Hañando Refugio kontra e Tormentanan di Bbida
JesuCristu i Su ekspiashon ta e refugio ku nos tur mester, apesar di e tormentanan ku ta pasa den nos bida.
B⌂k meimei di e añanan 90, durante mi añanan di universidat, mi tabata parti di ekuater Grupo di e departamentu di bombero na Chili. Miéntras ku mi tabata sirbi einan, mi tabata biba na e stashon di bombero ora mi tabatin ku traha warda di anochi. Na kabamentu di aña, nan a bisa mi ku mi tin ku bin traha e bipu di Aña Nobo anochi pasó riba e dia aki kasi semper tin algun emergensha. Ku sorpresa mi a kontesta, “di bèrdat?”
Mi ta kòrda ku mi tabata warda huntu ku mi koleganan. Diesdos or di a anochi, vürwèrk a kuminsá na e siudat di Santiago. Nos a brasa otro i tabata duna otro bon deseonan pa e aña nobo. Direpiente e bèl di e stashon di bombero a kuminsá zona, indikando ku tabatin un emergensia. Nos a kue nos ekipo i a drenta e trùk di bombero. Na kaminda pa e sitio di emergensia, miéntras nos tabata pasa kantidat di hende ku tabata selebrá àña nobo, mi a nota ku nan tabata en general sin preokupashon. Nan tabata relahá i tabata disfrutando e anochi di verano. No opstante, den bisindario, e hendenan ku nos tabata na kaminda pa yuda tabata den problema serio.
E eksperensha aki a yuda mi realisá mi mes ku ounke nos bida por ta relativamente trankil na sierto momentunan, e tempu lo yega ku kada un di nos tin ku enfrentá retonan ineksperá i tormentanan ku lo hiba nos na e limite di nos abilidat pa perseverá. Retonan físiko, mental, familiar i di empleo tantu komo desasternan natural i otro kousanan di bida i morto ta un par di ehèmpel di e tormentanan ku no lo enfrentá den e bida aki
Ora nos wòrdu konfrontá ku e tormentanan aki, hopi biaha nos ta eksperenshá sentimentunan di desesperashon i temor. Presidente Russell M. Nelson a bisa, “Fe ta e antídoto di temor”—fe dennos Señor JesuCristu (“Let Your Faith Show,” Liahona, Mei 2014, 29). Segun mi tabata wak e tormentanan ku ta afekta hende su bida, mi a bin konkluí ku no ta importa ki sorto di tormenta ta bati nos—sea si tin un solushon pa e òf si tin un final na bista —tin solamente un refugio, i e ta meskos pa tur típo di tormenta. E úniko refugio proveé dor di nos Tata Selestial ta nos Señor JesuCristu i su Ekspiashon.
Niun di nos ta eksonerá di efrentá e tormentanan aki. Helaman, un profeta den e Buki di Mormon a siña nos lo sigiente: “Kòrda, ku ta riba e baranka di nos Redentor, ku ta Cristu, e Yu di Dios ku bo mester konstruí boso fundamentu; pa ora e diabel manda su bientunan poderoso, si su flechanan den warwarú, si ora tur su hagel i su tormenta furioso ta suta boso, esaki lo no tin poder riba boso pa lastra boso pa e abismo di miseria i angustia sin fin, debí na e baranka riba kual boso ta edifiká, ku ta un fundamentu sigur, un fundamentu riba kual, si e hòmbernan edifiká, nan lo no kai” (Helaman 5:12).
Elder Robert D. Hales, ku tabatin su propio eksperenshanan pa soportá tormentanan, a bisa, “Sufrimentu ta universal; kon nos ta reakshoná riba sufrimentu ta individual. Sufrimentu por hiba nos un di e dos kamindanan. E por ta un eksperensha kombiná ku fe ku ta fortifiká i purifiká òf e por ta un forsa destruktivo den nos bida si nos no tin fe den Señor Su sakrifisio ekspiatorio” (“Your Sorrow Shall Be Turned to Joy,” Ensign, Nov. 1983, 66).
Pa por ta posibel pa disfrutá di e refugio ku JesuCristu i Su Ekspiashon ta ofresé, nos mester tin fe den Dje— un fe ku ta laga nos surpasá tur doló di e perspektibo di mundu limitá. El a primintí ku E lo hasi nos karganan lihé si nos bini serka Dje den tur kos ku nos ta hasi.
“Bini serka mi,” El a bisa, “tur ku ta kansá i kargá, i Ami lo duna boso sosiegu.”
“Tuma mi yugo riba bo, i siña di Mi; Paso mi ta mansu i humilde di kurason: i lo bo haña deskanso den boso alma.
“Pasó mi yugo ta suave, i mi karga ta lihé” (Mateo 11:28–30; mira tambe Mosia 24:14–15).
Ta wòrdu bisá “pa esun ku tin fe, niun splikashon ta nesesario. pa esun sin fe, niun splikashon ta posibel.” (E deklarashon aki a wòrdu atribuí na Thomas Aquinas, pero ta mas manera un frase di kosnan ku el a siña.) Sinembargo, nos tin komprenshon limitá di kosnan ku ta pasa aki na mundu i hopi biaha nos no tin kontesta riba e pregunta di e dikon. Di kon e kos aki ta pasa? Di kon e kos aki ta pasa ku ami? Kiko mi ta suponé di siña? Ora ku kontesta no ta evidente, ta e ora ei e palabranan ekspresá dor di nos Salbador na e profeta José Smith den e prisón di Liberty por wòrdu apliká:
“Mi yu, pas sea ku bo alma; bo atversidat i bo aflikshonnan lo ta pa un momentu breve;
“Y despues, si bo wanta esaki bon, Dios lo eksaltá bo den shelu” (Doctrina y Convenios 121:7–8).
Ounke hopi hende di bèrdat ta kere denJesuCristu, e gran pregunta ta si nos ta kere E i si nos ta kere e kosnan ku E ta siña nos i ta puntra nos pa hasi. Portá un hende por pensa, “Kiko JesuCristu sa di loke ta pasa ku mi? Kon E por sa kiko mi mester pa ta felis?” Di bèrdat, ta nos Redentor i Intesesario ta esun ku e profeta Isaías tabata papia di dje ora ku ela bisa:
“E tabata despresiá, bandoná pa tur hende; un hòmber ku konosé doló, ku sa di sufrimentu. …
“Sigur El a soportá nos penanan, i karga nos penarnan. …
“El a wòrdu heridá pa nos transgreshonnan, El a wòrdu heridá pa nos inikidatnan; e kastigu di nos pas tabata riba Dje; i ku Su yaganan nos ta wòrdu sana.”(Isaías 53:3–5).
E Apòstel Pedro tambe a siña nos tokante di e Salbador, bisando, “E mes a karga nos pikánan den su kurpa hiba nan na krus pa nos ku por muri pa piká por biba un bida segun boluntat di Dios. Ta danki na su yaganan ku boso a haña kura” (1 Pedro 2:24).
Ounke e tempu pa Pedro su mes martirio tabata yegando, su palabranan no tabata yená ku miedu i pesimismo. Al contrario el a instruí e santunan pa “regosishá”, aunke nan tabata “kargá ku hopi tentashon.” Pedro a konsehá nos pa kòrda ku ta“ e prueba di [nos] fe, … ounke e ta wòrdu di tèst den kandela,” lo pone ku boso lo haña “aprobashon, gloria i honor dia JesuCristu bini” i pa e “salbashon di [nos] alma” (1 Pedro 1:6–7, 9).
Pedro ta sigui:
“Rumannan stimá, no keda sorprendí ku boso ta pasa den kandela di prueba duru, i hasi komo si fuera ta algu apnormal:
“Sino sea kontentu ku boso por tuma parti na sufrimentu di Christu; Ya boso lo ta yen di goso dia ku Christu bini bèk den su gloria” (1 Pedro 4:12–13).
Presidente Russell-M. Nelson a siña ku “Santunan por ta felis bou di tur sirkunsha. … Ora e enfoke di nos bida ta riba Dios Su plan di salbashon … i JesuCristo ku Su evangelio, nos por sinti e alegria sin importá kiko ta pasando—òf kiko no ta pasando—den nos bida. Felisidat ta bin di i dor di DjE. E ta a fuente di tur goso” (“Joy and Spiritual Survival,” Liahona, Nov. 2016, 82).
Naturalmente ta mas fasil pa bisa e kosnan aki ora ku nos no ta mei mei di e tormenta ku ta pa biba i aplika nan durante di tormenta. Pero komo boso ruman, mi ta spera ku boso por sinti ku mi ker komparti ku boso kon baloroso ta pa sa ku JesuCristu i Su ekspiashon ta e refugio ku nos tur mester, no opstante di e retonan ku ta pasa den nos bida.
Mi sa ku nos tur ta yunan di Dios, ku E ta stima nos i ku nos no ta nos so. Mi ta invitá boso pa bini i mira ku E por liherá boso karganan i ta e refugio ku boso ta buska. Bini i yuda otro haña e refugio ku nan ta anhelá. Bin i keda huntu ku nos den e refugio aki, ku ta yuda bo resisiti e tormentanan di bida. No tin ningun duda den mi kurason ku si bo bini, lo bo mira, lo bo yuda i lo bo keda.
E profeta Alma a tèstifika lo sigienta na su yu Heleman. “Mi sa ku kualke hende ku pone nan konfiansa den Dios lo wòrdu sostené den nan tribulashonnan, i nan retonan, i nan aflikshonnan i lo wòrdu eksaltá na e delaster dia” (Alma 36:3).
E Salbador Mes a bisa:
“Laga boso kurashon wòrdu konsolá … ; pasó tur hende ta den Mi man; ta ketu i sa ku Ami ta Dios. …
“P’esei, no teme ni sikiera morto; pasó den e mundu aki bo goso no ta kompletu, pero den Mi bo goso lo ta kompletu” (Doctrina y Convenios 101:16, 36).
E hímno “Be still, My soul,” ku a toka mi kurashon na hopi okashon, tin u mensahe di konsuelo pa nos alma. E palabranan ta lo sigiente;
Ta ketu, mi alma: E ora ta yegando
Ora ku nos lo ta pa semper huntu ku Señor.
Ora ku desapuntashon, doló i temor a bai,
Sufrimentu ta wòrdu lubida i amor di mas puro wòrdu restourá.
Ta ketu, mi alma: Ora kambio i lagrima ta den pasado
Ora ku tur kos ta sigur i bendishoná nos lo mira otro porfin. Hymns, no. 124.
Segun nos ta enfrentá e tormentanan di bida, mi sa ku si nos hasi nos mihó enfóke i konfía den JesuCristu i Su ekspiahon komo nos refugio , nos lo wòrdu bendishoná ku e sosiegu, konsuelo, forsa i pas ku nos ta buska, ku sertesa den nos kurashon ku na final di nos tempu aki na tera, nos lo tende e palabranan di e Maestro: “Bon hasí! Bo ta un kriá bon i fiel--drenta, bin kompartí den mi alegria!” (Mateo 25:21). Den nòmber di JesuCristu, amèn.