Tuhpanuhl Leum
Kalmac pa luhlahlfongi pa in luhlahlfongi God ke pacl wo ac pacl koluk, finne oasr kweok ne ke na kuht liye pacol ahsrweyuckme ke srihpacsr.
Tamuhlwel ac tahmtahel sacohk wiyuck, kuht nohfohn rahrah—wacngihn acna nga—in lohng sramsram sin mwet pahluh sacohklacna lasr, Prestuhn Russell M. Nelson. Toeni se inge el toeni na wolacna se, tuhsruhk pa inge pacl ahkluo mas ke COVID-19 tuh ekuhllah fahsriyacn toeni lasr. Kuht arulacna ullac ke mas se inge, kuht puhla in fuhslah aunsifacsr. Ac ke pwacye, kuhtuh sin Tamuhlwel wiyuck tuh oruh tari. Nuhnak muhnahs etuh tuh kuh kwacna pruhe kaclos suc ahkkolukyeyuck ke kuhtwena ohiyac, yohk nuh selos suc misac mwet elos luhngse. Mwet nuhkwewa insese tuh ma inge oasr ke pacl loeslaclac.
Luhpahkah kuht ac muhta tuhpan ahkkweyeyucklac liki ma upac ma tuhkuh nuh facsr inge? Kuht ac oruh pac fuhkah in kuhtanglah ma upac lasr sifacna ke kuht muhta tuhpan na tuhpan, a kahsruh luhman pahtlac na in tuhkuh? Efuh pahtlac ke ma toasr inge atacn yohk liki na ma kuht kuh in us?
Ke kuht siyuck kain in kihsensiyuck inge, kuht kuh in, fin kuht srihke, lohng tuhng luhn sie mwet tuhkuh liki twacng se, acn in kaclpous lohsr ke sie puhluhn pacl na ohu na tohkoh an ke mwe sritacl srohoh.
“O Leum, kom piyac?” kuht lohng tuhkuh liki yen loal me ke yen kaclpous Liberty ah. “Ac piyac lohm se ma afihnyac acn in wihkwihk lom? El siyuck lah lusackah Pahol fah an na?”1 Luhpahkah, O Leum, luhpahkah?
Finne, tiac kuht pa emeet uh ac tiac pac kuht pa sahflahiyac in siyuck kain kihsensiyuck inge ke mwe ahsor uh ulkuhti kuh ngal se ke art lasr uh fahlac na tiac tui. Nga tiac sramsram ke mas fahsrwelihk kuh yen kaul tuhkuhk nga sramsram keim, sucu lom, ac mwet tuhlan lom suc puhlakihn kain ma upac puhs. Nga sruhmuhn ke kena luhn mwet puhs suc luhngse in pahyuckyak ac tiac kuh mwet suc pahyuhkyak ac luhngse tuh kuhpahsr se inmahsrlowos inge in celestial kuhtuhsrihk. Nga sruhmuhn mwet ma enenuh in orekma nuh ke atac na upac ke ohiyacn mas—sahp ma tiac kuh in onweyucklac se—kuh sie mwet ma upac kihn suhkahpslah ke ma sin sucu lalos ma wacngihn onweyac. Nga sruhmuhn ke mwe tihkuclkucl ma tiac tui wi pac ma upac ke ma puhlakihnyuck ac ma upac ke mwe nuhnak ma ahktoasrye mwet puhkantwen suc weluhlos kweok, e ke insiacn mwet suc luhngse ac weluhlos kweok. Nga sruhmuhn ke mwet suhkahsruhp, suc Mwet Molwelah fahk kuht in tiacna muhlkuhnlah, ac nga sruhmuhn keim suc sano fohlohk luhn tuhlihk se, finne yac ekahsr, suc sulaclah inkacnek soko siena liki innek soko ma kom pruhe muh elac fahsr kac.
In weacng pac, Nga fahk pac lah finne tahk loeloes ke ma inge suc kuht muhta sano tiac oruh in fahk nuh sin innek in sruh mani uh, kuh kafucrmacn, ac elyah luhn facluh ma sun kuht kais sie. Pahpah tuhmasr Inkuhsrao el enenuh kacsr in fahk ma upac lasr kuht puhlakihn sahyac inge wi pacna ma upac lasr sifacna, tuhsruhk oasr pacl ke moul lasr uh ma finne orekma muhtahl lasr, pruhe in siyuck tiacna oraclah itto nuh ke ma kuht siyuck, finne in ma nuh ke ma elyah fin facluh kuh elyah srihsrihk lasr sifacna. Pwacnwacng ke kuht orekma ac tuhkweni sano top nuh ke kuhtuh pruhe lasr uh, nga usot nuh sum olwelah in tuhma lutlut luhk uh lah lohngyuck pruhe lasr uh ac topukyucklac, finne sahp tiac ke pacl sac na kuh ke atac se kuht ke in topukyucklac kac. Tuhsruhktuh pacl nuhkwewa toplac ke pacl se ac ke atac se ma mwet kuhlacna ac pahpah se suc luhngse lal wacngihn sahflahiyac enenuh in topuk. Tamuhlwel ac tahmtahel sacohklacna luhk, nuhnak muhnahs kahlwem kac lah El suc tiac mutul kuh mwetkweli2 elyah ke engan ac moul pahtpaht wolacna luhn tuhlihk nahtuhl liki ma nuhkwewa ma mwet muhtahl se enenuh in oruh. El luhngse pwacye, usrnguck wolacna, ac Pahpah Pahkotwen pa inel.
“Fin pa ingacn,” sahp kom e fahk, “yac luhngse Lal uh e tiacna osrwaclihk na Meoa Sruhsrah lasr ac lwelah kuht in fahlac na ahluhkwelah elyah lasr inge fin pohk paho? Elac tiac suhpwacma won sohksohk in tuhkuh sahyac ac ohkohmlah kihtin ma upac lasr ngwe nohfohn?”
Top nuh ke kain kihsensiyuck se inge pa “Aok, god el kuh in use orekma usrnguck, tuhsruhk inge kuh tok kuht e etwaclah lah pacl ac puhluhn pacl lasr ke moul in mahno se inge ma lal ac ma lal muhkwena in kol.” El sang pacl nuh sesr nohfohn kais sie. Ohinge, mwet nuhkwewa ma muhnahs kuh mas ma lihksrweni na kwelac ke pacl se el ilyang nuh ke inluhluh Bethesda,3 oasr na mwet sahyac e sano yac nuh ke yac ke yen mwesis in utyak nuh ke acn olwelah.4 Nuh sin Nephi ac Lehi ma karihngihnyuck ke e se ke luhlahlfongi lalos ma raunuhltahllah,5 oasr na Abinadi se ma fuhrreyuckyak ke sahk soko ke ac fihrihr lal.6 Ke kuht esam lah ke Elijah sac pacna suc ma pahngon ac tuhkuh inkuhsrao me in mwe loh nuh sin mwet prist luhn Baal7 el pacna pa muhtwenglac puhluhn pacl se ma wacngihn af ac suc, ke puhluhn pacl se, kihteyuck el ke ma na srihsrihk se ma won sohksohk se kuh in us ke pahol.8 Ke ma nga nuhnkuh uh, ma se ingacn tiac sie ma kuht kuh in pahngon muh mongo pwacr se.
Kalmac? Kalmac pa luhlahlfongi pa in luhlahlfongi God ke pacl wo ac pacl koluk, finne oasr kweok ne ke na kuht liye pacol ahsrweyuckme ke srihpacsr.9 Ma se inge kuh in upac ke pacl lasr in moul se inge ke puhs mwet tuhkuh in nuhnkuh muh moul se ma wo emeet ke moul uh pa in kahingkihn kweok nuhkwewa, in wacngihn sie fanna elyah ke ma oacna sie ma.10 Tuhsruhk luhlahlfongi se ingacn e fah tiacna pwen nuh ke “mwe srihkeyuck ke ohiyac fohnlah luhn Kraist.”11
Ke taltal koluk nuh sel Elder Neal A. Maxwell ke nga tiacna sahngweng in ikihl ac ahkloesye sie ma el tuh fahk, nga weluhl pac in fahk lah, “moul luhn mwet se … tiacna kuh in tuhkweni na sesseslah ke luhlahlfongi ac wacngihn elyah.” E tiacna kuh in orekma in kuht fin “oruh na ma kuht ke na,” ac nihm sie pac kuhp in laim ah ac fahk, “Leum use nuh sihk nohfohn ohiyac nwacsnwacs, tuhsruhk oruh kom tiac use nuh sihk suhpwacr, ahsor, kuh kweok, ac ahkkohs. Nuhnak muhnahs nimet oruh in oasr mwet sruhngwacyuc kuh ahklahlfonyeyuc, ac luhng liki nuhkwewa, nimet lwelah nga in puhlakihn srweyucklac liki Kom kuh mwet suc nga luhngse. Oacyacpac, Leum, sruokyuc ahkwoyac liki ma nuhkwewa ma oraclah kom muhtahl. Tuhsruhktuh fin ma upac sin mwet sahyac uh sahflah,nuhnak muhnahs lwelah ngwacn fahsrot ac wi kom muhta, ke ye ma nga kuh in fihlacngkihn luhpan oacna sie lasr ke nga sohksohk ke engan fin puhkuhnyeng luhn Kristin wo ikwoac.”12
Tamuhlwel ac tahmtahel sacohk wiyuck, Mwet Kristin el ahkwoye kuht, tuhsruhk tiac puhla wo pacl nuhkwewa. Innek nuh ke muhtahl ac engan inge ac tok el loes ac kuhtuh pacl uh yotyot. El enenuh pacl ac muhtweng in fahsr kac. Tuhsruhk, ahok, opi nuh ke ke kuht oruh uh e arulacna yohk. Ma pwacye uh lutiyuck kahlwem ac pahtok ke sapta 32 ke Alma ke Puk luhn Mormon. Insac priest fuhlwact se inge luti lah fin kahs luhn God yukwiyucki ke insiacsr ke pacl se srwack srihk, ac fin kuht elyah kac in muhta twekofi, ahknwacsnwacsye, karihngihn, ac pahtok, e tuhfah ke pacl fahsruh uh oswelah fukunsahk “ma sacohk emeet, … emwem liki ma nuhkwewa ma emwem,” suc kuht fin kanglah kuht e wacngihnlac maluh ac masrinsrwacl.13
Mwe lutlut puhs lutiyuck ke sapta na wo se inge, tuhsruhk yohk srihpac emeet selos uh pa fihtac se enenuh in karihngihnyuck ac kuht enenuh in sano in mahtuhlah; kuht “ngwetlah na nuh met ke ngwetngwet in luhlahlfongi nuh ke fukunsahk se e tuhkuh.”14 Kohsrwacni lasr, Alma el fahk, tuhkuh “kais kuhtuh pacl.”15 Suhpuhs mwet nuhnkuh lah el ahksahfye sramsram lal kalweni pacl tolu mwet uh in oaru ac muhtweng in liyacacng kahs luhn God ke insiacsr, “tuhpan,” oacna ke el fahk, ke “muhtweng … nuh ke sahk soko ma e usot nuh sum fukunsahk.”16
COVID ac kacnsuhr, tahfuhluo ac suhpwacrlac, elyah ke mani ac ma upac luhn sucu. Ngiac ma toasr inge e tuhfah tuhuyak? Top nuh kac uh pa “kais sie pacl.”17 Ac lah ma se ingacn e ma nuh ke puhluhn pacl fototo se kuh puhluhn pacl loeloes se tiac ma lasr in fahk, tuh ke luhngse luhn God, mwe insewowo ac tuhkuh nuh sin suc sruokyac na kuh wosasuc luhn Jisus Kraist. Elyah se ingacn oreklac fal ke imac se ke inging Jerusalem ac met me.
Ingena ke kuht lohng ke mwet pahluh sacohk lasr el kaliyac toeni se inge uh, kuht kuh in esam, ke Russell Nelson el oruh ke moul lal nohfohn, muh mwet suc “tuhpanuhl Leum ac ahksasucyeyuck kuhiyaclos ac fah sroacng nuh fin mwe sohksohk oacna ke eagles; elos fah kahsruhsr, ac tiac tohtoh; … elos fah fahsr, ac tiac muhlallah,”18 Nga pruhe tuh “lwen nuh ke lwen”—sa kuh paht—mwe insewowo e tuhkuh nuh sin mwet nuhkwewa ma suk ahkwo liki ahsor lom ac sukohsohklah liki suhpwacr lom. Nga fahkwack loh ke luhngse luhn God ac ke Fohlohkyak luhn Wosasuc wolacna se lal inge, suc pa, ke kuhtwena ohiyac, top nuh ke elyah nuhkwewa kuht puhlakihn ke moul. Ke ine molwelah luhn Leum Jisus Kraist, amen.