Laga Dios Triunfá
Bo ta dispuesto pa laga Dios triunfá den bo bida? Bo ta dispuesto pa laga Dios ta e influensia di mas importante den bo bida?
Mi kerido rumannan, esta gradisí mi ta pa e mensahenan maravioso di e konferensia aki i pa mi privilegio pa papia ku boso awor.
Pa e mas di e 36 añanan ku mi ta un Apòstel, e doktrina di rekogementu di Israel a kapta mi atenshon.1 Tur kos tokante di dje a intrigá mi, inkluso e ministerionan i nòmbernan2 di Abraham, Isaak, i Jakob; nan bida i nan esposanan; e kombenio ku Dios a hasi ku nan i a ekstendé mediante di nan desendensia;3 e plamamentu di e diesdos tribunan; i e gran kantidat di profesianan tokante e rekogementu den nos tempu.
Mi a studia e rekogementu, a hasi orashon tokante di dje, i a alimentá riba kada skritura relashoná ku ne, i a pidi Señor pa oumentá mi komprendementu.
Purba imaginá [boso] mi alegria ora ku resientemente mi a wòrdu guiá pa un vishon nobo. Ku yudansa di dos erudito hebreo, mi a siña ku un di e nifikashonnan di e palabra Israel ta “laga Dios triunfá.”4 Asina ku,e nòmber mes di Israel ta referí na un persona ku ta dispuesto pa laga Dios triunfá den su bida. E konsepto aki ta inspirá mi alma!
E palabra dispuesto ta krusial na e interpretashon aki di Israel.5 Nos tur tin nos albedrio. Nos por skohe pa ta di Israel, òf no. Nos por skohe pa laga Dios triunfá den nos bida, òf no. Nos por skohe pa laga Dios ta e influensia di mas poderoso den nos bida, òf no.
Pa un momentu, laga nos kòrda un puntu krusial den e bida di Jakob, e ñetu di Abraham. Na e lugá ku Jakob a yama Peniel (ku ta nifiká “e kara di Dios”),6 Jakob a lucha ku un desafio serio. Su albedrio a wòrdu di tèst. Dor di e lucha aki, Jakob a proba kiko tabata mas importante pa e. El a demostrá ku e tabata dispuesto pa laga Dios triunfá den su bida. Komo kontesta, Dios a kambia Jakob su nòmber den Israel,7 ku ta nifiká “laga Dios triunfá.” Despues Dios a primintí Israel ku tur e bendishonnan ku a wòrdu pronunsiá riba Abraham su kabes lo a riba di dje tambe.8
Tristemente, Israel su posteridat a kibra nan kombenionan ku Dios. Nan a piedrá e profetanan i no tabata dispuesto pa laga Dios triunfá den nan bida. Despues, Dios a plama nan na e kuater skinanan di e mundu.9 Afortunadamente, el a primintí pa rekogé nan, manera skirbí pa Isaías: “Ta pa tempu kòrtiku numa Mi a bandoná bo [Israel]; pero ku gran mizerikòrdia lo mi rekogé boso.”10
Ku e definishon hebreo di Israel den mente, nos ta haña ku e rekogementu di Israel ta haña un nifikashon adishonal. Señor ta rekogiendo esnan ku ta dispuesto pa laga Dios triunfá den nan bida. Señor ta rekogiendo esnan ku ke skohe pa laga Dios ta e influensia di mas importante den nan bida.
Pa siglonan, profetanan a predesí e rekogementu aki,11 i e ta sosodiendo awor aki mes! Komo un preludio esensial na Segunda Benida di Señor, e ta e obra di mas importante den e mundu!
E rekogimentu promé ku milenio aki ta un saga individual di ekspandé fe i kurashi spiritual pa miónes di hende. I komo miembronan di E Iglesia di JesuCristu di e Santunan di e Delaster Dianan, òf “Israel di e kombenio di e delaster dianan,”12 nos a haña e tarea pa asisití Señor ku e obra fundamental aki.13
Ora nos ta papia di rekogementu di Israel na ámbos banda di e velo, nos ta referiendo, naturalmente, na obra mishonal, di tèmpel, i di historia familiar. Nos ta refiriendo tambe na edifiká fe i testimonio den e kurason di esnan ku kual nos ta biba, traha, i sirbi. Kada biaha ku nos hasi algu ku ta yuda un persona—na kualke banda di e velo—pa hasi i warda nan kombenionan ku Dios, nos ta yudando pa trese Israel huntu.
No muchu tempu pasá, e esposa di un di nos nietunan tabata luchando spiritualmente. Lo mi yamé “Jill.” Apesar di ayuno, orashon, i bendishonnan di saserdosio, Jill su tata tabata muriendo. E tabatin hopi miedu ku lo e pèrdè su tata i su testimonio.
Lat un anochi, mi kasá, Hermana Wendy Nelson, a konta mi di Jill su situashon. E mainta siguiente Wendy a sinti e impreshon pa kompartí ku Jill mi kontesta na su lucha spiritual tabata un palabra! E palabra tabata miópio.
Despues Jill a atmití na Wendy ku inisialmente e tabata kibrá pa mi kontesta. El a bisa, “Mi a spera pa Tawela primintí mi un milager pa mi tata. Mi a keda puntrando mi mes di kon e palabra miópio tabata esun ku el a sinti pa bisa.”
Despues ku Jill su tata a fayesé, e palabra miópio a keda bin na su mente. El a habri su kurason pa komprondé ainda mas profundo ku miópio kier men “ku ta mira di aserka so.” I su pensamentu a kuminsá kambia. Jill a bisa despues, “Miópio a pone mi stòp, pensa, i kura. Awor e palabra aki ta yena mi ku pas. E ta kòrda mi pa ekspandé mi perspektiva i buska kos eterno. E ta kòrda mi ku tin un plan divino i ku mi tata ta biba ainda i ta stima mi i ta sòru pa mi.. Miópio a guia mi na Dios.”
Mi ta masha orguyoso di nos presioso kasá di nos nietu. Durante di e tempu difísil den su bida, estimada Jill ta siñando pa brasa Dios Su boluntat pa su tata, ku un perspektiva eterno pa su mes bida. Dor di skohe pa laga Dios triunfá, e ta hañando pas.
Si nos pèrmitíe, tin hopi manera ku e intrepretashon hebreo aki di Israel por yuda nos. Imaginá kon nos orashonnan pa nos mishoneronan—i pa nos mes esfuersonan pa reuní Israel—por kambia ku e konsepto aki na mente. Hopi biaha nos ta pidi den orashon pa nos i e mishoneronan por wòrdu guiá na esnan ku ta prepará pa risibí e bèrdatnan di e evangelio restourá di JesuCristu. Mi ta puntra mi mes, na ken nos lo wòrdu guiá ora nos roga pa haña esnan ku ta dispuesto pa laga Dios triunfá den nan bida?
Nos lo por wòrdu guiá na algun ku nunka no kere den Dios òf JesuCristu pero ku awor ta anhelando pa siña tokante Nan i Nan plan di felisidat. Otronan por a “nase den e kombenio”14 pero for di e tempu ei a kita bai for di e kaminda di kombenio. Awor nan por ta kla pa arepentí, regresá, i laga Dios triunfá. Nos por asistí dor di risibí nan ku brasanan i kurason habrí. I na algun na kual nos por wòrdu guiá por a sinti semper ku tabatin un kos ku ta falta den nan bida. Nan tambe ta anhelando pa e plenitut i goso ku ta bini na esnan ku ta dispuesto pa laga Dios triunfá den nan bida.
E reda di evangelio pa rekogé Israel ku ta plamá ta masha grandi. Tin lugá pa kada persona ku ke aseptá e evangelio di JesuCristu. Kada konverso ta bira un di Dios su yunan di kombenio,15 sea pa nasementu òf pa adopshon. Kada un ta bira un heredero kompletu di tur lokual Dios a primintí na yunan fiel di Israel!16
Kada un di nos tin un potensial divino pasó kada un ta un yu di Dios. Kada un ta igual den Su bista. E implikashonnan di e bèrdat ta profundo. Rumannan, skucha koutelosamente loke mi ta bai bisa. Dios no ta stima un rasa mas ku e otro. Su doktrina riba e asuntu aki ta kla. E ta invitá tur pa bini na DjE, “pretu i blanku, katibu i liber, hòmber i muhé.”17
Mi ta sigurá boso ku boso posishon dilanti Dios no ta dependé dor di bo koló di bo kueru. Ta na grasia òf desgrasia diDios ta dependé di nos deboshon n Dios i no dor di di bo koló di bo kueru.
Mi ta lamentá ku nos rumannan pretu rònt mundu ta sufriendo e dolónan di rasismo i prehuisio. Awe mi ta hasi un yamada na nos miembronan tur kaminda pa guia e kaminda pa bandoná aktitutnan i akshonnan di prehuisio. Mi ta roga boso promové rèspèt pa tur Dios Su yunan.
E pregunta pa kada un di nos independientemente di rasa, ta meskos. Bo ta dispuesto pa laga Dios triunfá den bo bida? Bo ta dispuesto pa laga Dios ta e influensia di mas importante den bo bida. Lo bo pèrmití Su palabranan, Su mandamentunan, i Su kombenionan pa influensiá lokual bo ta hasi kada dia? Lo bo pèrmití Su stèm pa tuma prioridat riba tur otro? Bo ta dispuesto pa laga loke ku E tin mester pa bo hasi ta mas importante ku otro ambishon? Bo ta dispuesto pa bo boluntat wòrdu gulí den esun di DjE?18
Konsiderá kon tal disponibilidat por bendishoná bo. Si bo no ta kasá i ta buskando un kompañero eterno, bo deseo pa ta “ta di Israel” lo yuda bo disidí ken pa sali ku ne i kon.
Si bo ta kasá ku a kibra su kombenionan, bo disponibilidat pa laga Dios triunfá den bo bida lo pèrmití bo kombenionan ku Dios pa keda intakto. E Salbador lo sana bo kurason kibrá. E shelunan lo habri ora bo ta buska pa sa kon pa sigui dilanti. Bo no mester dwal rònt òf duda.
Si bo tin preguntanan sinsero tokante e evangelio òf e Iglesia, ora bo skohe pa laga Dios triunfá den bo bida lo bo haña i komprondé bèrdatnan apsoluto, i eterno ku lo guia bo bida i lo yuda bo keda firme riba e kaminda di konvenio.
Ora bo ta enfrentá tentashon—asta si e tentashon ta bini ora bo ta kabá òf ta sinti so òf komprondé robes—imaginá e kurashi ku bo por reuní ora bo skohe pa laga Dios triunfá den bo bida i segun bo ta roga na E pa duna bo forsa.
Ora bo deseo di mas grandi ta pa laga Dios triunfá, pa ta parti di Israel, asina tantu desishon lo bira mas fásil. Asina tantu problema ta stòp di ta problema! Bo sa mihó kon pa komplasé bo mes. Bo sa kiko pa wak i lesa, unda pa pasa bo tempu, i ku ken pa asosiá ku ne. Bo sa kiko bo ke logra. Bo konosé e tipo di persona ku bo ke bira realmente.
Awor, mi kerido rumannan, ta tuma tantu fe i kurashi pa laga Dios triunfá. Tin mester di trabou spiritual persistente, i riguroso pa arepentí i despohá e hòmber natural pa medio di e Ekspiashon di JesuCristu.19 Tin mester di esfuerso konstante, diario pa desaroyá kustumbernan personal pa studia e evangelio, pa siña mas tokante Tata Selestial i JesuCristu, i pa buska i respondé na revelashon personal.
Durante di e tempunan peligroso aki di kual e Apòstel Pablo a profetisá,20 Satanas ya no ta ni sikiera purba pa skonde su atakenan na Dios Su plan. Maldat enkurashá ta na abundansia. P‘esei, e úniko manera pa sobrebibí spiritualmente ta pa determiná pa laga Dios triunfá den nos bida, pa siña skucha Su stèm, i uza nos energia pa yuda rekogé Israel .
Awor, kon Señor ta sinti tokante e pueblo ku lo laga Dios triunfá? Nefi a resumié bon: “[Señor] stima esnan ku lo tin E pa ta nan Dios. Ata’ki, el a stima nos tatanan, i el a hasi kombenio ku nan,si, asta Abraham, Isaac, i Jacob; i el a kòrda e kombenionan ku el [a] hasi. ”21
I kiko Señor ta dispuesto pa hasi pa Israel? Señor a primintí ku E lo bringa nos batayanan, i nos yunan nan batayanan i nos yunan su yunan nan batayanan te di tres i di kuater generashon”!22
Miéntras bo ta studia e skrituranan durante e siguiente seis lunanan, mi ta kurashá bo pa traha un lista di tur lokual Señor a primintí ku E lo hasi pa Isael di kombenio. Mi ta pensa ku lo bo keda masha asombrá! Meditá riba e promesanan aki. Papia di nan ku bo famia i amigunan. Despues biba i wak pa e promesanan aki wòrdu kumplí den bo mes bida.
Mi kerido rumannan, ora boso skohe pa laga Dios triunfá den bosp bida, boso lo eksperensiá pa boso mes ku nos Dios ta “un Dios di milagernan.”23 Komo un pueblo, nos ta Su yunan di kombenio, i nos lo wòrdu yamá pa Su nòmber. Di esaki mi ta testifiká den e nòmber sagrado di JesuCristu, amèn.