Mi ta un Yu di Dios?
Kon kada unu di nos por eksperensiá e poder di komprondé nos identidat divino? E ta kuminsá dor di buska pa konosé Dios, nos Tata.
Resientemente mi a bai misa ku mi mama stimá na nos kapia bieu. Atraé dor di e stèmnan chikí biniendo for di e mesun kamber di Primaria ku ami a atendé dékadanan anterior, mi a kana patras i mi a observá lidernan kariñoso siñando e tema di e aña aki: ” Mi ta un Yu di Dios.” Mi a smile sigun mi tabata kòrda maestronan ku pasenshi i kariñoso ku, den e temporada ayá, hopi biaha lo a wak mi – un mucha hòmber chikitu turbulento na pia di e banki—na manera pa bisa, “E ta en bèrdat un yu di Dios? I ken a manda e akinan?”
Mi ta invitá kada unu di nos pa habri nos kurason pa e Spiritu Santu, ku “ta duna testimonio na nos spiritu, ku nos ta e yunan di Dios.”
Presidente Boyd K. Packer su palabranan ta simpel i presioso: “Abo ta un yu di Dios. E ta e tata di bo spiritu. Spiritualmente bo ta di nasementu di noblesa, e desendiente di e Rei di Shelu. Fiha e bèrdat ei den bo mente i tene na dje. No obstante kuantu generashonnan den bo antepasadonan, no ta importá kua rasa òf hende bo ta representá, e desendensia di bo spiritu por wòrdu skibí riba un liña singular. Bo ta un yu di Dios!”
“Ora ku bo … wak nos Tata,” Brigham Young a deskribí, “lo bo wak un ser ku kual bo ta hopi tempu konosí ku n’e kaba, i E lo risibí bo den Su brasanan, i abo lo ta kla pa kai den Su brasa i sunchi E.”
E Gran Guera tokante Identidat Divino
Moises a siña di su herensia divino papiando ku Señor kara a kara. Despues di e eksperensia ei, “Satanas a bini tentando” ku intento sutil pero malisioso pa trose Moises su identidat, “bisando: Moises, yu di hòmber, alabá mi. I … Moises a wak Satanas i a bisa: “Ken bo ta? Paso wak, ami ta un yu di Dios.”
E gran guera tokante di identidat divino ta razu pisá sigun Satanas su arsenal ku ta multiplikando ta punta pa destruí nos kerensia den i nos konosementu di nos relashon ku Dios. Gradisidamente, nos a wòrdu bendishoná ku un komprondementu klaro di nos identidat real for di kuminsamentu: “I Dios a bisa, Laga nos traha hòmber den nos imágen, sigun nos semehansa, i profetanan bibiente a proklamá, “Kada unu ta un spiritu yu hòmber òf muhé stimá di mayornan selestial, i di e manera aki, kada un tin un karakter i destino divino.”
Bin konosé e bèrdatnan aki ku sertesa ta yuda nos superá tur sorto di tribulashonnan, problemanan, i aflikshonnan. Ora a wòrdu puntrá, “Kon nos por yuda esnan ku ta luchando ku un [reto personal]?” un apòstel di Señor a instruí, “Siña nan, nan identidat i nan meta.”
E Konosementu Mas Poderoso ku Mi ta Poseé
E bèrdatnan poderoso aki tabata un transformashon di bida pa mi amiga Jen, ku komo un hóben a kousa un aksidente grave di outo. Ounke su trouma físiko tabata severo, e la sinti doló total paso e otro konduktor a pèrdè su bida. “Un hende a pèrdè su mama, i e tabata mi falta,” e la bisa. Jen, ku dianan promé a para i sita, “Nos ta yunan muhé di nos Tata Selestial, ku ta stima nos,” awor ta puntra su mes, “Kon E por stima ami?”
“E sufrimentu físiko a pasa,” e la bisa, “pero mi no a pensa ku hamas mi lo kura di e heridanan emoshonal i spiritual.”
Pa sobrebibí, Jen a skonde su sentimentunan hopi profundo, birando alehá i turdí. Despues di un aña, ora ku finalmente e tabata den estado di papia over di e aksidente, un konsehero inspirá a invitá e pa skibi e frase “Mi ta un yu di Dios” i bisa esaki dies biaha pa dia.
“Skibi e palabranan tabata fásil,” e ta kòrda, “ pero mi no tabata por a bisa nan. … Esei lo a hasi e kos real, i mi no tabata kere en bèrdat ku Dios tabata ke mi komo Su yu. Mi tabata korkobá den mi mes i yora.
Despues di diferente luna, Jen finalmente tabata den estado di kompletá e tarea ei tur dia. “Mi a deshogá henter mi alma,” e la bisa, “suplikando ku Dios. …. E ora ei mi a kuminsá na kere den e palabranan.” E fe aki a laga e Salbador kuminsá kura su alma heridá. E Buki di Mormón a trese konsuelo i kurashi den Su Ekspiashon.
“Christu a sinti mi dolónan, mi angustia, mi kulpa,” Jen ta konkluí. “Mi a sinti Dios su amor puro i nunka a eksperensia nada tan poderoso! Sa ku mi ta un yu di Dios ta e konosementu mas poderoso ku mi ta poseé!”
Buskando pa Konosé Dios, Nos Tata
Rumannan hòmber i muhé, kon kada unu di nos por eksperensiá e poder di komprondé nos identidat divino? E ta kuminsá dor di buska pa konosé Dios, nos Tata. Presidente Russell M. Nelson a tèstifika, “Algu poderoso ta pasa ora ku un yu di Dios ta buska pa sa mas tokante di Dje i Su Yu Stimá.”
Siñando tokante i sigui e Salbador ta yuda nos pa bin konosé e Tata. “Siendo … e imágen eksakto di su [Tata],” Jesus a siña, “E Yu no por hasi nada for di su mes, sino loke e la wak e Tata hasi.” Kada palabra i akto di Christu ta revelá e índole real di Dios i nos relashon ku Ne.” Elder Jeffrey R. Holland a siña, “Ku sanger saliendo for di kada porio i un sklamashon di angustia na su boka, Christu a buska Esun ku semper E ta buska--- Su Tata. ‘ Abba,’ E la sklama, ‘Papa.’”
Sigun Jesus seriamente tabata buska Su Tata na Gethsemanse, asina tambe e hóben José Smith, den 1820, ku orashon a buska Dios den e Arboleda Sagrado. Despues di lesa “Si kualke unu di boso ta falta sabiduria, laga e puntra di Dios,” José a retirá pa hasi orashon.
“Mi a hinka rudia,” ela skibi, “ i a kuminsá ofresé e deseonan di mi kurason na Dios. …
“ … Mi a wak un pilar di lus eksaktamente riba mi kabes. …
“ … Mi a wak dos Personahe, di kual nan brio i gloria ta desafiá tur deskripshon, pará riba di mi den laira. Un di nan a papia ku mi, yamando mi na nòmber i a bisa, mustrando riba e otro--- [José,] Esaki ta Mi Yu Stimá.Skucha E!”
Sigun nos ta sigui e ehèmpel di e Salbador i e Profeta José den seriamente buska Dios, nos lo bin komprondé den un manera bèrdadero, manera Jen a hasi, ku nos Tata konosé nos na nòmber, ku nos ta Su yunan.
Na mamanan, espesialmente mamanan yòn, ku hopi biaha ta sinti nan mes aplastá i ahogá sigun nan ta esforsá pa kria “un generashon resistente kontra di piká,” nunka no subestimá bo ròl sentral den Dios su plan. Na momentunan di stress—portá ora ku bo ta persiguí esnan chikí i holó kimá for di den kushina ta informá bo ku bo kuminda prepará ku hopi amor awor ta un sakrifisio ku hopi amor—sa ku Dios ta santifiká bo dianan di mas difísil. “No teme; paso Ami ta huntu ku bo,” pasífikamente E ta sigurá. Nos ta honra bo sigun bo ta ehekutá e speransa di Ruman Joy D. Jones, ku a sita, “Nos yunan ta meresé di komprondé nan identidat divino.”
Mi ta invitá kada unu di nos pa buska Dios i Su Yu Stimá. “Niun kaminda,” Presidente Nelson a bisa, “ e bèrdatnan ei no ta wòrdu siñá mas klaro i poderoso ku no ta den e Buki di Mormòn.” Habri su páginanan i siña ku Dios ta hasi “tur kos pa [bo] bienestar i felisidat,” ku E ta “ bondadoso i miserikordioso, poko poko pa rabia, ku yen di pasenshi i bondat,” i ku “tur ta meskos dilanti [Dje].” Ora ku bo ta sinti heridá, pèrdí, miedoso, rabiá, tristu, hambrá, òf bandoná sin speransa den bida su ekstremonan—habri e Buki di Mormòn, i bo lo bin konosé ku “[Dios] nunka lo no bandoná nos. E nunka a hasi esei, i nunka lo hasi esaki. E no por hasi e. E no ta den Su karakter [pa hasi esaki].”
Bin konosé nos Tata ta kambia tur kos, spesialmente nos kurasonnan, sigun Su Spiritu suave ta konfirmá nos identidat bèrdadero i gran balor den Su wowo. Dios ta kana ku nos riba e kaminda di kombenio sigun nos ta buska E dor di supliká den orashon, búskeda den skritura, i aspirashonnan obediente.
E Ekselensia di Dios su Karakter—Mi Testimonio
Mi ta stima Dios di mi antepasadonan, “e Dios Todopoderoso,” ku ta yora ku nos den nos angustianan, ku pasenshi kastigá nos pikánan, i tin plaser ora ku nos buska pa “deshasí di [tur] nos pikánan pa konosé [E].” Mi ta alabá E, ku semper ta “un tata pa esnan sin tata” i ta un kompañero pa esnan sin kompaño. Agradesido, mi ta tèstifiká ku mi a bin konosé Dios, mi Tata, i ta duna testimonio di e perfekshonnan, atributonan i ekselensia di [Su] karakter.”
Ku kada unu di nos lo por en bèrdat komprondé i kuida nos “derecho di bida presioso” komo un yu di Dios den bin konosé E, “e úniko Dios bèrdadero, i JesuCristu, ken [E] a manda” ta mi orashon ardiente. Den nòmber di JesuCristu, amèn.