Uni den Kumplimentu di e Obra di Dios
E manera mas efektivo pa kumpl kui nos potensial divino ta traha huntu, bendishoná dor di e poder i outoridat di e saserdosio.
Kerido rumannan [boso ku ta] maravioso, ta un goso pa ta huntu ku boso. Kiko ku bo por ta skuchando, mi ta ekstendé brasa pa mi hermananan i un man sinsero na mi hermanonan. Nos tauní den e obra di Señor.
Ora ku nos pensa riba Adam i Eva hopi biaha nos promé pensamentu ta tokante nan bida agradabel den e Hardin di Eden. Mi ta imaginá ku e wer tabata semper perfekto—no muchu kayente ni muchu friu—i ku fruta i berduranan delisioso tabata krese na abundansia den nan alkanse di manera ku nan por a yega na dje i kome ora ku nan tabata deseá. Komo ku esaki tabata un mundu nobo pa nan ta tin hopi kos pa diskubrí pues kada dia tabata interesante segun nan tabata interaktua ku e animalnan i eksplorá e bista bunita rondó di nan. Tambe a duna nan mandamentunan pa obedesé i tabata tin diferente manera pa atendé e instrukshon nan aki, kual a kousa sierto hansha i konfushon na inisio. 1 Pero ora ku nan a tuma desishonnan ku a kambia nan bida pa semper nan a siña traha huntu i a uni pa logra propósitonan ku Dios tabata tin pa nan i pa tur Su yu nan.
Awor imaginá bo e mesun pareha aki den bida mortal. Nan mester a traha pa nan kuminda. Algun animal tabata konsiderá nan kuminda i tabata tin retonan difísil kual solamente por a wòrdu superá si nan tabata konsehá otro i resa huntu. Mi ta imaginá ku tabata tin algun momentu ku nan tabata tin diferensha di opinion tokante kon pa atendé ku e retonan aki. Sinembargo pa medio di e kaida nan a siña ku tabata esensial pa aktua den unidat i amor. Den e instrukshonnan ku nan a risibí for di e fuente divino, nan a siña e plan di salbashon i e prinsipionan di e evangelio di JesuCristu kual ta hasi e plan operashonal. Dor ku nan a komprondé ku nan propósito na mundu i meta eterno tabata idéntiko, nan a haña satisfakshon i éksito ora nan tabata siña traha ku amor i rektitut ku otro.
Ora ku nan a haña yunan, Adam i Eva a siña nan famia loke nan a siña for di mensaheronan selestial. Nan tabata konsentrá pa yuda nan yunan tambe komprondé i brasa e prinsipionan kual lo hasi nan felis den e bida aki i tambe prepará pa regresá ku nan mayornan selestial despues di a oumentá nan abilidatnan i demostrá nan obedensia na Dios. Den e proseso Adam i Eva a siña pa apresiá e diferensia di nan fortalesa i sostené otro den nan labor eternamente signifikativo.2
Segun e siglonan i milenionan tabata bai i bin e klaridat pa ku e kontribushon interdependiente di hòmber i muhénan inspirá a wòrdu tapa ku nubianan di informashonnan eróneo i mal komprondementu. Durante e maravioso komienso di e hardin di Eden te ku awor e atversario tabata tin bastante éksito den su ophetivo pa dividí hòmber i muhénan den su intento pa konkista nos almanan. Lusifer sa ku si e por daña e unidat ku hòmber i muhé nan ta sinti, si e por konfundí nos tokante nos balor divino i e responsabilidatnan di e konvenio, e lo logra na destruí famianan, kual ta e unidatnan esensial di e eternidat.
Satanas ta alenta komparashon komo un hèrmènt pa krea sintimentunan di ta superior o inferior, skondiendo e bèrdat eterno ku hòmber i muhénan su diferenshanan a wòrdu duna dor di Dios i ta wòrdu balorá igual. El a intentá na degradá e kontribushon di hende muhé nan, tantu na e famia komo e sosiedat sivil, redusiendo di e manera aki su influensha edifikante pa semper. Su meta ta pa fomentá un lucha di poder na lugá di un selebrashon di kontribushonnan úniko di hòmber i muhénan ku ta komplementá otro i kontribuí na e unidat.
Atraves di añanan i den hinter e mundu e komprondementu kompletu di e divino interdependiente i ku un diferensia di e kontribushonnan i responsabilidatnan di hende muhé i hòmber a disparsé den gran forma. Muhénan den hopi sosiedat a bira supordinado na hòmbernan en bes di parehanan uni, ku aktividatnan masha limitá mes. E progreso spiritual a baha durante e tempunan skur; tambe, poko lus spiritual por a penetrá den e mentenan i e kurasonnan hundi ku tradishon di dominashon.
I despues e lus di e evangelio restourá a bria“riba e brio di solo”3 ora ku Dios e Tata i Su Yu JesuCristu a aparesé na e mucha hòmber Jose Smith tempran den lènte di aña 1820, den e mondi sagrado di estado di New York. E evento ei a kuminsá un ekspanshon moderno di revelashon for di shelu. Un di e promé elementonan di e Iglesia original di Cristu ku a wòrdu restourá ta e outoridat di e saserdosio di Dios. Segun e Restourashon a sigui desaroyá, hòmber i e muhé a kuminsá ripara e importansha i e potensial di traha huntu komo sosionan, outorisá i dirigí pa E den e trabou sagrado aki.
Na 1842 ora ku e muhénan na inisio di Iglesia kier a forma un grupo ofisial pa yuda den e trabou, e presidente Jose Smith a sinti su mes inspirá pa organisá e hende muhénan “bou di e saserdosio segun e patronchi di saserdosio.”4 El a bisa, awor mi ta duna bo e yabinan den nòmber di Dios …—esaki ta e inisio di e mihó dianan.”5 I for di momentu ku e yabi a wòrdu duna, edukashon, polítika i oportunidatnan ekonómiko pa hende muhé a kuminsá ekspandé gradualmente dor di mundu.6
E organisashon pa e hende muhénannobo aki, di e Iglesia kual ta yama Sosiedat di Sokoro, tabata diferente na otro sosiedatnan di hende muhé den e dianan ei, paso e la wòrdu establesé dor di un profeta ku a aktua ku outoridat di saserdosio pa otorgá na e muhénan outoridat, responsabilidat sagrado i posishonnan ofisial den e struktura di Iglesia,no apart di dje.7
For di den tempu di e Profeta Jose Smith te ku nos tempu, e kontinuashon di e restourashon di tur kos a trese kuné iluminashon riba e nesesidat di e outoridat i poder di e saserdosio, yudando hòmber i muhé pa kompletá nan responsabilidat divino kual wòrdu asigná na nan. Resientemente nos a siña ku muhénan ku wòrdu apartá dor di unu ku ta poseé e yabinan di saserdosio ta operá ku outoridat di e saserdosio den nan yamamentu.8
Den òktober 2019, Presidente Russell M. Nelson a siña ku hende muhénan ku ta investí den tèmpel tinpoder di Saserdosio den nan bida i den nan kas si nan warda e konvenionan sagrado ku nan a hasi ku Dios.9 El a splika ku “e Shelu ta mesun habrí pa hende muhéku ta investí ku Dios Su poder kual ta sali for di nan kombenio di saserdosio manera esaki ta pa hende hòmber ku ta poseé e saserdosio.” I el a enkurashá tur hermana pa “rekurí libremente na e Salbador su poder pa yuda bosnan famia i otronan ku bosnan ta stima.”10
Kiko esaki ta nifiká pa abo i ami? Kon e komprenshon di e outoridat i poder di saserdosio ta kambia nos bida? Un di e klavenan ta pa komprondé ku ora hende muhé i hende hòmber traha huntu, nos ta logra muchu mas ku ora nos traha separá.11 Nos ròlnan ta mas komplementario ku kompetitivo. Ounke hende muhé no ta ordená den e ofisio di saserdosio, manera a wòrdu señalá anteriormente e hende muhé ta wòrdu bendishoná ku e poder di e saserdosio si nan warda e kombenionan i nan ta aktua ku e outoridat di e saserdosio ora ku nan wòrdu apartá pa un yamamentu.
Riba un dia dushi den ougùstùs mi tabata tin e privilegio di a sinta ku Presidente Russell M. Nelson den e kas rekonstruí di Jose i Emma Smith na Harmony, Pennsylvania, serka di e lugá kaminda e Saserdosio Aaróniko a wòrdu restourá den e último dianan. Den nos kombersashon Presidente Nelson a papia tokante e ròl importante ku hende muhé ta hunga den e Restourashon.
Presidente Nelson: Un di e aspektonan mas importante ku ami ta kòrda ora mi bin na e sitio di Restorashon di e Saserdosio ta e ròl importante ku hende muhé a hunga den e Restorashon.
“Ora Jose a kuminsá e promé bes ku e tradukshon di e Buki Mormon, ken a skirbi? Awèl, el a hasi un tiki pero no hopi. Emma a yuda.
“I despues mi ta pensa kon Jos a bai den e mondi pa hasi orashon banda di nan kas na Palmyra, New York. Unda el a bai? El a bai na e mondi sagrado. Dikon el a bai einan? Pasó ta einan Mama tabata bai ora ku e kier a hasi orashon.
“Esei ta djis dos di e hende muhénan ku tabatin un ròl klave den e Restorashon di e Saserdosio i e restorashon di e Iglesia. Nos por bisa sin ningun duda, ku nos kasánan ta mesun importante awor aki ku nan tabata e tempu ei. Sigur ku nan ta.”
Manera Emma i Lucy i Jose nos ta mas efektivo ora ku nos ta disponibel pa siña for di otro i ta uni den nos meta pa yega na bira disipulonan di JesuCrustu i yuda otronan riba e kaminda.
Nos ta siña ku e “saserdosio ta bendishoná e yunan di Dios diferente manera. … Den yamamentunan di [Iglesia], ordenansanan di tèmpel, relashonnan familiar i e ministerio individual muhénan Santu di Delaster Dianan i hòmbernan ta avansá den e poder i outoridat di e saserdosio. E interdependensia aki di hende hòmber i hende muhé den kumplimentu ku Dios su obra dor di Su poder, ta sentral den e evangelio restourá di JesuCristu dor di e Profeta Jose Smith.”12
Unidat ta esensial pa e obra divino ku nos ta privilegiá i yamá pa hasi, pero e no ta djis sosodé. E ta kosta esfuerso i tempu pa realmente konsehá huntu—pa skucha otro, komprondé otro su punto di bista, i kompartí eksperenshanan—pero e proseso ta resultá den desishonnan mas inspirá. Sea na kas òf den nos responsabilidatnan di Iglesia, e manera mas efektivo pa yena nos potensial divino ta traha huntu, bendishoná dor di e poder i outoridat di Su saserdosio den nos diferente ròlnan.
Kon e asosashon ta mustra den e bida di muhénan di kombenio awendia? Laga mi kompartí un ehèmpel.
Alison i John tabata tin un relashon ku tabata úniko. Nan a kore rutanan kòrtiku i largu ku un baiskel tandem. Pa por kompetí ku éksito riba e vehíkulo e dos koredónan mester ta den harmonia. Nan mester a siña pa len den mesun direkshon na e momentu korekto. Un no por dominá e otro, pero nan mester komuniká kla i kada un ta hasi su parti. E kapitan, dilanti, tin kontròl riba ki ora tin ku wanta i ki ora tin ku para. E stoker,sintá patras, mester pone atenshon na kiko ta pasando i ta prepará pa pone èkstra forsa si nan kai atras òf si nan ta relahá, si nan ta yega muchu serka di e otro siklistanan. Nan mester a apoyá otro pa progresá i logra nan meta.
Alison a splika: “E promé ratu e persona den posishon di kapitan lo mester a bisa ‘para’ ora ku nos mester a para i wanta ora ku nos mester stòp di trapa. Despues di un ratu e persona ku tabata e stoker a siña pa bisa ki ora e kapitan tabata serka di para òf wanta i sin mester a bisa niun palabra. Nos ta siña pa ta pendiente pa sa kon ta bayendo ku otronan i nos por sa na ki momentu unu tabata lucha [despues] e otro ta trata pa rekuperá. Di bèrdat e ta trata di konfia i traha huntu.”13
John i Alison no tabata solamente uni ora ku nan tabata kore baiskel,pero nan tabata uni den nan matrimonio tambe. Kada un tabata deseá e felisidat di e otro mas tantu ku di su mes; kada un tabata wak e bon den e otro i traha pa superá e parti ménos bon den su mes. Nan tabata kambia liderato i kambia dunando mas ora un pareha tabata luchando. Kada un a balorá e otro su kontribushon i a haña mihó respuestanan pa nan retonan dor di kombiná nan talentonan i rekursonan. Di bèrdat nan ta uni na otro pa medio di e amor Kristian.
Yega na ta mas den frekuensia ku e patronchi divino pa traha huntu den union ta kritiko awor aki kaminda e mensahe “ami promé” ta rondoná nos. Hende muhé nan ta poseé donnan distintivo 14 i ta haña responsabilidatnan úniko, pero esei nan no ta ni mas ni ménos importante ku e donnan i responsabilidatnan di hende hòmbernan. Tur ta diseñá i ta nesesario pa ehekutá e plan divino di e Tata Selestial pa duna kada un di su yu nan e mihó oportunidat pa alkansá su potensial divino.
Awe, “nos mester di hende muhé ku tin e kurashi i vishon di nos mama Eva”15 pa uni ku su rumannan i trese mas alma na Cristu.16 Hòmbernan mester konvertí den sosionan berdadero na lugá di asumí ku nan ta e úniko nan responsabel o pretendé di aktua komo sosionan, miéntras ku e muhé nan ta hasi mayoria parti di e trabou. Hende muhé mester ta dispuesto pa “dal un paso dilanti i tuma nan lugá legítimo i nesesario ”17 komo pareha na lugá di pensa ku nan mester hasi tur kos nan so o warda pa sa ki pa hasi.18
Mirando e hende muhé komo un partisipante vital no ta trata di krea “igualdat” pero yega na komprondé e bèrdat di e doktrina. Na lugá di un programa pa logr’é nos por traha aktivo huntu pa balorá e hende muhé nan manera Dios ta hasi: komo partnernan esensial den e trabou di salbashon i eksaltashon.
Nos ta kla? Nos lo hasi nos esfuerso pa superá influenshanan kultural i akambio adaptá nos mes na patronchi i práktikanan divino basa riba e doktrina fundamental? Presidente Russell M. Nelson ta invitá nos pa “kana man tene den e obra sagrado aki … [pa] yuda prepará e mundu pa Segundo Binida di Señor.”19 Si nos hasié nos lo siña balorá kada individuo su kontribushon i oumentá e efektividat ku nos ta kumpli nos ròl divino kuné. Nos lo sinti un alegria mas grandi ku hamas nos a yega di eksperensha.
Ku kada un di nos por skohe pa uni den e forma inspirá di Señor pa yuda su obra avansá. Den e nòmber di nos Salbador stima, JesuCristu, amèn.