Ordenansanan Salbadó Lo Trese Nos Lus Maravioso
Partispá den e ordenansanan i honrá e konbenionan asosiá lo trese bo maravioso lus i protekshon den e mundu aki ku ta sigui bira mas i mas skur.
Rumannan, mi ta regosihá den e evangelio, òf e doktrina di Cristu.
Un amigu un biaha a puntra Elder Neil L. Andersen, e temp ei un Setenta, kon e ta sinti pa papia dilanti di 21,000 hende na e Sentro di Konferensia. Elder Andersen a kontesta, “E no ta e 21,000 hende kende ta hasi bo nervioso; e ta e 15 Rumannan sinta patras di bo.” Mi mestera hari e ora ei, pero awor mi ta sinti’e. Kon mi ta stima i sostené e 15 hòmbernan aki manera profeta, vidente, i reveladónan.
Señor a konta Abraham ku dor di su simia i dor di e saserdosio, tur e famianan riba e tera lo wòrdu bendishoná “ku e bendishonnan di e Evangelio, … asta di bida eterno.” (Abraham 2:11; tambe wak versikulonan 2–10).
E bendishonnan primití di e evangelio i e saserdosio a wòrdu restorá riba e tera, i despues, na 1842, e Profeta Jose Smith a atministrá e investidura pa un kantidat limitá di hende hòmber i muhé. Mercy Fielding Thompson tabata un di nan. E Profeta a bis’e, “E [investidura] aki lo trese bo for di e skuridat na e maravioso lus.” 1
Awe mi kier enfoká riba e ordenansanan salbadó, kua lo trese abo i ami maraviosos lus.
Ordenansanan i Konbenionan
Den Leales a la Fe: Una Referencia del Evangelio nos ta lesa: “Un ordenansa ta un sagrado akto formal ehekutá pa e autoridat di e saserdosio. [E] ordenansanan [ku] ta esensial pa nos ekshaltashon … ta yamá ordenansanan salbadó. Nan ta inkluí boutismo, konfirmashon, ordenashon na e Saserdosio Melkisedek (pa hende hòmber), e investidura di tempel, i e seyamentu di matrimonio.”2
Elder David A. Bednar a siña, “E ordenansanan di salbashon i ekshaltashon atministrá den Señor Su Iglesia restourá … ta konstituí kanalnan autorisá pa lokual e bendishonnan i podernan di shelu por kore den nos bidanan individual.”3
Meskos ku un coin ku dos banda, tur e ordenansanan salbadó ta akompañá pa konbenionan ku Dios. Dios ta primití nos bendishonnan si nos ta fielmente honrá e konbenionan ei.
E profeta Amulek a deklará, “E bida aki ta e tempu pa … prepará pa bai serka Dios” (Alma 34:32). Kon nos ta prepará? Pa dignamente resibi ordenansanan. Nos tambe mester, den palabranan di Presidente Nelson, “keda riba e kaminda di konbenio.” Presidente Russell M. Nelson a kontinuá, “Boso kompromiso pa sigui e Salbador pa hasi konbenionan ku n’E i e ora warda e konbenionan ei lo habri e porta pa kada bendishon i privilegio spiritual obtenibel pa hòmber, muhé, i mucha tur kaminda.”4
John i Bonnie Newman, manera hopi di boso, ta resipiente di e bendishonnan spiritual Presidente Nelson a primití. Un Djadumingu, despues di asistí iglesia ku nan tres muchanan yòn, Bonnie a bisa John, ku no tabata un miembro di Iglesia, “Mi no por hasi esaki riba mi mes. Bo mester disidí si bo ta bini na mi iglesia ku nos òf bo ta skohé un iglesia unda nos por bai huntu, pero e muchanan mester sa ku nan tata ta stima Dios tambe.” E siguiente djadomingu i kada djadumingo despues, John no solamente a asistí; e tambe a sirbi, tokando e piano pa hopi barionan, ramanan, i Primarianan durante e añanan. Mi tabatin e privilegio pa reuní ku John na aprèl 2015, i den e reunion ei, nos a diskutí ku e miho manera ku e por a manifesta su amor pa Bonnie tabata pa hib’e na e tempel, pero esei no por a pasa te ora e lo boutisá.
Despues di a asistí E Iglesia di Jesu Cristu di e Santunan di e Delaster Dianan pa 39 aña, John a wòrdu boutisá na 2015. Un aña despues, John i Bonnie tabata seyá den e Memphis Tennessee Tempel, 20 aña despues ku Bonnie a resibi su mes un investidura. Nan yu hòmber di 47 aña, Robert, a bisa di su tata, “Tata a realmente floriá desde ku el a resibi e saserdosio.” Bonnie a pone aserka, “John semper tabata un persona felis i alegre, pero resibiendo e ordenansanan i honrando su konbenionan a aumenta su mansidumbre.”
E Ekspiashon di Cristu i Su Ehempel
Hopi aña patras, Presidente Boyd K. Packer a avisá, “Bon kondukto sin e ordenansanan di e evangelio no lo redimí ni eksaltá humanidat.”5 Di echo, nos no solamente mester di e ordenansanan i konbenionan pa bolbe na nos Tata, pero nos tambe mester Su Yu, Jesu Cristu, i Su Ekspiashon.
Rei Benhamin a siñá ku únikamente den i dor di e nòmber di Cristu por salbashon bini na e yunan di hende (wak Mosia 3:17; tambe wak Artículos de Fe 1:3).
Pa Su Ekspiashon, Jesu Cristu a redimí nos f’or di e konsekuensianan di e Kaída di Adàn i a hasi nos arepentimentu i finalmente eksaltashon posibel. Durante Su bida, El a duna e ehempel pa nos pa resibí ordenansanan salbadó, den kua e poder di divinidat ta manifestá (DyC 84:20).
Despues ku e Salbador a resibí e ordenansa di boutismo pa “kumpli tur hustisia” (wak 2 Nefi 31:5–6), Satanas a tent’E. Meskos, nos tentashonnan no ta stop despues di boutismo òf seyamentu, pero resibí e ordenansanan salbadó i honrá e konbenionnan asosiá ta yena nos ku maravioso lus i duna nos forsa pa resistí i vense tentashonnan.
Aviso
Isaías a profetisá ku den e delaster dianan e tera tambe ta sushá pasobra nan a kambiá e ordenansanan (Isaías 24:5; tambe wak DyC 1:15).
Un aviso relashoná, revelá pa e Profeta Joseph Smith, tabata ku algun ta bini serka di Señor ku nan boka, i nan ta siña pa doktrina e mandamentunan di hende, teniendo un forma di divinidat, pero nan ta nenga e poder di dj’e (José Smith—Historia 1:19).
Pablo tambe a avisá ku hopi “lo hasi manera nan ta masha ku Dios, kaba nan a nenga e poder real di [dj’E]. Keda leu for di hende asina” (2 Timoteo 3:5). Mi ta repití, keda leu for di hende asina.
E hopi distraishonnan i tentashonnan di bida ta manera “lobonan feros” (Mateo 7:15). E ta e berdadero wardadó ku lo prepará, protehá, i avisá e karnénan ora e lobonan aki ta aserká (wak Juan 10:11–12). Manera wardadó den training kende ta buska pa emulá e perfekto bida di e Bon Wardadó, nos no ta wardadónan di nos mes un alma i tambe esun di otronan? Ku e konseho di profetanan, videntenan, i reveladónan, kende nos a kaba di sostené, i ku e poder i don di e Spiritu Santu, nos por wak e lobonan aserkando si nos ta vigilante i prepará. Al kontrario, ora nos ta wardadónan kasual di nos mes un alma i esun di otronan, víktimanan ta mas probablemente. Kasualidat ta resultá den pérdida. Mi ta invitá kada un di nos pa ta un wardadó fiel.
Eksperensia i Testimonio
E santa sena ta un ordenansa ku ta yuda nos pa keda riba e kaminda, i dignamente partisipando ta evidensia ku nos ta wardando e konbenionan asosiá ku tur e otro ordenansanan. Un par di aña pasa, ora mi kasa, Anita, i ami tabata sirbiendo na e Arkansas Little Rock Mission, mi a sali pa bai siña ku dos misioneronan yòn. Durante e les, e bon ruman ku nos tabata siñando a bisa, “Mi a bai na boso iglesia; dikon boso tin ku kome pan i bebe awa kada Djiadomingu? Na nos iglesia, nos ta hasi’e dos bes pa aña, riba Pasku Grandi i Pasku, i esei tin hopi nifikanshon.”
Nos a komparti ku n’e ku nos a wòrdu mandá pa “reuni huntu hopi pa partisipa di e pan i biña” (Moroni 6:6; tambe wak DyC 20:75). Nos a lesa huntu Mateo 26i 3 Nefi 18. El a kontesta ku ainda e no ta wak e nesesidat.
E ora ei nos a komparti e siguiente komparashon: “Imagina bo ta envolví den un aksidente di auto hopi serio. Bo a wòrdu heridá i ta for di tino. Un hende ta koriendo banda di bo, mirando ku bo ta for di tino, i ta yama ambulans. Bo ta wòrdu kuidá i ta bira konsiente di nobo.”
Nos a puntra e ruman, “Ora bo por rekonose bo ambiente, kua preguntanan lo bo tin?”
El a bisa, “Mi lo kier haña sa kon mi a yega eynan i kin a yuda mi. Mi lo kier dun’e danki kada dia pasobra el a salba mi bida.”
Nos a komparti ku e bon ruman aki kon e Salbador a salba nos bidanan i kon nos mester dun’E danki kada dia, kada dia, kada dia!
E ora nos a puntra, “Sabiendo ku El a duna Su bida pa bo i nos, kon hopi biaha bo kier kome e pan i bebe e awa manera emblemanan di Su kurpa i sanger?”
El a bisa, “Mi ta kompronde, mi ta kompronde. Pero un kos mas. Boso iglesia no ta animá manera esun di nos.”
Riba esei nos a kontesta, “Kiko bo lo hasi si e Salbador Jesu Cristu kana dor di bo porta?”
El a bisa, “Di biaha, mi lo kai riba mi rodia.”
Nos a puntra, “Esei no ta loke bo ta sinta ora bo ta drenta un kapia di Santunan di e Delaster dianan—reverensia pa e Salbador?”
El a bisa, “Mi ta kompronde, mi ta kompronde, mi ta kompronde!”
El a bini iglesia e Djadomingu di Pasku Grandi ei i a sigui bolbe.
Mi ta invita kada un di nos pa puntra nos mes, “Ki ordenansanan, inkluyendo e santa sena, ami mester resibi, i kua konbenionan ami mester hasi, warda, i honra?” Mi ta primiti ku partispá den e ordenansanan i honrá e konbenionan asosiá lo trese bo maravioso lus i protekshon den e munda aki ku ta sigui bira mas i mas skur. Den e nòmber di Jesu Cristu, amen.