Regalonan Presioso di Dios

Dor di Presidente M. Russel Ballard

Presidente den funshon di e Quorum di Diesdos Apòstelan

Bida por ta yena ku fe, goso, felisidat, speransa, i amor ora nos ehersé e kantidat mas chikí di fe real den Kristu.

Rumannan, nos a kaba di partisipá na un asamblea solèm, un práktika ku ta bai bek te den tempu di e Beibel ora Israel antiguo a reuní pa sinti e presensia di Señor i selebrá Su bendishonnan.¹ Nos ta privilegiá pa biba den e tempu kaminda práktikanan antiguo a wòrdu restourá pa medio di e Profeta Jose Smith.² Mi ta urgi boso pa registrá den bo diario personal kiko bo a sinti tokante di e okashon tan sagrado aki den kua bo tabata parti di dje.

Resientemente, nos a despedí di nos kerido amigu i profeta, Presidente Thomas S. Monson. Ounke nos tur ta sinti su falta, nos ta sumamente agradesido ku Señor a yama un profeta nobo, Presidente Russel M. Nelson, pa presidí riba Su Iglesia. Na un manera ordená nos awor a kuminsá un kapítulo nobo den historia di nos Iglesia. Esaki ta un regalo presioso di Dios.

Ora kada un di nos a sostené Presidente Nelson dor di hisa nos mannan, nos a para komo testigu dilanti di Dios i rekonosé ku e ta Presidente Monson su susesor. Ku nos mannan hisa, nos a primintí di skucha su boso ora ku e risibí direkshon di Señor.

Señor a bisa:

“Abo lo pone atenshon na kada un di su [refiriendo na e Presidente di e Iglesia] palabranan i mandamentunan kual e lo duna bo manera e ta risibí nan. ...

“Paso su palabra lo bo risibí, manera si e ta bin for di mi propio boka, den tur pasenshi i fe.”³

Mi a konosé nos profeta presidente nobo pa mas ku 60 aña. Mi a sirbi huntu ku ne den e Quorum di e Diesdos pa 33 aña. i mi ta un testigu ku e man di Señor a prepara e pa bira nos apòstel ku ta presidí i profeta pa atministrá tur e yabinan di e saserdosio sagrado na mundu. Ku kada un di nos sosten kompletamente i su konseheronan i sigui nan guia. Tambe nos ta duna un bon bini kaluroso na Elder Gong i Elder Soares komo miembronan di e Quorum di Diesdos Apòstel.

Despues di e resurekshon di Hesus, un evento ku nos ta selebrá e wikènt di Pasku glorioso aki, El a aparesé na Su disípulonan i bisa, “Pas sea ku boso: meskos ku mi Tata a manda mi, asina tambe mi ta manda boso.”⁴Ripara e akshon dòbel—Dios a manda Su Yu. E Yu ta manda Su sirbidónan—hòmber i muhé mortal—pa kumpli ku Nan obra.

Nos no mester ta sorprendí pa sa ku e individuonan yamá pa hasi e obra di Señor no ta humanamente perfekto. Historianan den eskritura ta detayá insidentenan tokante hòmber i muhé ku a wòrdu yamá pa Dios pa kumpli ku un obra grandi—bon yunan di nos Tata Selestial yamá pa sirbi den asignashonnan den e Iglesia, esforsando pa hasi nan bèst, pero ningun di nan perfekto. Esei tambe ta bèrdat pa nos.

Mirando e realidat di nos debilidat humando i defisiensia, kon nos por sigui pa dilanti den apoyá i sosten otro? E ta kuminsá ku fe—real, fe sinsero den Señor Jesucristo. Fe den e Salbador ta e promé prinsipio di e doktrina i evangelio di Kristu.

Vários aña pasa mi tabata bishitando e Tera Santu. Miéntras nos a pasa banda di un mata di mostasa, e direktor di BYU Sentro Jerusalem a puntra mi si mi a yega di mira un simia di mostasa. Mi no a mira nunka, pues nos a para. E la mustra mi e simia for di e mata di mostasa. Nan tabata sorprendentemente chikí.

E ora ei mi a kòrda e enseñansa di Hesus: “Di bèrdat, mi ta bisa bo, si bo tin fe manera un grano di simia di mostasa, lo bo bisa na e seru aki, Kita for di e lugá ei; i e lo kita; i nada lo ta imposibel pa bo.”⁵

Si nos tin fe mesun chikí ku un simia di mostasa, Señor lo yuda nos kita e serunan di desanimo i duda den e tareanan nos dilanti ora nos ta sirbi ku Señor su yunan, inkluyendo nos miembronan di famia, miembronan di Iglesia, i esnan ku ainda no ta miembro di e Iglesia.

Rumannan, bida por ta yená ku fe, goso, alegria, speransa, i amor ora nos ta ehersé e kantidat mas chikitu di fe real den Kristu—hasta un simia di mostasa di fe.

Elder George A. Smith a kòrda algun konseho ku e Profeta Jose Smith a dun’e: “E la bisa mi pa nunka deskurashá, kual sea e difikultatnan ku rondoná mi. Si mi tabata hundi den e buraku mas profundo di Nova Scotia i tur e Serunan Rokoso bòncha riba mi, Mi no mester deskurashá pero sigui tene, ehersé fe, i mantené bon kurashi i lo mi sali riba e monton na final.”⁶

Nos mester kòrda Pablo su deklarashon: “Mi por hasi tur kos pa medio di Kristu ku ta fortalesé mi.”⁷ Sabiendo esaki ta un otro regalo presioso di Dios.

Banda di tur e regalonan ku mi a menshoná, tin ainda hopi mas. Lo mi papia awor di djis algun—e regalo di e dia di Reposo, e sakramento, servisio na otronan, i e regalo inkomparabel di Dios nos Salbador.

E poder di e dia di Reposo ta pa eksperensia na iglesia i na kas e sentimentunan di delisia, e goso, i e kayente di e Spiritu di Señor sin ningun tipo di distraishon.

Muchu hopi ta permití nan mes pa kasi biba konektá ku nan dispositivonan sabi—pantayanan iluminando nan kara dia i nochi i enchufe di orea ta blòkia e boso ketu i suave di e Espíritu. Si nos no haña e tempu pa deskonektá, nos lo por pèrdè e oportunidatnan pa skucha e bos di dj’E ken a bisa, “Ta trankil i sa ku ami ta Dios.”⁸ Awor no tin nada malu den hasi uso di e avansenan den teknologia inspirá dor di Señor, pero nos mester ta sabio den nan uso. Kòrda, e regalo di e dia di Reposo.

E bendishon di risibié e sakramento nunka mester bira un rutina of djis algu ku nos ta hasi en e reunion sakramental. Ta solamente 70 minüt den hinter un siman ora nos por tuma un pousa i haña mas pas, goso, i felisidat den nos bida.

Partisipando di e sakramento i renobando nos konvenionan ta un señal di nos pa ku Señor ku nos lo semper kord’E. Su Sakrifisio ta un regalo divino di Dios.

E privilegio di servisio na Tata Selestial su yunan ta un oportunidat pa sigui e ehèmpel di Su Kerido Yu dor di sirbi otronan.

Algun oportunidat di servisio ta formal—den nos famia, den nos yamamentu di Iglesia, i nos partisipashon den organisashonnan di servisio komunitario.

Miembronan di Iglesia—tantu hòmber komo muhé—no mester duda, si nan tin e deseo, pa kampañá pa puesto públiko riba kualke nivel di gobièrnu unda ku nan ta biba. Nos bosnan ta esensial awendia i importante den nos skolnan, nos siudatnan, i nos paisnan. Kaminda demokrasia ta eksistí, ta nos deber komo miembronan pa vota pa hòmber i muhénan honra ku tin e deseo di sirbi.

Hopi oportunidat pa sirbi ta informal—sin asignashon—i ta bin ora nos saka man pa otronan ku nos ta topa den nos biahe di bida. Kòrda Hesus a siña e abogado ku nos mester stima Dios i nos próhimo manera nos mes usando e Bon Samaritano komo ehèmpel.⁹

Servisio ta habri bentana pa medio di kua nos por komprondé e bida i ministerio di Kristu. E la bin pa sirbi, manera e skrituranan ta siña, “hasta manera e Yu di hende a bin no pa ministra na dje, pero pa e ministra, i pa duna su bida komo rekompensa pa hopi.”¹⁰

Pedro kisas a duna e mihó deskripshon di e Salbador su ministerio mortal den sinku palabra ora e la referí nan Hesus, “ken a biba hasiendo bon.”¹¹

Señor Jesucristo ta e mas presioso di tur regalonan di Dios. Hesus a bisa, “Ami ta e kaminda, e bèrdat, i e bida; ningun hende ta bin serka e Tata, si no pa medio di mi.”¹²

Nefi a kaptura e importansia di nos Salbador ora e la deklará, “Nos ta papia di Kristu, nos ta regosiha den Kristu, nos ta prediká di Kristu, nos ta profetisá di Kristu, i nos ta skibi di akuerdo ku nos profesianan, pa nos yunan por sa na kua fuente nan buska pa e remishon di nan pikanan.”¹³ Nos mester mantené Kristu komo e sentro di nos bida na tur momentu i den tur lugá.

Nos mester kòrda ku Su nòmber ta aparesé riba nos lugánan di alabansa; nos ta wòrdu boutisa den Su nòmber; i nos ta wòrdu konfirmá, ordená, investí, i seyá den matrimonio den Su nòmber. Nos ta partisipá di e sakramentu i primintí di tuma riba nos mes Su nòmber—i bira berdadero Kristiannan. Finalmente, nos ta wòrdu puntra den e orashon sakramental pa “semper kòrd’e.”¹⁴

Ora nos ta preparando pa e Djadumingu di Pasku mañan, laga nos kòrda ku Kristu ta supremo. E ta e Hues rekto, nos Abogado fiel, Redentor bendishoná, Bon Pastor, Mesias primintí, berdadero Amigu, i muchu, muchu mas. E ta berdaderamente e regalo presioso na nos di nos Tata.

Den nos disipulado, nos tin hopi demanda, preokupashon, i asignashon. Sinembargo, algun aktividat semper mester ta na kurason di nos miembresia den Iglesia. “P’esei,” señor ta duna nos e mandamentu, “ta fiel; firme den e ofisio di kua mi a apuntá na bo; sokore esnan debil, alsa e mannan ku ta kologá abou, i fortalesé e rudianan debil.¹⁵

Esaki ta un Iglesia di akshon! Esaki ta religion puru! Esaki ta e evangelio den su sentido berdadero ora nos ta sokore, alsa, i fortalesé esnan den nesesidat spiritual i temporal! Hasiendo esaki ta rekerí pa nos bishita nan i asistí nan¹⁶ pa nan testimonio di fe den Tata Selestial i Jesucristo i Su Sakrifisio lo wòrdu ankrá den nan kurason.

Ku Señor yuda i bendishoná nos pa tesorá nos miembresia den Su Iglesia restourá. Ta mi orashon ku nos lo ta yen di amor pa tur e yunan di nos Tata Selestial i por wak nan nesesidat i ta deseoso pa kontesta nan preguntanan i preokupashonnan tokante e evangelio den manera kla i amabel ku lo krese komprenshon i apresio pa otro.

Mi ta testifiká ku Jesucristo ta nos Salbador. Loke nos wòrdu siñá den e konferensia general aki ta bin na nos pa medio di inspirashon di apòstelnan i profetanan, di Outoridatnan General, i hermanas lidernan ku ta Ofisialnan General di e Iglesia. Ku e goso i pas di Señor mora ku kada un di nos ta mi orashon den nòmber di Jesucristo, amèn.