“Ta Ku Nan i Fortalesé Nan”

Dor di Elder Jeffrey R. Holland

Di e Quorum di e Diesdos Apòstelnan

Nos orashon ta ku kada hòmber i muhé lo sali for di e konferensia general aki mas profundamente komprometé pa kuida di kurason un pa ku otro.

Pa sita Ralph Waldo Emerson, e momento mas memorabel den bida ta esnan ku nos ta sinti un avalancha di revelashon.¹ Presidente Nelson, ami no sa kuantu mas “avalancha” nos por soportá e fin di siman aki. Algun di nos tin kurason debil. Pero ora mi pensa riba dje, bo por atendé esei tambe. Ki un profeta!

Den e espíritu di Presidente Nelson su deklarashon maravioso i testimonionan di ayera nochi i e mainta aki, ami ke deklará mi propio testimonio ku e adaptashonnan aki ta ehèmpelnan di revelashon ku a bin ta guia e Iglesia aki for di komienso. Nan ta ainda mas evidensia ku Señor ta moviendo mas lihé Su obra den e tempu aki.²

Pa tur esnan ku ta ansioso pa siña di e detayenan di e asuntunan aki, por fabor sa ku inmediatamente despues di e konklushon di e seshon di konferensia, e sekuensia lo kuminsá ku ta inkluí, no nesesariamente den e órden aki, manda un kara di e Promé Presidensia na kada miembro di e Iglesia di kua tin un adrès di e-mail. Un dokumento di shete página di pregunta i kontesta lo ta agregá pa tur saserdosio i lidernan ouksiliar. Por último, e materialnan lo wòrdu publiká inmediatamente riba ministering.lds.org. “Pidi, i lo wòrdu duna na abo; buska, i lo bo haña.”³

Awor e asignashon maravioso ku Presidente Russel M. Nelson a duna am i na Hermana Jean B. Bingham. Rumannan, miéntras e obra di e quorumnan i e ouksiliarnan ta madurá institushonalmente, e ta sigui ku nos mester madurá personalmente tambe individualmente kresiendo riba kualke rutina mekániko, funshon sin sentimentu pa disipulado di kurason artikulá dor di e Salbador na konklushon di Su ministerio na mundu. Miéntras E ta prepara pa laga Su ainda inosente i algu konfuso grupo chikitu di siguidónan, E no a duna un lista di pasonan atministrativo ku nan mester a tuma òf duna nan un man yen di reporte pa wòrdu yena den tres kopia. No, E la resumí nan tarea den un mandamentu fundamental: “Stima otro; meskos ku ami a stima bo. …Pa medio di esaki tur hende lo sa ku boso ta mi disípulonan, si bo tin amor pa otro.”⁴

Den un esfuerso pa move mas serka na e ideal evangéliko ei, nos ta komplasí ku e konseptonan ministrante nobo di saserdosio di Sosiedat di Sokoro lo inkluí e siguiente deklarashon, algun di nan e Sosiedat di Sokoro ya kaba a pone den práktika ku éksito maravioso.⁵

Nos lo no usa mas e idioma di maestro orientador i maestra bishitante. Esei parsialmente pasobra hopi di nos esfuersonan ministrante lo ta den lugánan otro for di e hogar i parsialmente pasobra nos kontakto lo no wòrdu definí dor di siña lèsnan prepará, ounke lèsnan por wòrdu kompartí si tin e nesesidat di esei. Loke sea e detayenan, e propósito primario den kontaktonan ministrante lo ta, manera a wòrdu bisa di e hendenan den e dianan di Alma, pa “vela riba nan hendenan, i ... nutri nan ku e kosnan pertenesiente na rektitut.”⁶
Nos lo kontinuá bishitando hogarnan si ta posibel, pero sirkunstansianan lokal manera numbernan grandi, distansianan largu, seguridat personal, i otro kondishonnan desafiante por stroba un bishita kada luna na un hogar. Manera e Promé Presidensia a konsulta vários aña pasa, hasi bo esfuerso.⁷ Tambe na kualke skema ku bo establesé pa bo bishitanan, e kalènder por wòrdu suplementá ku yamadanan telefóniko, notanan skibi, teksto, e-mail, chat di video, kombersashonnan na reunionnan di Iglesia, proyektonan di servisio kompartí, aktividatnan sosial, i un kantidat grandi di otro posibilidatnan saka for di e mundu kresiente di media sosial. Sinembargo, mi mester enfatisá ku e vishon ekspandé di e kompromiso no ta inkluí e sentimentu penoso ku mi a mira resien riba un steker di outo. E ta lesa, “Si mi a pita bo, bo a haña bishita di maestro orientador.” Por faborrumannan, (e hermananan nunka lo ta kulpabel di esaki—mi ta papiando ku e hermanonan) ku e ahustenan aki nos ke mas kuido i preokupashon, no ménos.
Ku e konsepto di ministrashon mas nobo i mas basá riba e evangelio, mi ta sinti ku boso a kuminsá kai den pániko tokante kiko ta konta komo un reporte. Bon, relahá, pasobra no tin ningun reporte—por lo ménos no e reporte di e último dia di luna manera “mi a logra pasa dor di e porta ku e karni di mi djente”. Aki tambe nos ta madurando. E úniko reporte ku lo wòrdu hasi ta e kantidat di entrevistanan lidernan tabatin ku e kompañerismo ministrante den e bario e kuartal ei. Simpel ku e por zona, mi amigunan, e entrevistanan ei ta apsolutamente krusial. Sin e informashon ei e obispu lo no tin ningun manera pa risibí informashon ku e mester tokante e kondishon spiritual i temporal di su hendenan. Kòrda: rumannan ministrante ta representá e obispado i presidensia di quorum di elder; nan no ta remplasá nan. E yabinan di un obispu i presidente di quorum ta bai mas leu ku e konsepto di ministrashon.
Pasombra e reporte aki ta diferente for di esun ku nos ta entrega, laga mi pone énfasis ku e loke nos na e ofisinanan di Iglesia no mester sa kon bo a hasi kontakto, òf na unda bo a hasié, òf ki ora bo a hasié, pero djis nos ke sa i preokupá pa sa ku bo ta hasié i ku bo ta bendishoná bo hendenan den kada manera ku bo por.

Rumannan Nos tin un oportunidat aki mandá for di shelu pa demostrá “religion puru sin mancha dilanti di Dios”⁸—“pa karga otro su karganan, pa nan por ta lihé” i pa “konsolá esnan ku ta den nesesidat di konsuelo,”⁹ pa ministra na e viudanan i e huérfanonan, esnan kasa i esnan soltero, esnan fuerte i esnan den angustia, esnan oprimí i esnan robusto, esnan felis i esnan tristu—korto, nos tur, kada un di nos, pasobra nos tur tin mester di e man kayente di amistat i skucha un deklarashon firme di fe. Sinembargo, un nòmber nobo, fleksibilidat nobo, i ménos reporte lo no hasi ningun diferensia den nos servisio si nos no mira esaki komo un invitashon pa kuida mas pa un i otro den un manera mas grandi i mas santifiká. Ora nos ta alsa nos wowonan spiritual den direkshon di biba e lei di amor mas universal, nos ta duna tributo nan e generashonnan ku a sirbi e manera ei pa añanan kaba. Laga mi nota un ehèmpel resien di tal deboshon den speransa ku legionnan lo gara e mandamentu di Señor pa “ta ku nan i fortalesé nan”¹⁰ nos rumannan.

Dia 14 di yanüari , un djadumingu, djis despues di 5’or di atardi, mi amigunan hóben Brett i Kristin Hamblin tabata kombersá na nan kas na Tempe, Arizona, despues di Brett su dia di sirbi den e obispado i Kristin su dia okupá kuidando nan sinku yunan.

Direpente Kristin, un sobrebibiente basta eksitoso di kanser na pechu e aña anterior, a kai sin respondé mas. Un yamada a 911 a trese un ekipo di emergensia tratando desesperadamente pa rebibá. Miéntras Brett tabata orando rogando, e la hasi dos yamada telefóniko mas: un na su mama pidiendo ayudo ku e muchanan, e otro na Edwin Potter, su maestro orientador. E kombersashon último a bai kompletamente asin’aki:

Edwin, notando e yamada, a bisa, “Hei, Brett, konta?”

Brett su kontesta kasi gritando tabata: “Mi mester di bo aki—aworakí!”

Den ménos ku algun minüt Brett por a konta ku su kolega den saserdosio den su banda yudando ku e muchanan i hibando Hermano Hamblin na hospital tras di e ambulans ku tin su kasa den dje. Einan, ménos ku 40 minüt despues ku e la sera su wowonan, e dòkternan a pronunsiá Kristin morto.

Miéntras Brett tabata yora, Edwin a tené den su brasanan i yora kuné—pa un tempu, hopi largu. Despues, lagando Brett ta yora ku su otro miembronan di famia, Edwin a bai e kas di e obispu pa kont’e kiko a kaba di pasa. E obispu a kuminsá bai e hospital inmediatamente miéntras Edwin a bai e kas di e famia Hamblon. Einan ei ku su kasa, Charlotte, ku tambe a bin koriendo, a hunga ku e awor sinku yunan Hamblin sin mama, di edat 12 bai bou te ku 3, duna nan di kome, tene un resital musikal improvisá, i yuda prepará nan pa bai kama.

Brett a konta mi despues, “E parti maravioso di e historia no ta ku Edwin a bin ora ma yam’e. Den un emergensia, semper tin hende deseoso pa yuda. No, e parti maravioso di e historia ta ku e tabata esun ku mi a pensa riba dje. Tabata tin otro hendenan den besindario. Kristin su rumannan ku ámbos ta biba ménos ku tres mia leu. Nos tin un gran obispu. Pero e relashon entre Edwin i ami ta di tal manera ku mi a sinti ku mi instinto pa yama e ora di mester. E Iglesia ta proveé nos un manera struktura pa biba e di dos mandamentu mihó—pa stima, sirbi, i desaroyá un relashon ku nos rumannan ku ta yuda nos yega mas serka di Dios.”¹¹

Edwin a bisa di e eksperensia aki, “E ironia den tur e kos aki ta ku Brett tabata nos maestro orientador pa muchu mas aña ku ami tabata di dje. Durante e tempu, e la bishita nos mas komo amigu ku komo asignashon. E tabata un gran ehèmpel, e pitoma di kon un saserdosio aktivo i involukrá mester ta. Mi kasa, nos yunan, i ami no ta mir’e komo unu ku ta obligá na trese nos un mensahe kada fin di kada luna; nos ta pensa di dje komo un amigu ku ta biba djis pabou den kaya i lorando e huki, ku lo hasi kualke kos den e mundu aki pa bendishoná nos, mi ta felis ku mi por a page bek djis e tiki di e debe ku mi tin kuné.”¹²

Rumannan, mi ta uni na boso saludando kada maestro di bloke i maestro di bario i maestro orientador i maestra bishitante ku a stima i sirbi e manera aki durante nos historia. Nos orashon awe ta pa kada hòmber i muhé—i nos hóbennan adulto—por bai for di e konferensia general aki ku un kompromiso mas profundo pa kuido di kurason pa un i otro, motiva solamente pa e amor puru di Kristu pa hasi esaki. Apesar di kiko nos ta sinti nos limitashonnan ta i inefisiensia—i nos tur tin desafio—sinembargo nos por traha banda di otro den e viña di Señor¹³ dunando e Dios i Tata di nos tur un man di yudansa ku Su asombroso tarea di kontesta orashonnan, proveé konsuelo, seka lágrimanan, i fortalesé e rudianan debil.¹⁴ Si nos hasi esaki, nos lo ta mas manera e berdadero disípulonan di Kristu ku nos mester ta. Riba e Pasku di Resurekshon aki, ku nos por stima otro manera E a stima nos.¹⁵. Ta mi orashon den nòmber di Jesucristo, amèn.