge ke el fahk: “Orekma el ahkyohkye luhlahlfongi. … Luhlahlfongi pwacye el lohacng ke Leum Jisus Kraist ac kol nuh ke orekma pacl nuhkwewa.” 18
Tamuhlwel ac tahmtahel, ke sie facluh ekyek pacl nuhkwewa, kuht enenuh in ahkolah nuh ke mwe ahlohlloh. Finne lwen wowo e tuhkuh, kuht etuh lah finohl ac infahlfahl ke moul in ikoac luhn moul se inge e tuhtahflah na. Ke kuht suk in ahkolah ke moul in ikoac se inge, kuht kuh in lain ma upac ke moul se inge ke luhlahlfongi yohkyohkwelihk, mihs ke insiacsr, ac oacna Joseph Egypt, kuht e kuh in fahk, finne ke pacl upac, “Oasr fuhlao.” 19 Ke inen Jisus Kraist, amen.