Poder Duradero
Únikamente fe i e palabra di Dios ku ta yena e paden di nos alma ta sufisiente pa sostené nos—i ta permití nos di tin akseso na Su poder.
Repasando e enseñansanan di nos kerido profeta, Presidente Russell M. Nelson, mi a haña un palabra ku el a usa frekuentemente den diferente diskursonan. E palabra aki ta poder.
Den e promé konferensia general despues ku el a wòrdu sostené komo un Apòstel, Presidente Nelson a papia tokante poder.1 El a sigui siña tokante poder durante e añanan. For di momentu ku nos a sostené Presidente Nelson komo nos profeta, el a siña tokante e prinsipionan di poder—spesífikamente Dios Su poder—i kon nos por tin akseso na esaki. El a siña kon nos por konta ku e poder di Dios ora ku nos ta ministrá na otronan,2 kon arepentimentu ta invitá e poder di JesuCristu i Su Ekspiashon den nos bida,3 i kon saserdosio—e poder i outoridat di Dios—ta bendishoná tur ku hasi i mantené konbenionan ku nE.4 Presidente Nelson a testifiká ku e poder di Dios ta fluhi na tur ku ta investí den tèmpel si nan ta warda nan kombenionan.5
Mi a wòrdu konmové partikularmente dor di un desafio ku Presidente Nelson a presentá den e konferensia general di aprel 2020. El a instruí nos pa “studia i resa pa siña mas di e poder i konosementu ku kual bo a wòrdu investí—òf ku kual lo bo wòrdu investí.”6
Komo reakshon riba e desafio aki mi a studia i resa i mi a siña algun kos benefisioso tokante e poder i konosementu ku kual mi a wòrdu investí—òf ku kual lo mi tin ku wòrdu investí ainda.
No ta fásil pa komprondé e loke nos mester hasi pa haña akseso na e poder di Dios den nos bida pero ami a deskubrí ku e ta realisabel dor di studia esaki den nos mente i hasi orashon pa e Spiritu Santu por iluminá nos.7 Elder Richard G. Scott a duna un definishon kla di e poder di Dios: e ta e “poder pa hasi mas di loke nos mes por hasi riba nos mes.”8
Yenando nos kurason i hasta nos alma ku e palabra di Dios i e fundeshi di fe den JesuCristu ta krusial pa por hasi un apelashon riba e poder di Dios pa yuda nos den e tempunan difísil aki. Sin e palabra di Dios i un fe profundo di JesuCristu den nos kurason nos testimonionan i fe lo por faya i nos lo por pèrdè akseso na e poder ku Dios ke duna nos. Un fe superfisial no ta sufisiente. Únikamente fe i e palabra di Dios ku ta yena e paden di nos alma ta sufisiente pa sostené nos—i ta permití nos di tin akseso na Su poder.
Segun ku ruman Johnson i ami tabata lanta nos yunan nos a enkurashá kada un di nan pa siña toka un instrumento di músika. Pero nos a permití nos yunan haña lès di müzik solamente si nan hasi nan parti i práktika nan instrumento tur dia. Riba un djasabra, e yu muhé, Jaylinn tabata hopi eksitá pa bai hunga ku amigunan, pero ainda e no a hasi su práktika di piano. Sabiendo ku el a komprometé su mes pa práktika pa 30 minüt, el a intentá pa buta un taimer pasó e no ker a trein ni un minüt mas tantu ku tabata rekerí.
Segun ku e ta kanando ta bai na su piano el a kana pasa banda di e microwave el a para i primi algun boton. Pero enbes di buta e taimer el a programa e microwave pa kushina pa 30 minüt i primi rkònòpi di start. Despues di mas o ménos 20 minüt di práktika el a kana bai bek den kushina pa wak kuantu tempu mas a sobra i a haña e microwave na kandela.
Na e momentu ei el a kore bai den kura patras kaminda ami tabata trahando, gritando ku e kas tabata na kandela. Mi a kore drenta kas lihé i efektivamente mi a haña e microwave na kandela.
Den e esfuerso pa salbá nos kas di kima, mi yega tras di e microwave, deskonektá esaki i a usa e waya di koriente pa hisá e microwave na kamdela for di riba e tonbank. Sperando di ta e héroe i evitá un desaster riba e dia ei i tambe nos kas mi a zuai e microwave na kandela den un sirkulo ku e waya di koriente pa hala esaki for di mi kurpa, mi a bai patras den kura i atrobe zuai e microwave riba e yerba. Ei nos por a paga e flamnan ardiente ku un slan.
Kiko a bai robes? E microwave mester di algu pa apsorbé su energia i si no tin nada parti paden pa apsorbé e energia, e microwave mes ta apsorbé e energia, e lo kenta i por pega kandela i destruí su mes den flamnan i shinishi.9 Nos microwave kompletu tabata na kandela i a kima pasó no tabata tin nada parti paden.
Di e mesun manera, esnan ku tin fe i e palabra di Dios den profundidat di nan kurason lo por apsorbá i vense e kandela ardiente ku e atversario seguramente lo manda pa destruí nos.10 Di lo kontrario, nos fe, speransa i konvikshon lo no a dura i manera e microwave bashí nos por bira víktima.
Mi a siña ku [si mi] tin e palabra di Dios profundo den mi alma kombiná ku e fe den Señor JesuCristu i Su Ekspiashon lo pèrmití mi hasi uso di e poder di Dios pa vense e atversario i kualke otro kos ku e usa kontra mi. Ora ku nos ta enfrentá desafionan, nos por konfia den e promesa di Señor ku Pablo a siña: “Pasó Dios no a duna nos e spiritu di kobarfia; pero di poder, di amor i di sano huisio.”11
Nos sa ku na mucha e Salbador a krese i wòrdu fortalesé den spiritu, yena ku sabiduria: i e grasia di Dios tabata riba dje.”12 Nos sa ku segun e tabata krese, Jesus a oumentá den sabiduria i estatura, i den fabor ku Dios i hende.”13 I nos sa ku ora ku el a kuminsá Su ministerio, esnan ku a Skuch’E “tabata asombrá di su doktrina: pasó Su palabranan tabata tin poder.”14
Dor di e preparashon, e Salbador a krese den poder i por a resistí tur e tentashonnan di satanas.15 Si nos ta sigui e ehèmpel di e Salbador i prepará pa medio di estudio di e palabra di Dios i profundisá nos fe, nos por rekurí na e poder di Dios tambe pa resistí e tentashonnan.
Durante di e tempu aki kaminda tin restrinshon di enkuentronan kual ta hasi e asistensha regular na tèmpel imposibel, defakto mi a hasié un punto pa sigui studia i siña mas tokante e poder di Dios ku ta yega na nos ora ku nos hasi i warda kombenionan di tèmpel. Manera a wòrdu primintí den e orashon dedikatorio di e Tèmpel di Kirtland nos ta sali for di tèmpel harma ku e poder di Dios.16 No ta eksistí niun fecha di vensementu ku ta asosiá ku e poder ku Dios ta otorgá na esnan ku ta hasi i warda e kombenionan di tèmpel òf un restrikshon pa tin akseso na e poder aki durante e pandemia; Su poder ta disminuí den nos bida solamente si nos no ta kumpli ku nos kombenionan i no ta biba di un manera ku ta permití nos kalifiká kontinuamente pa risibí Su poder.
Miéntras mi kerida kasa i ami tabata sirbi komo lidernan di mishon na Tailandia, Laos i Myanmar nos tabata testigu personalmente di e poder di Dios ku ta yega na esnan ku ta hasi i warda kombenionan sagrado den tèmpel. E patrosinadó di Fondonan di Asistensha di Tèmpel a hasi posibel pa hopi Santunan den e paisnan aki por a asistí na e tèmpel despues di hasi tur posibel mediante sakrifisio i e preparashon personal. Mi ta kòrda di a konosé un grupo di 20 Santunan fiel di Laos na un aeropuerto di Bangkok, Tailandia, pa yuda nan bai un otro aeropuerto na Bangkok pa tuma nan buelo pa bai Hong Kong. E miembronan aki tabata yen di entusiasmo pa biaha finalmente pa e kas di Señor.
Ora ku nos a topa e bon Santunan aki despues ku nan a regresá, e madures di e Evangelio ku a wòrdu añadí i e poder asosiá ku e resultado di a risibí nan investidura den tèmpel i hasi kombenionan ku Dios tabata evidente. E Santunan aki a sali klaramente“harma ku [Su] poder for di tèmpel.”17 E poder pa hasi mas di loke nan mes tabata por a duna nan e forsa pa soportá e desafionan komo miembro di Iglesia den nan pais di orígen i pa sali hibando “notisianan sumamente grandioso, glorioso, di bèrdat,”18 miéntras ku nan ta sigui konstruí Dios su reino na Laos.
Durante e tempu ku nos no por a asistí na tèmpel nos a dependé di e kombenionan ku nos a hasi den tèmpel pa fiha un rumbo kla ku un direkshon direkto den nos bida? Si nos warda e kombenionan aki nan lo duna nos vishon i speransa relashoná ku futuro i un determinashon kla pa kualifiká pa risibí tur loke Señor a primintí abase fieldat.
Mi ta invitá bo pa buska e poder ku Dios ke duna bo. Mi ta testifika ku segun nos ta buska e poder, nos lo wòrdu bendishoná ku un komprondementu mas grandi di e amor ku nos Tata Selestial tin pa nos.
Mi ta testifika ku paso Tata Selestial ta stima abo i ami, El a manda Su Yu Stima, JesuCristu pa ta nos Salbador i Redentor. Mi ta testifika di JesuCristu, E ku tin tur poder,19 i ta hasié den e nòmber di JesuCristu, amèn.