Profetanan ta Papia por medio di e Poder di e Spiritu Santu.
Di tin un profeta ta un seña di Dios su amor pa Su yunan. Nan ta laga sa e promesanan i e karakter berdadero di Dios i di JesuCristu.
Mi rumannan stimá, unda ku bo ta, lo mi ke ekspresá un danki sinsero i profundo pa boso voto di sosten ayera. Ounke mi ta sinti mi mes inelegante i poko poko den palabra manera Moises, mi ta konsolá mi mes ku e palabranan di Señor na dje:
“Ken a traha boka di hòmber? Òf ken a traha esun muda, òf esun surdu, òf esun ku ta mira, òf esun ku ta siegu? No ta ami Señor?
“Pa esei bai, i ami lo ta huntu ku bo boka, i instruí bo kiko lo bo tin ku bisa” (Exodus 4:11–12; wak tambe versíkulo 10).
Mi ta tuma konsuelo den e amor i sòsten di mi kasá stimá. E ta un ehèmpel di bondat, amor i deboshon total na Señor pa ami i mi famía. Mi ta stima e ku delaster un pida di mi kurason, i mi ta gradisido pa e influensha positivo ku e tin riba nos.
Rumannan, mi ta tèstifiká na bo ku Presidente Russel M. Nelson ta e profeta di Dios riba tera. Nunka mi no a mira ningun hende mas kariñoso i yen di amor manera e ta. Ounke ku mi a sinti mi mes asina inadekuá pa e yamamentu sagrado aki, su palabranan i e mirada sensitivo den su wowo sigun e la ekstendé e responsabilidat aki a laga mi sinti mi mes brasá dor di e Salbador su amor. Masha danki, Presidente Nelson. Mi ta sostené i stima bo.
No ta un bendishon pa tin profetanan, videntenan, i reveladónan riba tera den e dianan aki den kual nos ta biba, ku ta buska pa sa e boluntat di Señor i sigui e? Ta un konsuelo pa sa ku nos no ta nos so den mundu, apesar di e retonan ku nos ta enfrentá den bida. Di tin profetanan ta un señal di Dios su amor pa Su yunan. Nan ta laga nos sa di e promesanan i e karakter berdadero di Dios i JesuCristu na Nan hende. Mi a haña sa esaki dor di mi propio eksperensianan.
Diesocho aña pasá, mi kasá i ami a risibí un yamada di Presidente James E. Faust, e tempu ei Segundo Konsehero den e Promé Presidensha. E la yama nos pa sirbi komo presidente di mishon i kompañero na Portugal. E la bisa nos ku nos tabatin solamente seis siman promé ku nos tabatin ku kuminsá e mishon. Ounke nos tabata sinti nos mes no prepará i inadekuá, nos a aseptá e yamamentu. Nos prekupashon mas importante na e momentu ei tabata pa òbtené e visanan rekerí pa sirbi den e pais ei paso, sigun eksperenshanan anterior, nos tabata sa ku e proseso lo tuma seis te ocho luna pa wòrdu kompletá.
Presidente Faust e ora ei a puntra si nos tabatin fe ku Señor lo proveé un milager i ku lo ta posibel pa nos pa resolvé e problema di visa mas lihé. Nos kontesta tabata un “si” grandi, i nos a kuminsá hasi trámite inmediatamente. Nos a prepará e dokumentonan rekerí pa e visanan, a kue nos tres yunan chikí, i a bai na e konsulado mas lihé ku nos tabata por. Un señora masha amabel a topa ku nos einan. Den revisá e papelnan i skuchando over di kiko nos lo bai hasi na Portugal, e la puntra nos, “Ta di bèrdat bosnan ta bai yuda e hendenan di mi pais?” Ku konvikshon nos a respondé “si” i a splika ku nos lo representá JesuCristu i tèstifiká di Dje i Su mishon divino den mundu. Nos a bai bèk einan 4 siman despues, risibí nos visanan, i a baha den e kampo mishonal dentro di seis siman, manera e profeta di Señor a pidi nos pa hasi.
Rumannan, for di e profundidat di mi kurason mi ta duna testimonio ku e profetanan ta papia por medio di e poder di e Spiritu Santu. Nan ta tèstifiká di Christu i Su mishon divino riba tera. Nan ta representá e mente i kurason di Señor i ta yamá pa representá E i siña nos kiko nos tin ku hasi pa regresá pa biba den e presensia di Dios i Su Yu, JesuCristu. Nos ta bendishoná sigun nos ta ehersitá nos fe i sigui nan instrukshonnan. Dor di sigui nan, nos bida ta mas felis i ménos kompliká, nos difikultatnan i problemanan ta mas fásil pa karga, i nos ta krea un eskudo spiritual rondó di nos ku lo protehá nos for di e atakenan di e enemigu den nos dia.
Riba e dia di Pasku di Resurekshon aki mi ta duna testimonio solèm ku JesuCristu a lanta, E ta bibu, i E ta guia Su Iglesia riba mundu por medio di Su profetanan, videntenan, i reveladónan. Mi ta tèstifiká ku E ta e Salbador i Redentor di mundu i ku por medio di Dje nos por wòrdu salbá i eksaltá den e presensia di nos Dios stimá. Mi ta stima E; mi ta adorá E. Mi ke sigui E i hasi Su boluntat i bira mas manera Dje. Mi ta bisa e kosnan aki humildemente den e nòmber sagrado di nos Señor JesuCristu, amèn.