Avansá den Fe

Pa Presidente Russell M. Nelson

Presidente di E Iglesia di JesuCristu di e Santunan di e Delaster Dianan

Mi ta bendishoná boso ku pas i fe kresiente den Señor

Mi rumannan stimá, segun nos ta yega na final di e konferensha históriko aki, nos ta ekspresá nos gratitut na Señor. E músika tabata sublime i e mensahenan inspirador.

Durante e konferensia aki, nos a eksperenshá hopi aspekto ku a destaká. Riba e aniversario bisentenario aki, nos a introdusí un proklamashon pa e mundu deklarando e realidat di e Restourashon di e evangelio di JesuCristu den su plenitut.

Nos a konmemorá e Restourashon ku e gritu di Hosanna,

Nos a revelá un símbolo nobo ku ta identifká nos fé den e Señor JesuCristu, i pa rekonosimentu visual di informashon i materialnan ofisial di Iglesia.

Nos a yama pa un dia global di ayuno i orashon,ku e pandemia presente por wòrdu kontrolá, dunadónan di kuido protehá, e ekonomia fortalesé, i bida normalisá. E ayuno aki lo wòrdu tene riba Bièrnè Santu, 10 di aprel, I ki gran Djabièrnè esei lo bira!

Otro siman djadumingu ta Pasku di Resurekshon, ora nos lo bolbe konmemorá e Ekspiashon i Resurekshon di nos Señor JesuCristu. Dor di Su Ekspiashon, Su don di resurekshon lo bini pa tur ku a yega di biba. I Su don di bida eterno lo bin na tur ku kalifiká dor di fidelidat na ordenansanan i kombenionan hasi den Su tèmpelnan sagrado.

E hopi komponentenan inspirá di konferensia general di aprel 2020 aki—i e siman sagrado ku nos ta bai drenta—por wòrdu resumí dor di dos palabra divinamente dekretá: “Skucha E.”¹ Nos ra resa ku boso ta enfoká riba Nos Tata Selestial, ku a papia e dos palabranan ei, i riba Su Yu Stimá, JesuCristu, lo permanesé den boso rekuerdo di tur loke a pasa. Nos ta resa ku boso por kuminsá di nobo pa di bèrdat skucha, tende di, i duna oido na e palabranan di e Salbador.² Mi ta primintí ku disminuishon di miedu i oumento di fe lo sigui.

Danki pa boso deseo pa hasi boso kasnan un santuario di fe, kaminda e Spiritu di Señor por permanesé. Nos kurikulo di estudio di evangelio, Ven, Siguen Me, lo sigui pa bendishoná boso bida. Boso esfuerso konsistente den e esfuerso aki—asta durante momentunan ei ora bo por sinti ku bo no ta eksitoso—lo kambia bo bida, esun di bo famia, i di hinter e mundu. Nos lo wòrdu fortalesé miéntras nos por bira disípulonan asta mas valiente di Señor, parando p’É i pa defend’É, na unda ku nos ta.

Awor, laga nos papia di tèmpel. Awor aki nos tin 168 tèmpel dediká rònt mundu. Otronan ta den varios fase di planifikashon i konstrukshon. Ora plannan wòrdu anunsia pa konstruí un tèmpel nobo, e ta bira parti di nos historia sagrado.

E por parse straño pa aunsiá tèmpelnan nobo ora tur nos tèmpelnan ta sera pa un tempu.

Mas ku un siglo pasá, Presidente Wilford Woodruff a premirá kondishonnan manera esunndi nos awe, manera registrá den su orashon dedikatorio di e tèmpel di Salt Lake, duná na 1893. Algun di boso por a mira eksraktonan di e orashon remarkabel aki, riba media sosial.

“Ora Bo pueblo lo no t in e oportunidat di drenta e kas sagrado aki … i nan ta oprimí i den problema, rondoná pa difikultat … i nan lo bira nan kara pa esaki, Bo kas sagrado i puntra Abo pa liberashon, pa ayudo, pa Bo poder por wòrdu ekstendé p naan, nos ta supliká Bo, pa wak abou for di Bo sagrado habitat den miseridordia … i skucha nan ruegonan. Òf ora e yunan di Bo pueblo, den aña ku ta bini, lo ta separá, dor di kualkier kousa, di e lugá aki, … i nan lo sklama na Bo di e profundidat di nan aflikshon i tristesa pa ekstende aliviio i liberashon na nan, nos ta supliká Bo humildememte pa… skucha nan gritu, i konsedé nan e bendishonnan ku nan ta pidi.”³

Rumannan, durante tempu di nos angustia ora tèmpelnan ta será, bo por ainda rekurí na e poder di [e] kombenionan di tèmpel i envestidura miéntras bo ta honra bo kombenionan. Por fabor usa e tempu ku tèmpelnan ta será pa sigui biba un bida digno di bai tèmpel, òf pa bira digno di bai tèmpel.

Papia di e tèmpel ku bo famia i amigunan. Dor ku JesuCristu ta e sentro di tur kos ku nos hasi den e tèmpel, miéntras bo ta pensa mas di e tèmpel lo bo ta pensando mas di Dje. Studia i resa pa siña mas di e poder i konosementu ku kual boso a wòrdu investí—òf ku kual boso lo wòrdu investí.

Awe nos tin e plaser di anunsiáplannan pa konstrukshon di ocho tèmpel den e siguiente lugánan: Bahía Blanca, Argentina; Tallahassee, Florida; Lubumbashi, Republika Demokrátiko di Congo; Pittsburgh, Pennsylvania; Benin City, Nigeria; Syracuse, Utah; Dubai, Emiratos Árabes Uní; i Shanghai, Pueblo su Republika di China.

Den tur ocho lugá, Iglesia su architektonan lo traha ku ofisialnan lokal pa asina e tèmpelnan lo harmonisá ku i lo ta un adishon bunita pa kada komunidat.

E plan pa un tèmpel na Dubai ta bin komo kontesta riba nan invitashon amabel, kual nos a gradisí a asptá.

E konteksto pa eplan di Shanghai ta hopi importante. Pa mas ku dos dekada, miembronan digno di bai tèmpel den e Pueblo su Republika di China a bishitá e tèmpel di Hong Kong, China. Pero na yüli 2019, e tèmpel ei a sera pa renobashon hopi tempu plania i hopi nesesario.

Na Shanghai, un lugá di reuní modesto di multipropósito lo proveé un manera pa e miembronan Chines pa sigui partisipá den ordenansanan di e tèmpel—den e Pueblo su Republika di China—pa nan i nan antepasadónan.⁴

Den kada pais, E Iglesia aki ta siñ su miembronan pa onra i obedesé, i sostené e lei.⁵ Nos ta siña e importansia di e famia, di ta bon mayornan i suidadano ehemplar. Pasó nos ta respetá e leinan i e legislashon di e Pueblo su Republika di China, e Iglesia no ta manda misioneronan pa proselitísmo einan; tampoko nos ta [bai] hasi esei awor.

Kongregashon di ekstranheronan i di Chines lo sigui reuní separá. E Iglesia su estado legal einan lo keda igual. Den e fase inisial di uso di fasilidat, e entrada lo ta solamente ku sita. E kas di Señor na Shabghai lo no ta un lagá de destinashon pa turista di otro pais.

E ocho tèmpelnan nobo lo bendishoná e bidanan di hopi hende na tur dos banda di e velo di morto. Tèmpelnan ta un parti kulminante di e Restourashon di e plenitut di e evangelio di JesuCristu Den Dios Su bondat i generosidat, E ta tresiendo e bendishonnan di e tèmpel mas serka di Su yunan tur kaminda.

Miéntras ku e Restourashon ta kontinua, mi sa ku Dios lo sigui revelá hopi kos grandi i importante ku ta pertenesé na Su reino aki na tera.⁶ E reino ei ta E Iglesia di JesuCristu di e Santunan di e Delaster Dianan.

Kerido rumannan, mi ta ekspresá mi amor pa bosonan. Durante e tempu aki di tenshon i inseguridat, i invokando e outoridat investí dden mi, mi ke konferí riba boso un bendishon apostóliko.

Mi ta bendishoná boso ku pas i fe kresiente den Señor.⁷

Mi ta bendishoná boso ku e deseo pa arepentí i perseverá i bira un tiki mas manera E kada dia ku pasa.⁸

Mi ta bendishoná boso pa sa ku e Profeta Jose Smith ta e profeta di e Restourashon di e evangelio di JesuCristu den su plenitut.

Si tin enfermedat entre boso òt entre boso sernan kerí mi ta laga mi bendishon di sanashon, konsistente ku e boluntat di Señor.

Mi ta bendishoná boso, añadiendo un biaha mas mi ekspreshon di amor pa kada unu di boso, den nòmber di JesuCristu, amèn.