Kumplimentu di Profesia
E profesianan ku a wòrdu kumplí dor di e Restourashon di e plenitut di e evangelio di JesuCristu ta hopi.
Mi rumannan stimá, ta un honor pa mi papia na e konferensia general históriko aki konmemorando José Smith su Promé Vishon di Dios e Tata i Su Yu , JesuCristu, den lokual ta, sin duda, un Arboleda Sagrado. E vishon aki tabata un kuminsamentu magnífiko pa e Restourashon di e evangelio i tur kos ku a desplegá, for di e Buki di Mormon te ku e regreso di outoridat i yabinan di saserdosio, e organisashon di e Iglesia bèrdadero di Señor, tèmpelnan di Dios, i profetanan i apòstelnan ku ta guia e obra den e delaster dianan aki.
Pa diseño divino, profetanan antiguo di Dios, ora inspirá pa e Spiritu Santu, a profetisá di e Restourashon i loke tin ku bini den nos tempu, e último dispensashon i plenitut di tempu. E obra mes “a inspirá e almanan” di e videntenan antiguo.1 Durante generashonnan di tempu, nan a predesí, soña, haña vishon i a profetisá di e futuro di e reino di Dios na tera, lokual Isaias a yama “un obra maravioso i un milager.” 2
E profesianan ku a wòrdu kumplí ku e Restourashon di e plenitut di e evangelio di JesuCristu, inkluso E Iglesia di JesuCristu di e Santunan di e Delaster Dianan, ta hopi. Sinembargo, awe lo mi pasa riba solamente algun di mi faboritonan. Esakinan a wòrdu siñá na mi pa mi maestronan stimá di Primaria i riba rudia di mi mama angelikal.
Daniel, ku a defendé su mes di e leonnan dor di su fe den Señor JesuCristu i e intersepshon di angelnan sirbidó, tabata un ku a mira nos tempu den un vishon. Interpretando un soño pa Rei Nebukadnèsar di Babilonia, Daniel a profetisá ku Señor su Iglesia lo lanta den e delaster dianan manera un piedra chikí “kòrtá for di e seru sin man.”3 “Sin man,”ta nifiká mediante intervenshon divino, Señor Su Iglesia lo krese den magnitut te ora e yena henter e mundu “[pa] no wòrdu destruí nunka … [pero pa] para pa semper.”4
Ta un testimonio profundo ku Daniel su palabranan ta wòrdu kumplí miéntras miembronan di Iglesia for di tur parti mundu, ta mirando i skuchando e konferensia awe.
E deboto Apòstel Pedro a deskribí “tempu di restituí tur kos … for di kuminsamentu di e mundu.”5 E Apòstel Pablo a skibi ku den e plenitut di tempu, Dios lo “reuní … den un tur kos den Cristu,” 6 “Jesu Cristu siendo e mes e piedra angular prinsipal. 7 Mi a sinti e profesianan aki asina fuerte na partisipashon na e dedikashon di e Tèmpel di Roma Italia. Tur e profetanan i apòstelnan tabata aya dunando testimonio di Jesu Cristu, e Redentor di e mundu, manera Pedro i Pablo. E Iglesia ta un ehèmpel bibu di e restourashon aki, hermanonan i hermananan, i nos miembronan ta testigunan di e profesianan dibino aki hopi tempu pasá.
José di Egipto a profetisá ku den e delaster dianan: “Un vidente Señor mi Dios lo lanta, kende lo ta un vidente skohé pa mi desendientenan.” 8 “Pasó e lo hasi [Señor Su] obra.” 9 José Smith, e profeta di e Restourashon, tabata e vidente ei.
Juan e Reveladó a profetisá di un angel di e Todopoderoso tresiendo huntu elementonan importante di e Restourashon ku e palabranan aki: “ I mi a mira un otro angel ta bula meimei di shelu, kende tabatin un evangelio etèrno pa prediká na esnan ku ta biba riba tera, i na tur nashon i tribu i lenga i pueblo.”10 Moroni tabata e angel aki. El a mira nos tempu manera registrá den e Buki di Mormon. Den aparishonnan tras di otro, el a prepará José Smith pa su ministerio, inkluso e tradukshon di e Buki di Mormon: Un otro Tèstamènt di JesuCristu.
Otro profetanan a predesí nos tempu. Malakías a bisa ku Elías lo restourá “e kurason di e tatanan pa nan yunan, i kurason di e yunan pa nan tatanan, i e kurason di yunan na nan tatanan.”11 Elías a bini, i komo resultado, awendia, nos tin 168 tèmpel rònt mundu. Kada tèmpel ta sirbi miembronan digno ku ta hasi kombenionan sagrado i risibiendo ordenansanan bendishoná pa bienestar di nan mes i nan antepasadonan ku a fayesé. E obra sagrado aki deskribí pa Malakías ta “sentral den e plan di e Kreador pa destino eterno di Su yunan.”12
Nos ta biba den tempu profetisá; nos ta e pueblo enkargá ku anunsio di e di Dos Bidnida di Jesucristu; nos tin ku reuní e yunan di Dios, esunnan ku lo skucha i brasa e bèrdatnan, kombenionan, i promesanan di e evangelio eterno. Presidente Nelson ta yam’é “e mas gran desafio, e mas gran kousa, i e mas gran obra riba [e] mundu awendia.”13 Mi ta duna mi testimonio di esaki.
Riba enkargo di Presidente Russell M. Nelson, den februari di e aña aki, mi a dediká e Tèmpel di Durban Zùit Afrika. Tabata un dia ku lo mi rekordá henter mi bida. Tabata ku miembronan ku a bini na e evangelio manera Yeremías a profetisá hopi tempu pasá—“un di un suidat, i dos di un famia.” 14 E doktrina di Jesucristu ta uni nos tur—rònt mundu—komo yunan hòmber i yunan muher di Dios, komo rumannan den evangelio. Independientemente di kon nos aparensia ta òf kon nos ta bisti, nos ta un pueblo ku un Tata den Shelu ken su plan for di kuminsamentu tabata i ta pa Su famia ta reuní dor di hasi i warda kombenionan sagrado di tèmpel.
Na un reunion chikitu di poseedónan di saserdosio den skol na Kirtland, Ohio, na 1834, e Profeta José Smith a profetisá, “Ta solamente un man yen di Saserdosio boso ta mira aki awe nochi, pero e Iglesia aki lo yena Amérika nort i zùit—e lo yena e mundu.” 15
Den añanan resiente mi a biaha rònt mundu pa topa ku miembronan di e Iglesia. Mi Rumannan den e Quorum di e Diesdos tabatin asignashonnan similar. Tòg, ken por wanta e skema di nos profeta stimá, Presidente Nelson, ken su biahenan den su promé dos añanan komo Presidente di Iglesia a hib’é pa topa ku Santunan den 32 pais i teritorionan merikano”16 pa testifiká di e Cristu bibu.
Mi ta kòrda tempu mi a risibí mi yamamentu di mishonero komo un hòmber yòn. Mi ke a sirbi na Alemania, meskos ku mi tata, ruman hòmber, i sua. Sin warda pa kualke hende yega kas, mi a kore purá pa e buzon i a habri e karta. Mi a lesa ku mi a wòrdu yamá pa e Mishon di e Estadonan Ost, ku sede na suidat di New York. Mi tabata desapuntá, asina ku mi a drenta paden i a habri mi skrituranan pa konsuelo. Mi a kuminsá lesa den e Doctrina y Convenios: “Mira aki, mi tin hopi hende den e lugá aki, den e regionnan den besindario; i un porta efektivo lo wòrdu habrí den e regionnan den besindario di e teranan di ost aki.”17 E profesia aki, duná na e Profeta José Smith na 1833, tabata un revelashon pa ami. E ora ei mi a sa ku mi a wòrdu yamá na e mishon eksakto ku Señor tabata ke pa mi a sirbi aden. Mi a siña e Restourashon i su kuminsamentu dramátiko ora Tata na Shelu a papia ku José Smith i a bisa, “Esaki ta Mi Yu Stimá. Skucha E!”18
Di gran importansia pa henter Iglesia ta e profesia di Isaías, mas ku 700 aña promé ku e nasementu di JesuCristu: “Lo yega un tempu den e delaster dianan, ku e seru di Señor su kas lo wòrdu establesé den e tòp di e serunan, … i tur nashon lo basha bai ei.”19
Awe den mi mente, mi ta imaginá miónes di nos miembronan i amigunan konektá na e prosedimentunan aki elektronikamente via televishon, Internet, òf otro medionan. Nos ta sinta manera ku nos ta huntu “den tòp di e serunan.”20 Tabata Brigham Young ku a bisa e palabranan profétiko aki “Esaki ta e lugá korekto.”21 E Santunan, algun di nan mi propio antepasadonan, a traha pa establesé Sion den e Rocky Mountains “pa medio di e boluntat i plaser di esun ku ta dirigí e nashonnan di e tera.”22
Awe mi ta para riba e tereno sagrado ku a atraé miónes di bishitante. Na 2002, Salt Lake City tabata e sede di Weganan Olímpiko di Invierno. E Koro di Tabernakulo a kanta na e seremonia di apertura, i Iglesia a ofresé konsiertonan i programanan pa huéspetnan i partisipantenan for di hopi, hopi nashon. Semper lo mi kòrda di a mira e tèmpel den e background di e transmishon di notisia mundialmente.
Durante e añanan, presidentenan di Estádos Unídos, reinan, huesnan, promé ministernan, embahadornan, i ofisialnan for di hopi pais a bini Salt Lake City i a enkontrá ku nos lidernan. Presidente Nelson tabata anfitrion di e lidernan di e Asosiashon Nashonal pa e Avanse di Personanan di Koló, un organisashon di Estádos Unídos komprometé pa igualdat di derechi sin deskriminashon basá riba rasa. Mi ta kòrda pará skouder ku skouder ku e amigunan i lidernan aki ora Presidente Nelson a uní na nan apelando pa un sivismo mas grandi i harmonia rasial den e mundu.23
Hopi mas lider a bini na Temple Square i nan a reuní den konseho ku lidernan di Iglesia. Por ehèmpel ,aña pasá, djis pa nombra algun, nos a duna bon biní na e di 68 konferensia di Sosiedat Sivil di e Nashonnan Uní, un reunion global i e promé di su tipo pafó di suidat di New York. Nos a reuní ku e Komité di Asuntunan Religioso di Vietnam i embahadornan di Cuba, Filipinas, Argentina, Rumania, Sudán, Qatar, y Arabia Saudita. Nos a yama bon biní tambe na e sekretario general di Liga Mundial Musulman.
Lokual mi ta deskribiendo ta e kumplimentu di e profesia di Isaías ku den e delaster dianan, nashonnan lo basha bai “na e seru di Señor Su kas.”24 E gran Tèmpel di Salt Lake ta para den e sentro di e mahestat i gloria aki.
No ta e paisahe ta atraé hende, ounke nos senario ta magnífiko; ta e esensia di religion puru ekshibí den spiritu, kresementu, bondat, i generosidat di E Iglesia di JesuCristu di e Santunan di e Delaster Dianan i su pueblo; nos amor manera Dios Su amor i nos kompromiso na un kousa mas haltu, loke José Smith a yama, “e kousa di Cristu.”25
Nos no sa ki dia e Salbador lo regresá, pero esaki nos sa. Nos mester ta prepará den kurason i mente, digno pa risibié, i sinti honor di ta parti di tur ku a wòrdu profetisá asina hopi tempu pasá.
Mi ta testifiká ku Presidente Russell M. Nelson ta profeta di Señor na tera, i na su banda tin Apòstelnan yamá pa Dios, sostené komo profetanan, videntenan, i reveladornan. I, mi hermanonan i hermananan stimá, e Restourashon ta sigui.
Mi ta finalisá ku e profesia di José Smith, palabranan ku mi ta testifiká ta bèrdat.E la bisa: “E Stándart di Bèrdat a wòrdu halsa; ningun man no permití no por stòp e obra di progresá; por tin persekushon, gruponan maligno por kombiná, sòldatnan por uni, kalumnia por difamá, pero e bèrdat di Dios lo sigui pa dilanti grandemente, noblemente, i independientemente, te ora e penetrá kada kontinente, bishita tur klima, pasa dor di kada pais, i zona den kada orea, te ora e propósito di Dios lo wòrdu kumpli, i e Gran Yehova bisa ku e obra ta kumpli.”26 Mi ta testifiká ku e profesianan di José Smith ta wòrdu kumplí.
Mi ta primintí ku ora boso sigui e konseho inspirá di nos profeta stimá, Presidente Russell M. Nelson, su konseheronan, e Apòstelnan, i otro lidernan di Iglesia, i ku boso pone atenshon na e profetanan antiguo ku a predesí nos dia, boso lo wòrdu yená, profundo den boso kurason i alma, ku e spiritu i e obra di e Restourashon. Mi ta primintí ku boso lo mira e man di Dios den boso bida, lo skucha Su inspirashonnan, i lo sinti Su amor. Den e nòmber di JesuCristu, ku gratitut pa e Restourashon di Su evangelio i Su Iglesia, den evidensia di Su amor inkomparabel, amèn.