E Benida di e Buki di Mormon
E echonan históriko i e testigunan speshal di e Buki di Mormon ta testifiká ku su benida di bèrdat tabata miralagroso.
Durante di un reunion huntu ku e eldernan di Iglesia, e profeta José Smith a deklará: “Si bo kita e Buki di Mormon i revelashon, e ora ei unda nos religion ta keda? Nos lo no tin nada. ”1 Mi rumannan stimá, despues die Promé Vishon, e benida milagroso di e Buki di Mormon ta e di dos evento importante fundamental di e restourashon di e evangelio di JesuCristu den e dispensashon aki. E Buki di Mormon ta testifika di Dios Su amor pa Su yunan i di Señor JesuCristu Su sakrifisio ekspiatorio divino i Su ministerio úniko entre di e Nefitanan djis despues di Su Resurekshon.2 Tambe e ta testifika ku e sobrá di e kas di Israèl tin ku bin úni dor di Su obra den e delaster dianan i no lo ta nan benta afó pa semper.3
Ora nos studia e benida di e santu buki di skritura aki den e delaster dianan nos ta realisá nos mes ku henter e obra tabata miralagroso—for di e profeta José Smith a risibiendo e planchanan di oro dor di un santu angel te na su tradukshon “di e don i poder di Dios,”4 su preservashon, i publikashon dor di man di Señor.
E benida di e Buki di Mormon a kuminsa hopi tempu promé ku José Smith a risibi e planchanan di ora serka e angel Moroni. Profetanan antiguo a profetisá di benida di e buki sagrado aki den nos tempu.5 Isaías a papia di e buki seyá, ku ora ku e lo aparesé, lo hasi ku hende lo bin lucha kontra Dios Su palabra. E sirkunstansha aki lo proveé e konteksto den kual Dios por a ehekutá su “obra maravioso i prodigio”, kousando ku e “sabiduria di nan sabionan [lo] peresé i e konosementu di esnan inteligente [lo] wòrdu skondé”, miéntras ku e mansunan lo “ekspandé nan goso den Señor i pobernan entre hende lo regosiha den e Esun sagrado di Israèl.”6 Ezekiel a papia tokante e palu di Judá (e Beibel) i e palu di Efraín (e Buki di Mormon) ku ta bini huntu pa bira unu. Ezekiel (den e testamènt bieu) i Lehi (den e Buki di Mormon) tur dos a indiká ku nan lo “bini huntu” pa konfrontá doktrina falsu, pa establisá pas i trese konosimentu di e kombenionan serka nos.7
Den e anochi di 21 di Sèptèmber 1823, tres aña i mei despues di e eksperensha di e Promé Vishon, José a wòrdu bishitá tres biaha dor di e angel Moroni, e lastu profeta di e Nefitanan di Amerika anitguo, komo resultado di un orashon sinsero. Durante di nan bishita ku a dura henter anochi, Moroni a bisa José ku Dios tin un obra maravioso pa e logra—e tradukshon i publikashon den henter mundu di e palabranan di profetanan antiguo inspirá, na e kontinente di Amerika.8 E sigiente día, José a bai na e lugá, no muchu leu for di su kas, kaminda e planchanan tabata derá dor di Moroni na final di su bida, siglonan anterior. Einan, José a mira Moroni atrobe, ku a instruí e pa prepará su mes pa risibi e planchanan den fururo.
Durante di e próksímo kuater aña, riba 22 di sèptember di kada aña, José a risibí instrukshonnan adishonal di Moroni ku ta konserní e konosementu di kon Señor Su reino lo tin ku wòrdu goberná den e delaster díanan. José su preparashon tambe a inkluí bishitanan di angelnan di Dios, asina laga sali na kla e mahestat i gloria di e susesonan ku lo tuma lugá den e dispensashon aki.9
Su matrimonio ku Emma Hale den 1827 tabata parti di e preparashon ei. El a hunga un ròl importante den yuda e profeta durante su bida i ministerio. En realidat, den sèptember di 1827, ta Emma a kompañá José bai na e seru, kaminda e planchanan tabata skondi, i a warda riba dje ora ku e angel Moroni a entregá e planchanan den José su man. José a risibi e promesa ku e planchanan lo wòrdu preservá si e lo dediká tur su esfuerso pa tene nan sigur te ora ku nan lo mester bai bèk den e mannan di Moroni.10
Mi kompañeronan stimá den evangelio, hopi di e diskubrimentunan di kosnan antiguo ta sosodé durante di eskabashon arkeológiko òf hasta inesperá durante di proyektonan di konstrukshon. José Smith, sinembargo a wòrdu dirigí pa yega na e planchanan dor di un angel. Esei so riba su mes kaba tabata un milager.
E proseso di tradukshon di e Buki di Mormon tambe tabata un milager. E dokumentu antiguo sagrado aki no a wòrdu “tradusí” na un manera tradishonal manera sientífikonan lo a tradusí tekstonan antiguo dor di siña e ifioma. Nos tin ku wak e proseso mas manera un “revelashon” ku yudansa di instrumentunan físiko proveé pa Señor i no manera un “tradukshon” dor di un hende ku konosimentu di idioma. José Smith a deklará ku ta dor di e poder di Dios, el a “tradusí e Buki di Mormon for di [hirpglifa], di kual e konosimentu tabata pèrdí for di mundu, den kua un suseso maravioso [el] a para su so, un hóben sin edukashon, pa kombatí kontra di sabiduria di mundu i ignoransha multipliká di mas di 18 siglo, ku un revelashon nobo.”11 Señor Su yudansa den e tradukshon di e planchanan—1 tradukshon na manera di papia— tambe tabata evidente ora ku konsiderá e tiki tempu ku a tuma José Smith pa tradusí nan.12
José su eskritornan a testifiká di e poder di Dios ku a wòrdu manifestá durante di e obra di tradukshon di e Buki di Mormon. Oliver Cowdery a yega di bisa: “Esakinan tabata díanan pa nunka wòrdu lubidá— pa sinta tende un bos ku ta wòrdu diktá dor di inspirashon di shelu, a lanta un gratitut profundo den e kurason aki! Día tras di día, mi a sigui, sin wòrdu interumpí, pa skibi loke e tabata papia, segun e tabata tradusi … ‘e Buki di Mormon.’”13
Fuentenan históriko ta revelá ku for di e momentu ku José Smith a risibí e planchanan den 1827, tabatin intentonan pa hòrta nan for di dje. El a nota ku “kosnan di mas straño a wòrdu hasí pa haña e [planchanan] for di [dje]” i ku “kada strategia ku por a wòrdu inventá a wòrdu usá pa e proposito ei.”14 Na final José i Emma a wòrdu fòrsá pa muda bai for di Manchèster na New Yòrk, pa bai Harmony na Pennsylvania, pa nan haña un lugá sigur pa por a sigui e obra di tradukshon, leu for di e persekushon i e hendenan ku ker a hòrta e planchanan.15 Manera un históriado a nota: “Asina e promé fase difísil a kaba di José su kuifo di e planchanan. … Ainda e pregisto tabata sigurá i den su lucha pa preservá nan, José kasi sigur a siña hopi tokante e kaminda di Dios i hende, ku lo yuda e bon den e tempu ku lo bini.”16
Durante e tradukshon di e Buki di Mormon, José a siña ku Señor a skohe testigunan pa mira e planchanan.17 Esaki ta parti di loke Señor Mes a establesé ora ku El a bisa, “for di boka di dos òf tres testigu kada palabra lo wòrdu establesé.”18 Oliver Cowdery, David Whitmer i Martin Harris, ku tabata algun di e promé kompañeronan di José pa establesé Dios Su obra maraviyoso den e dispensahon aki, tabata e promé testigunan ku a wòrdu yamá pa duna testimonio di e Buki di Mormon. Nan a testifiká ku un angel a bini for di e presensia di Dios, a mustra nan e dokumentunan antiguo aki i nan a mira e símbolonan ku tabata grabá riba e planchanan. Tambe nan a testifiká ku nan a tende e bos di Dios for di shelu deklarando ku e planchanan antiguo a wòrdu tradusí dor di e don i poder di Dios. Nan a wòrdu mandá pa testifika esaki na henter mundu.19
Señor na un manera milagroso a yama 8 testigu mas pa wak e planchanan di oro nan mes i pa ta testigunan speshal di e bèrdat di e divinidat di e Buki di Mormon. Nan a testifiká ku nan a wak i a eksaminá koutelosamente e planchanan i e karakternan grabá riba nan. Asta durante di atversidat, persukushon, tur manera di difikultat i asta algun di nan ku espues a faya den nan fe, e diesun testigu di e Buki di Mormon skohé nunka no a nenga nan testimonio ku nan a wak e planchanan. José Smith no tabata ya no tabata su so mas ku [tabatin] e konosimentu di Moroni su bishita i e planchanan di oro.
Lucy Mack Smith a dokumentá ku su yu a yega kas yen di goso despues ku e testigunan a wòrdu mustra e planchanan. José a splika su mayornan, “mi ta sinti manera mi a wòrdu aliviá di un karga ku tabata kasi demasiado pisá pa karga i mi alma ta regosihá ku no ta mi so sa di e planchanan.”20
José Smith a enfrentá hopi oposihon ora ku e mester a imprimí e Buki di Mormon na final di e tradukshon. E tabata por a kombensé un persona pa imprimí, Egbert B. Gradin na Palmyra, New Yòrk, pa drùk e buki solamente despues ku Martin Harris, den un akto di gran fe i sakrifisio, a pone su finka komo garantia na banko pa kubri e gastunan pa imprimí e buki. Dor ku e oposihon a sigui despues di e publikashon di e Buki di Mormon, Martin Harris fielmente a bende 151 acres (0.6 km2) di su finka pa paga e gastunan di e publikashon. Dor di un revelashon ku a wòrdu duná na di José Smith, Señor a insturí Martin Harris pa no anhelá su propiedat pero pa paga e gastunan pa imprimi e buki ku ta kontené “e bèrdat i e palabra di Dios.”21 Den Mart di 1830. e promé 5000 kopianan di e Buki di Mormon a wòrdu publiká i awendía mas di 180 miyon kopia a wòrdu imptimí den mas ku 100 idioma.
E echonan históriko i e testigunan speshal di e Buki di Mormon ta testifiká ku su benida di bèrdat tabata milagroso. Sinembargo, e poder di e buki aki no ta a base di su história magnífiko pero riba su mensahe poderoso i sin presedente, ku a kambia kantidat di bida —inkluyendo esun di mi!
Mi a lesa henter e Buki di Mormon pa promé biaha ora mi tabata un studiante di seminario. Manera mi maestronan a rekomendá mi, mi a kuminsá lesa for di kuminsamentu na e pagina di introdukshon. E promesa kontené den e promé paginanan di e buki te ainda ta zona den mi mente: “Meditá den [boso] kurason … i despues … puntra Dios [ku fe] … den e nòmber di Christu si e buki ta bèrdat. Esnan ku hasi esaki … lo haña un testimonio di su bèrdat i divinidat dor di e poder di e Spiritu Santu.”22
Ku e promesa ei den mente, mi a buska sin fin pa sa mas tokante di e bèrdat di dje i ku un spiritu di orashon mi a studia e Buki di Mormon, tiki tiki sigun mi tabata kompletá e asignashonnan di e lekshonnan di seminario. Mi ta kòrda kla kla, kon un sentimentu graduralmente a kuminsa krese den mi alma i yena mi kurashon, iluminá mi komprendimentu i a bin deleitá mi mesun kos ku Alma a deskribí ora ku e tabata prediká e palabra di Dios na su pueblo.23 E sentimentu finalmente a kambia den konosementu ku a haña fundeshi den mi kurason i a bira e fundeshi di mi testimonio di e susesonan important i enseñansanan basá riba e buki sagrado.
Dor di e eksperenshanan aki i otro presioso rksperensha personal aki, e Buki di Mormon di bèrdat a bin bira un piedra angular ku ta sostené mi fe den JesuCristu i mi testimonio di e doktrina di Su evangelio. El a bin bira un di e pilarnan ku ta testifiká na mi di Chistu Su sakrifisio ekspiatorio divino. El a bira un eskudo den hinter mi bida kontra di e e atvesario su intentonan pa debilitá mi fe i infundí inkredulidat den mi mente i kurashi pa firmenmente deklará mi testimonio di e Salbador den mundu.
Mi amigunan stimá, mi testimonio di e Buki di Mormon a bini liña pa liña23 komo un milager pa mi kurason. Te na e momento aki e testimonio aki ta sigui krese segun ku mi ta sigui buska, ku un kurason sinsero, pa kompronde mas mihó e palabra di Dios manera e ta skirbí den e buki di skritura ekstraordinario aki.
Na tur ku ta tende mi stèm awe, mi ta invitá boso pa ta parti di e benida milagroso di e Buki di Mormon den bo bida. Mi ta primintí bo ku segun bo ta studia e plabranan, ku e ta kontené den orashon i kontinuamente, boso por partisipá di e promesanan i bendishonnan den bosp bida. Mi ta konfirmá atrobe e promesa ku ta ripití su mes den e paginanan di e buki. Si bo “puntra Dios, e Tata Eterno, den e nòmber di Cristu, si e kosnan aki no ta bèrdat i si bo puntra ku un kurason sinsero, ku intenshon real, ku fe den Cristu,” Ku “miserikòrdia e lo manifestá e bèrdat na bo, dor di e poder di e Spiritu Santu.”25 Mi por sigurá bo ku E lo duna bo e kontesta na un manera masha personal. Manera El a hasi esaki pa ami i pa kantidat di otro hende rònt mundu. Bo eksperensha lo ta mesun glorioso i sagrado pa abo komo e ekperensha di José Smith tabata pa e, tantu komo pa e promé testigunan i pa tur ku a buska pa risibi un testimonio di e integridat i bèrdat di e buki sagrado aki.
Mi ta testifiká ku e Buki di Mormon ta di bèrdat e palabra di Dios. Mi ta testifiká ku e dokumentu sagrado aki “ta splika e doktrina di e evangelio, ta deskribí e plan di salbashon i ta mustra hòmber kiko nan tin ku hasi pa haña pas den e bida aki i salbashon eterno den e bida ku ta bini.”26 Mi ta testifiká ku e Buki di Mormon ta Dios Su instrumento pa trese ku por hasi e rekohimentu di Israèl posibel den nos tempu i pa yuda hende bin konosé Su Yu JesuChristu. Mi ta testifika ku Dios ta bibu i ku e ta stima nos. Ku su Yu JesuCristu ta e Salbador di mundu i e fundeshi di nos religion. I mi ta bisa e kosnan aki den e nòmber sagrado di nos Redentor, nos Maestro i nos Señor ku ta JesuChristu, amèn.