E Saserdosio Melkisedek i e Yabinan
Den e iglesia e outoridat di e saserodio mayor, e Saserdosio ta wòrdu ehersé bou di e direkshon di un lider di saserdosio ku tin e yabinan di e saserdosio.
Mi a skohe pa papia mas tokante di e saserdosio di Dios, e tópiko tratá kaba dor di tres diskursante ku a siña nos tokante kon e saserdosio ta bendishona e bidanan di hende muhé, mujeres jovenes i hombres jovenes.
E saserdosio ta un poder divino i outoridat poseé den konfiansa i usá pa Dios Su obra pa e benefisio di tur Su yunan. Saserdosio no ta esnan ku a wòrdu ordená den un ofisio di saserdosio òf esnan ku ta ehersé su outoridat. Hòmbernan ku tin e saserdosio no ta e saserdosio. Nos no mester referí na hòmbernan ordená komo e saserdosio, ta apropiá pa referí nan komo poseedor di e saserdosio.
E poder di e saserodio ta eksistí tantu den e Iglesia komo de e organisashon familiar. Pero e poder di saserdosio i e outoridat di saserdosio ta funshoná diferente den e Iglesia ku nan ta den e famia. Tur esaki ta di akuerdo ku e prinsipionan ku Señor a establesé. E propósito di Dios Su plan ta di guia Su yunan na bida eterno. Famianan mortal ta esensial den e plan ei. E Iglesia ta eksistí pa proveé e doktrina, e outoridat, i e ordenansa nesesario pa perpetua relashonnan familiar den eternidat. Pues, e organisashon familiar i e Iglesia di JesuCristo tin un relashon pa reforsá mutuamente. E bendishonnan di e saserdosio—manera e plenitut di e evangelio i e ordenansa manera boutismo, konfirmashon, i risibí e don di e Spiritu Santu, e investidura di tèmpel, i matrimonio eterno—ta disponibel pa e hende hòmber i hende muhé.1
E saserdosio ku nos ta papia di dje ta e Saserdosio Melkisedek, restourá na komienso di e Restourashon di e evangelio. José Smith i Oliverio Cowdery a wòrdu ordená dor di Pedro, Santiago, i Juan, ku a deklará nan mes “ku nan ta poseé e yabinan di e reino, i di e dispensashon di e plenitut di tempu”(Doctrina y Convenios 128:20). E Apòstelnan senior aki a risibí e outoridat for di e Salbador Mes. Tur otro outoridat òf ofisio den e saserdosio ta mará na e Saserdosio Melkisedek (wakDoctrina y Convenios 107:5), pasó e “tin e derechi di presidensia, i tin e poder i outoridat riba tur e ofisionan den e Iglesia den tur époka di mundu” (Doctrina y Convenios 107:8).
Den e iglesia e outoridat di e saserodio mayor, e Saserdosio Melkisedek, i esun menor, e Saserdosio Aaróniko ta wòrdu ehersé bou di e direkshon di un lider di saserdosio, manera un obispu, òf presidente, ku tin e yabinan di e saserdosio. Pa komprondé e ehersisio di outoridat di saserdosio den e Iglesia, nos mester komprondé e prinsipio di yabinan di saserdosio.
E yabinan di Saserdosio Melkisedek di e reino a wòrdu konferí dor di Pedro, Santiago, i Juan, pero esei no a kompletá e restourashon di e yabinan di saserdosio. Algun yabi di e saserdosio a bin despues. Siguiendo e dedikashon di e promé tèmpel di e dispensashon na Kirtland, Ohio, tres profeta—Moises, Elías, i Elia—a restoura “e yabinan di e dispensashon,” inkluyendo yabinan pertenesiente na e rekogimentu di Israel i e obra di tèmpel di Señor (wak Doctrina y Convenios 110), manera Presidente Eyring a kaba dt deskribí asina persuasivo.
E ehèmpel mas familiar di e funshon di e yabinan ta den ehersementu di e ordenansanan di saserdosio. Un ordenansa ta un akto solèm signifikando hasi kombenio i e promesa di bendishonnan. Den e Iglesia tur ordenansa ta wòrdu hasí bou di e outorisashon di e lider di saserdosio ku tin e yabinan pa e ordenansa ei.
Un ordenansa ta ofisialisá mas komun dor di hendenan ku a wòrdu ordena na un ofisio den e saserdosio aktuando bou di e direkshon di unu ku tin e yabinan di saserdosio. Por ehèmpel, e poseedornan di varios ofisio di e Saserdosio Aroniko ta ofisiá den e ordenansa di sakramento bou di e yabi i direkshon di e obispu, ku tin e yabi di e Saserdosio Aaróniko. E mesun prinsipio ei ta aplika na e ordenansanan di saserdosio den kua hende muhé ta ofisia den tèmpel. Ounke hende muhé no ta poseé un ofisio den e saserdosio, nan ta realisa ordenansanan sagrado di tèmpel bou di e outorisashon di e presidente di tèmpel, ken tin e yabinan di e ordenansanan di tèmpel.
Un otro ehèmpel di outoridat di saserdosio bou di e direkshon di un ku tin e yabinan ta e enseñansanan di hòmber i muhé yamá pa siña e evangelio, sea den klasnan den nan propio bario òf den e kampo misional. Otro ehèmpelnan ta e otronan ku tin posishon di liderazgo den e bario i ta ehersé e outoridat di saserdosio den nan liderazgo pa medio di nan yamamentu ku nan a wòrdu aparta p’e i bou di e direkshon di e lider di saserdosio ku tin e yabinan den e bario òf e estaka. Asina aki e outoridat i poder di e saserdosio ta wòrdu ehersé i disfrutá den E Iglesia di JesuCristo di e Santunan di e Delaster Dianan.2
Outoridat di saserdosio tambe ta wòrdu ehersé i su bendishonnan realisá den famianan di Santunan di e Delaster Dianan. Ku famia mi kermen un hòmber poseédo di saserdosio i un muhé ku ta kasa i nan yunan. Tambe mi ta inkluí e variashonnan for di e realshon ideal manera kousá pa morto òf divorsio.
E prinsipio di e outoridat di saserdosio por wòrdu ehersé solamente bou di e direkshon di un ku tin e yabinan pa e funshon ta fundamental den e Iglesia, pero e no ta aplika den e famia. Por ehèmpel, un tata ta presidí i ehersé e saserdosio den su famia pa medio di e outoridat di e saserdosio ku e tin. E no tin nesesidat di tin e direkshon òf aprobashon di un ku tin e yabinan di saserdosio pa por realisá vários funshon familiar. Esakinan ta inkluí konsehá e miembronan di famia, tene reunionan familiar, duna bendishon di saserdosio na su ái yunan, òf duna un bendishon na famia òf otronan.3 Outoridatnan di Iglesia ta siña miembronan di famia pero no ta ehersé e outoridat di saserdosio den e famia.
E mesun prinsipio ta apliká ora un tata ta ousente i e mama ta e lider di famia. E ta presidí den su hogar i ta instrumental den trese e poder i bendishon di e saserdosio den su famia pa medio di su investidura i seyamentu den e tèmpel. Maske e no ta outorisá pa duna bendishonnan di saserdosio ku por wòrdu duná solamente pa un persona ku ta poseé sierto ofisio den e saserdosio, e por realisá tur e otro funshonnan di liderazgo familiar. Hasiendo esaki, e por ehersé e poder di e saserdosio pa e benefisio di su yunan riba kua e ta presidí den su posishon di liderazgo den e famia.4
Si tatanan ta magnifiká nan saserdosio den nan propio famia, e lo yuda e mishon di e Iglesia mas ku kualke otro kos ku nan por hasi. Tatanan ku ta poseé e Saserdosio Melkisedek mester ehersé nan outoridat “pa medio di persuashon, longanimidat, pa medio di mansedumbre, humildat, i pa medio do amor sin fingi” (Doctrina i Convenios 121:41). E estandarte haltu aki pa ehersé tur e outoridat di saserdosio ta hopi importante den e famia. Poseédonan di e saserdosio mester tambe warda e mandamentunan asina nan por tin e poder di e saserdosio pa duna bendishonnan na nan miembronan di famia. Nan mester kultiva relashonnan familiar amoroso asina nan miembronan di famia ke pidi nan pa e bendishonnan ei. I mayornan mester enkurashá mas bendishonnan di saserdosio den e famia.5
Den e konferensianan aki, nos ta buska un eskondite kortiko for di nos preokupashonnan mortal ku e pandemia devastador, nos a wòrdu siñá prinsipionan grandi di eternidat . Mi ta enkurashá kada un di nos pa por tin nos wowo “konsentrá” pa por risibí e bèrdatnan di eternidat p’asina nos kurpa “por ta yená ku lus” (3 Nefi13:22)
Den Su sermon na e multitut registrá den e Bèibel i den e Buki di Mormon, e Salbador a siña ku kurpanan mortal por ta yená ku lus òf yená ku skuridat. Nos, dimes, ke ta yená ku lus, i nos Salbador a siña nos ku nos por laga esaki sosodé. Nos mester skucha na e mensahenan tokante e bèrdatnan di eternidat. E la usa e ehèmpel di nos wowonan, dor di kua nos ta tuma lus den nos kurpa. Si nos “wowo a konsentrá”—ku otro palabra, si nos ta konsentrá den risibí lus eterno i entendimentu—E ta splika ku, “henter bo kurpa lo ta yená ku lus” (Mateo 6:22; 3 Nefi 13:22). Pero si bo “wowo tin maldat”—esei ta, si nos buska maldat i tuma esei den nos kurpa—E ta atvertí, “hinter bo kurpa lo ta yená ku skuridat”(versíkulo 23). Den otro palabra, e lus òf skuridat den nos kurpa ta dependé riba kon nos ta mira—òf persibí— e bèrdatnan eterno ku nos ta wòrdu siñá.
Nos mester sigui e invitashon di e Salbador pa buska i puntra pa komprondé e bèrdatnan di eternidat. E ta primintí ku nos Tata den Shelu ta deseoso pa siña nos tur e bèrdatnan ku nan ta buskando.(wak 3 Nefi 14:8). Si nos ta deseá esaki i tin nos wowo konsentrá pa risibí, e Salbador ta primintí ku e bèrdatnan di eternidat “lo wòrdu habrí” pa nos (wak 3 Nefi 14:7-8).
Den kontraste, Satanas ta ansioso pa konfundí nos pensamentu òf pa hiba nos den pèrdida riba asuntunan importante manera e operashon di e saserdosio di Dios. E Salbador a atvertí di e tipo di “profetanan falsu, ku ta bin den paña di lamchi, pero paden nan ta lobonan feros” (3 Nefi 14:15). E la duna nos e tèst pa yuda nos skohe den e bèrdat for di entre e diferente enseñansanan ku por konfundi nos: “Lo bo konosenan pa medio di nan fruta,” E la siña (3 Nefi 14:16). “Un bon palu no por trese fruta malu, ni tampoko un palu korupto [por] trese bon fruta” (versikulo 18). P’esei, nos mester buska e resultadonan—“e frutanan”—di prinsipio ku nos ta wòrdu siñá i e personanan ku ta siña nan. Esei ta e mihó kontesta na hopi di e opheshonnan ku nos ta skucha kontra di Iglesia i su doktrina i pólisanan di liderazgo. Sigui e tèst ku e Salbador a siña nos. Buska e fruta—e resultado.
Ora nos pensa riba frutanan di e evangelio di e Iglesia di JesuCristu restourá, nos ta regosihá den kon e Iglesia, den e epokanan di e miembronan bibiente, a ekspandé for di kongregashonnan lokal den e Montañanan di wèst te kaminda e mayoria di e 16 mión miembronan ta biba pa nashonnan otro di Estádos Unídos. Ku e kresementu aki, nos a sinti oumentonan den e Iglesia su kapasidat pa asistí su miembronan. Nos ta asistí den warda e mandamentunan, den kumpli ku responsabilidatnan pa predika e evangelio restourá, den kongregá Israel, i den konstruí tèmpelnan rònt mundu.
Nos ta wòrdu guiá pa un profeta, Presidente Russel M. Nelson, ken su liderazgo Señor a usa pa logra e progreso ku nos a sinti durante mas ku e dos añanan di su liderazgo. Awor nos ta bendishoná pa skucha di Presidente Nelson, ku lo siña nos kon pa sigui progresá den nos Iglesia di Jesucristo restourá den e tempunan difísil aki.
Mi ta testifiká di e bèrdatnan aki i uni ku boso den orashon pa nos profeta di kua nos lo bai skucha un djis, den nòmber di JesuCristu, amèn.