Mensahe di Apertura
Nos tin ku buska, di tur manera ku nos por, pa skucha JesuCristu, ku ta papia ku nos dor di e poder i ministrashon di e Spiritu Santu.
Mi rumannan stimá, Miéntras nos ta yama boso bonbiní na e Konferensia General históriko aki di aprel 2020 di E Iglesia di JesuCristu di e Santunan di e Delaster Dianan, pa motibunan ku boso sa, mi ta para dilanti un ouditorio bashí!
M no por a sa, ora mi a primintí boso na e konferensia general di öktober 2019 ku e konferensia di aprel aki lo ta “memorabel” i “inolvidabel,” ku papiando ku un kongregashon visibel di ménos ku 10 hende lo hasi e konferensia aki asina memorabel i inolvidabel pa ami! Tòg e konosementu ku boso ta partisipando pa medio di transmishon elektróniko, i e koro su interpretashon di “It Is Well with My Soul,” ta trese gran konsuelo pa mi alma.
Manera boso sa, asistensia na e konferensia general aki a keda estrikamente restringí komo parti di nos esfuerso di ta bon suidadano global i hasi tur loke nos por pa limitá e plamamentu di COVID-19. E virus tabatin un mayor impakto rònt mundu. Tambe el a alterá temporalmente nos reunionnan di Iglesia, servisio misional, i e obra tèmpel pa un ratu.
Maske ku e restrinshonnan di awe ta relatá na un virus virulento, bida su pruebanan personal ta ekstendé mas ayá ku e pandemia aki. Futuro pruebanan por resultá for di un aksidente, un desaster natural, òf un doló personal inesperá.
Kon nos por soportá e pruebanan asina? Señor a bisa nos ku “si nos ta prepará boso lo no teme.”1 Naturalmente, nos por almasená nos reservanan di kuminda, awa, i sèn. Pero mes krusial ta nos nesesidat pa yena nos almasen personal spiritual ku fe, bèrdat i testimonio.
Nos mishon prinsipal den e bida aki ta pa prepará pa reuní ku nos Kreadó Nos ta hasi esaki dor di lucha diariamente pa bira mas manera e Salbador, JesuCristu.2 I nos ta hasi esei ora nos arepentí diariamente i risibí Su poder ku ta limpia, sana i fortalesé. E ora ei nos por sinti pas i goso ku ta dura, asta durante tempunan turbulento. Esaki ta eksaktamente dikon Señor a implorá nos pa para den lugánan sagrado i ”no wòrdu mové.”3
E aña aki, nos ta konmemorá e di 200 aniversario di un di e eventonan di mas signifikativo den e historia di e mundu—ku ta, e aparishon di Dios e Tata i Su Yu Stimá, JesuCristu, na Jose Smith. Durante e vishon singular ei, Dios e Tata a mustra riba JesuCristu i a bisa: “Esaki ta Mi Yu Stimá. Skucha E!”4
E amonestashon ei duná na Jose ta pa kada un di nos. Nos tin ku buska, di tur manera ku nos por, pa skucha JesuCristu, ku ta papia ku nos dor di e poder i ministrashon di e Spiritu Santu.
E propósito di esaki i kada konferensia general ta pa yuda nos skucha E. Nos a resa, i a invitá boso pa resa, ku e Spiritu di Señor lo ta ku nos asina abundante ku bo por skucha e mensahenan ku Señor tin spesialmente pa bo—mensahenan ku lo trese pas na bo alma. Mensahenan ku lo sana bo kurason kibrá. Mensahenan ku lo iluminá bo mente. Mensahenan ku lo yuda bo pa sa kiko {bo} tin ku hasi ora bo ta move bai dilanti den bida dor di futuro tempu di agitashon i prueba.
Nos ta resa ku e konferensia aki lo ta memorabel i inolvidabel, dor di e mensahenan ku boso lo tende, e anunsio úniko ku lo wòrdu hasí, i e eksperensha den kual boso lo wòrdu invitá pa partisipá.
Por ehèmpel, na e konklushon di e seshon di djadumingu mainta, nos lo yama un asamblea solemne ora mi lo bai boso dilanti den e Gritu sagrado di Hosanna. Nos ta resa ku esaki lo ta un punto kulminante spiritual pa boso ora nos ekspresá ku un bos global nos profundo gratitut na Dios Tata i Su Yu Stimá dor di elogiá Nan di e manera úniko aki.
Pa e eksperensha sagrado aki, nos ta usa lensu blanku limpi. Pero si bo no tin unu, bo por simpelmente zwai bo man. Na konklushon di e gritu di Hosanna, e kongregashon lo uni ku e koro kantando ”El Espiritu de Dios.”5
Mi rumannan stimá, e konferensia aki lo ta magnífiko. Eaña aki lo ta èkstraordinario si nos enfoká atentamente riba e Salbador i Su evangelio restourá. E efekto mas importante i duradero di e konferensia históriko aki lo ta ora nos kurasonnan kambia i kuminsá un buskeda di por bida pa skucha E.
Bon biní na Konferensia General di aprel 2020! Mi sa ku Dios nos Tata Selestial, i Su Yu, JesuCristu, ta konsiente di nos. Nan lo ta ku nos durante e prosedimentunan di e dos dianan glorioso aki miéntras nos ta buska pa hala yega mas serka di Nan i honrá Nan. Den e nòmber sagrado di JesuCristu, amèn.