E Poder di e Buki di Mormon den Kombershon

By Elder Benjamin M. Z. Tai

Di e Setentanan

E Buki di Mormon ta proveé nutrishon spiritual, preskribí un plan di akshon i konektá nos ku e Spiritu Santu.

Despues di e revisá e relato di un resien eksaminashon físiko mi a siña ku mi mester a hasi algun ahustenan na estilo di bida Pa yuda mi, mi dokter a preskribí un plan di nutrishon i ehersisio, kual, si mi skohe pa sigui lo transformá mi den un persona mas saludabel.

Si nos tur pasa dor di un eksaminashon spiritual, kiko nos por siña tokante nos mes? Ki ta e ahustenan ku nos dòkter spiritual lo preskribí? Pa nos por yega na bira e hende ku nos mester ta, e ta esensial pa nos sa kiko pa hasi i hasi loke nos sa.

JesuCristu ta e Dòkter Kabesante.¹ Dor di su Ekspiashon, E ta kura nos heridanan, tuma riba dje nos enfermedatnan i sana nos kurason kibra. ² Dor di Su grasia nos debilidat por bira fuerte.³ E ta invitá nos pa sigui E ⁴ dor di siña for di E, skucha Su palabra nan i kanando den e humildat di Su Spiritu.⁵ El a primintí di yuda nos⁶ den e proseso di kombershon di bida largu aki, kual ta transformá nos i ta duna felisidat eterno.⁷

E Salbador a duna nos e Buki di Mormon komo un hèrmènt poderoso pa yuda den e kombershon. E Buki di Mormon ta proveé nutrishon spiritual, preskribí un plan di akshon i konektá nos ku e Spiritu Santu. Skirbí pa nos,⁸ e ta kontené e palabra di Dios den simplesa ⁹ i ta splika nos di nos identidat, propósito i destino.¹⁰ Huntu ku e Beibel, e Buki di Mormon ta testifiká di JesuCristu¹¹ i ta siña kon pa nos haña sa e bèrdat i yega di ta manera E.

Ruman Saw Polo tabata tin 58 aña ora ku e la wòrdu introdusí na e evangelio restourá di JesuCristu. Ora ku mi a konosé e tabata sirbiendo komo presidente di rama pa hopi aña, pero mi a bin sa ku nunka el a lesa e Buki di Mormon paso e no tabata disponibel den su pais nativo Burma. Ora ku mi a puntr’é kon e por sa ku e buki tabata bèrdat sin ku el a les’é, el a respondé ku e la studia e kuenta nan di E Buki di Mormon buki di pintura i dor di wak e ilustrashonnan, usando e dikshonario pa tradusí e palabranan Ingles i hasi anotashon kuidadosamente di loke e la siña. El a splika, “ Kada bes ku mi studia mi tabata hasi orashon pa loke mi a siña i mi tabata sinti pas i alegria, mi mente tabata klara i mi kurason tabata bira moli. Mi a sinti e Spiritu Santu testifiká na mi ku e tabata bèrdat. Mi sa ku e Buki di Mormon ta e palabra di Dios.”

Manera Ruman Saw Polo kada un di nos por studia e Buki di Mormon segun nos sirkunstansha. Si nos ta deseá pa kere i meditá riba su enseñansanan den nos kurason, nos por puntra Dios ku fe si e enseñansanan ta bèrdat.¹² Si nos ta sinsero den nos deseo pa sa i tin un berdadero intenshon pa aktua, E lo kontesta nos den nos kurason pa medio di e Spiritu Santu. Ta pa medio di e poder di e Spiritu Santu nos por sa e bèrdat di tur kos.¹³ Ora ku nos haña un testimonio divino di e Buki di Mormon nos lo sa tambe pa e mesun poder ku JesuCristu ta e Salbador di e mundu, ku Joseph Smih ta Su profeta i ku E Iglesia di JesuCristu di e Santunan di e delaster Dianan ta Su Iglesia restourá.¹⁴

Komo un hóben kuminsando mi servisio mishonal mi a borda un avion rumbo pa Oustralia. Sintiendo hopi so, nervioso i inkapas pero tabata komprometé pa sirbi, mi ta tin e nesesidat pa sa ku siguransa ku e loke mi tabata kere tabata bèrdat. Mi a resa i lesa mi skrituranan sinseramente, pero segun e buelo tabata progresando, e duda den mi mes a bira mas intensivo i mi kondishon físiko a deteriorá. Despues di tabata luchando pa algun ora un stewardess a kana pasa den e gang i a stòp banda di mi stul. El a kue e Buki di Mormon ku mi tabata lesa for di mi man. El a wak e kaft i bisa, “E buki ei ta great !” despues el a duna mi e buki bek i a sigui kana. Nunka mas mi a mir’é.

Segun su palabranan tabata zona den mi orea mi a skucha klaramente i a sinti den mi kurason, “Mi ta aki i Mi sa unda bo ta. Djis hasi bo esfuerso paso Ami lo enkargá ku sobra.” Den e avion riba Oséano Pasífiko, mi a risibí un testimonio personal dor di mi estudio di e Buki Mormon i e insitashon di e Spiritu Santu ku mi Salbador sa ken mi tabata i ku e Evangelio tabata bèrdat.

Elder David A. Bednar a siña: “E konosementu ku e Evangelio ta bèrdat ta e esensia di un testimonio. Ser konsistente den e Evangelio ta e esensia di kombershon. ”¹⁵ Kombershon ta rekerí pa nos ta “hasidó di e palabra, i no solamente skuchadó.”¹⁶ Señor su plan di akshon pa nos— e doktrina di Cristu —ta wòrdu siña ku mas klaridat den e Buki di Mormon.¹⁷ E ta inkluí:

Promé, ehersé fe den JesuCristu dor di konfia E, wardando Su mandamentunan, i sa ku E lo yuda nos.¹⁸
Di dos, arepintiendo diariamente di nos defisiensianan i eksperensha felisidat i pas ora ku E pordoná nos.¹⁹ Arepentimentu ta rekerí ku nos tin ku pordoná otronan²⁰ i ta yuda nos sigui pa dilanti. E Salbador a primintí di pordoná nos kada bes ku nos arepentí.²¹
Tres, hasiendo i wardando konvenionan ku Dios dor di su ordenansanan manera boutismo. Esaki lo tene nos riba a kaminda di konvenio ku ta guia na E.²²
Kuater, risibiendo e don di Spiritu Santu. E don aki ta permití nos di tin e kompania konstante di esun ku ta santifiká i guia nos.²³
I sinku, perseverá te final dor di pusha bai dilanti firme miéntras deleitando r diariamente iba e palabra di Cristu.²⁴ Deleitando di e Buki di Mormon i pega nos mes na su enseñansanan nos por vense tentashonnan i risibí guia i protekshon durante nos bida.²⁵

Dor di apliká e doktrina di Cristu konsistentemente den nos bida, nos por superá inertia ku ta impedí kambio i miedu ku ta frustra akshon. Nos lo risibí revelashon personal for di e Spiritu Santu “lo mustra bo tur e kosnan ku bo tin ku hasi,”²⁶ i “e palabranan di Cristu lo bisa bo tur e kosnan ku bo mester hasi.”²⁷

Pa 20 aña, Ruman Huang Juncong a lucha ku alkohòl, sigaria i gembelmentu kompulsivo. Ora ku a el a wòrdu introdusí na e Evangelio restourá di JesuCristu Ruman Huang a deseá na kambia pa bienestar di su famia. Su desafio di mas grandi tabata humamentu. Siendo un gran humadó, el a trata pa stòp hopi biaha sin éksito. Un dia e palabranan aki di e Buki di Mormon a keda den su: “ku un kurason sinsero ku intenshon berdadero.”²⁸ Aunke e intento nan anterior tabata un frakaso, el a sinti ku kisas e por kambia ku yudansa di nos Tata Selestial i JesuCristu.

E misionero nan di tempu kompletu a uni nan fe huntu ku di dje i a proveé un plan di akshon òf intervenshon práktiko huntu ku un dosis pisa di orashon i estudio di e palabra di Dios. Ku un sinsero i berdadero intenshon, Ruman Huang a aktua ku un fe determiná i a haña sa ku si e enfoká mas riba e habito nan nobo ku e ta deseá pa desaroyá, manera estudio di Buki Mormon, e lo enfoká ménos riba e habito nan ku e kier pèrdè.

Rekordando su eksperensha nan di 15 aña pasa, e ta remarka, “Mi no ta kòrda presis na ki momentu mi a stòp di huma pero miéntras mi ta purba tur dia pa hasi e kos nan ku mi sa ku mi mester hasi pa invitá e Spiritu di Señor den mi bida i sigui hasi esaki, lo mi no sinti atrakshon pa e sigaria i esaki no a pasa for di e tempu.” Pa medio di apliká e enseñansanan di e Buki di Mormon, e bida di Ruman Huang a kambia i el a bira un mihó kasa i tata.

Presidente Russell M. Nelson a primintí: “Miéntras bo ta studia e Buki Mormon den orashon tur dia, lo bo tuma mihó desishonnan —tur dia. Mi ta primintí ku ora bo meditá riba loke ba studia e bentananan di shelu lo habri i lo bo risibí kontestanan riba bo propio preguntanan i direkshon pa bo propio bida. Mi ta primintí ku segun bo profundisá diariamente den e Buki di Mormon bo por wòrdu inmunisá kontra dianan malu, inkluso e plaga fuerte di pornografia i otro adikshonnan ku turdi nos mente.”²⁹

Kerido amigunan, e Buki di Mormon ta e palabra di Dios, i nos lo aserka mas na DjE si nos ta studi’é.³⁰ Segun nos ta eksperimentá ku su palabranan,³¹nos lo optené un testimonio di su verasidat. Si nos ta biba konsistentemente segun su enseñansanan, nos lo “no tin deseo pa hasi malu.”³² Nos kurason, semblante i naturalesa lo wòrdu transformá pa nos por bira mas manera e Salbador.³³ Mi ta duna mi testimonio ku siguransa ku Jesus ta e Cristu, nos Salbador, Redentor i Amigu. Den e nòmber di Jesu Cristu, amèn.