Un Bon Fundeshi kontra di e Tempu ku ta Bini
Durante e añanan benidero, ku nos por permiti e mehorashonnan aki na e Tèmpel di Salt Lake motivá i inspirá nos.
Historia di e Tèmpel di Salt Lake
Laga nos biaha bèk na e mèrdia kayente dia 24 di yüli, 1847 rònt di 2 or di mèrdia. Despues di un biahe difísil di 111 dia ku 148 miembro di Iglesia ku a forma e promé parti pa bai wèst, Brigham Young,e tempu ei Presidente di e Quorum di e Diesdos Apòstelnan, malu i debil pa un keintura di den seru, a drenta e Vaye di Salt Lake.
Dos dia despues, miéntras e tabata rekuperando si su malesa, Brigham Young a dirigí vários miembro di e Quorum di e Diesdos Apòstelnan i otronan den un ekspedishon di eksplorashon. William Clayton a registrá: “Aproksimadamente tres kuarto di mia nort di e kampamentu, nos a yega na un pida tera bunita, nivelá i ku un bon bahada na west.”1
Miéntras e tabata inspekshoná e lugá ku e grupo, diripiente Brigham Young a stòp i a hinka su baston den e tera, sklamando, “Aki lo tin un Tèmpel di nos Dios.” Un di su kompañeronan tabata Elder Wilford Woodruff, ku a bisa ku e deklarashon “a pasa dor di [dje] manera un werlek” , i el a hiba un taki den e suela pa marka e lugá marká pa e baston di presidente Young. A selekshoná acre (16 ha) pa e tèmpel, i a wòrdu disidí ku e suidat lo mester ta “perfektamente kuadrá nòrt & zùit, ost & west “ ku e tèmpel komo sentro.2
Na konferensia di aprel 1851, e miembronan di Iglesia a vota unánime pa sostené un moshon pa konstruí un tèmpel “na e nòmber di Señor.”3 Dos aña despues, na 14 di febrüari 1853, e lugá a wòrdu dediká pa Heber C. Kimball Kimball den un seremonia públiko ku asistensia di vários mil Santunan, i tera a wòrdu habrí pa e fundeshi di e tèmpel. Algun luna despues, riba 6 di aprel, e piedranan angular masivo di tèmpel a wòrdu butá i dediká ku seremonianan elaborá ku a inkluí un vigilante di koló i bandanan i un proseshon dirigí pa lidernan di Iglesia for di e antiguo tabernakulo te na e lugá di e tèmpel, kaminda tabatin komentario i orashonnan a wòrdu hasí na kada un di e kuater piedranan angular.4
Na e seremonia di inougurashon, Presidente Young a rekòrdá ku el a haña un vishon e promé biaha ku el a pone pia den e tera miéntras nan tabata inspekshoná e suela di e vaye, afirmando: “Mi tabata sa [e tempu ei], meskos ku mi sa awor, ku esaki tabata e tereno riba kual mester a pone un tèmpel—e tabata mi dilanti.”5
Dies aña despues, Brigham Young a ofresé e siguiente bista profétiko den e konferensia general di òktober 1863: “Mi ke mira [e] tèmpel wòrdu konstruí di un manera ku lo dura durante e milenio. Esaki no ta e úniko tèmpel ku nos lo konstruí; lo bai tin sentenar di nan konstruí i dediká na Señor. E tèmpel aki lo ta konosí komo e di promé tèmpel konstruí den e serunan dor di e Santunan di eDelaster Dianan. … Mi ke pa e tèmpel aki … ta pará komo un monumento orguyoso di e fe, perseveransia i industria di e Santunan di Dios den e serunan .”6
Revisando e historia kòrtiku aki, mi ta asombrá di e ròl di vidente di Brigham Young—di promé, su garantia ku, den lokual ta posibel i, usando e métodonan di konstrukshon disponibel den e momentu i lugá, e Tèmpel di Salt Lake lo wòrdu konstruí di un manera pa dura durante di e Milenio i, na di dos lugá, su profesia tokante di e kresementu di e futuro tèmpelnan den henter mundu, hasta e kantidat di sentenar.
Renobashon di e Tèmpel di Salt Lake
Meskos ku Brigham Young, nos profetanan di awendia ta söru pa e Tèmpel di Salt Lake i tur e otro tèmpelnan ku gran kuido. Durante e añanan, e Promé Presidensia, di tempu pa tempu, a konsehá e Obispado ku ta Presidí pa sigurá ku e fundeshi di e Tèmpel di Salt Lake ta sólido. Tempu mi tabata sirbi den e Obispado ku ta Presidí, na petishon di e Promé Presidensia, nos a hasi un revishon general di e Tèmpel di Salt Lake, inkluso un evaluashon di e avansenan mas resiente den diseño sísmiko i téknikanan di konstrukshon.
Aki ta parti di e revishon proveé pa e Promé Presidensia di e tempu ei: “Den e diseño i konstrukshon di e Tèmpel di Salt Lake, a uza e mihó rekursonan, di ingenieria, obra di man kualifiká, materialnan di konstrukshon, mobilario i otro rekursonan disponibel den e periodo aya. For di su dedikashon na 1893, e tèmpel a para firme i a sirbi komo un faro di fe [i] speransa i komo un lus na e pueblo. Gran kuido a wòrdu tumá pa operashon, limpiesa, i mantené e tèmpel den bon kondishon. E granit eksterior i balkinan di flur interior i e balkinan di sosten ta den bon kondishon. Estudionan resiente a konfirmá ku e lugá skohé pa Brigham Young pa e tèmpel tin masha bon tera i kualidat ekselente pa komprimí e tera.”7
E revishon a konkluí ku mester hasi reparashonnan normal i mehoramentu pa renobá i aktualisá e tèmpel, inkluyendo e kobertura eksterior i e áreanan di e superfisie, e sistemanan di utilidat opsoleto i e áreanan di boutisterio. Sinembargo, konsiderashon di un mehoramentu sísmiko mas kompletu separá kuminsando for di e fundeshi di e tèmpel te ariba.
E Fundeshi di e Tèmpel
Manera boso por kòrda, Presidente Brigham Young mes tabata enbolbí den gran detaye den konstrukshon di e fundeshi original di e tèmpel, ku a sirbi e tèmpel bon for di su finalisashon 127 aña pasá. E pakete nobo di aktualisashon sísmiko resientemente proponé pa e tèmpel lo utilisá teknologia básiko pa isolá, ku no a wòrdu ni imaginá na momentu di su konstrukshon. Esaki ta konsiderá e teknologia nobo mas avansá pa protekshon kontra teremoto.
E teknologia aki, resiente den su desaroyo, ta kuminsá na e fundeshi mes di e tèmpel, dunando un defensa robusto kontra daño di un teremoto. Esensialmente, e ta fortalesé e tèmpel su struktura pa para firme , inkluso ora e tera i su bisindario eksperensia un evento sísmiko.
E renobashon di tèmpel ku lo hasi uso di e teknologia aki a wòrdu anunsiá pa e Promé Presidensia aña pasá. Bou di direkshon di e Obispado Presidente, konstrukshon a kuminsá algun luna pasá, na yanüari 2020. Segun estimashon e lo wòrdu kompletá den aproksimadamente kuater aña.
Sigurá Boso Fundeshi Personal
Miéntras mi ta kontemplá e siguiente kuater añanan di e bida di e Tèmpel di Salt Lake bunita, noble, eksaltá, i imponente, mi ta imaginá mas komo un tempu di renobashon na lugá di tempu di seramentu! Di manera similar, nos por puntra nos mes, “Kon e renobashon ekstenso aki di e Tèmpel di Salt Lake por inspirá nos pa someté nos na nos propiorenobashon spiritual, rekonstrukshon, nasementu di nobo, revitalisashon, òf restourashon?”
Un mirada di eksaminashon propio por revelá ku nos tambe i nos famia por tin benefisio di hasi algun trabou di mantenshon i renobashon nesesario inkluso u aktualisashon sísmiko! Nos por kuminsá tal proseso dor di puntra:
“ Kiko mi fundeshi ta parse?”
“Kiko ta enserá e piedranan angular di murayanan diki, stabil i fuerte ku ta parti di mi fundeshi personal, riba kual mi testimonio ta sosegá?”
“Kua ta e elementonan fundamental di karakter spiritual i emoshonal ku lo pèrmití ami i mi famia pa keda firme i sin move, inkluso pa resistí e eventonan sísmiko di temblor i tumulto ku sigur lo pasa den nos bida?”
Susesonan ku ta similar na un teremoto hopi biaha ta difísil pa predesí i ta bini den vários nivel di intensidat—luchando ku preguntanan òf duda, eksperensiá aflikshon òf atversidat, trahando dor di ofensanan personal ku lidernan, miembronan, doktrina, òf polítika di Iglesia. E mihó defensa kontra di e mentiranan aki den nos fundeshi spiritual.
Kiko por ta e piedranan angular spiritual di nos bida personal i familiar? Nan lo por ta prinsipionan simpel, kla, i presioso di biba e evangelio—orashon familiar, studiamentu di skritura inkluyendo e Buki di Mormon, bai tèmpel, i siñamentu di evangelio dor di Bini, Sigui Mi i nochi di hogar. Otro rekursonan ku ta yuda pa fortalesé boso fundeshi spiritual por inkluí e Artíkulonan di Fe, e proklamashon di famia, i “E Cristu Bibu.”
Pa mi, e prinsipionan inkluí den e preguntanan hasí komo parti di risibí un rekomendashon pa tèmpel ta sirbi komo un base fuerte pa un fundeshi spiritual—partikularmente e promé kuater preguntanan. Mi ta mira nan komo piedranan angular spiritual.
Nos, klaro, ta familiar ku e preguntanan aki, komo ku Presidente Russell M. Nelson a lesa nan un pa un na nos den e delaster konferensia general.
-
Bo tin fe den i un testimonio di Dios e Tata Eterno; Su Yu, JesuCristu; i e Spiritu Santu?
-
Bo tin un testimonio di e Ekspiashon di JesuCristu i Su ròl komo bo Salbador i Redentor?
-
Bo tin un testimonio di e Restourashon di e evangelio di JesuCristu?
-
Bo ta sostené e Presidente di E Iglesia di JesuCristu di e Santunan di e Delaster dia komo e profeta, vidente i revelador i komo e úniko persona na mundu outorisá pa ehersé tur yabi di saserdosio?8
Boso por wak kon boso por konsiderá e preguntanan aki komo elementunan valioso den boso fundeshi personal pa yuda boso edifiká i hasié mas fuerte? Pablo a siña e Efesionan di un iglesia ku a tabata “edifiká riba e fundeshi di apòstelnan i profetanan, Jesu Cristu siendo e mes e piedra angular prinsipal; den kual henter e struktura di e edifisio ta pas den otro i ta krese bira un tèmpel santu den Señor.”9
Un di e gosonan di mas grandi di mi bida ta pa familiarisá miembronan ku i wòrdu inspirá pa miembronan di Iglesia rònt henter mundu ku ta ehèmpelnan bibu di fe den Jesu Cristu i Su evangelio. Nan a edifiká fundeshinan personal fuerte ku ta pèrmití nan pa soportá e eventonan sísmiko ku un komprenshon konstante i goso profundo i permanente.
Pa mustra esaki riba un nivel mas personal, mi a papia resientemente na entiero di un esposa bunita, vibrante, yòn i mama (tambe un amiga di nos). E tabata hungadó di futbòl di promé divishon 1 desaliñá tempu el a konosé i a kasa ku su esposo, studiante pa bira dentista. Nan a wòrdu bendishoná ku un yu muher bunita i presioso. El a batayá ku balentia vários forma di kanser pa seis aña desafiante. Apesar di e angustia emoshonal i físiko ku el a eksperensiá, e tabata konfia den su Tata Selestial amoroso i su siguidornan di ret sosial tabata sit’é hopi pa su famoso dicho: “Dios ta den e detayenan.”
Den un di su publikashonnan di ret sosial el a skibi ku un persona a puntr’é, “Kon ainda bo tin fe ku tur e dolor ku ta rondoná bo?” El a kontestá ku firmesa ku e palabranan aki: “Pasobra fe ta lokual yuda mi dor di e tempunan skur aki. Tin fe, no ta nifiká ku nada malu no ta bai pasa. Tin fe ta pèrmití mi pa kere ku lo tin lus atrobe. I e lus ei lo ta ainda mas briante pasobra mi a kana den skuridat. Tantu skuridat ku mi a presensiá durante e añanan, mi tabata testigu di muchu mas lus. Mi a mira milagernan. Mi a sinti angelnan. Mi a yega di sa ku mi Tata Selestial tabata kargando mi. Ningun di esei lo no a wòrdu eksperensiá si bida tabata fásil. E futuro di e bida aki por ta deskonosí, pero mi fe no ta. Si mi skohe pa no tin fe e ora ei mi a skohe pa kana den skuridat so. Pasó sin fe, skuridat ta tur lokual ta sobra.”10
Su testimonio firme di fe den Señor Jesu Cristu—den su palabranan i su akshonnan—tabata un inspirashon pa otronan. Apesar ku su kurpa tabata debil, el a lanta otronan pa ta mas fuerte.
Mi ta pensa riba innumerabel kantidat di miembronan di Iglesia, guereronan meskos e ruman aki, ku ta kana tur dia den fe, luchando pa ta disípulonan berdadero i sin temor di nos Salbador, JesuCristu. Nan ta siña di Cristu. Nan ta prediká di Cristu. Nan ta purba pa sigui Su ehèmpel. Sea e dianan di nan bida ta riba un tera firme òf instabil, nan sa ku nan fundeshi spiritual ta fuerte i inmovibel.
Esakinan ta e almanan deboto ku ta komprondé e signifikado di e letranan “Que Firme Cimientos, Santos del Señor” i “esun ku a skaba bai refugia den Señor.”11 Mi ta ekstremadamente gradesido pa por kana entre esunnan ku a prepará un fundeshi spiritual digno di e nòmber di Santunani ku ta fuerte i sufisientemente sigur kon pa resistí hopi tumultonan di bida.
Mi no ta kere ku nos por strès sufisiente e importansia di tal fundeshi den nos bida personal. Hasta na un edat hóben, nos muchanan di Primaria ta siña ora nan kanta e bèrdat aki:
E hòmber sabí a konstruí su kas riba e baranka,
I e áwaserua basha abou. …
E áwaseru a kai, i e inundashona bin,
I e kas riba e barankaa keda para.12
Skrituranan ta reforsá e doktrina fundamental aki. E Salbador a siña e pueblo di Amérika:
“I si boso hasi e kosnan aki pa semper boso lo ta bendishoná, pasó boso ta konstruí riba mi baranka.
“Pero esun di boso ku lo hasi mas òf ménos ku esaki, lo no ta konstruí riba mi baranka pero ta konstruí riba un fundeshi di santu; i ora áwaseru a kai, i e inundashon a bini, i e bientu a supla, i a bati kontra di esaki, nan lo kai.”13
Ta e speransa sinsero di e lidernan di Iglesia ku e renobashonnan signifikante di e Tèmpel di Salt Lake lo kontribuí na kumplimentu di e deseo di Brigham Young di mira “e tèmpel konstruí di un manera ku lo e permanesé durante e milenio.” Durante e añanan benidero, ku nos por permiti e mehorashonnan aki na e Tèmpel di Salt Lake motivá i inspirá nos, komo individuo i komo famia, ku nos tambe — metaforikamente—lo “konstruí den un manera ku lo permanesé den e milenio.”
Nos lo hasi asina segun nos kumpli ku e enkargo di e Apòstel Pablo pa “[pone] den e reserva pa [nos mes] un bon base kontra di e tempu ku ta bini, pa nos por tene duru na e bida eterno.”14 Ta mi orashon ardiente ku nos fundeshi spiritual lo ta sigur, ku nos testimonio di e Ekspiashon di Jesu Cristu i di Su ròl komo nos Salbador i Redentor lo bira pa nos [nos] propio piedra angular prinsipal, di kual mi ta testifiká den Su nòmber, ku ta JesuCristu, amèn