Toeni Luhlahp
Lwelah tuh God Elan Kuhtanglah
Toeni Luhlahp ke Ohktohpa 2020
18:51

Lwelah tuh God Elan Kuhtanglah

Sel Prestuhn Russell M. Nelson

Prestuhn luhn Alu luhn Jisus Kraist luhn Mwet Luhlahlfongi Lal ke Lwen-sahflah

Yac kom insese in lwelah tuh God Elan kuhtanglah moul lom? Yac kom insese in lwelah tuh God Elan pa yohk srihpac emeet in moul lom uh?

Tamuhlwel ac tahmtahel sacohk wiyuck, nga arulacna srui ke pweng na utuftuf ke tuhkweni se inge ac pacl wowo luhk in sramsram nuh suwos ingena.

Ke lusen yac 36 ma nga ekihn Mwet Sap ah, mwe luti ke fahsrweni luhn mwet Israel arulacna lihksrweni uslah muhtuhk.1 Ma nuhkwewa ma sruhmuhnyuck kac uh arlac nga fwefwelac kac weacng orekma lalos ac inelos2 Abraham, Isaac, ac Jacob; moul lalos muhtwacn kiyaclos; olwelah suc ma God el oraclah nuh selos ac nuh sin fihtac lalos;3 wacngihnlac luhn sruf singucul luo; ac mwe palye pucspucs ma sruhmuhnyuck ke fohlohkweni lalos ke lwen lasr uh.

Nga lutlut ke fohlohkwacni, pruhe kac, ac ipeis ke ma suhmuhslah nuhkwewa ma sramsram kac, ac siyuck sin Leum in ahkyohkye kahlwem luhk kac.

Na nuhnkuh ke insewowo luhk ke ikacklah nuh sihk sie kahlwem nuh ke mwe luti se inge. Ke kahsruh luhn mwet lahlmwetmwet Hebrew luo, nga lotwelah sie kalmacn kahs Hebrew se inge Israel pa “lwelah tuh God Elan kuhtanglah.”4 Tuh, ine se inge Israel luhma nuh sin sie mwet ma insese in lwelah God Elan kuhtanglah moul lal. Mwe luti se inge pihrihk insiyuck.

Kahs sac insese yohk srihpac nuh ke luhngasyacn Israel.5 Kuht nuhkwewa oasr sukohsohk in sulaclah la. Kuht kuh in sulaclah in ma Israel, kuh tiac. Kuht kuh in sulaclah God Elan kuhtanglah moul lasr, kuh tiac. Kuht kuh in sulaclah in lwelah God elan pa kuh se emeet in moul lasr, kuh tiac.

Ke pacl se inge, lwelah nuh sesr in ngwetlah ac esam ke pacl se ma eklac moul lasr Jacob, tuhlihk nuhtin nahtuhl Abraham. Ke acn suc Jacob el sang ine Peniel (suc kalmac pa “muhtahl God”),6 Jacob el apihrwack nuh sin sie mwe lain na upac. Srihkeyuck sukohsohk in sulaclah lal. Ke kihsrucngsrucng se inge, Jacob el ahkpwacyelah ma suc ma yohk srihpac emeet nuh sel. El ahkpwacyelah el insese in lwelah God Elan kuhtanglah moul lal. Ke top luhn God, God El ekuhllah inel Jacob nuh ke Israel,7 kalmac pa “lwelah God Elan Kuhtanglah.” Na God el olwelah nuh sel Israel lah mwet nuhkwewa mwe ahkinsewowo ma fwackyang nuh sel Abraham ac fah oacyacpac ma lal.8

Mwe suhpwacr se lah, fihtac lal Israel kuhnahoslah olwelah lalos yurin God. Elos tuhngal ac onwelah mwet pahluh ac tiac lwelah God Elan kuhtanglah moul lalos. Ke ma inge, God El oracltahlwelihk nuh ke sroasrihk ahkosr luhn facluh.9 Ke pahkotwen Lal, El olwelah tohkoh muh El ac oracltahlweni, oacna ke sruhmuhnyuck sel Isaiah: “Nga tuh siskomla [Israel] ke kitin pacl, A ke pakoten lulap luk, nga fah sifil eiskom.”10

Ke oasri kalmacn kahs se inge Israel sihk uh, kuht konwacack fohlohkweni luhn mwet Israel uh yohkwaclihk kalmac nuh sihk. Leum El ac orwacni elos suc lwelah tuh God Elan kuhtanglah moul lalos. Leum El ac usacni elos suc sulaclah in fihliyac tuh God in pa ma se emeet in moul lalos.

Ke yac puhs, mwet pahluh elos palye ke fohlohkwacni se inge,11 ac sikyak ingena! Ke pa inge sie ip yohk srihpac nuh ke Tuhkuh Ahk Luo luhn Leum, pa inge ma yohk srihpac emeet kuh orekma yohk srihpac se emeet fin facluh se inge!

Fohlohkweni se met liki yac tausin fahsruh uh el sie mwe sramsram nuh sin kais sie in sang ahkyohkye luhlahlfongi ac puhlaik in nguhn luhn mwet puhs liki million. Ke kuht ekihn mwet ke Alu luhn Jisus Kraist luhn Mwet Luhlahlfongi Lal ke Lwen-sahflah, kuh “mwet olwelah luhn Israel ke lwen sahflah,”12 kuneyucki kuht in kahsrwel Leum ke orekma na yohk srihpac se inge.13

Ke kuht sramsram ke fohlohkweni luhn mwet Israel kwewana ke facl se inge ac ke facl luhn nguhn, kuht luhma nuh ke, ahok, nuh ke misinacri, tempuhl, ac orekma ke tahk luhn sucu. Kuht luhma pac nuh ke muhsahiyacn luhlahlfongi ac testimoni ke insiacn mwet ma kuht wi muhta, orekma, ac kuhlwacnsuhpuh. Oacna sie pacl ma kuht oruh oacna sie ma ma kahsruh oacna sie mwet—ke kwena facl se inge ac facl luhng nguhn—in oruh ac liyacacng olwelah nuh sin God, kuht kahsruh in usacni mwet Israel.

Tiac paht ke pacl somlah ah, muhtwacn kiyacn mukul nuhtihk el tihkuclkucl ke moul in nguhn. Nga ac pahnglol “Jill.” Finne orek lalo, pruhe, ac mwe insewowo luhn pristut, pahpah tuhmwacl Jill el fahsr in misac. El toasrlah ke sahngweng lah e wacngihnlac pahpah tuhmwacl ac testimoni lal.

Paht ke sie ekuh ah, muhtwacn kiyuck, suc el pa Sister Wendy, el sruhmuhn nuh sihk ke ohiyac ma Jill el oasr kac. Litutacng tok ah Wendy el pihrihkyuck elan fahk nuh sel Jill top luhk nuh ke tihkuclkucl el puhlakihn ke moul in nguhn lal ke kahs se fanna. Kahs sac pa myopic.

Jill el ahkuhtweyac nuh sel Wendy tohkoh lah el lihksrweni na toasrlah ke top se luhk ah. El fahk, “Nga muhta finsrakkihn Paht Mahtuh elan olwelah nuh sihk muh oasr ma usrnguck ac sikyak nuh sel pahpah. Nga muhta na nuhnkuh lah efuh kahs se inge myopic pa kahs se ma pihrihkyuck el elan fahk uh.”

Tukun pahpah tuhmwacl Jill ah misac, kahs sac myopic sikalweni na in srihpuclpuclwel. El ikacslah nuhnak luhn insiacl in kahlwem yohk ke kahs sac myopic lah kalmac pa “porongo nuh ke ma luhn pacl fototo.” Ac nuhnak lal muhtwacwacack in eklac. Jill el fahk tohkoh, “Myopic el oruh nga in tui, nuhnak, ac kwelac. Kahs sac nwekyuclac ke mislac. El ahkacsmakihnyeyuc in ahkyohkye nuhnak luhk ac suk ma kawihl. El ahkacsmakihnyeyuc lah oasr plwacn muhtahl se ac lah pahpah tuhmuhk el srwackna moul ac luhngse nga ac el ngweti liyeyucyang.. Myopic el kolyuc nuh sin God .”

Nga arlac yuckihn tuhlihk nuhtin nahtuhlos suc ma sro nuh yuruk inge. Ke pacl na upac se nuh sel ke moul lal inge, Jill el lotwelah elan apsrweni kena luhn God nuh sin pahpah tuhmwacl, ke nuhnak kawihl nuh ke moul lal sifacna. Ke sulaclah lal in lwelah God Elan kuhtanglah moul lal, el sokwack mislac.

Fin kuht lwelah, oasr ohiyac puhs ma luhngasyacn kahs Hebrew se inge Israel ac kuh in kahsrwe kuht kac. Nuhnkuh lah pruhe lasr ke misinacri lasr—ac ke insacnweacng lasr in usacni mwet Israel—ac ekuhllah fuhkah nuhnak lasr ke mwe luti se inge. Kuht kwacna pruhe tuh kuht ac misinacri in kolyuck nuh selos suc ahkolah in eis ma pwacye ke wosasuc luhn Jisus Kraist ma fohlohkyak inge. Nga nuhnkuh, lah suc kuht ac kolyuck nuh se ke kuht pahng nuh sel in sokwack mwet ma insese in lwelah tuh God Elan kuhtanglah moul lalos?

Kuht ac sahp kolyuck nuh sin kuhtuh selos suc ma tiac wi luhlahlfongi ke God kuh Jisus Kraist tuhsruhk suk in lutlut Kaclos ac plwacn in engan Lalos. Kuhtuh selos sahp “isuslac nuh lun olwelah se inge”14 tuhsruhk fahsr liki inkacnek luhn olwelah se inge. Elos ingena sahp ahkolah in auliyak, fohlohkoh, ac lwelah tuh God Elan kuhtanglah. Kuht kuh in kahsrwelos ke kuht fohlohkohnuhlosme ke pain kuhlwacng luhn insiacsr ac ohiyacsr. Ac kuhtuh selos ma kuht kolyuck nuh se uh sahp puhla muh oasr ma wacngihn in moul lalos. Elos, oacyacpac, wi kena puhla engan ac fas ma tuhkuh nuh selos suc insese in lwelah God Elan kuhtanglah moul lalos.

Nwek luhn wosasuc ma ac sang orwacni mwet Israel ma oaclihk fin facluh arulacna yohk molo. Oasr infuckihl nuh sin kais sie suc isaclwacng kwewa in sruokyac wosasuc luhn Jisus Kraist. Kais sie suc eklac oacwaclah nuh ke tuhlihk olwelah nuhtin God,15 lah ke isuslac kuh ke nuht. Kais sie eklac usrui ma nuhkwewa ma God el uli nuh sin tuhlihk luhlahlfongi nahtuhl fin acn Israel!16

Kais sie sesr oasr srihpac muhtahl la ke srihpen kais sie sesr pa tuhlihk nuhtin God. Kais sie oacna sie ye Muhtahl. Kalmacn ma pwacye se inge yohk. Tamuhlwel ac tahmtahel, nuhnak muhnahs porongo nuh ke ma ngwac fahk. God el tiac luhngse yohk mwet ke sie acn yohk liki mwet ke acn ngi ac. Mwe luti lal ke ma se inge arulacna kahlwem. El suli nuhkwewa in fahsr nuh Yohrohl, “sralsral ac fasrfasr, srohoh ac sukohsohk, mukul ac muhtwacn.”17

Nga kwacfe nuh suwohs tuh suwohs lom ye muhtuhn God tiac ma nuh ke tuhnin kohloh. Kaksak kuh suhpwacr luhn God ma na ke oaru lowos nuh sin God ac masap Lal ac tiac ke tuhnin kohloh.

Nga ahsor lah Mwet Sralsral wiyacsr fin facluh se inge in muhtwacnglah kweok luhn sruhnga ac ahkkoluk. Mihsenge nga pahng nuh sin mempucr wiyacsr yen nuhkwewa in kol ohiyac in sislah nuhnak ac mukwikwi luhn sruhnga. Nga kwacfe kowos in oruh wo nuh sin tuhlihk nuh kwewa nuhtin God.

Kihsensiyuck se nuh sesr kais sie, lah kuht ma oyac, el oacna sie ke yen nuhkwewa. Yac kom insese in lwelah tuh God Elan kuhtanglah moul lom? Yac kom insese in lwelah tuh God Elan pa yohk srihpac emeet in moul lom uh? Yac kom ac lwelah tuh kahs lal, masap Lal, ac olwelah Lal in kol kom kais sie lwen? Yac kom ac lwelah Puhsrwacl in pa puhsra se emeet in moul lom? Yac kom kena tuh kuhtwena ma El enenuh kom in oruh in yohk liki ma kom luhngse nuhkwewa sahyac. Yac kom kena tuh kena lom in eisyuck ke kena Lal?18

Nuhnkuh lah ahkolah in eiskomyang ac ahkinsewowoye kom. Fin kom tiac pahyuck ac suk tahfweyom ne tok ma pahtpaht, kena lom in ekihn “mwet Israel” ac kahsrwe kom in sulaclah lah suc kom ac wi ac lah kom ac welah fuhkah.

Fin kom pahyuck nuh sin sie suc kuhnahoslah olwelah lal, kena lom in lwelah God Elan kuhtanglah moul lom ac oruh olwelah lom yurin God in tu na kuh tiac mukwilac. Leum El ac fah unwelah kweok luhn insiowos. Inkuhsrao ac fah ikacklah ke kom ac suk lah kom ac fahsr nuh meet fuhkah. Kom tiac enenuh suk kuh nuhnkuh.

Fin oasr siyuck elyah lom ke wosasuc kuh Alu uh, ke kom lwelah God Elan kuhtanglah, ac fah kolyuck kom in sokwack ac kahlwem ke ma pwacye, ma kawihl pwacye suc ma ac kol moul lom ac kahsrwe kom in tu na kuh ke inkacnek in olwelah.

Ke kom sun mwe sruhf—finne mwe sruhf tuhkuh sun kom ke pacl na kom tohtohlah kuh puhla muh kom muhkahimtacl kuh mwet uh tiac kahlwem sum—nuhnkuh ke puhlaik ma ac oasr sum ke kom sulaclah in lwelah God Elan kuhtanglah moul lom ac ke kom pahng nuh Sel in ahkkweye kom.

Ke kena se lom emeet pa in lwelah God Elan kuhtanglah, in ipin mwet luhn Israel, sulaclah puhs lom ac fah fihsrwacsrlah. Mwe elyah pucspucs lom ac fah eklac tilac elyah! Kom ac etuh lah kom ac nahwe kom fuhkah. Kom ac etuh lah meac kom ac etuh ac lah meac kom ac riti, kom ac sislah pacl lom oyac, ac lah suc kom ac asruoki nuh se. Kom ac etuh lah meac kom ke ahksahfyelah. Kom etuh lah kain in mwet fuhkah kom ac eklac nuh kac.

Inge, tamuhlwel ac tahmtahel sacohk wiyuck, enenuh luhlahlfongi ac puhlaik in lwelah God Elan kuhtanguhloslac. Enenuh insacnweacng, orekma suwohs luhn nguhn in auliyak ac eslah moul in ikoac luhn mwet facluh ke Iwaclah luhn Jisus Kraist.19 Enenuh oaru, insacnweacng ke lwen nuhkwewa in ahkkapye pahlah lom in lutlut ke wosasuc, in luti yohk ke Pahpah Lucng ac Jisus Christ, ac in suk ac top nuh ke fwackyuck ma utuckot nuh sum.

In pacl upac inge suc ma Mwet Sap Paul el palye tari,20 Setuhn el tiac kuh in sifil sukohsohk finne srihke in okanlah lain lal nuh ke plwacn luhn God. Sruasra luhn orekma koluk uh upaclah. Ke ma inge, ohiyac se fanna in kuh in pain moullac ke moul in nguhn uh pac in lwelah God Elan kuhtanglah moul lasr, in lutlut in porongo Puhsrwacl, ac in orekmakihn kuh lasr in kahsruh usacni mwet Israel.

Na inge, Leum El puhla fuhkah ke mwet ma lwelah tuh Elan kuhtanguhloslac uh? Nephi el ahkuhtweyac kahlwem: “[Leum] El luhngse elos suc lwelah tuh in el pa God lalos uh. Liye, el luhngse pahpah mahtuh tuhmwacsr, ac el olwelah nuh selos, ahok, finne Abraham, Isaac, ac Jacob; ac el esam olwelah ma el [tuh] oraclah.”21

Ac meac Leum el insese in oruh nuh sin mwet Israel? Leum el tuh fuhlahk muh El ac fah “oruh mweun [lasr], ac mweun luhn tuhlihk [nahtuhsr], ac [mweun] luhn tuhlihk nuhtin nahtuhsr … nuh ke fihl ahk tolu ac ahk ahkosr”!22

Ke kom lutlut ke ma suhmuhslah ke mahlwem ohnkohsr fahsruh uh, nga kwacfe kom in suhmuhslah ma nuhkwewa ma Leum El olwelah nuh sin tuhlihk nuhtin Israel. Nga motko muh kom ac arlac lut! Nuhnkuh ke olwelah inge. Sramsram kac tempuhl yurin sucu ac kawuck lom an. Na moulkihn ac tuhpan ke olwelah inge ac ahkpwacyeiyuck ke moul lom sifacna uh.

Tamuhlwel ac tahmtahel sacohk wiyuck, ke kom sulaclah in fuhlweacng nuh sin God in kuhtanglah moul lom, kom ac puhlakihn sum sifacna lah God lasr El “God luhn ma usrnguck.”23 Ke kuht mwet, kuht pa tuhlihk olwelah Nahtuhl, ac kuht ac fah pahngpahng ke Inel. Ke ma inge nga puhsisacl in fahkwack ke ine muhtahl luhn Jisus Kraist, amen.

Mwe Kahsruh

  1. Nga sramsram ke Israel ke pweng 378 ke pweng puhs liki 800 suc ma nga oraclah ke lusen yac 36 ma nga ekihn Mwet Sap Lal.

  2. Ke kahs Hebrew Abram el sie ine fuhlwact suc kalmac pa “pahpah fuhlwact.” Tuhsruhk ke God ekuhllah ine sacn nuh ke Abraham ine sacn yohkwaclihk kalmeyac suc kalmac, pa “pahpah tuhman mwet pucspucs.” Pwacyena lah, Abraham el ac fah “pahpah tuhmwacn muhtuhnfacl pucspucs.” (Liye Genesis 17:5; Nehemiah 9:7.)

  3. Leum God Jeova El oraclah sie olwelah nuh sel Abraham lah Mwet Lahngo luhn facl se inge ac fah isuslac ke fihtac lal, oasr acn suc ac fah usruiyuck, ac muhtuhnfacl nuhkwewa ac fah ahkinsewowoyeyuck ke fihtac lal Abraham (liye Bible Dictionary, “Abraham, covenant of”).

  4. Liye Bible Dictionary, “Prayer.”

  5. Kahs se inge Israel el sikyak puhs liki pacl tausin ke ma suhmuhslah. Kuh in furokyuck nuh ke sucu lal Jacob (Israel) sucu luhn wen singucul luo, wi acn nahtuhl (liye Genesis 35:23–26; 46:7). Misenge kuh pac in furokyuck orekmakihnyuck nuh ke acn fin facluh. Tuhsruhk ma suhmuhslah kac uh kuh in orekmakihnyuck nuh sin mwet na ma fuhlweacng God elan kuhtanglah moul lalos.

  6. Liye Genesis 32:30; also spelled as Penuel in Genesis 32:31.

  7. Liye Alma 32:28.

  8. Liye Genesis 35:11–12.

  9. In ahkyohkye mwe lutlut an, liye Topical Guide, “Israel, Scattering of.”

  10. Isaiah 54:7.

  11. Liye Isaiah 11:11–12; 2 Nephi 21:11–12; Mosiah 15:11.

  12. Liye Encyclopedia of Mormonism (1992), “Covenant Israel, Latter-Day,” 1:330–31.

  13. Ke kuht wi usacni tuhlihk nuhtin Israel, Leum el ahkuhtweyac wo kaclos ma fohlohkweni. El pahngon kuht oacna “ma sacohk usrnguck” Lal (Exodus 19:5; Psalm 135:4), ke “ma sacohk” Lal (Malachi 3:17; Doctrine and Covenants 101:3), ac ke sie “muhtuhn facl muhtahl” (Exodus 19:6; liye pac Deuteronomy 14:2; 26:18).

  14. Ke olwelah se na ma God el oraclah nuh sel Abraham ah, ke fahk, “Ke fihtac lom mwet nuhkwewa fin facluh ac fah ahkinsewowoyeyuck.” (3 Nephi 20:27). “Isuslac nuh ke olwelah” kalmac pa meet liki mwet sacn isuslac ah, pahpah ac ninac kiyacl sil tari lun tempuhl.

  15. Kain in olwelah ingacn lutiyuck sin God nuh sel Abraham: “Ac nuh sin mwet puhs ma eis Wosasuc se inge fah pahngpahng ke inek, ac fah oacwacyang nuh ke fihtac lom, ac fah tuyak ac ahkinsewowoye kom, oacna pahpah tuhmwaclos” (Abraham 2:10; liye pac Romans 8:14–17; Galatians 3:26–29).

  16. Kais sie mempucr suwohs kuh in ngihsre patriarchal blessing la. Ke kohkoh luhn Nguhn Muhtahl, patriarch se inge fahkwack lah tahk in sucu luhn sie mwet ke sucu lal Israel. Fahkwack kuh se inge tiac enenuh in ekuhllah, acn lal, muhtuhnfacl lal, kuh sucu na pwacye lal. Tuhsruhk, mwe fahkwack ke tahk sucu inge ahkkahlwemye lah sruf yac kac ke sucu lal Israel mwet se ingacn ac eis mwe insewowo lal kac uh.

  17. 2 Nephi 26:33.

  18. Liye Mosiah 15:7. In welah mwet Israel uh tiac mwe ahkmuhnahs se. In eis mwe insewowo nuhkwewa luhn God ma uliyuck nuh sel Abraham ac fihtac lal, kuht kuh in tuhpan pac in eis mwe insewowo oa inge, oacna “mwe srihke lal Abraham.” God Elac srihke kuht, oacna Mwet Pahluh Joseph Smith el luti, ke srihke insiacsr. (liye sramsram lal John Taylor ke Teachings of Presidents of the Church: Joseph Smith [2007], 231.)

  19. Liye Mosiah 3:19.

  20. Liye Luo Timothy 3:1–13.

  21. 1 Nephi 17:40; ahkuhtweyac wo ituckyang.

  22. Liye Doctrine and Covenants 98:37; liye pac Psalm 31:23; Isaiah 49:25; Doctrine and Covenants 105:14.

  23. Mormon 9:11.