Un yamamentu speshalmente nobel.

Pa Joy D. Jones

Presidente General di Primaria

Komo hende muhé di fe, nos por ekstraé e prinsipionan di bèrdat for di eksperenshanan di e profeta José Smith ku ta proporshoná komprenshon pa nos risibi nos propio revelashon.

Mi ta gradisí pa por enfoká mi remarkenan awe ribe ròlnan kontinuo di hende muhé den e Restourashon. Ta opvio ku durante historia hende muhé tabata tin un lugá distinto den e plan di nos Tata Selestial. Presidente Russell M. Nelson a siña, “Lo ta imposibel pa midi e influensia ku … muhénan manera esakinan tin, no solamente riba famianan pero tambe den e Iglesia di Señor, komo kasánan, mamanan, i welanan; komo rumannan i tantanan; komo maestranan i komo lidernan; i spesialmente komo ehèmpelnan i defendedónan devoto di e fe.” ¹

Den kuminsamentu e Sosiedat di Sokoro na Nauvoo, 178 aña pasá, e profeta José Smith a konsehá e rumannan pa “realisá [nan} privilegionan” ² Nan ehèmpel ta siña nos awendia. Huntu nan a sigui e stèm di un profeta i a biba ku fe inmovibel den JesuCristu segun nan tabata yuda pa traha e fundeshi kaminda nos ta pará awe. Rumannan, ta nos turno. Nos tin un enkargo divino di Señor i nos kontribushon fiel i úniko ta vítal.

Presidente Spencer W. Kimball a splika: “Pa ta un muhé rekto, durante e lastu esenanan di e mundu aki, promé ku e segundo benida di nos Salbador, ta un yamamentu speshalmente nobel. E muhénan rekto nan forsa i influensha awendia por ta dies biaha mas tantu di loke e lo por ta den tempunan mas trankil.” ³

Presidente Nelson a implorá di un manera similar: “Mi ta boga ku mi rumannan di [e] iglesia …pa bin dilanti! Tuma boso lugá legítimo i nesesario den boso hogar, den boso komunidat i den e reino di Dios—mas ku nunka bo a yega di hasi. ⁴

Resientemente, mi tabatin e privilegio, huntu ku un grupo di mucha di Primaria, pa reuní ku Presidente Russel M. Nelson den e réplika di e kas di famía Smith na Palmyra Nueva Yòrk. Skucha segun nos profeta ta siña e muchanan kiko nan por hasi pa bai dilanti.

1:55

Hermana Jones: “Mi ta kurioso pa sa si boso por tin un pregunta ku boso lo ke puntra Presidente Nelson. Bosnan ta sintá aki ku e profeta. Tin algu ku semper boso ker a puntra un profeta? Si, Pearl.”

Pearl: “Ta difisil pa ta un profeta? Bo ta, manera, hopi okupá?”

Presidente Nelson: “Naturalmente e ta difísil. Tur kos ku ta parti di bira mas manera e Salbador ta difísil. Un ehèmpel, ora ku Dios tabata ker a duna Moises e Dies Mandamentunan, unda El a bisa Moises bai? Na e punto mas haltu di un seru, na e kumbre di e seru di Sinaí. Esei kermen ku Moises mester a kana henter e kaminda bai ariba pa yega e kumbre di e seru ei pa e haña e Dies Mandamentunan. Awor, Tata Selestial por a bisa, ‘Moises, abo kuminsá aki, i Ami ta kuminsá aya i nos lo topa otro na mitar kaminda.’ Nò, Señor gusta esfuerso pasó esfuerso ta trese rekompensa ku no po yega di ningun otro manera. Por ehèmpel, boso a yega di tuma lès di piano?”

E muchanan: “Si.”

Pearl: “Ami ta tuma lès di fíol.“

Presidente Nelson: “I boso ta praktiká?”

E muchanan: “Si.”

Presidente Nelson: “Kiko ta pasa si boso no praktiká?”

Pearl: “Bo ta lubidá.”

Presidente Nelson: “Si, bo no ta progresa, no ta bèrdat?” Kermen e kontesta ta si, Pearl. E ta eksigí esfuerso, traha duru i hopi estudio. I nunka no tin un final. Esei ta bon! Esei ta bon, pasó semper nos ta pogresándo. Asta den siguiente bida nos lo sigui hasi progreso.

Presidente Nelson su kontesta na e muchanan presioso aki ta ekstendé pa kada uni di nos. Señor ta stima esfuerso i esfuerso ta trese rekompensa. Nos ta sigui praktiká. Nos ta semper progresando miéntras ku nos ta lucha pa sigui Señor. ⁵ E no ta spera perfekshon awe. Nos ta sigui subi nos seru personal di Sinaí. Manera den pasado, nos biahe di bèrdat ta eksigi esfuerso, trabou duru i estudio, pero nos kompromiso pa progresá ta trese rekompensa eterno. ⁶

Kiko mas nos ta siña for di e profeta José Smith i for di e Promé vishon tokante di esfuerso, traha duru i estudio? E Promé Vishon ta duna nos direkshon den nos ròl úniko i kontinuo. Komo hende muhé fiel, nos por saka prinsípionan di bèrdat for di e eksperenshanan di e profeta José Smith ku ta proveé komprenshon pa nos risibi nos propio revelashon. Por ehèmpel:

Nos ta traha bou di difikultatnan.
Nos ta bai den skritura pa risibí sabiduria pa aktua.
Nos ta demonstra nos fe i konfiansa den Dios.
Nos ta ehersé nos poder pa roga Dios pa yuda nos pa frustrá e influensha di e atversario.
Nos ta pone e deseonan di nos kurason dilanti di Dios.
Nos ta enfoká riba Su lus ku ta guía nos desishonnan di bida i ku ta bria riba nos ora ku nos bira na Dje.
Nos ta realisá nos mes ku E konosé kada un di nos na nòmber i tin ròlnan individual pa nos ehekutá. ⁷

Ademas di esaki, José Smith a restourá e konosimentu ku nos tin potenshal divino i balor eterno. Dor di e relashon ei ku nos Tata Selestial, mi ta kere ku E ta spera di nos pa risibi revelashon for di Dje.

Señor a instruí Emma Smith pa “risibí e Spiritu Santu.” siña hopi, “laga kosnan di mundu na banda, … buska e kosnan di mas mihó,” i “tene duru na [su] kombenionan” ku Dios. ⁸ Siñamentu ta importante pa progreso, espesialmente segun e kompaño konstante di e Spiritu Santu ta instruí nos loke ta nesesario pa kada un di nos pone na banda—kermen loke ku por distraí nos òf retrasá nos prgreso.

Presidente Nelson a bisa, “Mi ta supliká bo pa oumenta bo kapasidat spiritual pa risibí revelashon.” ⁹ Nos profeta su palabranan ta kontinuamente den mi mente segun mi ta kontemplá muhénan su abilidat pa bai dilanti. E ta supliká nos, loke ta indiká ku esaki ta indiká prioridat. E ta siña nos kon pa sobrebibí spiritualmente den un mundu yen di piká dor di risibí i aktua riba revelashon. ¹⁰ Segun nos ta hasi esaki, honra i biba e mandamentunan di Señor, nos ta wòrdu primintí, mesun kos ku Emma Smith, “un korona di rektitut.” ¹¹ E profeta José Smith a siña nos di e importansha di sa ku e kaminda ku nos ta sigui den e bida aki ta aprobá pa Dios. Sin e konosementu ei, nos “lo kansa den [nos] mente i kai flou.” ¹²

Den e konferensia aki, nos lo tende bèrdatnan ku lo inspirá nos pa kambia, mehorá, i purifiká nos bida. Por medio di revelashon personal, nos por prevení loke algun ta yama “aplastashon di konferensia general”—ora nos sali asina determiná pa hasi tur kos awor. Hende muhé por bisti hopi sombre, pero ta imposibel i tambe innesesario pa bisti nan tur pareu. E spiritu ta yuda nos determiná kua obra nos mester enfoká riba dje awe. ¹³

Señor Su influensha amoroso dor di e Spiritu Santu ta yuda nos sa Su prioridat pa nos progreso. Duna kaso na revelashon personal ta hiba na progreso personal. ¹⁴ Nos ta skucha i aktua ¹⁵ Señor a bisa, “Puntra e Tata den Mi nòmber ku fe, keriendo ku lo bo risibí, i lo bo tin e Spiritu Santu, ku ta manifestá tur kos ku ta nesesario.” ¹⁶ Nos ròl kontinuo ta pa risibí revelashon kontinuo.

Segun nos ta alkansá un grado di kompetensia mas grandi pa hasi esaki nos por risibí mas poder den nos ròlnan individual pa yuda i logra pa hasi e obra di salbashon i eksaltashon—pa di bèrdat “pone e kosnan di mundu un banda i buska e kosnan ku ta mas mihó.” ¹⁷ Dor di esaki nos por inspirá nos generashon di awendia mas efektivamente pa hasi mesun kos.

Rumannan, nos tur ta buska Dios Su poder den nos bida. ¹⁸ Tin un konekshon bunita entre hende muhé i hende hòmber pa logra Dios Su obra awendia. Nos ta yega na e poder di e saserdosio dor di kombenionan ku nos a hasi na promé lugá na nos boutismo i despues den e murayanan di tèmpel sagrado. ¹⁹ Presidente Nelson a siña nos, “Kada hende muhé i kada hende hòmber ku ta sera kombenionan ku Dios i ta warda e kombenionan ei, i ku ta partisipá dignamemte den e ordenansanan di saserdosio, tin akseso direkto na e poder di Dios.” ²⁰

Mi atmishon personal awe ta ku kome hende muhé mi a realisá antes den mi bida, ku ami tabatin askseso, dor di mi kombenionan, na e poder di e saserdosio. ²¹ Rumannan, mi ta hasi orashon ku nos lo rekonosé i apresiá e poder di saserdosio siegun nos ta “tene duru na [nos] kombenionan,” ²² rekonosé e bèrdat di den e skrituranan i aktua riba e palabranan di nos profeta bibiente.

Laga nos deklará ku sertesa nos deboshon na nos Tata Selestial i nos Salbador, “ku un fe inmovibel den Dje, konfiando kompletamente riba e mérito di Esun ku tin e poder pa salba.” ²³ Laga nos sigui e biahe aki ku goso pa yega nos potenshal spiritual di mas haltu i yuda esnan rondó di nos pa hasi meskos tambe dor di liderato, amor, servisio i kompashon.

Elder James E. Talmage ku ternura ta kòrda nos, “E mundu su kampión di mas grandi di hende muhé i femenidat ta JesuChristu.“ ²⁴ Den e análisis di hende muhé su ròl kontinuo den e Restourashon i pa nos tur, kua ròl ta esun mas importante? Mi ta testifiká ku e ta pa skucha E, ²⁵ pa sigi E, ²⁶ pa konfia E, ²⁷ i bira un ekstenshon di Su amor. ²⁸ Mi sa ku e ta bibu. ²⁹ Den e nòmber sagrado di JesuCristu, amèn.