Siyuck, Suk, ac Tongol
Ip yohk se ke plwacn lal Pahpah Luhng uh pa pacl wowo se in sramsram nuh Sel pacl na kuht ke uh.
Mahlwem ahkosr somlah ah, ke lutlut luhk ke ma suhmuhslah, nga riti ke misin lal Alma fin acn Ammonihah ke nga sun mwe fahk se ke Fahsruh, Fahsr tukuk: “Ke kom riti ke mwe insewowo na yohk ma God El sang nuh sin mwet Nephi (liye Alma 9:19–23, nuhnkuh ke mwe insewowo na yohk El usot nuh suwos.”1 Nga sulaclah in oraclah sie tahk ah ke mwe insewowo luhn God nuh sihk ac sruokyac ke lun puk digital se luhk ah. Ke minit na ekahsr, nga tahkuhnlah mwe insewowo 16.
Ma se ma yohk srihpac emet selos uh pa mwe insewowo ke pahkotwen ac Iwaclah lal Mwet in Molwelah ke srihpuck. Nga suhmuhslah pac mwe insewowo se oasr sihk ke nga ahollah Mwet in Molwelah in ekihn sie misinacri fuhsr fin acn Portugal ac, tok, wi tahfweyuck ma pahtpaht, Patricia, fin acn Brazil Porto Alegre South Mission, suc kuht kahsruh wi misinacri na fokoko ac wolacna 522. Sramsramkuhnuhl Patricia, mwe insewowo puhs ma nga suhmuhslah ke lwen sac pa mwe insewowo ma kuht tuhkweni puhlakihn ke lusen yac 40 ke macruht lasr uh—wi pac sil lasr ke Tempuhl fin acn São Paulo Brazil, tuhlihk 3 wolacna nahtuhsr, mukul ac muhtwacn kiaclos, ac tuhlihk 13 nuhtin tuhlihk nahtuhsr inge.
Nuhnak luhk uh forlah pac nuh sin ninac wowo kiyuck ac pahpah wowo tuhmuhk, suc tuhfweyuclac ke akwuck ke wosasuc se inge. Nga esamwack ke sie pacl ma ninac kiyuck el wiyuc sikuck muhtuhnteyak sisken ma kiyuck ah in pruhe ke nga yac 10 ma ah. Sahp el puhla muh fin pruhe luhk ac som sun Pahpah tuhmuhk Inkuhsrao, enenuh in ahkwoyeyucklac. Oruh el fahk, “Nga ac pruhe met, na tukun pruhe luhk, kom pruhe.” El kalweni in oruh atac se inge ke fong puhkantwen, nuh ke el etuh suwohs muh nga lotwelah ke akwuck ac pracktis lah ac fuhkah sramsram nuh sel Pahpah Luhng. Nga ac kuloh nuh sel nuh tok ke el luti yuc in pruhe, ke srihpen nga lotwelah lah Pahpah tuhmuhk Inkuhsrao el lohng pruhe luhk ac topuk.
Pwacye na, lah ma se ingacn el sie mwe insewowo ma nga sang nuh ke tahkuhnlah luhk—mwe insewowo ke kuh in lohng ac etwaclah luhngse luhn God. Ip yohk se ke plwacn lal Pahpah Luhng uh pa pacl wowo se in sramsram nuh Sel pacl na kuht ke uh.
Mwe Solsol sin Leum
Ke Mwet in Molwelah El muhtwacta nuh fin acn Macrike ke tukun sifil moulyak lal, El kalweni solsol se ma El sang nuh sin Mwet Tuhma Lutlut lal fin acn Galilee. El fahk:
“Siyuck, ac fah utuckot nuh sum; suk, ac kom fah konwacack; tongol, ac fah ikacklah nuh sum.
“Tuh mwet nuhkwewa suc siyuck, eis; ac kuhtwena mwet suc suk, konwacack; ac nuh sel suc tongol, ac fah ikacklah.” (3 Nephi 14:7–8; liye pac Matthew 7:7–8).
Mwet pahluh lasr, Prestuhn Russell M. Nelson, el oraclah solsol se oacpacna ke pacl lasr uh. El fahk: “Pruhe ke inen Jisus Kraist ke elyah lom, sahngweng lom, muhnahs lom—ahok, luhngse ac kena luhn insiom. Ac na porongo! Suhmuhslah nuhnak ma utyak nuh in nuhnak lom an. Sruokyac puhla lom ac ukwe ac mukwikwi ma kolyuck kom in oruh. Ke kom kalweni ohiyac se inge ke lwen nuh ke lwen, mahlwem nuh ke mahlwem, yac nuh ke yac, kom ac kapwack nuh ke akwuck ke fwackyuck.’”2
Prestuhn Russell M. Nelson el luti, “Ke lwen ma ac tuhkuh uh, ac fah tiacna kuh in pain moul ke nguhn fin wacngihn pwenyuck, kolyuck, ahkwoye, ac pihrihkyuck pacl nuhkwewa luhn Nguhn Muhtahl.”3
Efuh kuh fwackyuck el arulacna enenweyuck nuh ke pain moul luhn nguhn lasr uh? Mweyen facluh kuh in fohs ac ohkahrkahr, nwacnwaclah ke ma kikiacp ac mwe ahkfohs. Sramsram nuh sin Pahpah tuhmasr Inkuhsrao El oruh kuht in kuh in etuh lah meac pwacye ac meac kikiacp, meac enenweyuck nuh ke plwacn lal Leum nuh sesr ac meac tiac. Facluh el kuh in upac ac ahksuhpwacr. Tuhsruhk ke kuht ikucslah insiacsr ke pruhe uh, kuht ac puhla ahkkweyeyuck sin Pahpah tuhmasr Inkuhsrao me ac ahkpwacyeiyuck lah El luhngse kuht ac kuht yohk srihpac nuh sel.
Siyuck
Leum El fahk lah “mwet nuhkwewa ma siyuck, ac fah ituckyang.” Siyuck el atacn ma na fihsrwacsr se, tuhsruhk arulacna yohk kuh kac ke srihpen el ahkkahlwemye kena lasr ac luhlahlfongi lasr. Ne ohinge, el enenuh pacl ac muhtweng in etuh in kahlwem ke puhsrwen Leum. Kuht lohacng nuh ke nuhnak ac puhla ma tuhkuh nuh ke nuhnak lasr ac insiacsr, ac kuht suhmuhslah, oacna ke mwet pahluh lasr uh el fahk kuht in oruh uh. Suhmuhslah nuhnak lasr uh el ip yohk srihpac se nuh ke eis. El kahsrwe kuht in esamwack, sifil liye, ac sifil puhla meac Leum El luti kuht.
Ke pacl fototo somlah ah sucu se luhk fahk nuh sihk, “Nga luhlahlfongi muh fwackyuck nuh sin kais sie sie el pwacye. Nga luhlahlfongi muh Nguhn Muhtahl elac ahkkahlwemye nuh sihk ma nuhkwewa ma nga enenuh in oruh.4 Fihsrwacsr in luhlahlfongi ke nga puhla insiyuck fihrihrrihr ke luhlahlfongi kuh se.5 Tuhsruhk nga ac fuhkah eis Nguhn Muhtahl in sramsram nuh sihk ke luhpah se inge ke pacl nuhkwewa?
Nuh sin mwet sacohk luhk ac nuh sin nohfohn na, Nga ac fahk muh nga ac luhngse pac in puhla kolyuck fokoko sin Nguhn pacl puhkantwen ac liye kahlwem inkacnek soko in ukwe ke pacl nuhkwewa. Tuhsruhk nga tiac. Ne ohinge, ma se kuht kuh in kwacna muhta puhla uh pa puhsra srihsrihk, akwuck se luhn Leum mahmah nuh ke nuhnak lasr uh ac insiacsr: “Nga pa inge. Nga luhngse kom. Fahsr nuh met; sang kuhiyom. Nga ac fah ahkkweye kom.” Kuht tiac enenuh in etuh ma nuhkwewa ac liye ma nuhkwewa ke pacl nuhkwewa.
Puhsra srihsrihk sac el ahkpwacyei, pahtok, ac ahkkweye—ac ke pacl puhs pa na ngwacn ma kuht enenuh nuh ke lwen se ingacn uh. Nguhn Muhtahl el pwacye, ac kolyuck lal pwacye—ma yohk ac ma srihsrihk.
Suk
Leum El kalweni in olwelah, “El suc suk, fah konwacack.” Suk el enenuh kuh ke nuhnak ac nguhn—nuhnkuh yohk kac, srihkeyuck, srihke, ac lutlut. Kuht suk ke srihpen kuht luhlahlfongi olwelah luhn Leum. El suc fahsr nuh yohrohl God enenuh in luhlahlfongi in el, ac lah el ahkinsewowoye elos suc sokohl (liye Hebrews 11:6). Ke kuht suk, kuht ahkkahlwemye ke inse muhlahlah lah srack puhs ma kuht ac etwaclah, ac Leum Elac ahkyohkyelihk kahlwem lasr, ahkwe kuht in eis yohk. “Tuh liye, Leum God El fahk ohinge: Nga fah sang nuh sin tuhlihk nuhtin mwet ip nuh ke ip, luti nuh ke luti, kuhtuhsrihsrihk inge ac kuhtuhsrihsrihk ingoh; … tuh nuh sel suc eis Nga fah sang in yohk pac” (2 Nephi 28:30).
Tongol
Sahflahiyac ah, Leum El fahk, “Nuh sin suc tongolwack, ac tuhfah ikacklah.” In tongol pa in oasr luhlahlfongi. Ke kuht fahsr tohkohl uh, Leum El ikucslah innek uh ye muhtahsr. Oasr on in alu na kahto soko ma luti kuht in “nguhtwaclihk ac oruh sie ma yohk liki na in mwemwe kihn acn lasr inkuhsrao. Orekma wowo el pwacr se, engan se ma ahluhkwelah luhpah nuhkwewa, mwe insewowo se ke ma kunac ac luhngse.”6 Elder Gerrit W. Gong ke mwet sap Singucul luo ah el ahkuhtweyac ke pacl fototo somlah ah lah fwackyuck uh el kwacna tuhkuh ke pacl kuht oruh ma wo se uh. El fahk: “Ke kuht srihke in sang kahsruh nuh sin mwet ma raunikuhtlac uh, Nga nuhnkuh tuh Leum el use nuh sesr luhngse yohk lal nuh selos ac ohinge nuh sesr. Nga nuhnkuh muh kuht lohng puhsrwacl—kuht puhla Leum ke siena atac—ke kuht pruhe in kahsruh mwet ma raunikuhtlac ke srihpen pa ingacn sie pruhe ma El ke topuk emeet.”7
Srihkasrak lal Alma
Fahk fihsrwacsr se ke Fahsruh, Fahsr Tukuk in nuhnkuh ke mwe insewowo luhk use nguhn wolacna se ac kuhtuh kahlwem luhn nguhn ma tiac nuhnkuh muh ac sikyak. Ke nga tahfwelah na in riti kacl Alma ac luti lal fin acn Ammonihah, nga konwacack lah Alma el sang mwe srihkasrak wowo nuh ke lah mac kalmac in siyuck, suk, ac tongol. Kuht riti lah “Alma el orekma yohk ke nguhn, kwacfe sin God ke pruhe fokoko, tuh elan kuh in okwaclah Nguhn Lal nuh fin mwet suc oasr in siti sac.” Pruhe sac, ne ohinge, tiacna topukyucklac ke atac se ma el finsraki ah, ac sisilac Alma liki siti sac. “Toasr ke ahsor,” Alma el apkuhran in fuhlweack, ke lipufacn se tahfweacng pweng se: “Insewowo nuh sum, Alma; kweyak ac enganwack, mweyen oasr srihpac yohk kom in enganwack.” Lipufacn sac fahk pac nuh sel elan fohlohklac nuh Ammonihah ac sifilpac srihke, ac Alma “el silahklahk na fohlohklac.”8
Meac kuht lotwelah sel Alma ke siyuck, suk, ac tongohlwack? Kuht lotwelah lah pruhe el enenuh orekma upac ke nguhn, ac el tiacna fahsr nuh ke ma se ma kuht finsraki ke pacl nuhkwewa. Tuhsruhk ke kuht puhla suhpwacrlac kuh toasrlac ke ahsor, Leum El use nuh sesr ahkkweyeyuck ac kuh ke kain in atac puhkantwen. El kuh in tiac topuk nohfohn kihsensiyuck lasr uh kuh ahkwoyelah nohfohn elyah lasr ke pacl na sa; tuh, El ahkkweye kuht in kalweni na in srihke. Fin kuht silahklahk na oruh plwacn lasr in oacna plwacn Lal, El ac ikucslah innek uh nuh sesr, oacna ke el oruh nuh sel Alma.
Luhlahlfongi luhk muh pa inge fihl se ma fohnlah wosasuc uh. Kuht kuh in engankihn mwe insewowo ke Iwaclah lal Jisus Kraist ke moul lasr uh. Mwe suhmuhslah uh yolyak oasr sesr. Kuht kolyuck sin mwet pahluh suc luti kuht ke luhngse lal Leum ke pacl upac ma kuht oasr kac uh. In weacng pac, kuht kuh in sifacna eis fwackyuck lasr oruh Leum El kuh in ahkkweye kuht ac kol kuht sifacna. Oacna ke lipufacn sac fahk nuh sel Alma, oasr srihpac yohk lasr “in enganwack” (Alma 8:15). Ke inen Jisus Kraist, amen.