E Podernan di e Saserdosio
Magnifiká e santu saserdosio ku boso ta poseé ta vital pa e obra di Señor den boso famianan i den yamamentunan di Iglesia.
Nos a skucha un anunsio reveladó di Presidente Russell M. Nelson. I tambe elaborashonnan importante di Èldernan Christofferson i Rasband i di Presidente Eyring. Lokual ku lo wòrdu bisá ainda, inkluso mas for di Presidente Nelson, lo elaborá lokual boso, Señor su lidernan i poseedornan di saserdosio, lo hasi awor den boso responsabilidatnan. Pa yuda ku esaki, lo mi revisá algun prinsipio fundamental ku ta goberná e saserdosio ku boso ta poseé.
I. E Saserdosio
E Saserdosio di Melkisedek ta e outoridat dibino ku Dios a delegá pa kumpli ku Su obra “logra e ... bida eterno di e hòmber. (Moises 1:39 ). Na 1829, el a wòrdu konferí riba José Smith i Oliver Cowdery pa e Salbador su Apòstelnan Pedro, Hakobo, i Juan (wak D&C 27:12).
E yabinan di e Saserdosio ta e podernan pa dirigí e ehersementu di e outoridat di saserdosio. Pues, ora e Apòstelnan a konferí e Saserdosio di Melkisedek riba José i Oliver, tambe nan a duna nan e yabinan pa dirigí su ehersementu (wak D&C 27:12–13). Pero no tur yabi di saserdosio a wòrdu konferí na e momentu ei. E yabinan i konosementu kompleto nesesario pa e “dispensashon di e plenitut di tempunan” (D&C 128:18) ta wòrdu duná “liña riba liña” (verso 21). Yabinan adishonal a wòrdu duná shete aña despues den e Tèmpel di Kirtland (wak D&C 110:11–16). E yabinan aki a wòrdu duná pa dirigí outoridat di saserdosio den e asignashonnan adishonal duná na e tempu ei, manera boutismo pa mortonan.
E Saserdosio Melkisedek no ta un status òf un marka. E ta un poder dibino tené den konfiansa pa usa pa benefisio di e obra di Dios pa Su yunan. Semper nos tin ku kòrda ku hòmbernan ku ta poseé e saserdosio nota “e saserdosio.” No ta apropiá pa referí na “e saserdosio i e muhernan.” Nos tin ku referí na “e poseedornan di e saserdosio i e muhernan.”
II. Un Ministerio di Servisio
Awor laga nos konsiderá kiko Señor Jesucristu ta spera di esnan ku ta poseé Su saserdosio—kon nos ta bai trese almanan na Dje.
Presidente Joseph F. Smith a siña: “Di bèrdat a wòrdu bisá ku e Iglesia ta organisá perfektamente. E úniko problema ta ku e organisashonnan aki no ta kompletamente konsiente na e obligashonnan ku ta spera di nan. Ora nan bira kompletamente konsiente na e rekisitonan hasí di nan, nan lo kumpli ku nan deber mas fielmente, i e obra di Señor lo ta mas fuerte i mas poderoso i ku mas influensia den e mundu.”1
Presidente Smith a atvertí tambe:
“ E títulonan di honor duná pa Dios …asosiá ku e diferente ofisionan den i órden di e Santu Saserdosio, no ta pa usa ni konsiderá tal komo e títulonan originá di hende; nan no ta pa adorno ni tampoko nan no ta ekspreshon di dominio, pero mas bien un asignashon pa sirbi ku humildat den e obra di esun Maestro ku ta profesá pa sirbi. …
“... Nos ta trahando pa e salbashon di almanan, i nos mester sinti ku esaki ta e deber di mas grandi konfiá na nos. P’esei, nos mester sinti nos dispuesto pa sakrifiká tur kos, si ta nesesario, pa e amor di Dios, e salbashon di hende, i e triunfo di e reino di Dios na tera.”2
III. E Ofisionan di e Saserdosio
Den e Iglesia di Señor, e ofisionan den e Saserdosio Melkisedek tin diferente funshon. E Doctrina y Convenios ta referí na sumo saserdotenan komo presidentenan òf siervonan riba diferente estaka plamá tur kaminda (D&C 124:134). E ta referí na èldernan ku ta ministronan pa Su iglesia (D&C 124:137). Aki tin otro siñansanan di e diferente funshonnan aki.
Un sumo saserdote ta ofisiá i atministrá den kosnan spiritual (wak D&C 107:10, 12). Tambe, manera Presidente Joseph F. Smith a siña, ya ku el a wòrdu ordená komo un sumo saserdote, [e] mester sinti ku e ta obligá ...pa duna un ehèmpel dilanti di e bieu i hóbennan digno di sigui su ehèmpel, i pa pone su mes den un posishon pa ta un maestro di rektitut, no solamente pa presepto pero prinsipalmente dor di ehèmpel—dunando na esnan mas yòn e benefisio di eksperensia di edat, i pues bira individualmente un poder entre e komunidat den kua e ta biba.3
Tokante di e debernan di un èlder, Èlder Bruce R. McConkie di e Quorum di e Diesdos a siña : “Un Èlder ta un ministro di Señor Jesucristu. …E ta enkargá pa kumpli ku e obligashonnan i representá su Maestro …den ministrá su próhimo. E ta Señor su agente.” 4
Elder McConkie a kritiká e idea ku un persona ta “solamente un èlder.” Tur èlder den Iglesia ta poseé mes tantu saserdosio ku e Presidente di Iglesia … ,” el a bisa. “Kiko ta un èlder? E ta un wardadó, un wardadó ku ta sirbi den e kurá di karné di e Bon Wardadó.”5
Den e funshon importante aki pa ministrá den e kurá di karné di e Bon Wardadó, no tin distinshon entre e ofisionan di sumo saserdote i èlder den e Saserdosio Melkisedek. Den e gran sekshon 107 di Doctrina y Convenios, Señor ta deklará ku sumo saserdotenan den e órden di Saserdosio Melkisedek tin un derechi pa ofisiá den nan mes puesto, bou di direkshon di e presidensia, den atministrá kosnan spiritual, i tambe den e ofisio di un èlder [òf kualke ofisio den e Saserdosio Aaróniko]. (D&C 107:10; wak tambe verso 12).
E prinsipio di mas importante pa tur poseedor di saserdosio ta e prinsipio siñá pa e profeta Jakob den e Buki di Mormon. Despues ku e i su ruman Joseph a wòrdu konsagrá komo saserdote i maestro di e pueblo, el a deklará ku nan a magnifiká nan ofisio na Señor, tumando riba nan e responsabilidat, poniendo e pikánan di e pueblo riba nan mes kabes si nan no siña nan e palabra di Dios ku tur diligensia. (Jakob 1:19).
Hermanonan, nos responsabilidatnan komo poseedornan di saserdosio ta asuntunan serio. Otro organisashonnan por ta satisfasé ku stándartnan mundano di realisá nan mensahenan i nan otro funshonnan. Pero nos ku ta poseé e saserdosio di Dios tin e poder dibino ku hasta ta goberná entrada den e reino selestial di Dios. Nos tin e propósito i responsabilidat di Señor definí den e prólogo revelá den e Doctrina y Convenios. Nos ta proklamá na e mundu:
Pa laga tur hòmber papia den e nòmber di Dios, hasta e Salbador di e mundu.
Pa oumentá hende su fe,
Ku Su kombenio sempiterno por wòrdu establesé;
Ku e plenitut di Su evangelio por wòrdu proklamá pa esnan suak i ku esnan simpel te na fin di e mundu. (D&C 1:20–23).
Pa kumpli ku su kargo dibino, nos mester ta fiel den “magnifiká” nos yamamentunan i responsabilidatnan di saserdosio (wak D&C 84:33). Presidente Harold B. Lee a splika kiko ta nifiká pa magnifiká e saserdosio: “Ora un persona bira un poseedor di saserdosio, e ta bira un agente di Señor. E mester pensa di e yamamentu aki manera ku e ta atendé asuntu di Señor. Esei ta loke ta nifiká pa magnifiká e saserdosio.6
P’esei, rumannan, si Señor Mes lo pidi boso pa yuda un di Su yunan—ku El a yega di hasi via di Su sirbidónan—boso lo hasié? I si boso hasié, boso lo aktua komo Su agente, “na asuntu di Señor,” konfiando riba Su yudansa primintí?
Elder Lee tabatin un otro siñansa tokante magnifiká e saserdosio: “Ora boso ta tene un vergrootglas riba un kos e ta laga e kos mustra mas grandi ku bo por mir’é ku wowo sunú: esei ta un vergrootglas. Awor ... si kualke hende magnifiká nan saserdosio—esei ta, hasié mas grandi ku nan a pensa ku e tabata promé i mas importante ku kualke otro hende a pensa ku e tabata—esei ta e manera ku boso por magnifiká boso saserdosio.”7
Aki tin un ehèmpel di un poseedor di saserdosio magnifikando su responsabilidat di saserdosio. Mi a tende esaki di Èlder Jeffrey D. Erekson, mi kompañero den un konferensia di estaka na Idaho. Komo un èlder yòn kasá, desesperadamente pober i sintiendo su mes inkapas pa kaba ku su delaster aña di universidat, Jeffrey a disidí di kita for di skol i aseptá un oferta di trabou atraktivo. Algun dia despues su presidente di quorum di èlder a bini na su kas. “Bo ta komprondé e nifikashon di e yabinan di saserdosio ku bo ta poseé?” e presidente a puntra. Ora Jeffrey a bisa si, e presidente a bisé ku fo’i ora ku el a tende di su intenshon pa kita for di skol, Señor a torment’é durante di anochinan sin por drumi pa duna Jeffrey e mensahe aki: “Komo bo presidente di quorum, mi ta konsehá bo pa no kita for di skol. Esei ta un mensahe na abo di Señor.” Jeffrey a keda na skol. Añanan despues mi a topa ku n’e komo un negoshante eksitoso i a tendé konta un oudiensia di poseedornan di saserdosio, “Esei [konseho] a hasi tur e diferensia den mi bida.”
Un poseedor di saserdosio a magnifiká su saserdosio i yamamentu, i esei a hasi “tur e diferensia” den e bida di un otro yu di Dios.
IV. Saserdosio den e Famia
Te ku awor, mi a papia di e funshonnan di e saserdosio den Iglesia. Awor lo mi papia di saserdosio den famia. Mi ta kuminsá ku e yabinan. E prinsipio ku outoridat di saserdosio por wòrdu ehersé solamente bou di direkshon di un ku ta poseé e yabinan pa e funshon ei ta fundamental den Iglesia pero no ta apliká pa ehersé e outoridat di saserdosio den famia.8 Un tata ku ta poseé e saserdosio ta presidí den su famia pa outoridat di e saserdosio ku e ta poseé. E no tin mester di tin guia òf aprobashon di yabinan di saserdosio pa por konsehá miembronan di su famia, tene reunionnan familiar, duna bendishonnan di saserdosio na su kasá i yunan, òf pa duna bendishonnan di salú na miembronan di famia òf otronan.
Si tatanan lo magnifiká nan saserdosio den nan mes famia, e lo yuda progreso di e mishon di Iglesia mes tantu ku kualke otro kos lo hasi. Tatanan ku tin e saserdosio Melkisedek mester warda e mandamentunan p’asina nan por tin e poder di e saserdosio pa duna bendishonnan na miembronan di nan famia. Tambe nan mester kultivá relashonnan familiar amoroso p’asina miembronan di famia lo pidi nan tata pa bendishon. I mayornan mester kurashá mas bendishon di saserdosio den famia.
Tatanan, funshoná komo “partner igual” di boso esposa, manera e proklamashon di famia ta siña.9 I, tatanan, ora boso tin privilegio pa ehersé e poder i influensia di boso poder di saserdosio, hasi asina dor di persuashon, pasenshi den sufrimentu, bondat i humildat, i amor sinsero (D&C 121:41). E stándart haltu aki pa ehersé outoridat di saserdosio ta mas importante den famia. Presidente Harold B. Lee a duna e promesa aki djis despues ku el a bira Presidente di Iglesia: “Nunka e poder di saserdosio, ku boso ta poseé, ta mas maravioso ku ora tin un krísis den boso hogar, un malesa serio, òf algun desishon grandi ku mester wòrdu tumá. ... Envestí den e poder di e saserdosio, kua ta e poder di e Dios Todopoderoso, ta e poder pa realisá milagernan si Señor su boluntat ta asina, pero pa nos por usa e saserdosio aki, nos mester ta digno pa ehersé nan. Un fayo pa komprondé e prinsipio aki ta un fayo pa risibí e bendishonnan di poseé e gran saserdosio aki.”10
Mi estimado hermanonan, e saserdosio santu i magnífiko ku boso ta poseé ta vital pa e obra di Señor den boso famianan i boso yamamentunan di Iglesia.
Mi ta testifiká di E di ken e saserdosio ta. Pa medio di Su sufrimentu i sakrifisio i resurekshon ekspiatorio tur hòmber i muher tin e siguransa di inmortalidat i e oportunidat pa bida eterno. Kada un di nos mester ta fiel i diligente den hasi nos parti den e gran obra di Dios nos Tata Eterno, den e nòmber di Jesucristu,amèn.