Nga Luhlahlfongi ke Lipufacn
Leum El etuh ma upac kom oasr kac. El etwekom, El luhngse kom, ac nga olwelah, El ac suhpwacoht lipufacn in kahsre kom
Tamuhlwel ac tahmtahel, nga luhlahlfongi ke lipufacn, ac nga ke akacsruhi nuh sum ma sikyak nuh sihk kaclos. In oruh, nga finsrak ac pruhe tuh kuht ac akihlen yohk srihpen lipufacn ke moul lasr.
Pa inge kahs lal Elder Jeffrey R. Holland ke sie toeni luhlahp tari ah: “Ke kuht sramsram kaclos suc mwe orekma in poun God, kuht ahkacsmakihnyeyuck tuh tiac lipufacn nuhkwewa ma oasr ke lacyacn sahyac luhn moul uh. Kuhtuh selos kuht fahsr yohroh ac sramsram nuh se—inge, ingena, lwen nuhkwewa. Kuhtuh selos muhta ke mura sesr. Pwacye, inkuhsrao luhman fototo ke kuht liye luhngse luhn God ahkkahlwemyeyuck sin kuhlwacng ac oaru luhn mwet suc wo ac suwohs oruh lipufacn pa kahs muhkwena in ahkuhtweloslac” (“The Ministry of Angels,” Liahona, Nohfuhmpuh 2008, 30).
Lipufacn ke moul se inge pa nga luhngse in sramsram kac. Lipufacn suc fahsr inmahsrlosr ke moul lasr lwen nuhkwewa pa mwe acsmak fokoko luhn luhngse luhn God nuh sesr.
Lipufacn se met nga ac sramsram kac pa misinacri tahmtahel luo suc lutiyuc ke wosasuc ke nga tuh mukul fuhsr se: Tahmtahel Vima Molina ac Tahmtahel Ivonete Rivitti. Tuhlihk muhtwacn wiyuck ac nga suliyuck in wi mukwikwi luhn Alu uh ac we kuht ohsun nuh sin lipufacn luo. Nga tiac nuhnkuh met tuh mukwikwi fihsrwacsr se inge ac fah ekuhllah moul luhk.
Ninac pahpah ac ma wiyuck tiac kena in lutlut yohk ke Alu uh ke pacl sacn. Elos tiac pac luhngse in oasr misinacri lohm sesr, oruh nga wi lutlut luhn misinacri ke lohm Alu uh. Infuhkihl sacn ke lohm alu sacn pa “insack muhtahl” luhk.
Mahlwem se tukun lipufacn inge akacsruhi wosasuc nuh sihk, nga pacptaislac. Nga tuh matwac 16. Ke suhpwacr, wacngihn petsac ke pacl muhtahl sacn, tuh oasr petsac luhn muhtwacn wiyuck ac nga ke pacl se kuht wi mukwikwi sacn. Nga enenuh in ahkpwacyei suc oasr kac petsac se inge. Tuh nga pa el suc loes ke lacpo lacsac.
Oacna kowos kuh in luhmweyac, in wi alu upac nuh sin mwet fuhsr se suc tuhfahna ekuhllah moul lal ac sucu lal tiac wi inkacnek sepacna.
Ke nga srihke in eklac nuh ke moul, facsin, ac kawuck sasuc, nga puhla sienalac. Nga puhla muhkahimtacl ac pucs pacl suhpwacr. Nga tuh etuh Alu uh pwacye, tuhsruhk upac in puhla nga oasr kac. Finne tiac fihsrwacsr ac nga tahfuh luo ke nga srihke in falyang nuh ke alu sasuc luhk, nga puhlaikyak in wi toeni ke mwet fuhsr ke lusen lwen tolu, ma nga nuhnkuh tuh ac kahsreyuc in oraclah kawuck sasuc. Pa inge ke nga ohsun lipufacn molwelah se, pahngpahng Mônica Brandão.
El sasuc nuh ke acn sacn, el tuh mukwilac liki acn sahyac luhn Brazil. El sa in akihlenyuck sihk ac, wo nuh sihk, eis yuc oacna kawuck se lal. Nga muh el tuh liye yuc ke ohiyac na pwacye luhk ac tiac ke luhmah muhkwena.
Ke srihpen el kawuck luhk, nga tuh ohsun nuh sin kawuck lal, suc kawuck luhk pac ke kuht tuhkweni engankihn mukwikwi luhn mwet fuhsr pucs nga tuh wi tohk. Mukwikwi ingacn yohk srihpac nuh sihk in wi moul sasuc se inge.
Kawuck wowo inge kahsruh na pwacye, tuh ke srihpen wosasuc tiac lutiyuck lohm sihk ke sucu suc luhlahlfongi oruh eklac luhk nuh alu srihkeyuck. Kuhpahsr in wosasuc luhk ke Alu uh yohk srihpac nuh sin luhlahlfongi kapwack luhk. Na lipufacn luo pac suhpweyucklac sin Leum in kahsruh.
Sie selos pa Leda Vettori, mwet luti in seminary lututacng luhk. Nuh ke kuhlahs luhngse ac moklweyuck lal, el use nuh sihk lwen nuhkwewa “kahs wo luhn God” (Moroni 6:4), ma nga enenuh nuh ke lwen luhk. Ma inge kahsreyuc in eis kuh in nguhn in fahsr nuh met.
Lipufacn se sahyac suhpweyucklac nuh sihk pa prestuhn luhn Mukul Fuhsr, Marco Antônio Fusco. Oacyacpac pakpucki El in mwet suc wi yuc oruh forfor luti ke lohm luhk. Finne nga srwackna sasuc ac siena ke atac, el use nuh sihk kunohkohn in luti u in mwet tol lasr ac forfor luti lasr. El use nuh sihk pacl in mukwikwi ac etwaclah ac in tiac mwet suc muhta liye wosasuc muhkwena. El luhlahlfongiyuc, yohk liki na luhlahlfongiyuc sifacna.
Kuloh nuh sin lipufacn nuhkwewa inge, ac mwet pucs sahyac nga ohsun nuh se ke pacl fuhsr yohk srihpac ingacn, nga eis kuh fal in fahsr nuh ke inkacnek in olwelah ke nga eis ahkpwacye sin nguhn ke ma pwacye.
Ac in fahk, muhtwacn lipufacn fuhsr sacn, Mônica? Tukun kuht kwewa kuhlwacnsap ke misin lasr, kuht macruhtlac.
Nga tiac nuhnkuh tuh sikyak ke wacngihn srihpac tuh kawuck wo, kunohkohn ke Alu uh, ac ahkkweyeyuck ke kahs wowo luhn God pa ohiyac sacn. Prestuhn Gordon B. Hinckley el lahlmwetmwet in luti: “Tiac ma fihsrwacsr se in eklac in wi Alu se inge. Kalmac kuhpahsr mahtuh tui. Kalmac in fahsr liki kawuck mahtuh. Sahp kalmac in fihliyac nuh sahyac luhlahlfongi mahtuh. Sahp enenuh mwet suc in sislah ahkpah ac kuhtanglah kena koluk. Nuh sin mwet pucs kalmac muhkahimtacl ac sahngweng sin ma elos tiac etuh. Enenuh in oasr ahkkweyeyuck ac karihngihn ke pacl upac luhn moul in mwet se suc tuhfahna wi alu.” “There Must Be Messengers,” Ensign, Oct. 1987, 5).
Tohk el tuh fahk pac, “Kais sie selos enenuh ma tolu: kawuck se, kunohkohn se, ac ahkkweyeyuck sin ‘kahs wowo luhn God’” (“Converts and Young Men,” Ensign, Mei 1997, 47).
Efuh nga akacsruhi ma inge yuruwos?
Ma se met, pa in suhpwacoht pweng nuh selos suc puhlakihn ma inge ingena. Sahp ke kom mwet se suc tuhfahna wi alu, kuht fohlohk nuh ke Alu uh tukun kom tuhlac ke kuhtuh pac, kuh mwet se suc upac in wi. Nuhnak muhnahs, nuhnak muhnahs, tiac fuhlweack mukwikwi lowos in wi sucu luhlahp se inge. Pa inge Alu pwacye luhn Jisus Kraist uh!
Nuh ke engan ac molwelah lom, ac ahkinsewowoye kom in sulpac srihke. Ac ahkinsewowoye kom in ahksuwohsye moul ac facsin lowos. Leum El etuh ma upac kom oasr kac. El etwekom, El luhngse kom, ac nga olwelah, El ac suhpwacoht lipufacn in kahsre kom.
Ke kahs Lal sifacna Mwet Lahngo El tuh fahk: “Nga ac som ye muhtom. Nga fah oasr ke lacpo lacyot ac lacsac, … ac Nguhn Luhk fah oan insiom, ac lipufacn Luhk fah raunikomlac, in sruhkkomyak” (liye Doctrine and Covenants 84:88).
Srihpac ahkluo lah nga akacsruhi ma inge pa in suhpwaclah pweng se nuh sin mempucr nuhkwewa luhn Alu uh—nuh sin kuht kais sie. Kuht in esam tuh tiac fihsrwacsr nuh sin mempucr suc tuhfahna wi, kawuck suc fohlohk, ac elos ke facsin siena in sa sroacng na pwacye. Leum El etuh ma upac elos oasr kac, ac El suk lipufacn suc kena in kahsruh. Leum El kwacna suk mwet suc luhngse in lipufacn ke moul in mwet sahyac.
Tamuhlwel ac tahmtahel, kuh kowos kena in mwe orekma in poun Leum? Kuh kowos kena in oacna lipufacn inge? In mwet tuhtahf po, suhpwacyuck sin God, ke moul se inge, sin mwet se El fosrngahkihn? El enenwekowos. Elos enenwekowos.
Pwacye na, kuht kuh in fihliyac nuh sin misinacri lasr. Elos oasr pacl nuhkwewa, mwet met in sroacng nuh ke orekma luhn lipufacn inge. Tuh elos muhkwena tiac fal.
Fin kuht ngwetngwet, kom ac liye mwet pucs suc enenuh kahsruh luhn lipufacn. Sahp mwet inge tiacna nukum wes fasrfasr, nuknuk wo, kuh kuhtwena nuknuk in Sacnri. Sahp elos muhta sifacna, ke tukun lohm alu kuh kuhlahs, ac kuhtuh pacl puhla oacna elos tiac etweyuck. Sahp atacn aunsifaclos siena kuh ohiyacn sramsram lalos siena, tuh elos oasr, ac elos srihke.
Sahp kom nuhnkuh, “Kuh nga srwackna fohlohk? Kuh nga in sifilpac srihke?” Mwet sahyac ac nuhnkuh fin sie lwen elos ac puhla painyuck ac luhngseyuck. Lipufacn uh enenweyuck, ingena, lipufacn suc kena som liki acn puhla wo in ahkkweyaclos; “[mwet suc] wo ac suwohs oruh lipufacn pa kahs muhkwena in [ahkuhtweloslac]” (Jeffrey R. Holland, “The Ministry of Angels,” 30).
Tamuhlwel ac tahmtahel, nga luhlahlfongi ke lipufacn! Kuht nuh kwewa oasr mihsenge, un mwet mweun luhn lipufacn srihsrngiyucki nuh ke lwen sahflah inge, in karihngihn mwet sahyac oacna poun Mwet Oreklac luhngse se. Nga olwelah tuh fin kuht kena in kuhlwacnsap, Leum El fah use nuh sesr pac in lipufacn kuhlwacnsap. El etuh suc enenuh kahsruh luhn lipufacn, ac El fah fuhlwelosi nuh inkacnek lasr. Leum El fuhlwelosi suc enenuh kahsruh luhn lipufacn ke inkacnek lasr lwen nuhkwewa.
Nga kuloh ke lipufacn pucspucs ma Leum El fihliyac ke inkacnek luhk ke lusen moul luhk. Elos enenweyuck. Nga oacyacpac kuloh ke wosasuc Lal ma kahsre kuht in eklac ac use nuh sesr pacl in ahkwoye.
Pa inge wosasuc luhngse se, wosasuc in karihngihn. Ke ma inge nga fahkwack ke inen Jisus Kraist, amen.