Ministrashon Inspirá
Nos ta risibí e Espíritu Santu mihó ora nos ta enfoká den sirbi otronan. Ta pa esei nos tin e responsabilidat di saserdosio pa sirbi pa Señor.
Mi kerido rumannan, mi ta agradesido pa e privilegio di papia na boso den e konferensia general históriko aki. Nos a sostené Presidente Russel M. Nelson komo e di diesshete Presidente di e Iglesia di Jesucristo di e Santunan di Delaster dia. Miéntras nos a hasi esaki, i miéntras mi ta tin e bendishon di traha kuné kada dia, mi a sinti e konfirmashon di e Espíritu ku Presidente Nelson ta yamá pa Dios pa guia Señor su Iglesia berdadero.
Ta tambe mi testimonio ku Señor a yama Elder Gerrit W. Gong i Elder Ulisses Soares pa sirbi komo miembronan di e Quorum di Diesdos Apòstel. Mi stima i ta sostené nan. Nan lo, pa medio di nan ministerio, bendishoná bidanan rònt mundu.
E konferensia aki ta históriko pa otro motibu tambe. Presidente Nelson a anunsiá un paso inspirá pa dilanti den Señor su plan organisá pa Su Iglesia. E plan aki ta inkluí un struktura nobo pa e quorumnan di saserdosio den bario i estakanan p’asina nos por kumpli mihó ku nos responsabilidatnan di saserdosio. E responsabilidatnan aki tur tin di aber ku nos kuido komo saserdosio di Tata su yunan.
E plan di Señor pa Su Santunan pa proveé kuido amoroso a tuma diferente forma durante e añanan. Den e dianan di antaño di Nauvoo, e Profeta Jose Smith tabata tin mester di un manera organisá pa kuida e kantidat grandi di konverso pober drentando e siudat. Kuater di mi bisa bisa abuelonan tabata entre nan - Famianan, Eyring, Bennion, Romney i Smith. E Profeta a organisá e kuido di e Santunan ei pa medio di geografia. Na Illinois, e divishonnan di e siudatnan tabata wòrdu yama “barionan.”
Miéntras e Santunan tabata krusa e plano, nan kuido pa otro tabata organisá den “kompanianan.” Un di mi bisa bisa abuelo (paternal) tabata regresando for di su mishon na loke nos ta yama awendia Oklahoma ora ku e la topa un kompania riba e ruta. E tabata debil ku malesa ku a pone ku e i su kompañero tabata riba nan lomba riba un di e wagònnan chikitu.
E lider di e kompania a manda dos muher hóben pa yuda esunnan ku ta den e wagòn ei. Un di nan, un hermana hóben ku a kombertí na Suisa, a tira un bista riba un di e misioneronan i a sinti kompashon. E la wòrdu salba pa e kompania di Santunan. E la rekuperá sufisientemente ku e por a kana e sobra kaminda pa e Vaye di Lago Salado ku su reskatante na su banda. Nan a enamorá i a kasa. E la bira mi bisa bisa abuelo Henry Eyring, i e hermana mi bisa bisa abuela Maria Bommeli Eyring.
Añanan despues, ora hendenan ta remarká tokante di e gran difikultat di krusa e kontinente, e la bisa, “Ai no, e no tabata difísil. Miéntras nos tabata kana, nos a papia hinter e kaminda tokante kon milagroso e tabata ku nos tur dos a haña e evangelio berdadero di Jesucristo. Tabata un di e tempunan mas felis ku mi por a kòrda.”
For di e tempu ei, Señor a usa vários manera pa yuda Su Santunan kuida otro. Awor E la bendishoná nos ku quorumnan fortifiká i unifiká na nivel di bario i estaka - quorumnan ku ta traha den kordinashon ku tur e organisashonnan di bario.
Barionan munisipal, kompanianan, i quorumnan fortifiká tur a rekerí semper dos kos pa nan por ta eksitoso den Dios su intenshon di tin e Santunan kuida otro den e manera ku E ta kuida di nan. Nan tin éksito ora e Santunan sinti e amor di Kristu pa otro mas ku nan propio interes. Eskrituranan ta yama esaki “karidat … e amor puru di Kristu” (Moroni 7:47). I nan ta eksitoso ora e Espíritu Santu guia esun ku ta duna kuido pa sa kiko Señor sa ku ta mihó pa e persona ku e ta tratando na yuda.
Na vários momentu durante e simannan resien, miembronan di Iglesia a aktua den mi presensia manera di un manera òf otro nan a antisipá kiko Señor tabata bai hasi. Laga mi duna bo djis dos ehèmpel. E promé, un diskurso simpel den sakramento dor di un maestro di 14 aña den e Saserdosio Aroniko ku ta komprondé kiko e posedornan di saserdosio por logra den nan servisio pa Señor. Di dos, un posedor di Saserdosio Melkisedek kual, ku e amor di Kristu, a wòrdu inspirá pa sirbi un famia.
Promé, laga mi duna bo e palabranan di e hoben ku a papia den un reunion sakramental di un bario. Trata na korda kon bo tabata tempu bo ta tin 14 aña i skuch’e bisa mas ku loke un hóben por ta kapas di sa:
“Mi a gusta hopi di ta un miembro di e quorum di maestro den nos bario for di tempu mi a bira 14 aña pasa. Un maestro ainda tin e responsabilidatnan di un diakono plùs algun mas.
“Ya ku algun di nos ta maestro, otronan lo ta den futuro, i tur hende den Iglesia ta wòrdu bendishoná pa medio di e saserdosio, pues ta importante pa kada un di nos sa mas tokante nos debernan komo maestro.
Promé ku tur kos, Doktrina i Konvenio 20:53 ta bisa, ‘E maestro su deber ta pa vigilá riba e iglesia semper, i ta huntu ku nan i fortifiká nan.’
Siguiente, Doktrina i Konvenio 20: 54–55 ta bisa:
‘“I wak pa no tin maldat den iglesia, tampoko duresa ku un ku otro, tampoko gañamentu, murmurá, òf papia malu di otro:
‘“I wak pa e iglesia reuní konstante, i tambe wak pa e miembronan kumpli ku nan deber.”’
E hóben a kontinuá:
“Señor ta bisa nos ku nos responsabilidat no ta solamente pa kuida si Iglesia pero tambe pa nos kuida e hendenan den e Iglesia, na e manera ku Kristu lo hasié pasobra ta Su Iglesia. Si nos ta purba na warda e mandamentunan, ta amabel ku otro, honesto, bon amigu, i disfrutá di ta ku otro, e ora ei nos lo tin e Espíritu ku nos i sa ku Tata Selestial ke pa nos hasi. Si nos no hasié, nos no por magnifiká nos yamamentu.”
E la sigui bisa:
“Ora maestronan skohe pa duna e ehèmpel korekto dor di ta un bon maestro orientador, saludá e miembronan na iglesia, prepará e sakramentu, yuda na kas, i ta hasidónan di pas, e ta skohe na honra su saserdosio i kumpli ku su yamamentu.
“Siendo un bon maestro no solamente ta nifiká ta responsabel ora nos ta na iglesia òf aktividatnan di iglesia. E Apòstel Pablo a siña, ‘Ta un ehèmpel di e kreyentenan, den palabra, den kombersashon, den karidat, den espíritu, den fe, i den puresa’ (1 Timoteo 4:12)”.
E ora ei e hóben a bisa:
“No ta importá unda nos ta òf kiko nos ta hasiendo, nos por ta un bon ehèmpel di rektitut na tur momentu i den tur lugá.
“Mi tata i ami ta siña famia Brown. Kada bia ku nos bai einan, mi tin un hopi bon tempu bishitando i konosiendo nan. Un kos ku mi gusta hopi di e famia Brown ta ku kada bia mi bai einan, nan ta semper deseoso pa skucha i nan semper tin bo historianan pa kompartí.
“Ora nos konosé e hendenan den bario bon pa motibu di maestro orientador, e ta hasié hopi mas fásil pa kumpli ku e siguiente deber di e maestro, i esei ta saluda e miembronan di iglesia. Yuda nan sinti nan mes na kas i inkluí den iglesia kual ta yuda tur miembro di iglesia sinti nan stimá i prepará pa tuma e santa sena.
“Despues di saludá miembronan ku a bin iglesia, maestronan ta yuda kada djadumingu dor di prepará e sakramentu. Mi ta disfrutá hopi e repartishon i preparashon di e sakramento den e bario aki pasobra tur hende ta asina reverente. Semper mi ta sinti e Espíritu ora mi ta prepará i repartí e sakramento. Ta un bendishon berdadero pa mi ku mi por hasi tur djadumingu.
“Algun servisio manera repartí e sakramento ta algu ku hende ta wak i ta gradesí nos pa hasié pero otro servisio manera prepará e sakramentu usualmente ta wòrdu hasi sin ningun hende ripara. No ta importante si hende wak nos sirbi; loke ta importante ta ku Señor sa ku nos a sirbi E.
“Komo maestro, nos mester semper trata na fortifiká e Iglesia, nos amigunan, i nos famia dor di kumpli ku nos responsabilidatnan di saserdosio. No semper ta fasil, pero Señor no ta duna mandamentu na nos ‘salvo e prepará un manera pa nos pa kumpli ku loke e la manda nos hasi’ (1 Nefi 3:17).”
Ora e hóben aki tabata konkluí, mi a sigui di ta asombrá riba su madures i sabiduria. E la resumí bisando, “Mi sa ku nos lo bira mihó si nos skohe pa sigui [Jesucristo].”
Un otro historia di servisio di saserdosio a wòrdu kontá un luna pasa den un reunion sakramental. E posedor di saserdosio ku eksperensia aki no tabata sa miéntras e ta papiando ku e tabata deskribí eksaktamente lo ke Señor tabata deseá pa sosodé ku fortifiká e quorumnan di saserdosio. Esaki ta e esensia di su relato:
E i su kompañero di maestro orientador a wòrdu asigná shete famia. Kasi tur no ke bishita. Ora e maestronan orientador bai nan apartamentunan, nan ta ninga di kontesta e porta. Ora nan hasi yamada, nan no ta haña kontesta. Ora nan laga un mensahe, e yamada no ta wòrdu kontestá. E kompañero mayor aki finalmente a bai ofer na e ministerio di skibi karta. E la kuminsá usa ènvelòpnan kolo hel briante ku e speransa di haña un reakshon.
Un di e shete famianan tabata un hermana soltero ménos aktivo ku a emigrá for di Europa. E tabata tin dos yu chikí.
Despues di hopi intento pa kontakt’é, e la risibí un teksto. E la informe apruptamente ku e tabata muchu okupá pa topa ku e maestronan orientador. E ta tin dos trabou i tabata den militar tambe. Su trabou primordial tabata di un ofisial di polis, i su meta di karera ta pa bira un detektive i despues regresá su pais natal i kontinuá su trabou einan.
E maestro orientador nunka por a bishit’é den su hogar. Algun biaha e tabata mand’e mensahe di teksto. Kada luna e tabata manda un karta skibi na man, suplementá ku karchinan di Pasku pa kada yu.
E no a risibí ningun kontesta. Pero e hermana tabata sa ken ta su maestro orientador, i kon pa kontaktá nan, i ku nan lo persistí den nan servisio di saserdosio.
E ora ei un dia e la risibí un mensahe di teksto urgente di e hermana. E tabata tin nesesidat desesperá di yudansa. E no tabata sa ken ta su obispu, pero e tabata sa si ken ta su maestro orientador.
Den algun dia, e hermana lo ta tin ku biaha bai otro estado pa un ehersisio militar di un luna. E no por a bai ku su yunan. Su mama ku lo a kuida e yunan a kaba di bai Europa pa kuida su kasa, ku ta tin un emergensia médiko.
E hermana soltero ménos aktivo aki tabata tin sufisiente sèn pa kumpra un pasashi pa Europa pa e yu mas yòn pero no pa Eric, su yu di 12 aña. E la puntra su maestro orientador si e por haña un bon famia SUD ku lo por tuma Eric den na hogar pa e siguiente 30 dianan!
E maestro orientador a kontest’é ku e lo hasi su esfuerso. E la kontaktá e ora ei e lidernan di saserdosio. E obispu a dun’e aprobashon pa aserka miembronan di e konseho di bario, inkluyendo e presidente di Sosiedat di Sokoro.
Masha lihé e presidente di Sosiedat di Sokoro a haña kuater bon famia SUD, tur ku yunan mesun edat ku Eric, ku lo ke tum’e den nan kas un siman kada un. Durante e siguiente luna, e famianan aki a duna Eric di kome, dun’e un kamber den e apartamentonan òf kasnan chikí basta yen kaba, hib’e na nan aktividatnan di verano previamente planifiká, hib’e iglesia, inkluyé den e nochi di hogar di famia, i hopi mas.
E famianan tabata tin yunan hòmber na edat di Eric, i nan a inkluyé tambe den e reunionnan i aktividatnan di e quorum di diakono. Durante e periodo di 30 dia, Eric tabata den iglesia kada djadumingu pa promé bia.
Despues ku su mama e bin bek for di su ehersisio, Eric a kontinuá asistiendo iglesia, usualmente ku un di e kuater famianan SUD voluntario of otronan ku a bira su amigu, inkluyendo e mama su maestro orientador. Ku tempu, e la wòrdu ordená un diakono i a kuminsá repartí e sakramentu regularmente.
Awor, laga nos wak den Eric su futuro. Nos lo no ta sorprendé si e bira un lider den Iglesia den e pais di su mama ora su famia regresá einan - tur esaki pasobra Santunan ku a traha huntu den union pa sirbi i bou di e direkshon di un obispu, pa sirbi for di e karidat di nan kurason i ku e poder di e Espiritu Santu.
Nos sa ku karidat ta esensial pa nos por wòrdu salba den e reino di Dios. Moroni a skibi, “Si bo no tin karidat di ningun manera bo no por wòrdu salba den e reino di Dios” (Moroni 10:21); wak tambe Eter 12:34).
Nos tur sa ku karidat ta un don duná na nos despues di tur loke nos por hasi. Nos mester “hasi orashon na Tata ku tur e energia di nos kurason, pa [nos] por ta yená ku su amor, kual e la deramá riba nos tur komo berdadero siguidónan di su Yu, Jesucristo” (Moroni 7:48).
Na mi pareser nos ta risibí e Spiritu di Dios mihó ora nos ta enfoká riba sirbi otronan. Esaki ta e motibu pakiko nos tin e responsabilidat di saserdosio pa sirbi pa e Salbador. Ora nos ta den e servisio di otronan, nos ta pensa ménos riba nos mes, i e Espíritu Santu por bin serka nos mas lihé i yuda nos den nos búskeda di hinter nos bida pa nos tin e don di karidat deramá riba nos.
Mi ta kompartí mi testimonio ku Señor a kuminsá kaba ku un gran paso pa dilanti den Su plan pa nos pa bira mas inspira i mas karitativo den nos servisio ministrashon di saserdosio. Mi ta agradesido pa Su amor, kual E asina generoso a duna nos. Den e nòmber di Jesucristo, amèn.