Kompartiendo e Mensahe di e Restourashon i e Resurekshon
E Restourashon ta pertenesé na e mundu, i su mensahe ta spesialmente urgente awe.
Durante e konferensia general aki nos a papia i kanta ku goso tokante e kumplimentu di e profesia hasí hopi tempu pasá “restitushon di tur kos,”1 tokante trese “huntu den un tur kos den Cristu,”2 tokante e regreso di e plenitut di e evangelio, saserdosio, i Iglesia di JesuCristu na mundu, di kua tur ta kai bou di e titulo “e Restourashon.”
Pero e Restourashon no ta solamente pa esnan i nos ku ta regosihá den dje awe. E revelashonnan di e Promé Vishon no tabata pa José Smith so pero ta wòrdu ofresé komo lus i bèrdat pa kualke un ku tin “falta di sabiduria.”3 E Buki di Mormon ta e poseshon di humanidat. E ordenansanan di saserdosio di salbashon i eksaltashon a wòrdu prepará pa kada individuo, inkluyendo esnan ku ya no ta na bida mas. E Iglesia di JesuCristu di e Santunan di Delaster dianan i su bendishonnan ta pa tur esnan ku ke nan. E don di e Spiritu Santu ta pa tur hende. E Restourashon ta pertenesé na e mundu, i su mensahe ta spesialmente urgente awendia.
“Pesei, kon grandi e importansia di hasi tur e kosnan aki konosí na tur e habitantenan di tera, pa nan por konosé ku no tin niungun karni ku por biba den presensia di Dios, sino solamente pa medio di e méritonan, i miserikòrdia, i grasia di e Santu Mesias, ku a entregá su bida di akuerdo ku e karni, i tumé bèk pa medio di e poder di e Spiritu, pa e por kumpli ku e resurekshon for di e morto.”4
For di e dia ku e ruman di e Profeta, Samuel Smith, a yena su tas ku kopianan fresku di e Buki di Mormon i a kuminsá kana pa kompartí e skritura nobo, e Santunan a laborá sin para “pa hasi tur e kosnan aki konosí na e habitantenan di tera.”
Na 1920, e tempu ei–Elder David O.McKay di e Quorum di Diesdos Apòstelnan, a kuminsá un rekorido di un aña largu den e mishonnan di e Iglesia. Pa mei 1921, e tabata pará den un santana chikitu na Fagali’i, Samoa, dilanti di e grafnan bon kuidá di tres mucha chikitu, e yu muhé i dos yu hòmber di Thomas i Sarah Hilton. E tres chikitunan aki—esun mas grandi tabatin dos—a muri durante e tempu ku Thomas i Sarah tabata sirbi komo pareha misional hoben den ultimo parti di 1800.
Promé ku e la bandoná Utah, Elder McKay a primintí Sarha, awor un viuda, ku e lo bishitá e graf di su yunan na Samoa ya ku e nunka por a regresá einan. Elder McKay a sibi bèk na dje, “Bo tres chikitinnan, Hermana Hilton, den un silensio elokuente … a sigui ku bo obra misional noble kuminsá kas trinta aña pasá.” Despues e la agregá un verso di su propio komposishon:
Dor di mannan amoroso nan wowonan moribundo a wòrdu será,
Dor di mannan amoroso nan kurpanan chikitu a wòrdu drechá,
Pa mannan ekstranhero nan grafnan humilde a wòrdu dekorá,
Dor di stranheronan honrá, i dor di stranheronan yorá.5
E historia aki ta un den mil, miles i miles, ku ta papia di e tempu, tesoro, i bida sakrifiká durante e lastu 200 añanan pa kompartí e mensahe di Restourashon. Nos aspirashon pa yega kada nashon, famia, lenga, i pueblo no ta disminuí awendia komo testigu di mas ku 68,000 hóben i pareha aktualmente sirbiendo bou di yamamentunan mishonal di tempu kompletu, dor di miembronan di Iglesia generalmente ku ta resoná e invitashon di Filipe pa bini i wak,6 i e miones di dòler anualmente pa sostené e esfuerso ei rònt mundu.
Miéntras nos invitashonnan ta sin kompulshon, nos ta spera ku hendenan lo haña nan konvinsente. Pa esei ta asina, mi ta kere ku tres kos por lo ménos ta nesesario; di promé boso amor, di dos, boso ehèmpel; i di tres, boso uso di e Buki di Mormon.
Nos invitashon no por ta un asuntu di interes propio; mas bien, nan mester ta un ekspreshon di amor sin egoismo, e amor ku ta ’kita tur temor.”7 E amor aki, konosí komo karidat, e amor puru di Cristu, ta di nos si nos puntra. Nos ta wòrdu invitá, hasta komo mandamentu, pa “hasi orashon na e Tata ku tur e energia di nos kurason, pa [nos] por ta yená ku e amor aki.”8
Komo un ehèmpel, mi ta kompartí un eksperiensia relatá pa Hermana Lanett Ho Ching, aktualmente sirbiendo ku su kasá Presidente Francis Ho Ching, ku ta presidí riba e Mishon Samoa Apia. Hermana Ho Ching ta relatá:
“Hopi aña pasá, nos famia hóben a muda pa un kas chikí na Laie, Hawaii. E garashi di nos kas a wòrdu konvertí den un apartamentu chikitu, kaminda un hòmber yamá Jonathan tabata biba. Jonathan tabata nos bisiña na un otro lugá. Sintiendo manera ku no tabata un koinsidensia ku Señor a pone nos huntu, mi a disidí di ta mas habrí tokante nos aktividatnan i miembresia den Iglesia. Jonathan a disfrutá di nos amistat i tabata stima pasa tempu ku nos famia. El tabata gusta siña tokante e evangelio, pero no tabata interesá den komprometé na e Iglesia.
“Ku tempu, Jonathan a gana e apodo, ‘Tio Jonathan’ serka nos yunan. Mientras nos famia a sigui krese, asina tambe Jonathan su interes den nos aktividatnan. Nos invitashonnan na selebrashonnan festivo, evento di skol, i aktividatnan di Iglesia a wòrdu ekstendé noche di hogar i e boutismo di e muchanan.
“Un dia mi a risibí un yamada di Jonathan. E tabata tin mester di yudansa. E tabata sufri di diabetis i a desaroyá un infekshon severo na su pia ku tabata rekerí un amputashon pa salba su bida. Nos famia i miembronan di bario bisiña a kompañé durante e tempu ei di tribulashon. Nos a tuma turno pa hib’é hospital, i bendishonnan di saserdosio a wòrdu ofresé. Miéntras Jonathan tabata den rehabilitashon, ku e ayudo di e rumannan di Sosiedat di Sokoro, nos a limpia su apartamentu. E rumannan di saserdosio a konstruí un rampa na su entrada di prota i a pega baranan pa wanta den su baño. Ora Jonathan a regresá su kas, el a wòrdu dominá ku emoshon.
“Jonathan a kuminsá tuma e lèsnan mishonal atrobe. E siman promé ku Aña Nobo, el a yama mi i puntra, ‘Kiko bo ta bai hasi Bispu di Aña Nobo?’ Mi a kòrd’e di nos fiesta anual. Pero na su turno, el a kontestá, ‘Mi ke pa bo bin mi boutismo! Mi ke kuminsa e aña nobo aki bon.’ Despues di 20 aña di ‘bin i wak,’ ‘bin i yuda,’ i ‘bin i keda,’ e alma presioso aki tabata kla pa wòrdu boutisá.
“Na 2018, ora nos a wòrdu yamá pa bira presidente di mishon i kompañera, Jonathan su salú tabata bayendo atras. Nos a rog’é pa e keda fuerte wardando nos regreso. E la lucha pa kasi un aña, pero Señor tabata preparand’e pa e bin kas. E la fayese pasifikamente na aprel 2019. Mi yunan a asistí na e funeral di nan ‘Tio Jonathan’ i a kanta e mesun kantika ku nos a kanta na su boutismo.”
Mi a introdusí un di dos rekesito pa un kompartimentu eksitoso di e mensahe di Restourashon ku e pregunta aki: kiko ta loke lo hasi bo invitashon mas atraktivo pa un persona? No ta abo, ta e ehèmpel di bo bida? Hopi ku a skucha i risibí e mensahe di Restourashon a wòrdu atraé inisialmente pa loke nan a persibí den e miembro òf miembronan di e Iglesia di JesuCristu. E por ta e manera ku nan a trata ku otro, òf loke nan a bisa òf keda sin bisa, e firmesa ku nan ta demostrá den situashonnan difisil, òf simplemente nan kara.9
Loke sea ku e ta, nos no por skapa e echo ku nos mester komprondé i biba e prinsipionan di e evangelio restourá na e mihó manera ku nos por pa nos invitashon ta atraktivo. E ta algu hopi bia referí awendia komo outentisidat. Si e amor di Cristu biba den nos, otronan lo sa ku e amor pa nan ta genuino. Si e lus di e Spiritu Santu ta kim0a den nos, e lo rebibá e Lus di Cristu den nan.10 Loke bo ta, ta duna outentisidat na bo invitashon pa bin eksperensiá e goso di e plenitut di e evangelio di JesuCristu.
E di tres rekisito ta uso liberal di e instrumento di konvershon ku Dios a disená pa e delaster dispensashon aki, e Buki di Mormon. E ta un evidensia palpabel di José Smith su yamamentu profétiko i evidensia konvinsente di e divinidat i Resurekshon di JesuCristu. Su eksposishon di nos Tata Selestial su plan di redenshon ta inigualá. Ora bo kompartí e Buki di Mormon, bo ta kompartiendo e Restourashon.
Tempu Jason Olson tabata un adolesente, el a wòrdu atvertí repetidamente dor di famia i otronan kontra bira un Cristian. Sinembargo, e tabata tin dos bon amigu, ku tabata miembro di E Iglesia di JesuCristu di e Santunan di Delaster dianan, i nan semper tabata diskutí religion. Su amigunan, Shea i Dave, respetuosamente a kontraresta e argumentonan ku otronan a duna Jason kontra di fé den JesuCristu. Finalmente, nan a dun’é un kopia di e Buki di Mormon, bisando, “E buki aki lo kontestá bo preguntanan. Por fabor lesé.” Sin masha animo e la akseptá e buki i pone den su tas, kaminda e la keda pa basta luna. E no ker a lage na kas kaminda su famia por a mir’é, i e no ker a desapuntá Shea i Dave dor di duné bek. Finalmente, el a yega na un solushon di kima e buki.
Un anochi, ku un laiter den un man i e Buki di Mormon den e otro, e tabata klá pa pega e buki na kandela ora el a skucha un stèm den su mente ku a bisa, “No kima e buki.” Sorprendí, el a wanta. E ora ei, pensando ku el a imaginá e stèm, el a purba atrobe na sende e laiter. Atrobe, e stèm a bin na su mente: “Bai bo kamber i lesa mi buki.” Jason a pone e laiter un banda, kana bai den su kamber, habri e Buki di Mormon, i a kuminsá lesa. El a kontinuá dia tras di dia, hopi bia den oranan tempran di mainta. Ora Jason a yega na e fin i a hasi orashon, el a skibi, “mi tabata yená for di e korona di mi kabes te na planta di mi pianan ku e Spiritu. … Mi a sinti mi yená ku e lus. … Tabata un di e eksperiensianan mas gososo ku mi a yega di sinti den mi bida.” El a buska boutismo i despues e mes a bira un misionero.
Kisas por bai na bisa ku maske tin amor genuino i sinseridat, hopi, si no ta tur, di nos invitashonnan pa kompartí e mensahe di e Restourashon lo wòrdu rechasá. Pero kòrda esaki: kada persona ta meresé un invitashon asina—“tur ta meskos pa Dios”,11 Señor ta komplasí ku kada esfuerso ku nos hasi, sin importá e resultado; un invitashon rechasá no ta rason pa nos asosiashon terminá; un falta di interes awe kisas masha bon un dia por bira un interes den futuro. Sin importá, nos amor ta keda konstante.
Laga nos nunka lubida ku e Restourashon a sali di un eksperensia i sakrifisio intenso. Esei ta un tópiko pa otro dia. Awe nos ta gosa den e frutanan di e Restourashon, un di esnan di mas importante ta e poder un biaha mas pa uni nos riba tera komo den shelu.12 Manera ekspresá hopi aña pasá pa Presidente Gordon B. Hinckley, “Si nada mas no sali di e tur e tristesa, e trabou y dolor de e restourashon ku e poder seyador di e santu di saserdosio pa uni famianan pa semper, lo e tabata bal la pena tur lokual el a kosta.13
E promesa di e Restourashon ta redenshon pa medio di JesuCristu. E Resurekshon di JesuCristu ta e prueba ku E, de hecho, ta poseé poder di redenshon na tur ku bin na Dje—redimí nan for di doló, inhustisia, lamento, piká, i hasta morto. Awe ta djadumingu di Rama: un siman promé ku Pasku di Resurekshon. Nos ta kòrda, semper nos ta kòrda, Cristu su sufrimentu i morto pa ekspiá pa nos pikánan, i nos ta selebrá ku e djadumingu mas maraviyoso ei, Señor su dia, riba kua El a lanta for di morto. Pa motibu di e Resurekshon di JesuCristu, e Restourashon tin sentido, nos bida mortal tin sentido, i finalmente nos eksistensia mes tin sentido.
José Smith, e gran profeta di e Restourashon, ta ofresé un testimonio fuerte pa nos tempu di e Cristu resusitá. “ Ku e ta biba! Pasó nos a mir’é, hasta na e man drechi di Dios.”14 Mi ta agregá testimonio na esun di José i na esnan di tur e apòstelnan i profetanan promé ku ne i tur e apòstelnan i profetanan ku a bin despues di dje, e Jesus di Nazarèt, e Mesias primintí, e Unigénito di Dios, i e Redentor resusitá di hinter humanidat.
Nos ta testifiká ku “esnan ku den orashon studia e mensahe di e Restourashon i aktua den fe lo wòrdu bendishoná pa haña nan propio testimonio di su divindat i di su propósito pa prepará e mundu pa e Segunda Binida primintí di nos Señor i Salbador, JesuCristu.”15 Cristu su Resurekshon ta hasi Su promesanan sigur. Den e nòmber di JesuCristu, amèn.