Garantisando un Huisio Hustu

Pa Elder James R. Rasband

Di e Setentanan

Pa sigurá un huisio hustu,e Salbador Su sakrifisio ekspiatorio lo kita e malesa di ignoransia i e sumpiñanan doloroso kousá pa otronan.

E Buki di Mormon tasiñ e doktrina di Cristu

Òktober último, Presidente Russell M. Nelson a reta nos pa konsiderá kon nos bida lo ta diferente si nos “konosementu ku nos tin di e Buki di Mormon lo wòrdu kita diripiente.”¹ Mi a meditá riba e pregunta aki, manera mi tin sigur ku hopi di boso a hasi. Un pensamentu a bini kada biaha—sin e Buki di Mormon i su klaridat tokante e doktrina di Cristu i Su sakrifisio ekspiatorio, unda lo mi por buska pas?

E doktrina di Cristu—ku ta konsistí di e prinsipionan salbadó i ordenansanan di fe den Cristu, arepentimentu, boutismo, e don di e Spiritu Santu, i perseverá te na fin—ta wòrdu siñá hopi biaha den tur e skrituranan di e Restourashon pero ku poder partikular den e Buki di Mormon.² E doktrina ta kuminsá ku fe den Cristu, i kada un di su elementonan ta dependé riba e konfiansa den Su sakrifisio ekspiatorio.

Manera Presidente Nelson a siña, “E Buki di Mormon ta duna e komprendementu mas kompletu i outorisá di e ekspiashon di JesuCristu ku bo por haña na kualke lugá.”³ Mas nos komprondé tokante di e Salbador Su don supremo, mas nos lo yega na konosé, den nos mente i kurason,⁴ e realidat di e siguransa di Presidente Nelson ku “e bèrdatnan di e Buki di Mormon tin e poder pa kura, konsolá, restourá, sostené, fortalesé, i alegrá nos alma.”⁵

E Salbador Su Ekspiashon ta Satisfasé Tur e Eksigensianan di Hustisia

Un kontribushon vital i pasífiko di e Buki di Mormon pa nos komprondementu di e Ekspiashon di e Salbador ta su enseñansa ku Cristu Su sakrifisio miserikordioso ta kumpli ku tur e eksigensianan di hustisia. Manera Alma a splika: “Dios mes a ekspiá pa e pikánan di e mundu, pa realisá e plan di miserikòrdia, pa apasiguá e eksigensianan di hustisia, ku Dios por ta un Dios perfekto i hustu, i un Dios miserikordioso tambe.”⁶ E Tata Su plan di miserikòrdia⁷—loke e skrituranan ta yama tambe e plan di felisidat⁸ òf e plan di salbashon⁹— lo no por a wòrdu lográ a ménos ku tur e eksigensianan di hustisia wòrdu satisfasé.

Pero kiko eksaktamente ta e “eksigensianan di hustisia”? Konsiderá Alma su mes eksperensia. Kòrda ku, komo un hòmber yòn, Alma tabata bai rònt buskando “pa destruí e iglesia.”¹⁰ En realidat, Alma a bisa su yu Helaman ku el a wòrdu “tormentá ku e dolornan di fièrnu” pasû efektivamente el a “asesiná hopi di [Dios Su] yunan” dor di hiba “nan pa destrukshon.”¹¹

Alma a splika na Helaman ku pas a bini finalmente na dje ora su “mente a konsentrá” riba enseñansa di su tata “tokante e binida di… Jesucristu … pa ekspiá pa e pikánan di e mundu.” ¹² Un Alma arepentí a roga pa Cristu Su miserikòrdia¹³ i despues a sinti goso i alivio ora el a realisá ku Cristu a ekspiá pa su pikánan i a paga tur lokual hustisia ta eksigí. Atrobe, kiko hustisia lo a eksigí di Alma? Manera Alma mes a siña despues, “nada impuro no por heredá e reino di Dios.”¹⁴ Pues, un parti di Alma su alivio mester tabata ku, si miserikòrdia no intersedé, hustisia lo a prevení pa e regresá pa biba ku Tata Selestial.¹⁵

E Salbador ta Sana e Heridanan ku Nos [mes] no Por Sana

Pero e goso di Alma tabata enfoká únikamente riba e mes—den su evitá e kastigu i su poder pa regresá na e Tata? Nos sa ku Alma a agonisá tambe tokante ken el a alehá for di e bèrdat.¹⁶ Pero Alma mes no por a kura i restourá tur esunnan ku el a alehá. E no por a garantisá su mes ku nan lo haña un oportunidat honesto pa siña e doktrina di Cristu i pa wòrdu bendishoná pa biba su prinsipionan alegre. E no por a trese bèk esnan ku por a muri ainda siegá pa su enseñansa falsu.

Manera Presidente Boyd K. Packer a yega di siña: “E pensamentu ku a reskatá Alma … ta esaki: Restourá lokual bo no por restourá, sana e herida ku bo no por kura, drecha lokual bo a kibra i ku bo no por drecha ta eksaktamente e propósito di e ekspiashon di Cristu.”¹⁷ E bèrdat alegre riba kual Alma su mente “a konsentrá” no tabata solamente ku e mes por a wòrdu hasí limpi pero tambe ku esnan ku el a hasi daño por a wòrdu kurá i saná.

E Salbador ta Garantisá un Huisio Hustu

Añanan promé ku Alma a wòrdu reskatá dor di e doktrina trankilisadó aki, Rei Benjamin a siña e rumannan tokante e sanashon ofresé pa medio di e Salbador Su sakrifisio ekspiatorio. Rei Benjamin a deklará ku “bon nobo di gran goso” a wòrdu duná na dje “pa un angel di Dios.”¹⁸ Entre e gran alegria aki tabatin e bèrdat ku Cristu lo sufri i muri pa nos pikánan i erornan pa garantisá ku “un huisio hustu por bini riba e yunan di hende.”¹⁹

Kiko eksaktamente un “huisio hustu” ta rekerí? Den e siguiente versíkulo, Rei Benjamin a splika ku, pa garantisá un huisio hustu, e Salbador Su sanger a ekspiá “pa e pikánan di esnan ku a kai debí na e transgreshon di Adam, i pa esnan “ku a muri sin sa e boluntat di Dios tokante nan, òf ku a kometé piká den ignoransha.”²⁰ Un huisio hustu tambe tabata rekerí, el a siña, ku e “sanger di Cristu ta ekspiá” e pikánan di muchanan chikitu.²¹

E skrituranan aki ta siña un doktrina glorioso: e Salbador Susakrifisio ekspiatorio ta sana, komo un don grátis, esnan ku hasi piká den ignoransia—esnan na kual, manera Jakob a poné, “lei no a wòrdu duná.”²² Responsabilidat pa piká ta dependé di e lus ku a wòrdu duná na nos i ta dependé di nos kapasidat pa ehersé nos agensia.²³ Nos konosé e bèrdat sanadó i konsolador aki solamente dor di e Buki di Mormon i otro skritura di Restourashon.²⁴

Naturalmente, kaminda tin un lei duná, kaminda nos no ta ignorante di e boluntat di Dios, nos ta responsabel. Manera Rei Benjamin a enfatisá: “Ai di esun ku sa ku e ta rebeldiá kontra Dios! Pasó salbashon no ta yega na ningun asina, ku eksepshon si e ta dor di arepentimentu i fe den Señor JesuCristu.”²⁵

Esaki tambe ta bon notisia di e doktrina di Cristu. E Salbador no ta solamente sana i restourá esnan ku hasi piká den ignoransia pero tambe, pa esnan ku a hasi piká kontra di e lus, e Salbador ta ofresé sanashon ku e kondishon di arepentimentu i fe den Dje.²⁶

Alma mester a “konsiderá” tur dos bèrdatnan aki. Alma realmentelo por a sinti lokual el a deskribí komo “goso… ekskisito”²⁷ si el a pensa ku Cristu a salb’é pero a laga esnan ku el a alehá for di bèrdat dañá pa semper? Sigur ku no. Pa Alma por a sinti pas kompletu, esnan ku el a hasi daño tambe mester di e oportunidat pa bira kompletu atrobe.

Pero eksaktamente kon nan—òf esnan ku nos por a hasi daño—por bira kompletu atrobe? Ounke nos no ta komprondé e mekanismonan sagrado pa kual e sakrifisio ekspiatorio di e Salbador ta sana i restourá, nos si sa ku pa garantisá un huisio hustu, e Salbador lo kita e malesa di ignoransia i e sumpiñanan doloroso kousá pa otronan.²⁸ Ku esaki E ta sigurá ku tur yu di Dios lo haña e oportunidat, ku vishon kla, pa skohe pa sigui E i aseptá e gran plan di felisidat ²⁹

E Salbador Lo Drecha Tur ku Nos a Kibra

Ta e bèrdatnan aki lo a trese pas na Alma. I ta e bèrdatnan aki mester trese nos gran pas tambe. Komo hòmbernan i muhernan natural, nos lo dal, òf tin biaha pega ku otro i kousa daño. Manera kualke mayor por testifiká, e dolor asosiá ku nos erornan no ta simplemente e miedu pa nos propio kastigu pero e miedu ku nos a limitá goso di nos yunan òf di algun manera a stroba nan di mira i komprondé e bèrdat. E promesa glorioso di e Salbador Su sakrifisio ekspiatorio ta ku, loke ta konserní nos erornan komo mayornan, E ta np tené nos yunan kulpabel i ta primintí sanashon pa nan.³⁰ I hasta ora nan a kometé piká kontra di e lus—manera nos tur ta hasi—Su brasa di miserikòrdia ta ekstendé³¹i E lo redimí nan si nan ke mira na Dje i biba. ³²

Ounke e Salbador tin poder pa drecha lokual nos no por solushoná, E ta manda nos pa hasi tur lokual nos por pa hasi restitushon komo parti di nos arepentimentu.³³ Nos pikánan i erornan no solamente ta desplasá nos relashon ku Dios pero tambe nos relashon ku otronan. Tin biaha nos esfuersonan pa kura i restourá por ta mes simpel ku un diskulpa, pero otro biaha restitushon por tuma añanan di esfuerso humilde.³⁴ Sinembargo, pa hopi di nos pikánan i erornan, simplemente nos no ta kapas pa sana kompletamente esnan ku nos a heridá. E magnífiko promesa, di pas den e Buki di Mormon i e evangelio restourá ta ku e Salbador lo drecha tur lokual nos a kibra.³⁵ I E lo drecha nos tambe si nos bira na Dje den fe i arepentí di e daño ku nos a kousa.³⁶ E ta ofresé tur dos e regalonan pasó E ta stima nos ku amor perfekto³⁷i pasó E ta komprometé pa garantisá un huisio hustu ku ta honra hustisia i miserikòrdia. Mi ta testifiká ku esaki ta bèrdat den e nòmber di JesuCristu, amèn.