Suk Kraist ke Nuhnak Nuhkwewa
Lain mwe sruhf uh el enenuh lusen moul in kampare ac luhlahlfongi. Tuhsruhk nuhnak muhnahs etuh lah Leum el ahkolah in kahsrwe kuht.
Ke on in kaksak lal, mwet se suc suhmuhslah Psalm sac fahk:
“O Leum, kom liyeyuc, ac etweyuc.
“Kom etuh ke monglac luhk ac ke tuhkahkwek luhk, kom asr yen loesloes kom kahlwem ke nuhnak luhk.
“Kom srihsrngiyac inkacnek luhk ac monglac luhk, ac kom etuh nohfohn ohiyac luhk.”1
Ke sohkahs se inge, mwet suhmuhslah Psalm el kaksakihn ohiyac muhtahl lal Jesus Christ ke el etuh ma nuhkwewa mweyen pwacyena lah el etuh ma nuhkwewa ke moul lasr uh.2 El etuh ma nuhkwewa ma fal nuh sesr ke moul se inge, ac Mwet in Molwelah el suli kuht in sokuhl ke nuhnak lasr nohfohn ac in fahsr tohkohl ke insiyacsr nohfohn.3 Ma se inge use nuh sesr olwelah se muh kuht kuh in fahsr ke Kahlwem Lal ac lah Kolyuhk Lal tulokihn mokleyuhk luhn ma lohsr ke moul lasr uh.4
Kuht fin e sokuhl Kraist ke nuhnkuh lasr pacl nuhkwewa ac ukwacl ke insiyacsr kwewa kuht enenuh in ekuhllah nuhnkwacsr ac luhngse lasr in oacna El.5 Ma suhmuhslah luhma ahksuhwohs se inge nuhke “tu na kuh ke Leum lasr.”6 Kalmeacn ma se inge pa kuht in kalweni na oruh lasr ke moul lasr uh in fahsr fal kuh ukwe wosasuc lal Kraist ac lohacng nuhke ma nuhkwewa ma wo ke lwen nuhkwewa.7 Pwacna pacl kuht kuh in ahkfahsryelah “mislac luhn God, suc ahluhkwelah kahlwem nuhkwewa” ac e fah “sruokyac na insiyacsr ac nuhnak lasr in an na in Jisus Kraist.”8 Mwet in Molwelah el sifacna fahk nuhsin elderske Alu uh ke Fepuacri 1831, “Karihngihn ma inge ke insiyom, ac lwelah ma muhtahl luhn ma pahtpaht in an na in nuhnak lom an.”9
Finne kuht sang kuhiyacsr in kalweni in suk Leum, nuhnak suhfal kuh in utyak nuhke nuhnak lasr uh. Ke kain nuhnak inge lwelah ac suliyuhk in oan na ke nuhnak lasr uh, nuhnak koluk inge kuh in ekkuhllah kena luhn insiyacsr ac kol kuht nuhke ma kuht el eklac nuhkac ke moul se inge ac e kais kuhtuh na kol kuht nuhke ma kuht e usrui ne tok ma pahtpaht.10 Elder Neal A. Maxwell tuh ahkuhtweyac sie pacl ke ip yohk se inge fahk, “Kena uh el oacyacpac fahkwack ma e sikyak, weacng pacna ma se oruh ‘pohs mwet pahng, tuh suhpohs mwet sollac.’”13
Mwet pahluh mahtuh ac mwet pahluh ingena uh kwacna ahkacsmakihye kuht in forlah liki mwe sruhf in kahingkihn wacngihnlac luhn nguhn ac fohswack, ac nuhnak kikiacp ke moul se inge.
Fin luhmweyuhk nuhke sie puhpuhlyuhk, sruhflah ke mwe sruhf uh el oacpacna ke e asr osra se sesr ac kuht fahsryang nuhke sie macknet. Kuh se luhn macknet se ma tiac liyeyuhk inge el pwacnlah ma osra ac sruokyac in kuh. Macknet se inge e wacngihnlac kuh lal nuhke ma osra se ingacn muhkwena fin ma osra se inge el utucklac ac fihliyucki oan loes liki. Pwacnwacng, oacpacna ke macknet se el wacngihn kuh la nuhke ma se ma an loes liki uh, ke kuht forlah liki mwe sruhf uh, eltahl wacngihnlac ac tuhlac kuh laltahl in kuhtanglah nuhnak lasr ac insiyacsr ac, pwacnwacng tiac kuh in kuhtanglah orekma lasr.
Luhmweyuhk se inge ahkacsmakinyeyuc ke sie ma muh mempuhr se ke alu uh el akacsruhi nuh sihk ke pacl fototo somlah ah. Mempuhr se inge fahk nuh sihk lah ke sie litutacng ma el nguhtwaclihk ah, nuhnak fohkfohk se suc ma el tiacna muhta nuhnkuh kac met utyak nuh in nuhnak lal ah. Finne nuhnak se inge oruh el lut, el sihlahklahk na mukwikwi nuhke ma se el asr kac inge, fahk nuh sel sifacna ac nuhke nuhnak se inge, “Muoh!” ac ahollah nuhke sie ma wo ah in ekuhllah nuhnak lal liki nuhnak tiac lwelah se inge. El fahk nuh sihk lah ke el ahsrosri sulaclah in pwacye lal, ma koluk, suc ma sifacna utyak nuh in nuhnak lal wacngihnlac na ke pacl se ingacn.
Ke Moroni el pahngon mwet ah in luhlahlfongi ke Kraist ac in auliyak, el fahk nuh selos in fahsr tukun Mwet in Molwelah ke insiyacltahl nohfohn, ac in eslah nohfohn ma fohkfohk luhkwelos. In weacng pac, Moroni el suli mwet inge in siyuhk sel God, ke nuhnak fokoko, tuh elos in tiac puhtatyang nuhke mwe sruhf.14 Orekmakihnyen ip yohk inge nuhke moul lasr uh el enenuh ma yohk liki na kuht in etuh muhkwena; enenuh kuht in ekuhllah nuhnak lasr ac insiyacsr in fal nuhke ip yohk inge. Eklac se inge el enenuh insacnweacng luhn mwet se ke lwen nuhkwewa ke pacl nuhkwewa, weacng pac luhlahlfongi nuhke Mwet in Molwelah, ke sripen nuhnak in mahno lasr uh e tiacna sifacna wacngihnlac. Lain mwe sruhf uh el enenuh lusen moul in kampare ac luhlahlfongi. Tuhsruhk nuhnak muhnahs etuh lah Leum el ahkolah in kahsrwe kuht ke ma kuht puhlakihn ac el olwelah mwe insewowo na wolacna fin kuht kampare neke sahflah.
Ke sie puhluhn pacl upac Ke Joseph Smith ac mwet weluhl sruhuh ke Liberty Jail wacngihn sukohsohk lalos ke oacna sie ma sahyacn na nuhnak lalos, Leum el sang kahs in kahsruh ac olwelah nuh selos ma som nuh sesr nohfohn:
“Lwelah insiyom in sesseslah ke luhngse nuh sin mukul nuhkwewa [ac muhtwacn], ac nuh sin lohm se suc luhlahlfongi, ac lwelah suwohswohs in ahkkahtoye nuhnak lom ac ke pacl nuhkwewa; na luhlahlfongi lom fah kapwack fokokoi ye muhtuhn God; …
Nguhn Muhtahl e fah wi kom pacl nuhkwewa, ac sikucl yuhnlac lom fah sikucl in suwohs ac pwacye.”13
Ke kuht oruh ohinge, nuhnak muhtahl e kalweni in oan ke nuhnak lasr uh ac kena suwohswohs e fah pwen kuht nuhke orekma suwohs.
Moroni el ahkacsmakihnye pac mwet lal in tiac lohlah ke nuhnak suhfal lalos.14 Kahs se inge nuhnak suhfal kalmac pa in ke na upac ac luhngse tiac wo ke ma se.15 El raunwelah kuhtwena nuhnak lohsr kuh kena koluk ma oruh sie mwet in lohacng na nuhke ma la sifacna kuh ma luhn facluh liki na in oruh wo,in kuhlwacng, ac in liyacacng masap luhn God. Wacna ahkkahlwemyeyuck ke puhla ke moul in ikoac luhn mwet se. Mwet Sap Paul el fahk kuhtuh sin puhla inge, pa nuhke “tiac nwacsnwacs, kuhpahtol, … sruhnga, … kasrkuhsrak, lokalok, … sok, … ac kuhtuh pac ma oacna ma inge.”16 Sahyacn ma koluk nuhkwewa luhn kena se inge, kuht tiacna kuh in muhlkuhnlah lah mwet lokalok lasr el orekmakihn ma se inge in sruhluhkihn kuhfwen mwe mweun se lal nuh sesr ke el srihfe kuht in oruh sie ma koluk ah.
Tamuhlwel ac tahmtahel sacohk wiyuhk, nga fahkwack lah fin kuht luhlahlfongi ke yot in moul ma pahtpaht, Mwet in Molwelah ke moul lasr, ac ukwe kahs in kahsruh lal Moroni, kuh lasr in kuh in kol nuhnak lasr uh el yohkyohkwelihk. Nga kuh in ahkpwacye kom lah kapwack ke nguhn e kapwack mohi, ekuhllah insiyacsr, ac oruh kuht in oacna Jisus Kraist. Weacng pac, mokleyuhk luhn Nguhn Muhtahl e yohk liki na met ah ac kalweni na in wi kuht ke moul lasr uh. Mwe sruhf lal Setuhn, e kais kuhtuhsrihk na, wacngihnlac kuh nuh facsr, pwacnwacng in engan ac suwohs moul lasr liki na met ah.
Nuh sin mwet suc, ke kuhtwena sripac, puhtatyang nuhke mwe sruhf ac muhta ke orekma sesuwohs, nga ahkpwacyei nuh sum lah asr innek in fohlohk, lah asr finsrak in Kraist. Ke yac ekahsr somlah ah, asr pacl wowo se luhk in muhtwacta wi mempuhr sacohk se ke Alu lal Jisus Kraist luhn Mwet Luhlahlfongi ke Lwen Sahflah suc puhlakihn pacl na upac ke moul lal tukun el orwaclah ma koluk na yohk se. Ke nga tuhfahna liyaclwack ah, nga kuh in liye ahsor ke muhtahl, weacng pac sie kahlwem in finsrak ke ngwetngwet lal ah. Ohiyacn ngwetngwet lal fahkwack inse puhsisacl ac insiyac eklac se. El sie mwet ma kampare in fahsr tohkohl Jisus ac el arulacna ahk insewowoyeyuhk yohk sel Leum. Tuhsruhktuh, el lwelah kihtin nuhnak suhfal se in utyak nuhke nuhnak lal ah, pwacnwacng orwaclah pac kuhtuh ma sahyac ah. Ke el kais kuhtuh na lwelah nuhnak suhfal inge in yohkyohkwelihk uh, nuhnak inge elos fulfuli ke nuhnak lal ac muhtwacwacack in kapwack loal lun insiyacl. Te paht na el orwaclah ma kena suhfal inge, suc pwacnuhl nuhke sulaclah lal in lain ma nuhkwewa ma sacohk ke moul lal. El fahk nuh sihk lah fin el tiacna lwelah nuhnak ispacl se ke tuhfahna utyak nuhke nuhnak lal ah, el ac tiac muhnahslac ac sruhflah ke mwe sruhf lal setuhn—mwe sruhf ma use ahsor luhlahp nuhke moul lal, finne ke sie puhluhn pacl ah.
Wo ohiyac, oacna ke wen prodigal se ke puhpuhlyuhk pwengpweng se ke wosasuc luhn Luke, “el acsmaklac” ac nguhtwaclihk liki mwemwe koluk sac. 17 El ahksasucyeack luhlahlfongi lal ke Leum ac puhla eklac pwacye ac asr kena in sifilpac fohlohk nuhke u luhn Leum. Lwen se ingacn kuht tuhkweni puhla luhngse in iwaclah lal Mwet in Molwelah nuh sesr. Ke sahflahiyacn muhtwacta fototo se lasr ah, kuht tuhkwena na sesseslah ke luhngse, ac nuhke lwen misenge uh, nga esam engan yohk an ke muhtahl ke el som liki ohfohs luhk ah.
Kawuhk sacohk luhk, ke kuht tiac lohacng ke mwe sruhf srihsrihk inge, suc kwacna tuhkuh nuhke moul lasr uh ma kuht tiac nuhnkuh muh e tuhkuh, fihsrwacsr kuht in kahingkihn ma koluk upac. Ke Prestuhn Spencer W. Kimball el fahk: “Sesasaclah mwet se in ilyang nuhke ma koluk na loal sahyacn el sruhflah ke mwe sruhf srihsrihk met, pwacnwacng ikuhslah sruhnguhl nuhke ma luhlahp se ingacn. … ‘Sie acn nwacsnwacs tiacna ingacng na mahmahuh.’”18
Ke el ahkoo in orwaclah orekma muhtahl kunwacl fin facluh, Mwet in Molwelah Jisuhs Kraist el ahkuhtweye yohk sripaciyacn kahkahsrihk na forlah liki ma nukwewa ma e kuh in ahkmuhnahsye kuht in tiac akihlen sripac ma pahtpaht lasr. Tukun Setuhn el srifacl tuh tena orwaclah, in pwacnuhllah liki ma kunwacl, Mwet in Molwelah lasr el fahk nuh sel; “Som liki yuc, Setuhn. … Na Devil el som luhkwel, ac, liye, lipufacn uh tuhkuh ac luti nuh sel.”19
Kom kuh in nuhnkuh, tamuhlwel ac tahmtahel wiyuhk, lah meac e sikyak fin kuht kuh in eslah kuh ac puhlaik liki Mwet in Molwelah lasr ac fahk “Muoh” ac “Som liki yuc” nuh sin nuhnak fohkfohk ma muhta ilyak nuh ke nuhnak lasr uh ke kais kuhtuh pacl? Meac e sikyak ke kena luhn insiyacsr? Ma kuht orwaclah uh e fuhkah oruh kuht in fototo nuh yurin Mwet in Molwelah ac lwelah kolyuhk luhn Nguhn Muhtahl in kalweni na in wi kuht ke moul lasr uh? Nga etuh lah fin kuht ukwe srihkasrak lal Jisus, kuht e kahingkihn ma upac puhkantwen ac mukwikwi koluk ma ekuh in oraclah elyah nuh sin sucu ac tiac insesei, puhla koluk, orwaclah sesuwohs ac ahkngal, kohslah ke ma koluk, ac ma nuhkwewa sahyac ma lain masap luhn Leum.
Ke sramsram lal ke Eprel ke yac inge, mwet pahluh sacohk lasr, Prestuhn Russell M. Nelson, el orwaclh sie olwelah lah mwet nuhkwewa ma luhngse in “lohngohl”—lohng Jisus Kraist—ac ahkos masap lal “e fah ahkinsewowoyeyuhk ke kuh yohk in lain mwe sruhf, ma upac, ac mwe muhahs” ac luhpan puhla engan lasr uh e yohkwelihk, finne ke pacl se ma fohs uh yohkwelihk pac.20
Nga fahkwack nuh sum lah olwelah ma utuckuh nuh sesr sin mwet pahluh sacohk lasr pa olwelah ma utuckuh sin Mwet in Molwelah sifacna. Nga suli kuht nohfohn in “lohngohl” ke nuhnak lasr kwewa ac fahsr tohkohl ke insiyacsr nohfohn in kuh in eis kuh ac puhlaik in fahk “Muoh” ac “Som likiyuh” nuhke ma nuhkwewa ma kuh in use suhpwacr nuhke moul lasr uh. Fin kuht oruh ma inge, nga olwelah nuh sum muh Leum elac fah suhpwacma Nguhn Muhtahl lal in ahkfokokoyekuht ac ahkwoyekuht, ac kuht kuh in eklac mwet oacna ke Luhngse luhn Leum.21
Nga fahkwack mwe lohoh luhk lah Jisus el moul ac in El, kuht kuh in kuhtanglah srikeyuhk lal setuhn ac kuh in moul ma pahtpaht wi Leum ac muhta ye muhtuhn Pahpah sacohklacna lasr Inkosrao. Nga fahkwack ma pwacye inge ke lungse luhk nuh sum nohfohn ac nuhke Mwet Molwelah wolacna lasr, suc ine nga sang wolacna nuh se, ahkfuhlwact,ac kaksak ma pahtpaht. Nga fahk ma inge ke inen muhtahl Jisus Kraist, amen.